Lajme Shqip Saturday, 27 October 2012 11:23

Kejsi Stoner provoi për të disatën herë se në pistën e Filip Ajlend nuk ka pilot më të shpejtë se ai. Australiani i Hondas ka dominuar përsëri provat zyrtare duke marrë pole-position në “pistën e shtëpisë”, për të lënë me më shumë se gjysmë sekonde larg Horge Lorencon i cili u rendit i dyti.

Dominimi i Stoner ishte aq i ndjeshëm sa rivali në luftën për titull, Dani Pedrosa, ka mbetur rreth 1 sekondë larg, ndonëse ishte piloti i tretë më i shpejtë në pistë dhe garon me të njëjtin motor me australianin.

Gjithçka bëhet edhe më domethënëse kur mendon se Stoner i ka arritur kohët e tij fantastike edhe pse shkatërroi motorin e parë gjatë një rënie dhe mbylli provat me motorin rezervë.

Stoner fiton në këtë pistë pa ndërprerje që nga viti 2007 dhe në garën e nesërme, pavarësisht një ndikimi të mundshëm të reshjeve të shiut, ai do të tentojë përsëri të triumfojë duke parë distancat e mëdha që ka me të tjerët pas tij. Por lufta e vërtetë pritet të bëhet për vendin e dytë, ku Lorenco dhe Pedroza diskutojnë më shumë se vetëm pozicionin në podium, por edhe titullin kampion, ashtu si një javë më parë.

E panjohura e madhe e garës mbetet Valentino Rosi, i cili këtë radhë ka arritur të shfrytëzojë në maksimum shpejtësinë e motorit të tij por u rendit i 8-ti. (LajmeShqip.com)

 
Lajme Shqip Friday, 26 October 2012 10:20

Pista e Filip Ajlend do të kujtojë gjithmonë Kejsi Stoner, pasi ka vendosur t’i vërë emrin e tij kthesës së tretë të cirkuitit të famshëm të garave me motorë në Australi.

Kthesa me numër 3 në këtë pistë është ndër më të shpejtat në të gjitha pistat e MotoGP dhe ka qenë ajo që ka nxjerrë më në pah aftësitë e dy herë kampionit të botës për të kontrolluar në mënyrë të pabesueshme motorin në shpejtësi të lartë.

Për më tepër, kjo është një mënyrë për të falënderuar pilotin që fiton në këtë pistë pa ndërprerje që nga viti 2007.

Drejtuesit e pistës i kishin kërkuar Stoner të zgjidhte cilëndo pjesë të cirkuitit për të vendosur emrin e tij dhe ai zgjodhi vetëm kthesën e tretë, të cilën pilotët e përshkojnë me një shpejtësi që kalon 250 kilometra në orë.

“Kjo pjesë e pistës është padyshim kthesa ime e preferuar. Është shumë e shpejtë dhe e kaloj me marshin e pestë në maksimum. Kjo është një kthesë që më dhuron gjithmonë një emocion të jashtëzakonshëm. Është një privilegj që kjo pjesë e Filip Ajlend mban emrin tim”, tha Stoner.

Piloti australian ka treguar që në provat e lira të sotme se nuk ka dyshime mbi atë që është favoriti kryesor i fitores së kësaj gare, pasi ka dhënë një kohë të pakapshme nga pilotët e tjerë. Xhiroja e tij prej 1 minutë e 29.999 sekonda ka lënë gojëhapur të gjithë kundërshtarët, me Pedrosën në vendin e dytë që është 0.885 sekonda larg e Lorencon që është 1.006 sekonda larg në vendin e tretë. (LajmeShqip.com)