Lajme Shqip Sunday, 29 April 2012 18:48

Kampioni i botës në fuqi MotoGP, Kejsi Stoner, ka treguar se ai vazhdon të mbetet pretendenti kryesor për titull në këtë edicion, duke fituar Çmimin e Madh të Herez në Spanjë, pikërisht në pistën e preferuar të rivalit të tij më të madh, Horge Lorenco.

Australiani i Hondas dhe spanjolli i Jamahas dueluan me njëri-tjetrin gjatë të gjithë garës, fillimisht në një grup prej katër pilotësh, e më pas të vetëm në xhirot e fundit duke kërkuar të rrëmbenin fitoren.

Stoner këtë radhë nuk pati problemet e Katarit që e detyruan të ngadalësonte në xhirot e fundit. Në të kundërt, ai bëri dy xhiro fantastike në fund për t’iu shkëputur ndjekësit të tij dhe për të marrë këtë fitore të rëndësishme.

Dani Pedroza me Hondan tjetër zyrtare arriti të ngjitej në shkallën e tretë të podiumit, ndërsa e përfundoi garën para Kal Kraçlou me Jamaha Tek 3.

Niki Heiden e filloi mirë garën, duke luftuar për kreun, por me kalimin e xhirove, Dukati i tij nuk arriti të mbante hapin e kryesuesve dhe piloti amerikan u desh të kënaqej me vendin e 8-të, para shokut të skuadrës Valentino Rosi. Ky i fundit nuk u shfaq asnjëherë konkurrues në këtë garë dhe ky ishte pozicioni më i mirë që mbajti që në fillimin e saj, duke konfirmuar se këtë sezon nuk do të jetë mes pretendentëve për titull. (LajmeShqip.com)

RENDITJA PER PILOTË

45        Horge Lorenco-Jamaha

41        Kejsi Stoner-Honda

36        Dani Pedroza-Honda

26        Kal Kraçlou-Tek 3 Jamaha

22        Andrea Doviciozo-Tek 3 Jamaha

19        Alvaro Bautista-Gresini Honda

18        Niki Heiden-Dukati

17        Stefan Bradl-LCR Honda

13        Valentino Rosi-Dukati

13        Hektor Barbera-Pramak Dukati

10        Ben Spies-Jamaha

5          Aleiks Espargaro-Aspar Aprilia

4          Kolin Eduards-Suter BMV

3          Danilo Petruçi-Ioda Aprilia

3          Rendi De Punie-Aspar Aprilia

2          Matia Pasini-Spid Master Aprilia

2          Joni Hernandez-Avintia FTR Kauasaki

1          Ivan Silva-Avintia Inmotek-Kauasaki

 
Lajme Shqip Saturday, 28 April 2012 17:04

Horge Lorenco ka fituar pole-position në Çmimin e Madh të Spanjës në MotoGP. Në një kualifikuese të ndikuar nga shiu, por me pistën që është tharë në fund, piloti i Jamahas ka regjistruar kohën më të shpejtë 1:39.532, duke arritur t’i bëjë ballë sulmeve të Dani Pedrozës me Honda, i cili regjistroi kohën e dytë më të mirë.

Minutat e fundit të kualifikueseve u kthyen në një duel mes dy spanjollëve, të cilët dëshironin të tregonin se kush ishte superior në garën që zhvillohet në vendlindjen e tyre. Ka qenë fituesi i garës së parë të sezonit, Lorenco, që ka siguruar vendin e parë në vijën e nisjes, por Pedroza ka vërtetuar se këtë sezon do të jetë protagonist, duke qëndruar ngjitur pas tij dhe duke hedhur kandidaturën për një fitore të mundshme në garë.

Në vendin e tretë, në mënyrë të papritur është renditur Niki Heiden, i cili duket se është përshtatur më mirë me kushtet e pistës duke ngjitur kaq lart Dukatin, ndonëse koha e tij më e shpejtë ishte rreth 1 sekondë më e ngadaltë se ajo e dy spanjollëve.

Por i shumëprituri Valentino Rosi ka zhgënjyer përsëri, pasi është renditur vetëm në vendin e 13-të, i kaluar nga të gjithë pilotët e tjerë të Dukatit, edhe ata të skuadrave dytësore. Piloti italian ishte i vetmi që nuk arriti të përshtatej me pistën që thahej duke treguar se ishte përgatitur vetë për një garë me shi.

Faktorë për garën e nesërme pritet te jenë edhe Kraçlou e Stoner, të cilët ishin shumë pranë kohës së Hejden dhe do të synojnë një vend në podium.

Provat zyrtare treguan se në një pistë të lagur, pilotët do të kenë shumë probleme me rrëzimet gjatë garës, siç ndodhi sot me Hernandez, Pirro, Eduards, Kraçlou e Barbera. Ndërkohë, kanë shpëtuar mirë duke qëndruar mbi motor falë manovrimeve të shpejta Stoner, Rosi e Bautista. (LajmeShqip.com)

 
Lajme Shqip Friday, 27 April 2012 19:11

Valentino Rosi ka arritur më në fund të shfaqet mes më të mirëve, ndonëse kanë qenë vetëm provat e lira të Çmimit të Madh të Herez në MotoGP. Piloti italian i Dukatit ka konfirmuar se në një pistë të lagur, motori i tij është po aq i shpejtë sa ai i kundërshtarëve që luftojnë për titull.

“Vendi i dytë është i mirë pasi me motorin e vjetër ecnim shpejt në pistë të lagur dhe kjo na është konfirmuar edhe me modelin e ri. Kjo na ndihmon për moralin, nëse bie shi mund të arrijmë një kualifikim të mirë dhe një garë të mirë. Mund të jemi konkurrues. Shpresojmë që të bjerë shi!”, ishin fjalët e “Doktorit” i cili këtë sezon duket ende shumë larg kryesuesve.

“Duhen parë kushtet klimaterike të së shtunës dhe të dielës. Sot kam bërë prova edhe me motorin e dytë që të jem i përgatitur për çdo lloj situate. Por kur pista fillon të thahet, gomat fillojnë të shkatërrohen dhe fillojmë të ecim më ngadalë. Për këtë arsye, nuk na duhet një pistë krejtësisht e lagur apo krejtësisht e thatë. Nëse do të kishim një situatë të mesme, për ne do të ishte ideale dhe do të synonim që të bënim një garë sa më të mirë”, u shpreh piloti italian.

Ndërkohë, kampioni i botës në fuqi, Kejsi Stoner, ka deklaruar para shtypit se nuk do të kërkojë operacionin për zgjidhjen e problemeve në dorën e djathtë. “Të gjithë doktorët më kanë thënë se operacioni nuk do ta zgjidhë përfundimisht këtë problem”, ishin fjalët e tij, referuar humbjes së forcës në dorën e djathtë që shkaktoi probleme në garën e parë të sezoni në Katar. (LajmeShqip.com)