Lajme Shqip Sunday, 04 March 2012 20:54

Mançester Junajtid ka fituar 3-1 në fushën e Totenhem, duke marrë një sukses të cilin Aleks Ferguson disa ditë më parë e cilësonte si më të rëndësishmin e sezonit. “Djajtë e kuq” fillimisht kanë përballuar furinë e vendasve, e më pas kanë ditur të godasin pikërisht atëherë kur Totenhem dukej më pranë golit, duke prerë shpresat e skuadrës së drejtuar nga Herri Redknap. 

Ndeshja ka filluar nën trysninë e Totenhem që ka rrezikuar disa herë, i ndaluar nga De Gea, ndërsa vendasve iu anulua edhe një gol për prekje të topit me dorë nga Adebajor. Kur dukej se pjesa e parë po përfundonte në barazim, “djajtë e kuq” kanë gjetur golin me anë të Uejn Runi, pas zhvillimit të një goditje nga këndi.

Pavarësisht tentativave të Totenhem për të gjetur barazimin, janë miqtë që shënojnë përsëri dy herë radhazi me anë të Eshli Jang, i cili gjen rrjetën me dy veprime spektakolare.

Fillimisht ai dërgon topin në rrjetë me një gjuajtje gërshërë në minutën e 60-të për të çuar rezultatin në 2-0, ndërsa 9 minuta më vonë realizon edhe golin e 3-0 me një gjuajtje perfekte nga jashtë zonës.

Goli i Defo shërben vetëm si ngushëllim për Totenhem që pas kësaj humbje duhet të ruhet pasi rrezikon të humbasë vendin e tretë në renditje, sepse tani Arsenali gjendet vetëm 4 pikë larg. (LajmeShqip.com)

Rezultatet

Njukasëll-Sandërlend      1-1

Fullhem-Ulvërhempton  5-0

Totenhem-M. Junajtid    1-3

Renditja

Mançester Siti 66, Mançester Junajtid 64, Totenhem 53, Arsenal 49, Çelsi 46, Njukasëll 44, Liverpul 39, Stouk 36, Fullhem 36, Noruiç 35, Uest Bromuiç 35, Everton 34, Sandërlend 34, Suonsi 33, Aston Vila 30, QPR 22, Ulvërhempton 22, Bllekbërn 22, Bolton 20, Uigan 20.

 
Lajme Shqip Saturday, 03 March 2012 19:27

Situata te Çelsi sa vjen e përkeqësohet. Londinezët kanë bërë një tjetër hap të gabuar dhe tashmë shohin Arsenalin të marrë vendin e katërt dhe të arratiset 3 pikë sipër tyre në renditje, ndërsa vetëm pak javë më parë situata ishte krejtësisht ndryshe dhe blutë gjendeshin të qetë në këtë pozicion që të çon në Ligën e Kampioneve. 

Skuadra e drejtuar nga Andre Vijas-Boas nuk ka ditur të shfrytëzojë rastet e krijuara përballë Uest Bromuiç dhe është mundur me rezultatin 1-0 nga goli i MekAuli vetëm 8 minuta para përfundimit të sfidës. Tani AVB rrezikon seriozisht shkarkimin nga detyra, pasi edhe tifozeria e skuadrës është kundër tij, meqenëse ka kuptuar se ish-zëvendësi i Murinjos, nuk ka asnjë lidhje me “Special One”.

Ndërkohë, Mançester Siti vazhdon të dominojë kampionatin anglez duke bindur me paraqitjet që bën. Skuadra e Roberto Mançinit ka mundur 2-0 Boltonin në një takim që mund të kishte patur një diferencë më të thellë golash nëse Mario Baloteli do të kishte qenë më i saktë para portës kundërshtare.

Sulmues italian pritej të merrte ndëshkim nga klubi për “jetën e natës” pa leje, por çuditërisht ai ka figuruar mes titullarëve dhe ka qenë ndër futbollistët më të mirë në fushë duke krijuar raste të njëpasnjëshme. Ai ka shënuar golin e dytë për skuadrën e tij në minutën e 69-të duke vulosur rezultatin përfundimtar 2-0, ndërsa goli i parë për Sitin kishte ardhur në pjesën e parë falë një autogoli të Steinson. (LajmeShqip.com)

Rezultatet

Liverpul-Arsenal            1-2

Bllekbërn-Aston Vila     1-1

Mançester Siti-Bolton    2-0

QPR-Everton                 1-1

Stouk-Noruiç                 1-0

Uest Bromuiç-Çelsi       1-0

Uigan-Suonsi                 0-2

Renditja

Mançester Siti 66, Mançester Junajtid 61, Totenhem 53, Arsenal 49, Çelsi 46, Njukasëll 43, Liverpul 39, Stouk 36, Uest Bromuiç 35, Noruiç 35, Everton 34, Sandërlend 33, Fullhem 33, Suonsi 33, Aston Vila 30, QPR 22, Ulvërhempton 22, Bllekbërn 22, Bolton 20, Uigan 20.

 
Lajme Shqip Saturday, 03 March 2012 16:50

Robin Van Persi ka bërë që Liverpuli të qajë rastet e humbura, pasi dy golat e tij i kanë siguruar Arsenalit një fitore 2-1 në “Anfild”. 

Portieri i “topçinjve” Shçezesnji priti penalltinë e Dirk Kajt në minutën e 18-të të ndeshjes, por u ndëshkua vetëm 5 minuta më vonë nga një autogol i shokut të tij të skuadrës, Koshielni, i cili ktheu në portën e vet harkimin e Henderson.

Por avantazhi i Liverpulit zgjati vetëm 7 minuta, pasi një harkim i Sanja nga djathta u devijua në rrjetë me kokë nga Van Persi.

Liverpuli goditi dy herë shtyllën në pjesën e parë, ndërsa vazhdoi të krijonte raste për shënim edhe në pjesën e dytë të ndeshjes, të cilën po e dominonte.

Por Van Persi shënoi përsëri në kohën shtesë duke mundur Pepe Reina me një gjuajtje fluturimthi.

Fitorja e Arsenalit ka ndalur rekordin e pathyeshmërisë së Liverpulit në shtëpi në këtë sezon, ndërsa tashmë “topçinjtë” janë vetë 4 pikë pas Totenhemit të vendit të tretë që luan të dielën ndaj Mançester Junajtid. (LajmeShqip.com)