Lajme Shqip Wednesday, 30 October 2013 23:56

Nuk ndalet hemorragjia brenda të djathtës. Edhe Gjovalin Kadeli ka deklaruar largimin e tij nga Partia Demokratike. Ai e bëri të ditur lajmin në një intervistë për Ora News.

 

Kadeli tha se largohet nga PD për t’u bashkuar me Lëvizjen Socialiste për Integrim.

“Do të largohem nga Partia Demokratike për të qenë pjesë e grupit parlamentar të Lëvizjes Socialiste për Integrim. Kam kontaktuar me zotin Meta që përpara zgjedhjeve parlamentare dhe prisja të isha pjesë e ekipeve të tij. Për disa arsye, zoti Meta u vonua në përgjigjen e tij dhe në atë kohë u paraqit nevoja e votës në parlament për anëtarin e Kolegjit Zgjedhor dhe mbajtjen e qeverisë si detyrim që ishte për zgjedhësit shqiptarë. Zgjedhjet u realizuan me përpikmëri të lartë të lira e të ndershme, edhe si rezultat i votës së time dhe dy kolegëve të tij”, u shpreh Kadeli.

 

Ai tha se marrëdhënia e tij me Partinë Demokratike ka qenë një marrëdhënie me zotin Sali Berisha dhe e ka marrë mandatin për shkak të burrërisë së Berishës.

“Kjo burrëri bëri që të mos ishim parazit me mandat të dhuruar por ishim si gjithë kandidatët e tjerë dhe në Lezhë kjo u konfirmua me praninë e militantëve të PS që mbështetën PD-në”, u shpreh Kadelli.

 
Lajme Shqip Thursday, 26 September 2013 14:47

 

Ish- Kryeministri Sali Berisha, përsëriti në seancën e Kuvendit faktin se statusi i vendit kandidat për në BE po pengohet për shkak se po preket ligji për shërbimin civil.

 

Berisha tha se është duke u përgatitur një akt normativ për të rrëzuar konsensusin e arritur për këtë ligj.

 

“Statusi është i sigurt. Është gabim fatal nëse ne ndërmarrim veprime për ta shtyrë atë. Ju garantoj që dënojmë vendin në këtë mënyrë. Ministri i Jashtëm, bashkë me Kryeministrin, kanë mashtruar 100 përqind në Bruksel. Korpusi i nëpunësve civilë është një pasuri e madhe,” tha Berisha.

 

Ai akuzoi se në krye të Departamentit të Administratës Publike është vënë një i Bashkisë së Ramës.

 

Berisha shkoi më tej kur tha se po hiqen nga puna edhe socialistët, pasi kjo drejtori e ka pasur gjysmën me socialistë.

 

Fjalës së Berishës iu përgjigj kryetari i Kuvendit, Ilir Meta, që e quajti Berishën bashkëkryetar të opozitës. Më herët Berisha e kishte quajtur Metën bashkëkryetar të mazhorancës.

 

“E vlerësoj shumë shqetësimin tuaj zoti bashkëkryetar i opozitës, që do të ndalësh socialistët që kanë ardhur në pushtet, për të larguar socialistët që ishin në punë,” tha Meta.

 

Ai shkoi edhe më tej kur tha se nuk do e zbatojë rregulloren e Kuvendit për Berishën, që nënkupton se ai do të flasë sa herë të dojë.

 

Pas këtij debati, Sali Berisha u largua nga salla e Kuvendit.

 

Në një deklaratë të shkurtër për mediat, Berisha tha se “ecjen dhe notin i bëj pa asnjë përtesë”.

 

I pyetur nga gazetarët nëse Berisha është bashkëkryetar i PD-së, përgjigja e ish- Kryeministrit ndaj gazetares ishte arrogante: “Je zëdhënëse e zotit Meta”.

 

Ndërkohë në Kuvend u hoq nga rendi i ditës diskutimi për lirimin nga detyra të dy ish-anëtarëve të KQZ-së, Denar Biba dhe Albana Shtylla.

 

“Kjo pikë nuk ka qenë në rendin e diskutuar prej nesh. Konferenca e Kryetarëve nuk është njoftuar, por edhe ditën e mbledhjes kemi lënë vetëm miratimin e komisioneve dhe këshillave”, tha Paloka.

 

Opozita shkoi më tej kur akuzoi se ky ishte një shpërblim për dy ish- anëtarët e KQZ-së për veprimet e tyre.

 

Kurse Ilir Meta tha se nuk mund të mbahet me pahir në detyrë dikush që kërkon të largohet.

 

“Kjo ka të bëjë me vetë kërkesën e të interesuarve, të cilët nuk mund t’i mbajmë me pahir si anëtarë të KQZ-së. Nëse ju mendoni se kjo është shkelje e rregullores, mendoj se do ishte mirë të respektohen të drejtat e njeriut, se nuk mund të mbash me pahir një njeri në një detyre kur kërkon të largohet prej saj”, tha Meta.

 

Opozita e ndezi debatin për këtë çështje për shkak se Albana Shtylla, një nga anëtarët e dorëhequra të KQZ-së, përflitet se do të shkojë si Sekretare e Përgjithshme e Kuvendit.

 

Pavarësisht debatit, kjo kërkesë e opozitës gjeti konsensusin e maxhorancës dhe u vendos heqja nga rendi i ditës së kësaj pike.

 

Seanca u mbyll me votimin e Vangjel Dules si nënkryetar i Kuvendit të Shqipërisë. Dule mori 104 vota pro.

 

Po ashtu u miratuan me 120 vota pro dhe asnjë kundër përbërja e komisioneve të përhershme të Kuvendit të Shqipërisë.

 

Gjithashtu është miratuar edhe përbërja e sekretarive të Kuvendit të Shqipërisë, me 117 vota pro.