Lajme Shqip Saturday, 28 June 2014 16:29

Njësitë policore të Kosovës në bashkëpunim me Policinë e Shqipërisë, edhe këtë vit gjatë zezonës verore do të patrullojnë së bashku në akset rrugore, brenda territorit të Republikës së Shqipërisë, duke filluar nga periudha kohore 1 korrik e deri në fund të muajit gusht, ku edhe përfundon zezona verore. Ky bashkëpunim është arritur sot, nga drejtoritë Policore të Kosovës dhe asaj të Shqipërisë ku edhe kanë nënshkruar një marrëveshje.

Drejtori i Përgjithshëm i Policisë së Kosovës, Shpend Maxhuni, ka thënë se ky aktivitet është bërë tradicional dhe se mbi bazën e vlerësimeve që dy policitë e dy shteteve kanë bërë, ka rezultuar se ka treguar suksese në shumë fusha e mbi të gjitha në fushën e qarkullimit rrugor.

“Qëllim i këtij aktiviteti do të jetë në shumë drejtime, duke filluar nga shkëmbimi i përvojave në mes të dy policive në fushën e policimit rrugor, pastaj mbështetja në parandalimin e ngjarjeve aksidentale, ku synim kryesor do të jetë ruajtja e jetës së njerëzve në qarkullim rrugor, fuqizimi i përgjithshëm i sigurisë në qarkullimin rrugor , p astaj do të jetë trajtimi i të gjithë shkelësve, apo kundërvajtësve të cilët në një mënyrë apo tjetrën bien ndesh me rregullativën ligjore brenda territorit të Republikës së Shqipërisë, si dhe vlerësimet e përbashkëta që duhet pasuar nga të dyja policitë për të menaxhuar në mënyrë profesionale tërë këtë aktivitet, pra që do të realizohet nga dy policitë e dy vendeve”, ka thënë ai.

Edhe Drejtori i Përgjithshëm i Policisë së Shqipërisë, Artan Didi, tha se janë të përgatitur dhe se janë duke u munduar që tu krijojnë të gjitha kushtet e nevojshme që i duhen çdo turisti të zakonshëm.

“Tashmë është bërë traditë bashkëpunimi i dy policive të fushës së qarkullimit rrugor edhe në vitet e mëparshme këto kanë dhënë rezultate pozitive sido mos në menaxhimin e trafikut, por edhe në trajtimin e shkeljeve të ndryshme, apo edhe në trajtimin e ngjarjeve të tjera aksidentale, të cilat kanë bërë që t’i përgjigjem në një kohë më të shpejtë, të gjithë qytetarëve e sidomos përdoruesve të rrugës që vinë nga Kosova duke shfrytëzuar bregdetin shqiptar. Është një sezone që ka një fluks të shtuar të mjeteve dhe ne jemi të përgatitur, por edhe jemi të interesuar që tu krijojmë të gjitha lehtësitë e nevojshme pushuesve që vinë nga Kosova dhe turistëve nga Kosova për të krijuar të gjitha ato lehtësirat e nevojshme që duhet t’i krijohen turistëve në përgjithësi”, ka thënë Didi.

Ndërsa, në kuadër të kësaj marrëveshje bashkëpunimi, janë paraparë që nga Policia e Kosovës të jenë tri patrullime, të cilët do të patrullojnë gjatë gjithë seznonës verore, brenda territorit të Shqipërisë. 

 
Lajme Shqip Saturday, 29 March 2014 16:31

Ministria e Energjetikës dhe Industrisë së Shqipërisë ka konfirmuar në mënyrë zyrtare se, do të bashkëpunojë me Ministrinë e Zhvillimit Ekonomik në Kosovë, për krijimin e një tregu të përbashkët energjetik midis dy vendeve.

Dy ministrat e dikastereve përkatëse, Damian Gjiknuri dhe Fadil Ismajli pohuan bindshëm se, këtë herë do të përkushtohen maksimalisht me qëllim që kjo nismë të mos ngelet në kuadrin e premtimeve të pambajtura deri tani, por të zyrtarizohet dhe të intensifikohet puna për këtë nismë bilaterale.

Ky bashkëpunim i rëndësishëm do të nisë për linjën Prizren-Kukës. Për këtë linjë punimet do të zgjasin 2 vjet dhe do të kurorëzohet me linjën e Interkonjeksionit. Ministrat nuk dhanë detaje të tjera përsa i takon afateve se kur do të nisë dhe përfundojë ky treg i përbashkët energjetik.

 

Dhuna në burgje është konstatuar se është në nivele shqetësuese. Përgjatë të gjitha raporteve që janë hartuar mbi gjendjen nëpër burgjet tona, këto kryesisht raporte të organizmave të huaja dhe kërkesave të Avokatit të Popullit, janë hasur raste specifike kur gardianët kanë përdorur dhunë ndaj të burgosurve. Pikërisht për të evituar abuzimin ligjvënësit e Komisionit të Ligjeve vijuan dje diskutimin mbi ndryshimet e nevojshme në ligjin për Policinë e Burgjeve që trashmë propozohet të quhet Shërbimi i Sigurisë në Burgjeve. Deputetë i kushtuan vëmendje të veçantë mjeteve që duhet të mbajnë këto forca policore në raste të jashtëzakonshme. Drafti i qeverisë nuk sillte ndryshime nga ligji bazë ndërsa relatori Pirro Lutaj propozoi riformulimi të ligjit ekzistues duke saktësuar që: “Punonjësit e Shërbimit të Sigurisë në Burgje përveç rasteve të ngjarjeve të jashtëzakonshme nuk mbajnë armë vdekjeprurëse brenda regjimit të brendshëm. Mbajtja e mjeteve të tjera në regjimin e brendshëm si shkopinj gome, pranga, zinxhirë, lejohet vetëm kur nevojiten për garantimin e elementëve të sigurisë”. Ishte socialistja Vasilika Hysi e cila kërkoi eliminimin e çdo mundësie abuzimi.

 
Lajme Shqip Friday, 28 March 2014 23:31

Brenda harkut të shkurtër kohor, ministri i Financave, Shkëlqim Cani realizoi takimin e dytë në Kosovë me homologun Besim Beqanj, kësaj here për të konkretizuar dy marrëveshje, shmangien e tatimit të dyfishtë dhe parandalimin e evazionit fiskal si dhe heqjen e TVSH-së për librat. 

“Kjo vizitë edhe një herë konfirmon orientimet tona vëllazërorë të bashkëpunimeve ekonomike dhe avancimit të bashkëpunimeve në mes të dy vendeve tona”, ishin fjalët e para përshëndetëse të ministrit të Financave të Kosovës, Beqaj.

“Është kënaqësi të vijë për herë të dytë për një kohë të shkurtër për të nënshkruar dy marrëveshje, natyrisht që uroj që herën e tretë kur të vijë nënshkruajmë tre marrëveshje, ndoshta dhe gjashtë sepse hapësira, dëshira dhe vullneti nuk na mungon”, deklaroi ministri Cani. 

“Ne sot nënshkruam dy marrëveshje të rëndësishme në aspektin fiskal, që lehtësojnë mjaft çështje midis dy vendeve tona. Marrëveshja për shmangien e tatimit të dyfishtë na ndihmon për të paraprirë shmangien e evazionit fiskal.

Njëkohësisht, ne nënshkruam edhe shmangien e TVSH-së për tregtimin e librave dhe më këtë rast i uroj botës së akademisë, por edhe atyre të prodhimtarisë dhe lexuesve të librave që të shtohet dëshira për librin e përbashkët në të dy krahët”, shtoi më tej ministri shqiptar i Financave. 

Dy ministrat ranë dakord të inkurajojnë bashkëpunimin mes dhomave të tregtisë përmes marrëveshjeve të mirëkuptimit, në ndihmë të sipërmarrjes private, por edhe të vet ministrive të Financave. “Nuk jemi vetëm kontrollor, vetëm taksambledhës! Padyshim na intereson të kemi bashkëpunim dhe mirëkuptim edhe me sipërmarrjen private”, shtoi ministri Cani.

 
Lajme Shqip Friday, 14 March 2014 22:57

Ministrat e punëve të jashtme të Kosovës dhe Shqipërisë, Enver Hoxhaj dhe Ditmir Bushati kanë ligjëruar të premten para një audience të përzgjedhurish të organizuar nga Akademia Diplomatike e Kosovës.

Para diplomatëve, zyrtarëve të institucioneve, përfaqësuesve të shoqërisë civile e gazetarëve dy ministrat u fokusuan në partneritetin strategjik si dhe bashkëpunimin ndërmjet dy shteteve, veçmas pas mbledhjes së përbashkët ndërmjet dy qeverive në Prizren.

Ministri Hoxhaj gjatë ligjëratës tha se Kosova dhe Shqipëria janë model për rajonin në rrafshin e bashkëpunimit.

Ai tha se për Kosovën ka tri nivele të bashkëpunimit rajonal.

“Niveli i parë është fqinjësia e mirë, niveli i dytë është fqinjësia konstruktive, ku kohëve të fundit kemi reflektuar edhe në disa vende të rajonit, dhe niveli i tretë për ne është partneriteti strategjik. Me Shqipërinë për arsye historike, kulturore, gjuhësore, politike, por mbi të gjitha për arsye ekonomike, jemi partnerë strategjik”, tha Hoxhaj.

Ministri Hoxhaj po ashtu paralajmëroi se në një të ardhme të afërt ndërmjet Kosovës e Shqipërisë do të jetë mundësia e krijimit të një tregu energjetik të përbashkët, duke shprehur besimin se mbledhja e ardhshme e dy qeverive në Vlorë do të sjellë vendime konkrete.

Ministri Ditmir Bushati tha se rruga e bashkëpunimit do të duhej të shihej me një qasje të integruar me portet, me energjinë, me turizmin, me arsimin, me një qasje tjetër në produktet bujqësore.

“Ne jemi përpjekur për të punuar, për të pasur një dokument i cili thjesht nuk do t’iu shërbejë vetëm qeverive të cilat ne përfaqësojmë, por do të jetë një mekanizëm, një kuadër konceptual i cili do të përcaktojë mënyrën sesi do të ndërtohet edhe më tej ky partneritet strategjik. Pra, jo thjesht inflacion marrëveshjesh dhe në fund të ditës për t’i matur këto, por projekte konkrete dhe bashkëpunim të strukturuar. Ky lloj bashkëpunimi është strategjik për ne, është stabilizues për rajonin dhe është orientues për të gjithë rrugëtimin tonë euroatlantik”, tha Bushati.

 
Lajme Shqip Thursday, 06 February 2014 16:47

Në Tiranë sot është nënshkruar marrëveshja e bashkëpunimit në fushën e turizmit në mes Ministrisë së Tregtisë dhe Industrisë të Kosovës dhe Ministrisë së Zhvillimit Urban dhe Turizmit të Republikës së Shqipërisë. Marrëveshjen në emër të delegacionit të Kosovës e nënshkroi  u.d. i  ministrit, Bernard Nikaj, kurse të Shqipërisë ministrja Eglantina Gjermeni. 

Në njoftimin për medie theksohet se kjo marrëveshje është shprehje e vullnetit të përbashkët mes dy qeverive, të Shqipërisë e të Kosovës,  pas deklaratës për Bashkëpunim dhe Partneritet Strategjik, të nënshkruar në Prizren, më 11 janar të këtij viti.    

Të dy palët vlerësuan si shumë të rëndësishëm bashkëpunimin në fushën e turizmit, si një sektor potencial për zhvillimin e ekonomisë në të dy vendet. 

Për Ushtruesin e detyrës së ministrit të Tregtisë dhe Industrisë të Kosovës, z. Nikaj,  kjo u hap rrugën vizitave të përbashkëta në destinacione turistike të të dyja shteteve, ku do të prezantohen së bashku me publikime dhe materiale promovuese të dy vendeve. “Kjo marrëveshje do të vendosë në një kornizë institucionale bashkëpunimin mes institucioneve tona, i cili shumë shpejt do të konkretizohet me projekte të përbashkëta. Së bashku jemi më të fortë”, – deklaroi Nikaj. 

“Synimi ynë kryesor është krijimi dhe zhvillimi i paketave të përbashkëta turistike, si e vetmja mundësi për të qenë konkurrues në tregun rajonal dhe më gjerë”, – deklaroi gjatë konferencës për shtyp ministrja Gjermeni. “Ne kërkojmë të zgjerojmë veprimtarinë e operatorëve turistikë të të dy vendeve dhe të shtojmë numrin e turistëve, duke iu siguruar kushte dhe standarde më të mira”, – u shpreh ministrja në konferencën për shtyp. 

Palët ranë dakord të punojnë bashkërisht për të rritur numrin e turistëve mes dy vendeve, duke siguruar praktika të thjeshta ndërkufitare përgjatë gjithë vitit, si dhe lëvizjen e vizitorëve  nga njëri shtet në tjetrin në përputhje me standardet kombëtare dhe ndërkombëtare. 

Një tjetër pikë me rëndësi për zbatimin me sukses të kësaj marrëveshjeje është trajnimi i stafeve të turizmit, shkëmbimi i të dhënave statistikore turistike si dhe shkëmbimi i përvojave dhe praktikave më të mira profesionale. 

Palët angazhohen për krijimin e tregut të përbashkët të turizmit në mes dy vendeve, që do të sjellë rritjen e investime në sektorin e turizmit. 

Diskutimet mes dy delegacioneve vazhduan në nivel teknik mes ekspertëve të dy ministrive.

 
Lajme Shqip Saturday, 18 January 2014 19:38

Kryetari i Kuvendit të Shqipërisë, Ilir Meta, gjatë një interviste me Janusz Bugajski ne “Albanian Screen”, veç çështjeve të brendshme të Shqipërisë, ka folur edhe për Kosovën, gjegjësisht në lidhje me mbledhjen e përbashkët të dy qeverive shqiptare të mbajtur në Prizren gjatë këtij muaji.

Meta ka thënë se ky takim ka qenë mjaft pozitiv, duke theksuar se marrëdhëniet e Shqipërisë me Kosovën janë unike – janë marrëdhënie të dy vendeve fqinje, por jo vetëm kaq, janë më shumë. 

“Janë dy vende që të ardhmen e qytetarëve të tyre e shohin në BE. Kemi mundësi më të mëdha për të shfrytëzuar resurset për një zhvillim më të shpejtë, për të integruar më shpejt, por edhe për të përdorur më mirë resurset e njeri- tjetrit. Si në aspektin energjetik. Shqipëria dhe Kosova kanë më shumë mundësi të përfitojnë më shumë nga sistemet energjetike. Shqipëria bazën kryesore të energjisë e ka nga energjia e rinovueshme, hidro. Ndërsa Kosova e ka nga energjia, e cila prodhohet nga termocentralet”, ka thënë Meta në intervistën për AS, transmeton Koha.net. 

Ai ka folur më tej edhe për bashkëpunimet tjera në mes të dy vendeve tona, duke thënë se ky bashkëpunim duhet parë si një mundësi për të eksploruar të gjitha mundësitë e fjetura deri tani për një zhvillim edhe më të mirë ekonomik, por edhe për të dhënë ndonjë shembull të një bashkëpunimi tepër konstruktiv edhe në rajon. 

“Ka qenë një mbledhje e paramenduar. Ideja për të realizuar një bashkëpunim sa më të dobishëm nga Shqipëria me Kosovën, ka qenë një ide përpara zgjedhjeve dhe pas tyre. Unë besoj se takimi i Prizrenit do të pasohet me takime të tjera. Kemi nevojë për vendime konkrete, si p.sh konsullatë apo ambasada të përbashkëta. Kjo është pozitive, jo vetëm me Kosovën, por edhe me vendet e tjera. Kur ne duhet të japim shërbimin tonë ndaj fqinjëve tanë, por edhe të shfrytëzojmë burimet tona, sepse nuk kemi mundësi të hapim konsullata kudo”, ka thënë Meta, duke shtuar se këto forma bashkëpunimi janë të dobishme dhe me interes konkret edhe praktik për qytetarët tanë.

 
Lajme Shqip Saturday, 18 January 2014 16:47

Gazeta greke “Kathimerini” boton një shkrim të gazetarit Stavros Tzimas, njohës i çështjeve të Ballkanit, që lidhet me mbledhjen e dy qeverive shqiptare në Prizren para disa ditësh. 

Shkrimi analizon faktin që mbledhja u zhvillua pikërisht në një qytet me histori dhe simbolikë të fuqishme për shqiptarët. Pasi bën një historik të shkurtër për lidhjen e Prizrenit, ku në vitin 1878 shqiptarët deklaruan autonominë nga turqit, gazetari thotë se “sot, 136 vjet më vonë qeveritë e Shqipërisë dhe Kosovës takohen në të njëjtin qytet historik për Shqipërinë, Kosovën e rajonin”. 

Duke i quajtur popujt shqiptarë të Shqipërisë dhe Kosovës “vëllezërit e papërmbushur”, gazetari thekson se “përse”-në e takimit të dy qeverive në Prizren, nuk e spjegoi as Thaçi dhe as Rama, edhe pse ky i fundit për të shmangur konotacionet apo interpretimet e mundshme, foli për paprekshmërinë e kufijve. 

“Nuk është e vështirë për të kuptuar një iniciativë të tillë, kur termi i papërmendshëm “Shqipëri e madhe” pretendon të gjejë vend në axhendën politike të partive dhe qeverive shqiptare. Tirana dhe Prishtina asnjëherë nuk kanë pushuar së besuari, se edhe pas pavarësisë së Kosovës, ka çështje kombëtare të pazgjidhura”, shkruan Tzimas, i cili kujton se një takim i dytë i ngjashëm do të zhvillohet në Vlorë, gjithashtu një qytet-simbol i fuqishëm kombëtar, ku u ngrit flamuri i pavarësisë së Shqipërisë. 

“Takimi nisi me marshe dhe melodi kombëtare sikur të ishte luftë, ndërsa leximi i linjave të deklaratave të udhëheqësve shqiptarë të bën të kuptosh se këta të fundit nuk kanë mësuar asgjë nga historia e keqe e popujve “superiorë” (mikromegalomanë) të Ballkanit”, përfundon shkrimi i “Kathimerini”. /ballkanweb/ 

 
Lajme Shqip Saturday, 11 January 2014 12:17

(E plotësuar) – Në mbledhjen e dy qeverive të dy shteteve të një kombi, kryeministrit Hashim Thaçi dhe Edi Rama kanë dhënë mesazhin e qartë se mes dy vendeve nuk do të ketë bashkim kufijsh sipas kuptimit të mirëfilltë.

“Jemi sot këtu për të punuar për të ardhmen, nuk ka asnjë dyshim se shpallja e pavarësisë së Kosovës dhe përfundimi i mbikëqyrjes ndërkombëtare përbën një nga arritjet më të mëdha për dy shtetet shqiptare. Ky takim shënon një kapitull të ri për Kosovën, Shqipërinë dhe rajonin”, u shpreh Thaçi.

Kryeministri i Shqipërisë në fjalën e tij theksoi se kjo mbledhje ka për qëllim heqjen e kufirit mes dy vendeve por ai foli për një bashkim të stilit të vendeve të Beneluksit.

Nga ana tjetër, Rama u shpreh se nuk mund të ketë bashkim të dy vendeve pasi kjo gjë u është premtuar SHBA-ve dhe BE-se.

“I takojnë një kombi me një gjuhë kulturë të përbashkët, por nëse mbledhja e përbashkët bëhet arsye trembjeje apo inkurajimi për këdo që ka shqetësime në lidhje me vijat kufitare, dua të them se kufiri mes Shqipërisë dhe Kosovës është për ne shumë i qartë dhe i patjetërsueshëm si një vijë që na kujton qoftë pamundësinë e historisë nga njëra anë apo përpjekjet heroike që solli krijimin e shtetit të dytë shqiptar nga ana tjetër dhe qoftë dhe detyrimin tonë për t’i qëndruar besës së dhënë atyre pa të cilët Kosova e lirë dhe e pavarur do të kishte mbetur një ëndërr e përgjakur SHBA-ve dhe BE-së”, u shpreh Rama.

Video: http://www.youtube.com/watch?v=m3jryWTlxc0

 

Në Prizren takimi Kosovë – Shqipëri

 

Sot në Prizren, para dite, është paraparë mbajtja e takimit ndërmjet dy qeverive – të Kosovës e të Shqipërisë. Për këtë takim thuhet të jenë përgatitur të dy vendet. Janë ndërmarrë edhe masa të nevojshme të sigurisë në qytetin historik të Prizrenit në të cilin kanë ndodhur e janë zhvilluar disa Lidhje shqiptare të Prizrenit. Edhe ky takim nga shumë kush po quhet një Lidhje e re shqiptare e Prizrenit. Në të pritet të shqyrtohen e të arrihen marrëveshje për tema të rëndësishme ndërshqiptare brenda e jashtë kufijve të këtij populli. 

Kryeministri Thaçi ka theksuar dje se takimi i Prizrenit shënon kapitull të ri dhe se ai dërgon mesazhin evropian për të gjithë, mesazhin e rajonit me kufi të hapur dhe pa barriera të së kaluarës.

Por, nga qarqe të LDK –së ky takim është quajtur vetëm takim marketingu që nuk mund të sjellë shumë dobi për shqiptarët. 

Takimin me interesim të madh e pret Lugina e Preshevës për cilën Kosova e Shqipëria kanë marrë vendimin të themelojnë një Fond të përbashkët. Takimi fillon në hotelin “Theranda” e përfundon, simbolikisht,  në ndërtesën historike të Lidhjes Shqiptare të Prizrenit./koha/