Lajme Shqip Monday, 30 January 2012 18:39

Shtatë pikë diferencë me Realin e Madridit nuk janë asgjë për Barcelonën, e cila vazhdon të shpresojë te përmbysja dhe te fitimi i titullit kampion. Në vetë faqen zyrtare të klubit katalanas janë publikuar 5 arsyet pse tifozët e ekipit duhet të besojnë se titulli kampion mund të arrihet…

– Skuadra është në gjendje të përballojë çdo lloj situate. Barça e Guardolës nuk njihet për ekip që dorëzohet dhe rikuperimi është ndoshta një nga sfidat më entuziazmuese deri tani. Klubi ka fituar 13 nga 16 turnetë ku ka marrë pjesë në 3 vite e gjysmë dhe në secilin prej sezoneve duhej të udhëtonte në “Santiago Bernabeu” për të marrë titullin. Diferenca nuk ka qenë asnjëherë kaq e madhe, por këtë radhë, Reali duhet të udhëtojë për në “Kamp Nou”.

– Forma në shtëpi. Barça ka qenë e jashtëzakonshme ne “Kamp Nou” ku ka 9 fitore dhe një barazim, duke shënuar 43 gola dhe pësuar vetëm 2 ndaj Betis. Ky është sezoni i parë ku arrihet të ruhet e paprekur rrjeta në 9 ndeshjet e para në shtëpi.

– Përmirësim në ndeshjet jashtë. Skuadra ka barazuar 5 ndeshje dhe ka humbur 1 jashtë fushës së saj (17 nga 30 pikët e mundshme). Ky vazhdon të jetë rekordi i dytë më i mirë në kampionat deri tani për ndeshjet jashtë, por për Barcelonën është një rendiment më i dobët se në sezonet e fundit. Por nëse Barça fiton të 9 ndeshjet e mbetura jashtë, mund të barazojë rekordin e 13 sukseseve jashtë, ashtu si në 3 sezonet e mëparshme.

– Riaftësimi i të dëmtuarve. Skuadrës i kanë munguar lojtarë kyç në ndeshjet e fundit. Dëmtime afatshkurtra kanë ndikuar te Iniesta dhe Pedro, ndërsa Keita është në Kupën e Afrikës. Shumë shpejt, këta lojtarë do të kthehen ndërsa Vija dhe Afellai mund të jenë vendimtarë në fundin e sezonit.

– Historia flet vetë. Barça ka arritur gjëra të shkëlqyera nën drejtimin e Guardiolës, por edhe para mbërritjes së tij, klubi i është gëzuar një historie të jashtëzakonshme përmbysjesh.

Dy shembuj të famshëm janë përmbysjet në dy sezone radhazi me ndihmën e Tenerifes në vitet 1991/92 dhe 1992/93. Ashtu ishte edhe kampionati i vitit 1993/94, që u zgjidh në sekondat e fundit, në të njëjtën mënyrë si sezoni 2003/04, për të cilin mund të thuhet se ishte pika e kthesës për Barçën e mrekullueshme që kemi sot. (LajmeShqip.com)

 
Lajme Shqip Sunday, 29 January 2012 15:56

Zhoze Murinjo do të kthehet në kampionatin anglez të futbollit pas përfundimit të këtij sezoni, ose të paktën kështu e mendojnë mediat angleze.

Megjithëse Reali i Madridit ka 7 pikë avantazh në renditjen e kampionatit spanjoll, Murinjo duket se është gjithmonë pranë largimit për shkak të polemikave që arrin të shkaktojë sa herë që i jepet rasti.

49 vjeçari nuk ka arritur të thyejë dominimin e Barcelonës në ndeshjet direkte dhe kjo duket se ka sjellë edhe acarimin e tifozëve të ekipit ndaj tij.

Ndonëse presidenti i madrilenëve, Florentino Perez, ka deklaruar se punësimi i tij ishte zgjedhja më e mirë që kishte bërë ndonjëherë, vetë Murinjo ka bërë të qartë se në përfundimin e kontratës në vitin 2014, do të dëshironte të kthehej në Angli.

 “The Sunday Times” ka publikuar një lajm se portugezi ka vënë në lëvizje menaxherin e tij për t’i gjetur një skuadër në Angli pasi dëshiron të largohet nga madrilenët në fund të këtij sezoni. Sipas burimit të gazetës angleze, ai është në pritje të Arsenalit apo Totenhemit, dy ekipeve që mund të ndryshojnë trajnerë në fundin e sezonit.

Vetë Murinjo ka shprehur dëshirën që të drejtojë Mançester Junajtid, por Sër Aleks Ferguson nuk ka ndër mend të largohet nga “djajtë e kuq” edhe për 2-3 sezone të tjera. Gjithsesi, cilado skuadër që kërkon shërbimet e Murinjos, duhet të paguajë 20 milionë euro gjobë, siç e përshkruan kontrata e tij me madrilenët.(LajmeShqip.com)

 
Lajme Shqip Sunday, 29 January 2012 00:32

“El Clasico” mund t’i buzëqeshë gjithmonë Barcelonës, por në kampionat është Reali i Madridit që buzëqesh pasi i është shkëputur katalanasve dhe ecën i qetë drejt titullit kampion. Madrilenët kanë mundur 3-1 Saragozën në ndeshjen e javës së 20-të, në një takim që ka qenë më i komplikuar se ç’pritej. 

Kanë qenë miqtë që kanë shënuar të parët me anë të Lafita në minutën e 12-të, duke bërë që “Santiago Bernabeu” të heshtë duke menduar më të keqen. Por në minutën e 32-të është Kaka, i kthyer mes titullarëve pas provës bindëse ndaj Barçës në mesjavë, që gjen rrugën e rrjetës dhe çon skuadrat në baraspeshë në pushimin e ndeshjes.

Në pjesën e dytë, në fushë është vetëm Reali që dominon e krijon raste. Si rrjedhojë, vijnë edhe dy gola të tjerë me autorë Kristiano Ronaldon e Mesut Ozil, duke siguruar përfundimisht rezultatin e takimit dhe tre pikët e rëndësishme për klasifikimin.

Ndërkohë, Barcelona nuk ka arritur të mbajë hapin e kryesuesve dhe është ndalur në një barazim pa gola përballë Vijarealit. Katalanasit janë paraqitur në “El Madrigal” me një formacion të improvizuar për shkak të mungesave shumta për dëmtime. Si rrjedhojë, vendasit kanë arritur t’i bëjnë ballë sulmeve të tyre dhe t’i ndalin ata në luftën për titullin kampion.

Tashmë Reali i Madridit është shkëputur me 7 pikë para katalanasve dhe duket se ka krijuar një distancë sigurie përsa i përket luftës për titull. (LajmeShqip.com)