Lajme Shqip Saturday, 06 July 2013 12:47

Prishtine – Ministria e Punës dhe Mirëqenies Sociale (MPMS) që udhëhiqet nga Nenad Rashiqi, shumë lehtë mund të gjobitet me plot 5 mijë euro. E përveç kësaj, edhe zyrtarit të prokurimit në atë ministri, mund t’i merret certifikata për prokurim.

U kanë mbetur vetëm edhe pesë ditë deri tek këto gjoba. Ky është afati që Organi Shqyrtues i Prokurimit (OSHP) i ka dhënë kësaj ministrie, në rastin e tenderit për ndërtimin e shtëpive për komunitetin RAE të fshatit Dobravë të Ferizajt, transmeton Express.

Gjithçka nisi kur OSHP në qershor të këtij viti kishte urdhëruar MPMS’në që të rivlerësojë edhe një herë aktivitetin e prokurimit “Ndërtimi i shtëpive për komunitetin RAE”, për faktin se kishte vërejtur që gjatë procesit të vlerësimit nuk është respektuar Ligji për Prokurim Publik.

Por një urdhëresë e tillë, duket se nuk i bëri fort përshtypje ministrisë, më saktësisht zyrës së prokurimit të Rashqit. Ajo vazhdoi me të veten, duke mos e respektuar vendimin.

“Mosrespektimin e dëshmon fakti që autoriteti kontraktues, në këtë rast MPMS ende nuk e ka njoftuar OSHP’në lidhur me procesin e rivlerësimit të ofertave për këtë tender, ashtu siç ne kemi kërkuar në qershor të këtij viti”, është arsyetimi që OSHP ka dhënë.

Është kjo arsyeja që përveç në qershor, OSHP është detyruar edhe njëherë t’ia bëjë me dije MPMS’së urdhëresën e formës së prerë. Në të kundërtën thotë se pasojnë dënimet.

“Mosrespektimi i vendimit të 6 qershorit e detyron panelin tonë që në përputhje ligjit të vendos një gjobë prej 5 mijë eurosh për ministrinë, kurse ndaj zyrtarit të prokurimit do të jetë e obliguar të marrë vendim për marrjen e certifikatës së prokurimit për ikje të vendimit që ne kemi dhënë”.

E për t’i shpëtuar këtyre dy gjobave, ministria ka kohë vetëm pesë ditë. Ky është afati që i ka dhënë OSHP’ja, e cila thotë se nëse edhe pas pesë ditësh ministria nuk ndërmerr masa, ajo e zbaton vendimin.

“Ministria do të gjobitet me 5 mijë euro si dhe zyrtarit të prokurimit do t;i merret certifikata”.

Por si duket ministria i ka shpëtuar gjobës. Sipas publikimit që ka bërë në faqen zyrtare të Komisionit Rregullativ te Prokurimit Publik ministria tashmë ka anuluar njoftimin për dhënien e kontratës për ndërtimin e shtëpive për të cilat ka reaguar OSHP’ja. I ka mbetur që këtë tender vetëm ta qojë në rivlerësim, ashtu siç është urdhëruar.

Ministria kishte shpall fituese të tenderit në maj të këtij viti dy kompanitë nga Kamenica,NNP CTA dhe NNP “Perspektiva”. Vlera e kontratës ishte afër 542 mijë euro.

Por vetëm pas një muaji sipas njoftimeve që arkivohen në KRPP, ministria e Punës dhe Mirëqenies Sociale e ka anuluar kontratën me këto dy kompani. Kontrata është ndërprerë me 21 qershor të këtij viti dhe prej atëherë nuk është hap më asnjë tender për ndërtimin e këtyre shtëpive.

 

 
Lajme Shqip Thursday, 20 June 2013 10:36

Prishtinë – Auditori i Përgjithshëm ka zbuluar një mal shkeljesh në Ministrinë e Punës dhe Mirëqenies Sociale(MPMS),e cila udhëhiqet nga Nenan Rashiq.

Sipas auditorit, në Shtëpinë e Pleqve në Prishtinë për një sezon dimëror (periudhë gjashtë mujore) ishin shpenzuar 51,500 litra të derivateve (naftë) në vlerë prej 65,405 euro.

Auditori ka gjetur edhe shkelje të tjera në këtë Ministri, përkatësisht me kontratat e punës së stafit. MPMS,sipas auditorit, kishte nënshkruar kontratë të rregullt pune në pozitë drejtuese, me pagë sekondare. Në kontratë nuk ishte precizuar orari i punës, shkruan “Zëri”.

Në bazë të shënimeve nga sistemi i Payrollit, auditori ka vërejtur se zyrtari i njëjtë ka edhe kontratë të rregullt pune me pagë primare në një organizatë tjetër buxhetore.

Edhe sa i përket pagesave për punët jashtë orarit të stafit,në tri raste në Administratën Qendrore të MPMS-së, për shkak të rritjes se vëllimit të punëve pas shkuarjes së disa zyrtarëve në pushime, u janë bërë kompensimet zyrtarëve aktivë për kryerjen e detyrave shtesë, këto punë shtesë janë kryer gjatë orarit të rregullt të punës.

Ministria e Punës gjatë vitit 2012 në pesë raste ka lidhur kontrata mbi vepër (të përkohshme) jashtë procedurave të konkursit.

 
Lajme Shqip Wednesday, 15 May 2013 14:21

Ky i fundit është akuzuar rëndë nga bashkëpartiaku i tij, Petroviq, lideri i partisë së pavarur serbe (SLS),  për tradhti ndaj serbëve, ndaj institucioneve të Kosovës, për komplote dhe për pengesë ndaj proceseve pozitive të vendit.

Në ndërkohë që, Rashiq thotë se Petroviq nuk komunikon me gjysmën e liderëve serbë të Kosovës, ka përçarë politikanët serbë mes vete, ka pamundësuar integrimin e serbëve të veriut në institucione të Kosovës, ka punuar për interesa të veta e aspak për komunitetin serb dhe sot vazhdon të jetë njeriu kyç i bllokimit të zbatimit të marrëveshjes Kosovë-Serbi.

Sipas tij, kjo qasje e Petroviqit ka bërë që gjysma e deputetëve pjesë e grupit parlamentar të Kosovës të largohen nga SLS, dhe të formojnë grupin parlamentar të ri të quajtur “E ardhmja e përbashkët”, në krye të së cilit është vetë ministri Rashiq.

Të gjitha këto ndryshime, kanë bërë që vetë Petroviq të kërkojë nga kryeministri Thaçi, shkarkimin e Nenad Rashiqit nga posti i ministrit. Jo më mirë kanë mbetur edhe deputetët që kanë lëshuar SLS-së, të cilët po ballafaqohen me presione e kërcënime. Kjo përçarje ka bërë që të reagojë edhe bashkësia ndërkombëtare.

Siç ka mësuar “Zëri”, edhe vetë kryeministri Thaçi mban krahun e Petroviqit, kjo për shkak të së kaluarës së përbashkët që kanë pasur në procese të ndryshme që ka kaluar Kosova.

Zëvendëskryeministri Petroviq nuk ka pranuar të flasë për “Zërin”, por i cituar nga RTK, ai thotë se tashmë ka kërkuar nga kryeministri Thaçi largimin e ministrit Rashiq.

“Në mbledhjen e fundi të partisë njëzëri është miratuar vendimi për largimin e Rashiqit nga ky subjekt. Ne sot ia kemi dërguar një shkresë kryeministrit dhe presim që ditët e ardhshme të kemi një emër të ri për pozitën e ministrit të Punës dhe Mirëqenies Sociale”, ka thënë Petroviq, i cili ndër tjerash ka mohuar se SLS është përçarë.

Por, Rashiq beson se përkundër presioneve të Petroviqit, iniciativa e grupit të ri serb do të ketë sukses. Ai tregon se në kundërshtim me statusin e partisë, Petroviq e ka larguar atë nga mbledhja e partisë javën e kaluar.

“Jo vetëm mua, por Petroviq po përdor variante të ndryshme si presione dhe kërcënime edhe ndaj deputetëve që kanë lëshuar SLS-në”, tha ai.
Sidoqoftë, sipas tij, interesi i kësaj iniciative nuk është që të prishet Qeveria Thaçi, por përkundrazi që të ndihmojë këtë qeveri të ecë përpara në proceset që gjendet, sidomos kur bëhet fjalë për zbatimin e marrëveshjes me Serbinë.

“‘E ardhmja e Përbashkët’ ka për qëllim që të punojë në interes të komunitetit serb, ndërkohë që Petroviq ka punuar që liderët serbë në qendër të Kosovës të mos flasin mes vete, që serbët e veriut t’u frikësohen institucioneve të Kosovës, që zbatimi i marrëveshjes Kosovë-Serbi të mos nisë me shumë dëme e probleme tjera”, tha Rashiq.

Ai shtoi se ditët në vijim do të kërkojë takim me kryeministrin Thaçi dhe siç tha ai, mundësia që të kërkojë një koalicion të ri mbetet e hapur.
“Ne nuk duam prishje të Qeverisë, përkundrazi ne mbesim pjesë e kësaj Qeverie e politikave të saj, por mundësia që të ketë ndryshime pozitash mbetet e hapur”, tha Rashiq.

Këto përplasje kanë bërë që të reagojë edhe bashkësia ndërkombëtare, në veçanti Ambasada e SHBA-ve në Kosovë. Gazeta ka kuptuar se Ambasada Amerikane anon kah politikat e Nenad Rashiqit, megjithëse ajo nuk është e pajtimit që në këtë kohë, në këtë moment të ketë ndryshime në qeverisjen Thaçi.
“Prioriteti i bashkësisë ndërkombëtare për momentin është nisja e zbatimit të marrëveshjes Kosovë-Serbi. Ata nuk duan që të humbet kohë tani me procese të brendshme të koalicionit qeverisës, dhe të humbet koncentrimi karshi marrëveshjes”, tha një zyrtar ndërkombëtar.

Ndryshe emrat e katër deputetëve që janë larguar nga SLS janë: Biserka Kostiç, Goran Marinkoviq, Boban Todoroviq dhe Milivoje Stojanoviq.

Këtij grupi të ri, fillimisht me katër deputetë të SLS-së, i është bashkangjitur edhe një deputet nga lista e bashkuar serbe (JSL), një nga Partia Demokratike Serbe (PG) dhe një nga komuniteti Ashkali, duke e çuar numrin në 7 deputetë. Ndërsa grupi parlamentar i SLS-së, ka mbetur me 6 deputetë, prej tyre katër të SLS-së, një nga JSL dhe një goran.