Lajme Shqip Sunday, 14 October 2012 08:01

Dani Pedrosa ka mbajtur gjallë shanset e tij për titullin kampion në MotoGP duke mundur Horge Lorenco në pistën e Motegi.

Fitorja e katërt në pesë garat e fundit e ka afruar Pedrosan në 28 pikë diferencë ndaj pilotit të Jamahas, ndonëse për të përmbysur këtë diferencë kur kanë mbetur vetëm 3 gara deri në fundin e këtij sezoni do t’i nevojitej një gabim shumë i rëndë i Lorenco.

Në një duel të parë shpesh në garat e fundit, Lorenco mori kryesimin në fillim të garës, por më pas ishte Pedrosa që e kaloi kur mbeteshin 13 xhiro nga fundi, duke krijuar menjëherë një distancë sigurie për të shkuar i vetëm drejt finishit.

Ndërkohë, Alvaro Bautista ka arritur të marrë një vend të tretë të shkëlqyer pas një beteje të jashtëzakonshme me Kal Kraçlou, ku dy pilotët ndryshuan shpesh pozicionet duke patur edhe kontakte mes tyre. Në fund fitimtar doli spanjolli edhe për faktin se kundërshtari i tij mbeti pa karburant në xhiron e fundit të garës dhe u desh të tërhiqej.

Vendi i katërt i shkoi Andrea Doviciozo, ndërsa Kejsi Stoner mori vetëm vendin e pestë në garën e parë pas rikthimit për shkak dëmtimi. Vendi i gjashtë i shkoi Stefan Bradl, ndërsa Valentino Rosi zhvilloi një tjetër garë zhgënjyese, duke i dalë i shtati vetëm falë tërheqjes së Kraçlou e Spis. (LajmeShqip.com)

Renditja e kampionatit MotoGP

310      Horge Lorenco

282      Dani Pedrosa

197      Kejsi Stoner

192      Andrea Doviciozo

144      Alvaro Bautista

137      Valentino Rosi

135      Kal Kraçlou

125      Stefan Bradl

101      Niki Hejden

88        Ben Spis

70        Hektor Barbera

 
Lajme Shqip Saturday, 13 October 2012 14:10

Horge Lorenco dhe Dani Pedrosa kanë dhuruar një duel spektakolar në pistën e Motegi, duke i paraprirë një gare të ndezur me rekorde të njëpasnjëshme në provat zyrtare.

Spanjolli i Hondës arriti të vendoste rekordin e pistës në xhiron e tij të fundit, duke dhënë kohën 1 minutë e 44.969 sekonda, për të marrë pole-position të 6-të në këtë sezon dhe për të treguar se dëshiron të ruajë kryesimin ndaj rivalit të tij kryesor në luftën për titull.

Të gjithë mendonin se do të ishte Pedrosa që do të merrte pole-position, pasi kishte dominuar provat zyrtare dhe kishte qenë ai i që kishte thyer rekordin e mëparshëm të pistës, por as ai nuk mundtë bënte asgjë përballë xhiros perfekte të Lorencos, që u bë i pari pilot në historinë e kësaj gare që zbret nën kohën 1 minutë e 45 sekonda në këtë pistë.

Pas dy pretendentëve për titull u rendit Kal Kraçlou me Tek 3 Jamaha, i vetmi pilot që duket në gjendje të rivalizojë me ta në këtë pistë dhe të kërkojë një fitore. Ai la pas krahëve Ben Spis me Jamaha, i cili u rrëzua në xhirot e fundit dhe nuk arriti të përmirësonte kohën e tij. Alvaro Bautista me Gresini Honda regjistroi kohën e 5-të, para Andrea Doviciozos, ndërsa Kejsi Stoner arriti të merrte vetëm vendin e shtatë në nisje në garën e parë që pas aksidentit që e detyroi të mbyllte para kohë ëndrrat për një tjetër fitore të titullit kampion.

Vazhdojnë paraqitjet zhgënjyese të Dukatit, me Valentino Rosin dhe Niki Hejden që kanë siguruar vendin e 9-të dhe të 10-të në këto prova zyrtare. (LajmeShqip.com)