Lajme Shqip Friday, 20 January 2012 14:11

Prishtinë (PLOTESUAR 20 Janar, 19:20) Kuvendi i Kosovës, me shumicë votash, ka miratuar sot mocionin e ri për reciprocitet me Serbinë. Pesëdhjet e nëntë deputetë kanë votuar për, 41 kundër dhe një abstenim.

Ky mocion, sipas deputetëve të Partisë Demokratike të Kosovës, parasheh që Qeveria e Kosovës t’i raportojë Kuvendit çdo tre muaj lidhur me çështjen e reciprocitetetit.

Shefi i Grupit Parlamentar të PDK-së, Adem Grabovci, tha se ky mocion i hap rrugë perspektivës së vendit.

Por mocioni i ri për reciprocitet me Serbinë shfuqizon mocionin e mëparshem të Parlamentit të propozuar nga Vetëvendosje.

Shefi i Grupit Parlamentar të subjektit politik “Vetëvendosje”, Visar Ymeri, tha se ky subjekt është kundër shfuqizimit të vendimit të mëhershëm të Kuvendit të Kosovës për reciprocitet me Serbinë.

Ymeri tha po ashtu se mocioni i miratuar tregon qartë se nuk ka reciprocitet me Serbinë.

Në dhjetor të vitit të kaluar, Kuvendi i Kosovës, me shumicë votash, ka miratuar mocionin e Lëvizjes Vetëvendosje për marrjen e masave të reciprocitetit në raport me mallrat e Serbisë.

Mocioni ishte miratuar pas një debati rreth çështjes së masave të reciprocitetit me Serbinë që ishin vendosur më 20 korrik të 2011-ës, si kundërpërgjigje ndaj bllokadës që Serbia u kishte vendosur mallrave nga Kosova.

 ***********************

Prishtinë (PLOTESUAR 20 Janar, 16:20) Pas një debati në Kuvend është miratuar kërkesa për vazhdimin e mandatit për Komisionin për ndryshimin e Kushtetutës. 62 deputetë kanë votuar për, 2 ishin kundër, ndërsa 1 ka abstenuar.

Puna e vazhdueshme e Komisionit ka të bëjë me nenin 84 që flet për kompetencat e Presidentit të vendit. Zgjatja e mandatit të Komisionit mund të shtyjë zgjedhjet presidenciale, të parapara për këtë vit.

Për vazhdimin e mandatit të këtij komisioni ishin pothuajse të gjitha  grupet parlamentare, por më vërejtjet e tyre.

Por deputeti i LDK-së Sabri Hamiti ndryshe nga  të tjerët tha se komisionit duhet dhënë mandat shtesë për një çështje tjetër pasi sipas tij i ka kaluar koha.

Afrim Kasolli nga Vetëvendosje ka kërkuar që është dashur që në kuvend së pari të vijnë amandamentet për të parë nëse do të kalonin, e pastaj të mendohet për shtyrje të mandatit të komisionit.

Komisioni për ndryshime Kushtetuese është formuar në bazë të Rezolutës së Kuvendit të Kosovës për ndryshim të kompetencave të Presidentit të vendit, pas një marrëveshje të arritur në mes tri partive politike PDK, LDK e AKR.

***************************

Prishtinë (PLOTESUAR 20 Janar, 14:40) -Vetëm 2 ditë para protestës së dytë të Vetëvendosjes në pikat kufitare me Serbinë, Partia Demokratike e Kosovës e kryeministrit Thaçi ka sfiduar hapur lëvizjen e Albin Kurtit.

Me 53 vota pro deputetët miratuan një propozim të Partisë Demokratike të Kosovës, ku është kërkuar debat për 14 janarin dhe miratimin e një mocioni të ri për reciprocitet me Serbinë.

Grupi Parlamentar i Partisë Demokratike të Kosovës kërkoi sot debat në seancën plenare të Kuvendit, për 14 janarin dhe miratimin e një mocioni, që e detyron qeverinë t’i raportojë Kuvendit, çdo tre muaj për reciprocitet, por që shfuqizon të gjitha vendimet e tjera lidhur me këtë çështje, duke sfiduar kështu mocionin e Lëvizjes Vetëvendosje. Propozimi i PDK-së u miratua me 53 vota pro, 24 kundër dhe 10 abstenime.

Gjatë fjalës së tij në parlament, kryeministri i Kosovës Hashim Thaçi përshëndeti nisjen e bisedimeve per liberalizimin e vizave ndërsa kërkoi më shumë stabilitet në Kosovë, duke thënë se diskutimet duhet të zhvillohen në parlament në mënyrë që procesi i nisur për vizat të mos pengohet.

***************************

Prishtinë- Kuvendi i Kosovës do të votojë sot një mocion të propozuar nga Partia Demokratike i cili do të shfuqizojë rezolutën për reciprocitet me Serbinë.

Në mocionin e propozuar nga PDK-ja do të obligohet qeveria që të raportojë në Kuvend çdo tre muaj për mbarëvajtjen e reciprocitetit me Serbinë.

Kjo ishte një pikë që u fut në rend dite me procedurë urgjente ndërsa kërkesa e Vetëvendosje për debat rreth protesëtsë së 14 janarit nuk u aprovua nga deputetët. (LajmeShqip.com)

 
Lajme Shqip Friday, 06 January 2012 20:11

Prishtinë-Ministri i Punëve të Brendshme, Bajram Rexhepi, mbajti sot takimin e parë për këtë vit me menaxhmentin e lartë ekzekutiv të Policisë së Kosovës, ku u diskutua për gjendjen e përgjithshme të sigurisë në vend dhe u shpalosën planet dhe aktivitetet të parapara për t’u realizuar në vitin 2012.

Sipas komunikatës nga Ministria e Brendshme e Kosovës, po ashtu, në këtë takim u diskutua lidhur me paralajmërimet e subjektit politik “Vetëvendosje” për bllokimin e Pikave Kufitare në Merdarë dhe Dheu i Bardhë, me qëllim të siç thuhet “zbatimit të mocionit të Kuvendit të Kosovës për vendosjen e masave të reciprocitetit në raport me mallrat e Serbisë”.

Komunikata thekson se me këtë rast dëshirojmë të njoftojmë opinionin se Policia e Kosovës sikurse në të kaluarën do të ushtrojë detyrat e saj, si garantues i zbatimit të ligjit, në përputhje me mandatin dhe përgjegjësinë që i takon.

E drejta e disa qytetarëve për të protestuar dhe shprehur pakënaqësinë nuk do të lejohet të abuzohet në dëm të lëvizjes së lirë të qytetarëve tjerë dhe mallrave në territorin e Republikës së Kosovës.

Rrjedhimisht, Policia e Kosovës ka përgatitur Planin Operativ për parandalimin e bllokimit të Pikave Kufitare Merdarë dhe Dheu i Bardhë, si dhe rrugëve magjistrale të cilat shpijnë në këto pika kufitare.

Ministria e Punëve të Brendshme kërkon nga të gjithë qytetarët e Republikës së Kosovës të mos përkrahin forma jo ligjore të shfaqjes së pakënaqësisë.

Policia e Kosovës do të ketë zero tolerancë ndaj bllokimit ilegal të rrugëve dhe do të jetë në gatishmëri të plotë për t’u përballur me të gjithë ata që janë të përfshirë në aktivitete të jashtëligjshme me forcën e ligjit, forcë kjo që buron nga Kushtetuta më moderne dhe që respekton të drejtat e njeriut, përfundon komunikata. (LajmeShqip.com)

 
Lajme Shqip Tuesday, 20 December 2011 15:58

Prishtinë- “Vizita e Kancelares Federale Angela Merkel në Kosovë i kushtohej ushtarëve gjermanë të KFOR-it, si dhe mirënjohjes së Gjermanisë për qëndrimin e përgjegjshëm dhe pragmatik të Kosovës në dialog me Beogradin”,  deklaroi sot, ambasadori gjerman në Prishtinë, Dr. Ernst Reichel.

Më tej theksohet se, “vizita shpreh gjithashtu mirënjohjen për qëndrimin e përgjegjshëm dhe pragmatik të Kosovës në dialogun me Beogradin.

“Ky dialog është rruga për normalizimin e marrëdhënieve me Beogradin dhe gjithashtu për normalizimin e qëndrueshëm të gjendjes në veri. Ky normalizim është një hap i rëndësishëm i Kosovës dhe i Serbisë, për integrimin evropian”, thekson ambasadori gjerman.

Ndërsa për rezolutën e Kuvendit për “reciprocitetin” me Serbinë, ambasadori gjermen Reichel, shprehet se, “kjo rezolutë, menjëherë para vendimit të Këshillit Evropian për statusin e kandidatit të BE-së për Serbinë, në asnjë mënyrë nuk ishte e dobishme”.

Sipas tij, ende mbetet e pasqaruar, se çfarë kërkohet konkretisht me emërtimin ‘reciprocitet’.

“Falë një marrëveshjeje nga dialogu i udhëhequr nga BE, kufijtë ndërmjet Kosovës dhe Serbisë janë të hapur për mallra në të dy drejtimet, kështu që reciprociteti tanimë ekziston”, theksohet në deklaratë.

Më tej shtohet se, “tani ka kërcënime edhe me bllokada në vendkalimet kufitare Merdare dhe Dheu i Bardhë, nëse ky reciprocitet i padefinuar dhe në të vërtetë  ekzistues, nuk realizohet”.

“Gjëja e fundit që i nevojitet këtij vendi janë barrikada të tjera dhe më shumë dhunë në kufijtë me Serbinë. Kushdo që e ndjek këtë rrugë, nuk i kryen shërbim vendit të tij”, thekson ambasadori i Gjermanisë në Kosovë. (LajmeShqip.com)

 

 
Lajme Shqip Sunday, 18 December 2011 20:00

Prishtinë-Lëvizja Vetëvendosje i ka dhënë afat Qeverisë së Kosovës deri më 1 janar të zbatojë mocionin e miratuar në Kuvend për ndërmarrjen e masave të reciprocitetit me Serbinë.

Drejtues të kësaj lëvizjeje kanë thënë se kryeministri Hashim Thaçi duke e konsideruar vendimin e Kuvendit të Kosovës si opinion, sipas tyre, ai “praktikisht ka bërë grusht-shtet ndaj institucioneve të tjera”.

 Në një konferencë për media të dielën, kryesuesi i Këshillit të Përgjithshëm të Lëvizjes Vetëvendosje, Ismajl Kurteshi ka bërë të ditura vendimet e marra në mbledhjen e tretë të këtij këshilli.

Ai ka thënë se nëse Qeveria deri më 1 janar nuk zbaton mocionin për ndërmarrjen e masave të reciprocitetit ndaj Serbisë, atëherë 14 janari do të jetë dita kur aktivistët e kësaj lëvizjeje do të fillojnë të bllokojnë mallrat serbe në pikat kufitare te Dheu i Bardhë dhe në Merdare.

“Këshilli i Përgjithshëm i Lëvizjes Vetëvendosjes, nё mbledhjen e vet tё tretё tё mbajtur sot, mori vendim qё ta marrë në mbrojtje vendimin e Kuvendit tё Republikës sё Kosovës, dhe nёse Qeveria e Kosovës nuk e zbaton kёtё vendim deri mё 1 janar 2012, Lёvizja Vetëvendosje do tё ndërmarrë veprime konkrete pёr ta zbatuar kёtё vendim tё Kuvendit nё çdo pikё tё tij. Kështu, nga data 14 janar 2012, aktivistët e Vetëvendosjes do tё bllokojnё mallrat e Serbisё nё pikat kufitare te Dheu i Bardhё dhe nё Merdarё” , ka thënë Kurteshi.

Kryetari i Vetëvendosjes, Albin Kurti, ka thënë se kur kjo lëvizje do të vijë në pushtet atëherë do të ketë mundësi të marrë edhe vendime të rëndësishme në përputhje me interesat e vendit.

“Një ditë kur do të jemi në qeveri dhe do ta kemi pushtetin do t`i përdorim edhe mekanizmat e pushtetit në përputhje me interesat e Kosovës dhe vullnetin e popullit në mënyrë që kufirin me Serbinë njëherë e përgjithmonë ta bëjmë kufi ndërshtetëror ashtu qysh nuk po e bënë Qeveria e Kosovës”, ka theksuar ai.

Sipas Kurtit, Qeveria e Kosovës po përpiqet që Republikën parlamentare ta bëjë Republikë qeveritare, derisa kryeministri Thaçi me deklaratën e tij se kuvendi jep opinione, sipas Kurtit, po përpiqet të bëjë grusht-shtet.

“Kryeministri Thaçi me deklaratën e tij se kuvendi jep opinione, praktikisht ka bërë grusht-shtet. Ne jemi këtu që ta mbrojmë Kuvendin e Republikës së Kosovës si organ përfaqësues i popullit dhe i vullnetit të tij dhe si organi më i lartë politik në Kosovë”, ka potencuar Kurti.

 Më datën 7 dhjetor të këtij viti, Kuvendi i Republikës së Kosovës kishte miratuar mocionin e iniciuar nga Vetëvendosja që Qeveria t`i marrë masat e reciprocitetit të plotë politik, ekonomik, tregtar ndaj Serbisë. Mirëpo ky mocion nuk u konsiderua obligues nga ana e Qeveria.

 
Lajme Shqip Wednesday, 07 December 2011 15:49

Prishtinë-Me shumicë votash, Kuvendi i Kosovës ka miratuar sot mocionin e Lëvizjes Vetëvendosje për marrjen e masave të reciprocitetit në raport me mallrat e Serbisë.

Mocioni është miratuar pas një debati rreth çështjes së masave të reciprocitetit me Serbinë, të cilat janë vendosur më 20 korrik të këtij viti, si kundërpërgjigje ndaj bllokadës që Serbia u ka vendosur mallrave nga Kosova.

Parashtruesi i kërkesës, Visar Ymeri, deputet i Lëvizjes Vetëvendosje, lexoi tri pikat e mocionit, të cilat më pas u miratuan me shumicën e votave të deputetëve të pranishëm në sallë.

Mocioni i Vetëvendosje u miratua me 44 vota pro, 33 kundër, ndërkaq 2 deputetë abstenuan. Ky ishte një prej rasteve të rralla kur opozita ia doli të miratojë një nismë, duke siguruar shumicën në Kuvend.

Mocioni i reciprocitetit i votuar sot në Kuvend parashikon: 

 1. Qeveria të marrë masat e reciprocitetit të plotë politik, ekonomik e tregtar ndaj Serbisë. 

2. Ministria e Tregtisë dhe Industrisë të nxisë dhe udhëheqë bashkëpunimin me prodhuesit vendorë dhe ndërmarrjet tregtare për gjetjen e zëvendësimeve për produktet e importuara ngaSerbia.

3. Qeveria t’i forcojë të gjithë mekanizmat shtetërorë për të siguruar zbatimin e përpiktë të masave të reciprocitetit ndaj Serbisë.

 
Lajme Shqip Wednesday, 07 December 2011 14:15

Prishtinë-Tregtarët dhe qytetarët kosovarë duket se nuk mund të bëjnë pa produktet e Serbisë. Siç raporton e përditshmja “Express”, prodhimet e këtij shteti, edhe përkundër fushatave të ndryshme për moskonsumin e tyre, vazhdojnë të dominojnë në tregun kosovar. Të paktën kështu tregojnë të dhënat e Entit të Statistikave të Kosovës, të publikuara për muajin tetor. Sipas këtyre të dhënave, Serbia është njëra nga shtetet që prin me produktet e saj në importin e Kosovës.  

Vetëm gjatë muajit tetor, nga ky shtet janë importuar mallra në vlerë prej 26 milionë eurosh, ndërsa janë eksportuar vetëm 1 milion euro mallra. Në kohën kur Qeveria e Kosovës, vuri masat e reciprocitetit drejt Serbisë, tregtarët kosovarë premtuan se mallrat serbe më nuk do të kenë vend në kompanitë e tyre.

Por gjithçka ndryshoi, në momentin kur Qeveria i hoqi këto masa me këtë shtet. Prodhimet e këtij shteti përsëri e vërshuan tregun kosovar. E tash më së miri për këtë flasin edhe të dhënat e ESK’së. “Në muajin tetor të këtij viti, përqindja më e madhe e importit është nga Maqedonia 11.5 për qind, nga Gjermania 11.1 për qind, nga Serbia 10.6 për qind, nga Italia 9.1 për qind dhe Turqia 7.2 për qind”, thuhet në këto të dhëna.

Ndërkaq, gjatë këtij muaji, eksporti më i madh është bërë drejt Gjermanisë, 26.4 për qind, Italisë 21.5 për qind, Shqipërisë 10.5 për qind, Kinës 8.4 për qind dhe Maqedonisë 7.2 për qind.Krahas kësaj, janë edhe disa të dhëna të tjera, mjaft shqetësuese për ekonominë kosovare. Deficiti tregtar nga muaji në muaj po shënon rritje.

 Të dhënat e tregtisë së jashtme tregojnë për një deficit tregtar për muajin tetor prej 218,5 milionë euro krahasuar me deficitin prej 167,4 milionë euro me tetorin e vitit të kaluar. “Eksporti në muajin tetor kishte vlerën 27,2 milionë euro, ndërsa importi 245,8 milionë euro, pra është një rënie e eksportit prej -4 për qind si dhe një rritje prej 26 për qind për import krahasuar me tetorin vitit të kaluar”, thuhet më tej në publikimin e ESK’së.

Sipas të dhënave të grupeve kryesor të eksportit, 49.8 për qind të eksportit e përbëjnë metalet bazë dhe artikujt prej tyre, 25 për qind makineritë, pajisjet mekanike dhe elektrike dhe 5.3 për qind produktet minerale. Ndërsa sipas të dhënave të grupeve kryesore për import, 24.1 për qind të importit e përbëjnë produktet minerale, 11 për qind makineritë, pajisjet mekanike dhe elektrike, 9.7 për qind ushqimet e përgatitura, pijet dhe duhani, 9.5 për qind metale bazë dhe artikuj prej tyre, 7.9 për qind produkte të industrisë kimike.

Shqetësimin për praninë e prodhimeve serbe në një masë kaq të madhe në tregun kosovar, e ka shprehur edhe vetë kryetari i Odës Ekonomike të Kosovës, Safet Gërxhaliu. “Pas masave të reciprocitetit është shtuar një dozë e asaj që quhet optimizëm se një dukuri e tillë nuk do të jetë e pranishme, por tash me të vërtetë prania produkteve serbe është në rritje e sipër”, thotë Gërxhaliu. Sipas tij, është koha kur duhet të analizohet konsumatori kosovar, se çka është duke ndodhur me të dhe pse është orientuar kaq shumë te prodhimet serbe.