Lajme Shqip Wednesday, 31 July 2013 12:18

Prishtinë – Nëse gjithçka shkon sipas Planit të Ministrisë së Drejtësisë, atëherë prej janarit të vitit të ardhshëm gjyqtarët dhe prokurorët vendor do të merren me hetimin dhe dënimin e krimeve të luftës.
Kompetencat që aktualisht i ka EULEX’i, pritet të kalojnë në Gjykatën Themelore të Prishtinës, përkatësisht në Departamentin për Krime Serioze që do të themelohet pasi të bëhen ndryshime ligjore.
Ministri i Drejtësisë, Hajredin Kuçi ka treguar se idenë për të themeluar Divizionin për Krimze Serioze pranë Gjykatës Themelore të Prishtinës e ka pasur prej se është emëruar Ministër.
Në kuadër të këtij Divizioni, Kuçi thotë se duhet të jetë pjesa që merret me krimet e luftës.
“Një projekt të tillë e kam paraqitur qysh në ditët e para kur jam emëruar Ministër. Kemi pasur debat të plotë si me ndërkombëtarët ashtu edhe me vendorët. Ne duhet ta kemi një Departament për Krimet Serioze që do të ketë pesë kompetenca kryesore që vijnë nga Prokuroria Speciale që do të vendoset në Gjykatën Themelore të Prishtinës”, ka thënë Kuçi, për Gazetën Express, të martën.
“Ky Divizion do të ketë në kompetencë luftën kundër krimit të organizuar, luftën kundër korrupsionit në nivelet e larta, luftën kundër terrorizmit, shpëlarjen e parave dhe krimet e luftës”, ka shtuar ai.
Ai ka thënë se më së largu në fillim të vitit të ardhshëm do të jetë gati edhe baza ligjore për të funksionuar një departament i tillë.
“Unë pres të kemi ndryshime ligjore dhe po ashtu dua të besoj se prej fillimit të vitit të ardhshëm do të filloj punën Departamenti i Krimeve Serioze pranë Gjykatës Themelore”, ka treguar ai.
Por, sa janë të gatshëm gjyqtarët dhe prokurorët të ballafaqohen me krimet e luftës?
Zëvendëskryeministri dhe Ministri i Drejtësisë thotë se gjyqtarët dhe prokurorët vendës kanë të gjitha kapacitetet si morale ashtu edhe profesionale për t’u marrë me të gjitha rastet e krimeve.
“Gjyqtarët dhe prokurorët tonë e kanë kompetencën e plotë, e kanë betimin që kanë dhënë dhe e kanë devotshmërinë, por duhet edhe t’iu japim mbështetje. Unë besoj në profesionalizmin, guximin dhe ndershmërinë të gjyqtarëve tonë”, ka shtuar ai.
Megjithëkëtë, Kuçi thotë se europianët për një kohë do të mbikëqyrin punën e vendorëve.
“Por, roli monitorues do ta ketë me siguri BE’ja edhe në të ardhmen”.
Sidoqoftë, ky zyrtar qeveritar thotë se Misioni i EULEX’it do të shkoj drejt fundit në momentin që të bartën të gjitha kompetencat te vendorët.
Sipas tij, sa më shumë që të punon Misioni i BE’së aq më shpejt edhe do ta përfundojë mandatin.
“Aq më shumë që të punon EULEX’i aq më pak i nevojshëm është në Kosovë. Dhe, sa më shumë që punojmë ne, po ashtu, i ngrisim kapacitetet tona. Ne duhet të punojmë që me marrëveshje të përfundoj mandati i EULEX’it në Kosovë kurdo që përfundon. Do të thotë qysh e kemi përfundu pavarësinë e mbikëqyrur do ta përfundojmë edhe mandatin e EULEX’it”, ka thënë ai.
Zëvendëskryeministri ka thënë se Qeveria e Kosovës nuk është në konflikt me EULEX’in dhe se për mandatin e tij do të vendoset në Kuvendin e Kosovës në gjysmën e vitit 2014.
Kuçi ka komentuar edhe deklaratat e zyrtarëve serb, të cilët kanë thënë se nuk do të lejojnë të largohet EULEX’i nga Kosova.
“Serbia nuk përzihet në çështje të tilla dhe s’ka asnjë kompetencë. Serbia në fillim ka qenë kundër Misionit të BE’së për Rend dhe Ligj në Kosovë. Serbia duhet ta ketë parasysh se ne do të jemi në proces integrues për në BE, por për misionet e ndryshme të BE’së që janë në Kosovë vendosim ne bashkë me BE’në”, ka thënë Hajredin Kuçi./Express/Lajmeshqip/

 

 
Lajme Shqip Thursday, 25 July 2013 14:13

Prishtinë – Ministri i Drejtësisë, Hajredin Kuçi ka thënë se me marrëveshje duhet të përfundojë mandati i EULEX’it ashtu siç ka ndodhur me përmbylljen e pavarësisë së mbikëqyrur.
Por, para se të ndodh largimi i Misionit më të madh të BE’së për Sundimin e Ligjit, Kuçi ka thënë se duhet të forcohen institucionet e drejtësisë dhe të gjitha prokurorët dhe gjyqtarët të jenë në gjendje të zbatojnë ligjet ashtu siç janë miratuar në Kuvendin e Kosovës.
“Qeveria e Kosovës do t’i kryej të gjitha obligimet e veta në këtë drejtim. Natyrisht, ne do ta përfundojmë misionin e EULEX’it dhe duhet të përfundojë dhe duhet të jemi sikur të gjitha shtetet tjera sovrane për rreth nesh. Por e gjithë kjo duhet të ndodh në mirëkuptim, me plotësimin e kapaciteteve tona”, ka thënë Kuçi në debatin që po zhvillohet aktualisht në Kuvend në lidhje me mandatin e EULEX’it.
“Mbi të gjitha me një marrëveshje sikurse e kemi përmbyllur pavarësinë e mbikëqyrur me marrëveshje, edhe Misionin e EULEX’it me marrëveshje do ta përfundojmë”, ka thënë ai.
Ministri i Drejtësisë, Hajredin Kuçi ka thënë se me ngritjen e kapaciteteve në fushën e drejtësisë do te zvogëlohet prania e ndërkombëtarëve në këtë fushë. Ai ka thënë se kanë propozuar që në Gjykatën Themelore në Prishtinë të themelohet një departament i cili do të emërohej si “Departamenti për krimet serioze”.
“E para të merren me korrupsionin në nivelin e lartë. E dyta, me krimin e organizuar. E treta, me shpëlarjen e parave. E katërta me terrorizmin dhe e pesta me krimet e luftës. Mendoj se këto kompetenca duhet t’i bartim në një departament të tillë që janë të përafërta me vendet e tjera”, ka thënë ai.
Ndërkohë, Rexhep Selimi i Vetëvendosjes ka kërkuar që të votohet iniciativa e veteranëve të UÇK’së për t’ia ndërprerë mandatin EULEX’in.
“Kjo kërkesë e veteranëve duhet të përshihet në rekomandimet e këtij debati”, ka thënë Selimi.
Ymeri, Grabovcit: Të besoj veç kur flet italisht
Seanca e sotme e Kuvendit të Kosovës ka filluar me kundërshtime rreth mbajtjes ose jo të debatit për hetimin dhe gjykimin e krimeve të luftës, rolin e EULEX-it, Qeverisë së Kosovës dhe periudha e tranzicionit. Opozita akuzojë propozuesin për ndryshimin e kërkesës pa dijeninë e deputetëve nënshkrues. Megjithatë, pas votimit u vendos që debati të vazhdojë.
Për shkelje të procedurave Kryetari i Grupit Parlamentar të Lidhjes Demokratike të Kosovës, Ismet Beqiri ka thënë se deputetët e kësaj partie nuk do të marrin pjesë në debat.
Pakënaqësi për këtë çështje ka shfaqur edhe Aleanca për Ardhmërinë e Kosovës, derisa Shefi i Grupit Parlamentar Ardian Gjini ka kërkuar mocion për heqjen e debatit, i cili u hodh poshtë me 43 vota, 15 vota ishin kundër derisa 5 deputetë kanë abstenuar.
Tërheqjen e rezolutës e ka kërkuar edhe Shefi i Grupit Parlamentar të Partisë Demokratike të Kosovës, Adem Grabovci, i cili ka kërkuar që të nxirret një rezolutë pas konsultave të shefave të grupeve parlamentare.
Edhe Kryetari i Grupit Parlamentar i Lëvizjes Vetëvendosje, Visar Ymeri ka thënë se nuk e përkrahin rezolutën me rekomandimet shtesë të cilat janë shtuar pa dijeninë e deputetëve nënshkrues.
Mos mbajtjen e një debati të tillë e ka kërkuar edhe iniciuesi Kurtan Kajtazi, i cili për këtë ka ngjallur reagimin e Ymerit të Vetëvendosjes.
Ai ka thënë se nuk i beson atij dhe deputetëve të tjerë të PDK-së, të cilët sipas tij në të njëjtën mënyrë u tërhoqën edhe nga rasti “Kleçka”.
Pas reagimit të Grabovcit, i cili tha se nuk dëshiron të merret me deklaratat e atyre që nuk u besojnë institucioneve, ka reaguar sërish Ymeri duke thënë se nuk i beson Grabovcit dhe shokëve të tij.
Ai i tha Grabovci është vetvetja vetëm kur flet italisht, prandaj i tha se i beson vetëm kur flet për atë gjuhë.
Debat është zhvilluar edhe në mes të deputetit Kurtan Kajtazi dhe Ismet Beqirit. Kajtazi akuzoi Beqirin se nëpërmjet sms-ve kishte kërcënuar deputetët e LDK-së që të mos përkrahin debatin e tillë.
Por Beqiri duke mohuar mundësinë e tillë i ka kujtuar Kajtazit që të mos shpif dhe se nëse posedon ndonjë fakt të tillë ta bëjë publik./Kosovapress/Lajmeshqip/