Lajme Shqip Tuesday, 23 April 2013 10:54

Shkoder – E majta shqiptare i ka dhënë fund ndasive dhe përçarjes së gjatë, duke hapur një kapitull të ri bashkëpunimi mes Partisë Socialiste dhe LSI-së, në kuadër të Aleancës për Shqipërinë Evropiane.

Edi Rama dhe Ilir Meta pasditen e së hënës hodhën firmat e tyre në atë që ata e quajtën një kartë parimesh, e cila konsiderohet si një marrëveshje paraelektotrale.

Sipas dy liderëve, kjo marrëveshje hedh piketat e përbashkëta se si këto dy forca politike do të qeverisin vendin pas zgjedhjeve të 23 qershorit.

Marrëveshja u nënshkrua gjatë konferencës së Partisë Socialste Europiane me liderët e së majtës ballkanase, ku Rama dhe Meta evidentuan në fjalën tyre rëndësinë që merr bashkimi i së majtës në këto kohë kritike që po kalon Shqipëria.

“Ne sot jemi bashkë për të filluar një rrugë të re dhe për t’i dhënë Shqipërisë një perspektivë të re. Vendimin për të firmosur në Shkodër bashkë me kreun e LSI marrëveshjen që do t’u kthejë shqiptarëve të drejtën sovrane të qeverisjes së këtij vendi. Kemi rënë dakord për një marrëveshje që nis me një kartë parimesh”, deklaroi Rama.

“Në emër të këtij bashkëpunimi dhe së ardhmes evropiane, LSI iu përgjigj pozitivisht ftesës së PS dhe zotit Rama, për të bashkuar të majtën dhe të gjitha forcat opozitare për zgjedhjet e 23 qershorit. Bashkimi i forcave të majta shqiptare është një aksion historik dhe i domosdoshëm për një ndryshim substancial për vendin”, tha nga ana tjetër Ilir Meta.

Detajet e kartës se parimeve i lexuan Taulant Balla për PS dhe sekretari për marrëdhëniet me jashtë në LSI, Ralf Gjoni.

“Me shqetësimin e përbashkët për situatën kritike të demokracisë dhe ekonomisë në vend, me institucionet që kanë dalë jashtë kontrollit kushtetues dhe qytetar dhe janë kthyer në vegla të partisë në pushtet, vendosim të bashkohemi në Aleancën për Shqipërinë Evropiane”, deklaruan njëzëri Balla dhe Gjoni.

Një ndër pikat më të rëndësishme të marrëveshjes është edhe ajo e ndarjes së qeverisë nga Parlamenti. Deputetët nuk do të jenë ministra, çka nënkupton që edhe nëse zgjidhen në Kuvend, ata do të japin dorëheqjen pas emërimit në kabinetin qeveritar.

Kjo, sipas burimeve brenda dy partive, bëhet për të forcuar rolin e Parlamentit dhe për të fokusuar qeverinë në punë dhe në raportimin në Kuvend.

Kjo marrëveshje e nënshkruar nga PS dhe LSI është përshëndetur nga eurodeputetja Tanja Fajon dhe ish-presidenti serb Boris Tadiç.

Në një videomesazh nga Brukseli, koalicionin e dy partive më të mëdha të së majtës e ka përshëndetur edhe presidenti i Partive Europiane Socialiste, Sergej Stanishev, ai që bëri i pari apelin për një bashkim mes tyre gati një muaj më parë. (LajmeShqip.com)

 
Lajme Shqip Monday, 22 April 2013 13:00

TIRANE – Partia Socialiste ka përfshirë në koalicionin e saj edhe PBDNJ-në e Vangjel Dules. Palët firmosën në selinë e PS marrëveshjen e koalicionit ndërsa rreth orës 11:40 të dy kryetarët, Rama dhe Dule dolën në një konferencë të përbashkët për shtyp ku shprehën kënaqësinë e këtij bashkëpunimi mes dy partive.

Rama u shpreh se për marrëdhëniet e PS me PBDNJ, flet vetë tradita e miqësisë. Rama shtoi se koalicioni do të quhet, “Aleanca për Shqipërinë Europiane”.
“Nuk besoj se ka nevojë për shumë fjalë për afrimitetin bashkëpunimin dhe objektivat afatgjatë të vizionit të një Shqipërie që e kemi tërësisht të përbashkët, si një Shqipëri europiane në raportet tona me Partinë e Bashkimit për të Drejtat e Njeriut, flet tradita e një fqinjësie të mirë, e një marrëdhënie të mirë e mbështetur tek reciprociteti. Jam i kënaqur që me mikun tim Dule të hyjmë së bashkë në koalicionin ‘Aleanca për Shqipërinë Europiane”.

Edhe Dule përdori fjalët më të përzgjedhura në bashkëpunimin me PS. Sipas kreut të PBDNJ, ka ardhur koha për rrotacion politik me qëllimin e vetëm, sic tha ai, t’i hapet rruga perspektivës europiane.
“Jemi sot në konkludim për bashkëpunim me PS. Bashkëpunimi tynë nuk është bashkëpunim që ka filluar rishtazi,. Është prej vitesh dhe kjo na bën më të sigurt, se njohim mirë njëri-tjetrin si forca politike, pikat e përbashkëta sikurse dhe vështirësitë që kemi pasur në të shkuarën. Pas  vitesh ne opozitë është momenti të realizohet rrotacioni i shumëdëshiruar. Jo si qëllim në vetvete, por për t’i hapur vendin perspektivës në familjen europiane. Ky bashkëpunim do ketë kontributin qoftë dhe sa më të vogël”. 

“Faleminderit, zgjerimi i koalicionit vijon!”, ishte nderhyrja e Rames ne fund te konferences per shtyp

Mediat: PS, aleance dhe me AK
Sot pritet të zyrtarizohet marrëveshja mes dy partive. Mësohet se PS ka pranuar që t’i japë një deputet PBDNJ-së në një vend të sigurt në listat e saj, ndërsa partia e Dules do të tërhiqet nga anëtari i KQZ-së dhe ai në ZAZ-të, duke ia lënë LSI-së së Ilir Metës. 

PS do t’i japë komisionerë PBDNJ-së në ato zona ku ajo ka vota, si qarku i Vlorës, Gjirokastrës dhe Korçës. Në funksion të bashkëpunimit me PS ishte dhe dorëheqja e anëtarit të PBDNJ-së, Jani Jani nga KQZ, i cili kishte vendosur dy ditë më parë një raport të ngrirë me këtë institucion. Burime nga PS pohuan dje se është shumë pranë një bashkëpunimi parazgjedhor dhe me Aleancën Kuq e Zi të Kreshnik Spahiut, shkruan e perditshmja Panorama. Nuk dihen ende kushtet e pranuara nga PS, pasi Spahiu i kishte kërkuar Ramës pesë vende në listat për deputetë të socialistëve. 

Duket se socialistët kanë mundur të bashkojnë në një koalicion PBDNJ-në dhe AK, dy parti që qëndrojnë shumë larg njëra-tjetrës, për shkak të qëndrimeve nacionaliste të Spahiut kundër vendit fqinj, Greqisë. Por ajo që dihet, është se PS do të nënshkruajë marrëveshje të veçanta me secilën nga këto dy parti, duke mos i përfshirë në tryezën e madhe të koalicionit opozitar. Sot, kreu i PS do të zyrtarizojë bashkëpunimin parazgjedhor me Ilir Metën. Firmat do të hidhen sot pasdite në qytetin e Shkodrës, gjatë një aktiviteti rajonal ku do të marrin pjesë dhe shumë drejtues të socialistëve europianë. 

Firmosja e marrëveshjes së bashkëpunimit do të jetë simbolike në prani të socialistëve europianë, edhe për shkak të angazhimit të tyre në afrimin e dy forcave të majta shqiptare. Ende mbetet i paqartë pozicioni i dy partive tradicionale aleate të PS-së, PSD-së të Skënder Gjinushit dhe PDS-së së Paskal Milos. Vetë Milo është shprehur dje se pret një përgjigje nga kreu socialist. Milo e Gjinushi i kanë kërkuar Ramës që të jenë pjesë e listës së PS për deputetë, por dhe pjesë e kabinetit qeveritar. Ata munguan në firmosjen e 28 partive të koalicionit opozitar tri ditë më parë.(LajmeShqip.com)

 
Lajme Shqip Sunday, 21 April 2013 11:50

TIRANE- Në një prononcim ekskluziv për ‘Gazeta Shqiptare’, analisti i njohur amerikan, Bernd J. Fischer, analizon paktin e fundit midis LSI dhe PS si dhe ngjarjet më të fundit në KQZ. Sipas tij, pakti PS-LSI konfirmoi edhe njëherë se politika shqiptare varet nga pushteti personal i një grushti politikanësh elitar.

“Ky akt në dukje i rastësishëm nga ana e Ilir Metës e vë theksin edhe njëherë tek natyra shumë personale e politikës Shqiptare. Nuk kishte ndonjë diferencë të dukshme në politikë apo ndonjë vizion politik të kundërt që çoi në këtë përçarje”, – thotë Profesori dhe Drejtori i Departamentit të Historisë në Universitetin e Indianës në Fort Wayne. Fischer mendon se LSI mund të fitojë më shumë në zgjedhjet e ardhshme nëse Ilir Meta largohet nga kjo parti duke e lidhur këtë me reputacionin e tij. Padyshim, partia e tij do të dilte më mirë në sondazhe nëse ai do të largohej.

Nëse Shqipëria do të ishte një shtet i bazuar në sundimin e ligjit, z.Meta do të ishte larguar nga politika shumë kohë më pare. Si rezultat i faktit se sistemi i drejtësisë në Shqipëri ende vuan nga korrupsioni i shumëp-ërhapur, z.Meta vazhdon të jetë një lojtar i rëndësishëm dhe ai mund të përcaktojë rezultatin e zgjedhjeve të Qershorit”, – thotë ai. Së fundmi, ai komenton gjatë rreth heqjes së anëtarit të LSI nga “parlamenti i bindur i Berishës” duke e quajtur këtë “një tjetër goditje ndaj procesit elektoral në Shqipëri”. Ai nuk harron të thotë se ato që sot e ndihmuan qeverinë Berisha të dalë në breg do t’i humbin pozitat e tyre në qershor. (G.SH/LajmeShqip.com)

 
Lajme Shqip Thursday, 04 April 2013 12:52

TIRANË – Kuvendi miratoi sot ministrat e rinj të kabinetit qeveritar, në vendet e mbetura bosh, pas tërheqjes së Lëvizjes Socialiste për Integrim(LSI), nga koalicioni qeverisës.

Presidenti i Republikës, Bujar Nishani, dekretoi mbrëmë, pak para mesnate, ministrat e rinj, të emëruar më herët nga kryeministri Sali Berisha. Ky i fundit, pasditen e djeshme, pas largimit të LSI-së nga qeveria, ku mbante tre poste të rëndësishme, emëroi ministrat e rinj, që do të votohen sot në parlament.

Kështu në postin e ministrit të Jashtëm, në vend të Edmond Panariti është emëruar Aldo Bumci, i cili lë kështu ministrinë e Kulturës, ku zëvendësohet nga Visar Zhiti, një shkrimtar i njohur.

Në ministrinë e Ekonomisë, në vend të Edmond Haxhinasto shkon Florion Mima, aktualisht deputet i Partisë Demokratike, ish-zv/ministër i Financave. Ndërsa në ministrinë e Shëndetësisë u emërua mjeku i njohur Halim Kosova, aktualisht drejtor i spitalit gjinekologjik “Mbretëresha Geraldinë” në Tiranë. Ndërsa posti i zv/kryeministrit do të mbahet nga ministri aktual i Arsimit, Myqerem Tafaj. 

NDËRPRITET PËR DISA MINUTA SEANCA PLENARE, PAS KËRKESËS SË GRUPIT TË PD-së
Ora 12: 07
Kuvendi ka ndërprerë për disa minuta punimet e seancës së sotme plenare, pak çaste para nisjes së procesit të votimit të çështjeve të parashikuara në rendin e ditës. 

Kryetari i grupit parlamentar të Partisë Demokratike, Astrit Patozi, i kërkoi kryetares së Kuvendit, Jozefina Topalli, që të ndërpresë seancën për një pushim pesë minutësh. Kjo e fundit, duke iu referuar axhendës parlamentare, kërkoi sërish të hedhë në votim tre ligjet e integrimit, që presin të votohen që nga muaji tetor i vitit të kaluar. 

Seanca e sotme është parashikuar me shumë interes, pas zhvillimeve të vrullshme politike të ditëve të fundit, ku Lëvizja Socialiste për Integrim u largua nga koalicioni qeverisës, për t’u bashkuar në një aleance paraelektorale me Partinë Socialiste të opozitës.

DISKUTOHET LIGJI I RI ‘PËR DEKORATAT DHE MEDALJET’

 
Lajme Shqip Thursday, 04 April 2013 10:17

TIRANË (PLOTESUAR)- Marrëveshja PS-LSI për krijimin e një koalicioni parazgjedhor, ka sjellë në Tiranë zëvendës/presidentin e parë të Parlamentit Europian, Gianni Pittella, i cili zhvilloi takime të ndara me kryetarin e PS-së, Edi Rama, dhe kreun e LSI-së, Ilir Meta, për t’i përgëzuar ata për arritjen e marrëveshjes për bashkimin e së majtës shqiptare.

Zyrtari i lartë i PE-së zgjodhi selinë e LSI-së për të komunikuar me mediat, ku u shpreh i bindur se bashkimi i së majtës është garanci për krijimin e një qeverie të re, që siç tha ai, do të përshpejtojë procesin e integrimit të Shqipërisë në familjen evropiane.

I pyetur nëse Partia Socialiste do të miratojë në Kuvend 3 ligjet ndikuese për marrjen e statusit, Pittella tha se partia e Ramës nuk do të bëhet pengesë për ato që duhen bërë por avancimin e axhendës evropiane.

“Vendosa të vij personalisht për të falenderuar mikun dhe shokun tim Ilir Meta, siç falenderova edhe mikun tim Edi Rama për mirëpritjen e thirrjeve të forcave të qendrës së majtë për mesazhin që të lemë pas të shkuarën dhe të ecim drejt së ardhmes. Ne kemi vlerësuar vendimin e marrë nga partitë e majta në Shqipëri, për bashkimin forcave për t’i garantuar Shqipërisë një të ardhme më të mirë. Problemet në Shqipëri janë të shumta, që lidhen me punësimin dhe borxhin publik dhe kjo do të thotë që zgjidhja më e mirë për këto probleme në vend është bashkimi i te gjitha forcave dhe brenda këtij bashkimi të madh të kombit duhet parë edhe bashkimi i të majtëve në vend. Kjo është një lloj garancie që do të garantojë një qeveri të re që do të jetë e përqënduar tek procesi i integrimit evropian. Në duhet të realizojmë eëndrrën e pjesës më të madhe të shqiptarëve për të bashkuar Shqipërinë me familjen e madhe evropiane. Jam i sigurt që aleanca e forcave të majta në Shqipëri do të ndihmojë për plotësimin e këtij objektivi. Bashkë socialistët shqiptarë dhe evropiane mund të punojnë më në fund pa ndasitë e së shkuarës”- u shpreh Pittella.

Nga ana e tij, kryetari i LSI-së Ilir Meta siguroi zotin Pittella dhe të gjithë socialistët europianë se partia e tij do ta shfrytëzojë këtë moment bashkëpunimi me PS-së për përshpejtimin e procesit të integrimit në BE. Më tej Meta theksoi se “LSI-ja e ka nisur sot ditën në opozitë, me angazhimin kryesor për integrimin dhe stabilitetin e vendit”.

“Kemi zhvilluar një takim shumë miqësor, i cili kishte të bënte me situatën më të re politike. Me këtë moment te ri te bashkëpunimit midis LSI dhe PS, e cila ka qenë një kërkesë e vazhdueshme e socialistëve evropianë, të cilët kanë qenë dhe mbeten shumë të interesuar, jo vetëm për bashkëpunimin midis forcave të majta në Shqipëri dhe për integrimin evropian të Shqipërisë. Siguroj zotin Pitella dhe socialistët evropiane se LSI do ta shfrytëzojë këtë moment të ri bashkëpunimi me qëllim edhe përshpejtimin e integrimit evropian të vendit, pasi ky është interesi kryesor i të gjithë të majtëve dhe shqiptarëve”- u shpreh Meta.

Rreth orës 09:00, Pittella mbërriti në selinë e PS-së, ku zhvilloi një bisedë me kryetarin Edi Rama, për rreth 1 orë. Në përfundim të takimit, zoti Pittella nuk pranoi të jepte asnjë deklaratë për mediat, ndërkohë që u nis drejt selisë së LSI-së ku zhvilloi takimin me kryetarin Ilir Meta dhe më pas dolën në një konference të përbashkët për shtyp.

Vizita e zëvendës/presidentit të parë të Parlamentit Europian në Tiranë, vjen 3 ditë pasi zyrtari i lartë europian i bëri apel kreut socialist, Edi Rama dhe kreut të LSI, Ilir Meta të bashkohen për të fituar zgjedhjet dhe për të siguruar një rotacion politik duke sjellë në pushtet të majtën shqiptare. Sipas Pitellës, ka ikur koha e qeverisjes së djathtë dhe vetëm koalicioni PS-LSI do të garantojë fitoren në 23 qershor.

Një ditë më parë Lëvizja Socialiste për Integrim iu përgjigj pozitivisht ftesës së PS-së për krijimin e një koalicioni parazgjedhor. LSI zyrtarizoi largimin nga qeveria dhe fillimin e një bashkëpunimi me PS-në për zgjedhjet e 23 qershorit. Vendimi u mor nga kryesia e LSI-së, ndërkohë që një orë pas mbledhjes, kreu i saj, Ilir Meta konfirmoi tërheqjen nga të gjitha nivelet politike të qeverisjes dhe nënshkrimin në parim të një marrëveshjeje parazgjedhore me PS-në. Para mediave, Meta vuri në dukje se LSI-ja ka zbatuar çdo pikë të marrëveshjes që nënshkroi para 4 vitesh me PD-në, teksa vlerësoi bashkëpunimin me kryeministrin Berisha. (LajmeShqip.com)
********************************************************

Koalicioni parazgjedhor PS-LSI, ka sjellë në Tiranë zëvendës/presidentin e parë të Parlamentit Europian, Gianni Pittella. Rreth orës 09:00 Pittella ka mbërritur në selinë e PS-së, ku u prit nga kryetari i opozitës Edi Rama, ndërkohë që takimi me kryetarin LSI-së, Ilir Meta është parashikuar për në orën 10:30.

Vizita e zëvendës/presidentit të parë të Parlamentit Europian në Tiranë, vjen 3 ditë pasi zyrtari i lartë europian i bëri apel kreut socialist, Edi Rama dhe kreut të LSI, Ilir Meta të bashkohen për të fituar zgjedhjet dhe për të siguruar një rotacion politik duke sjellë në pushtet të majtën shqiptare. Sipas Pitellës, ka ikur koha e qeverisjes së djathtë dhe vetëm koalicioni PS-LSI do të garantojë fitoren në 23 qershor. 

Një ditë më parë Lëvizja Socialiste për Integrim iu përgjigj pozitivisht ftesës së PS-së për krijimin e një koalicioni parazgjedhor. LSI zyrtarizoi largimin nga qeveria dhe fillimin e një bashkëpunimi me PS-në për zgjedhjet e 23 qershorit. Vendimi u mor nga kryesia e LSI-së, ndërkohë që një orë pas mbledhjes, kreu i saj, Ilir Meta konfirmoi tërheqjen nga të gjitha nivelet politike të qeverisjes dhe nënshkrimin në parim të një marrëveshjeje parazgjedhore me PS-në. Para mediave, Meta vuri në dukje se LSI-ja ka zbatuar çdo pikë të marrëveshjes që nënshkroi para 4 vitesh me PD-në, teksa vlerësoi bashkëpunimin me kryeministrin Berisha.(LajmeShqip.com)

 
Lajme Shqip Wednesday, 03 April 2013 17:46

Tirane (plotesuar) – Kryetari i LSI, Ilir Meta ka konfirmuar në një konferencë për shtyp atë që pritej, pranimin e ftesës për bashkëpunim të bërë nga Partia Socialiste.

Gjatë fjalës së tij, Meta ka deklaruar se LSI kalon zyrtarisht në opozitë dhe se prioriteti i saj në këtë bashkëpunim të ri do të jetë integrimi i Shqipërisë në BE.

“E cilësojmë të përfunduar bashkëpunimin me PD. Nga ky moment ne jo vetëm do të tërhiqemi nga të gjitha funksionet qeverisëse, por njëkohësisht, duke u deklaruar si forcë në opozitë, do punojmë për realizimin e një marrëveshjeje parimore me PS, jo vetëm për fitoren me 23 qershor, por edhe për stabilitetin e vendit dhe për një dinamikë të re për integrimin në BE”, ka deklaruar Meta.

Duke iu përgjigjur interesit të mediave, Meta ka nënvizuar se, fakti që LSI pranon ftesën e PS nuk do të thotë se ajo ndan me të të njëjtat mendime dhe vlerësime për të kaluarën dhe të sotmen.

Ai është shprehur se të kaluarën, në të cilën mes tij dhe kreut të PS Rama ka pasur shkëmbim akuzash të forta, u takon të tjerëve ta analizojnë.

“Ne nuk synojmë të rishkruajmë historinë e së kaluarës. LSI është një forcë e majtë, që i takon familjes socialiste evropiane. Me të kaluarën u takon të merren historianëve e analistëve”, ka thënë Meta.

Ai ka vlerësuar se, koalicioni i deritanishëm qeveritar i ka përmbushur objektivat kryesorë, por vendi ka nevojë për një ekuilibër të ri politik.

“Falenderoj kryeministrin Berisha. Ka qenë një bashkëpunim i qëndrueshëm në rrethana jo të lehta dhe që do t’i vlejë si eksperiencë politikës shqiptare”, ka vijuar kreu i LSI.

Duke iu përgjigjur pyetjeve të gazetarëve, Meta ka shtuar se, LSI asnjëherë nuk e ka konsideruar KQZ-në si një institucion politik dhe angazhimi i saj do jetë që KQZ të funksionojë në bazë të ligjit dhe Kodit.

Ndërsa përsa i takon qëndrimit të LSI në këshillat bashkiakë, ai ka thënë se, “ne nuk synojmë të politizojmë qeverisjen vendore, që është e ndryshme në qytete e rajone të ndryshme. Kjo do jetë kompetencë e të zgjedhurve vendorë”.

*****************************************************

TIRANE- Partia Levizja Socialiste per Integrim ka mbledhur para pak minutash Kryesinë e saj.

Në fjalën e tij hapëse, Sekretari i Përgjithshëm i LSI-së, Luan Rama u shpreh se kjo është një mbledhje e cila do të bëjë një vlerësim të të gjitha zhvillimeve në vend.

Po ashtu, shtoi ai, Kryesia do të bëjë një vlerësim të situatës reale të strukturave tona në të gjitha qarqet, për të përgatitur të gjitha strukturat për të përballuar me sukses sfidën elektorale më të afërt.

Në këto momente, është Kryetari i LSI-së, Ilir Meta, i cili po mban një fjalim, në mbledhjen e cila po zhvillohet pa praninë  e medias.

Në orën 18:00, vetë kreu i LSI-së, Meta do të dalë në një Konferencë për shtyp për të bërë publike vendimet e Kryesisë, ku ndër ta pritet të jetë edhe deklarimi i LSI-së për daljen nga qeveria, si dhe një përgjigje ndaj ftesës publike të PS-së për koalicion parazgjedhor.(LajmeShqip.com)

 
Lajme Shqip Tuesday, 02 April 2013 16:02

TIRANE – Kryetarët e dy partive Rama-Meta kanë rënë dakord mes tyre që të ndjekin një skenar të caktuar për të shkuar drejt një bashkëpunimi parazgjedhor mes tyre. Një ditë më parë burime pranë dy partive pohojnë se bisedat për këtë marrëveshje kanë kohë që kanë nisur, por është pritur momenti i duhur për të shkuar në realizimin e saj. Sot pati zhvillime të shumta në kampin socialist dhe reagime nga ai, demokrat.

Pak para se Rama të zyrtarizonte ftesën për LSI, Berisha komentoi në ‘Facebook’ se çdo forcë politike ka të drejtë të zgjedhë të bëjë koalicion me kë dëshiron. Në mbledhjen e kryesisë së PS u bë zyrtare ftesa për LSI, kurse në mbledhjen e grupit parlamentar të kësaj partie pati debate të shumta dhe të zjarrta mbi këtë marrëveshje. Rama vlerësoi se për hir të interesit kombëtar do bëjë koalicion me LSI, por jo të të njëjtit mendim kanë qenë deputetë të PS dhe aleatë të kësaj force politike.

DEPUTETET E PS KUNDËR ALEANCËS ME LSI
Ora 13:30
-Mbledhja e kryesisë ku u zyrtarizua dhe ftesa që PS i drejtoi LSI për një koalicion në zgjedhjet parlamentare të 23 Qershorit është karakterizuar me debate të shumta. Kundra këtij vendimi dolën Arta Dade, Erjon Braçe, Pandeli Majko. Deputeti Majko sot ne mbedhje heshti por anëtari i Kryesisë socialiste, u shpreh dje kundër një bashkëpunimi parazgjedhor me LSI-në. Në adresën e tij në rrjetin social Facebook, Majko, përmes një postimi tregon qëndrimin e tij të papajtueshëm për një afrim me LSI-në, duke e cilësuar ditën e djeshme, 1 prillin, si ditën e gënjeshtrës dhe politikanëve që mohojnë të vërtetat. “Miq! Gëzuar 1 prillin! Ditën e mashtrimit dhe gënjeshtrës. Ditën kur gënjeshtrën e mirëkuptojmë si humor. Kjo është dita kur themi gënjeshtra të “stisura” ose pa dashje pohojmë të vërtetat e mëdha të gënjeshtrës. Ai është fakti se në ditët e tjera të vitit gënjeshtra është edhe zgjedhja juaj”, shkruan Majko në adresën e tij. Për ish-kryeministrin socialist, në periudhat më të vështira të historisë së kombit shqiptar, politikanët e 1 prillit nuk po i japin alternativa popullit për të bërë dallimin se cili gënjen dhe cili thotë të vërtetën. “Gëzuar 1 prillin, ditën e politikanëve që nuk u bënë kurrë të tillë, por iu dorëzuan shenjës së kësaj date. Të gënjesh një popull është faj. Ta lësh atë pa të drejtën e zgjedhjes midis të vërtetës dhe gënjeshtrës është dramë e maskarenjve pa principe të politikës. Kjo është arsyeja që besoj se gënjeshtra kujtohet, por nuk festohet. Rilindja e së vërtetës është shpresa për nesër. Kam zgjedhur koalicionin e 21 janarit dhe jo atë të 1 prillit”, shkruan Majko.
Shënimin e tij në faqen e tij në Facebook, i cili përshkohet nga një zemërim i dukshëm, Majko e mbyll me një fjali që paralajmëron një debat të fortë në mbledhjen e Kryesisë socialiste që do të zhvillohet sot paradite. “Nesër është 2 prill. Ditë e bukur për ‘t’u vrarë’”, përfundon Majko shënimin e tij në Facebook.

TAHIRI: FTESA PER LSI, PREMISA ME MORALE PER REALIZIMIN E PROGRAMIT TONE
ORA 13:15 –
Në një deklaratë të shkurtër për mediat, deputeti socialist Saimir Tahiri tha se ftesa e PS-së për LSI-në është premisa më morale për të realizuar programin për një rilindje shqiptare. “Ne duam tu japim shqiptarëve programin që kemi realizuar bashkë me ta, duke fituar zgjedhjet”,- u shpreh Tahiri.

BLUSHI: KOALICION ME TË GJITHË ATA QË FLUTUROJNË
Ora 12:50
-Pas mbledhjes së grupit të PS, para dyerve të selisë rozë, deputeti Ben Blushi komentoi për mediat këtë ftesë të PS për koalicion me LSI.
“Në vitin 2009 kemi humbur për këtë arsye dhe është në arsye që ne duhet ta shmangim. Ne e dinim që çdo gjë që fluturon hahet, ne do bëjmë koalicion me të gjithë ata që fluturojnë i vetmi që nuk fluturon është Saliu”, tha Blushi.

RAMA: JEMI SOCIALISTE, S’DUHET TE NGUROJME KUR MUND TE UDHEHEQIM

ORA 12:40 – Në mbledhjen e grupit parlamentar të PS-së, kryesocialisti Edi Rama ftoi zyrtarisht Lëvizjen Socialiste për Integrim për tu bashkuar me PS-në në koalicionin parazgjedhor, në mënyrë që siç tha ai, shumicës së vendit t’i kthehet e drejta për të qeverisur.

Ndërsa shpjegoi arsyet e këtij vendimi, duke cilësuar si prioritare interesat e shqiptarëve dhe garantimin e zgjedhjeve, Rama tha se “në kushtet ku ndodhet vendi, vetëm një koalicion forcash me vullnetin e madh për bashkim mund ta izolojë Berishën dhe planin e tij të lexueshëm për vjedhjen e zgjedhjeve”.

Më tej, Rama theksoi se Partia Demokratike nuk mund të përfitojë më nga ndarja e socialistëve të Shqipërisë.
“Nga ky bashkim do të humbiste vetëm PD, e cila ka përfituar 8 vjet rresht falë manipulimeve zgjedhore dhe mosmarrëveshjeve në kampin tonë. Sot duhet bashkim, askush që do rotacionin nuk duhet t’i trembet këtij bashkimi. Nga ky bashkim do të fitonte çdo njeri i zakonshëm në këtë vend, që prej 8 vjetësh nuk voton dot i lirë, nuk mendon dot i lirë, për shkak të shantazhit politik të kryeministrit. Shumica dërrmuese e shqiptarëve kanë arsye të dyshojnë fort sot se vota përsëri është e kërcënuar nga vjedhja, ashtu siç kanë arsye të mendojnë se e ardhmja e këtij vendi është peng i historisë që përsëritet”,- theksoi Rama. 

Në pritje të përgjigjes zyrtare të LSI-së, Rama theksoi se PS pret që partia e Metës t’i përgjigjet ftesës duke u nisur nga interesi i vendit dhe së majtës shqiptare. Rama mirëkuptoi edhe qëndrimet e kritikëve për këtë vendim, por theksoi se bashkimi i së majtës është rruga e fitores, që i jep socialistëve pushtetin për të të sjellë ndryshimin.

“E di që e shkuara ka hijen e saj, por kur politika nuk e kapërcen dot të shkuarën, e shkuara mban peng politikën. Ne jemi këtu për të mos lejuar që e ardhmja t’i ngjajë së shkuarës. Nuk pres që sot të gjithë të më jepni të drejtë, pres vetëm që të më kuptoni se unë dua të fitoj për të gjithë ju dhe kjo është rruga e fitores që na jep pushtetin për të ndryshuar gjërat. Ne jemi PS dhe jemi bërë për të fituar dhe jo për të nguruar atëherë kur mund të udhëheqim”,- u shpreh Rama.

KOALICIONI PS-LSI, XHAXHAI I ALEKS NIKËS KËRKON TAKIM ME RAMËN
ORA 12:10
-Pas lajmit se Rama po bën koalicion me Metën, xhaxhai i Aleks Nikës, protestuesit të vrarë më 21 Janar kërkoi sot një takim me kryetarin e PS. “Pasnesër takim me Edi Ramën, nëse kjo është e vërtetë, atëhere kjo është një tradhti!”, tha xhaxhai i Akleks Nikës, një prej 4 protestusve që mbetën të vrarë më 21 Janar të vitit 2011.

NGJELA: DUHET NJË QEVERI TEKNIKE, META TA ÇOJË PUNËN DERI NE FUND
ORA 12:00-
Spartak Ngjela, kreu i PLD në një interviste për “News 24” theksoi se pas largimit të LSI nga koalicioni qeverisës, duhet një qeveri teknike. Sipas Ngjelës, lëvizje e Metës është politike dhe se ai si kryetar i PLD është pro koalicioneve.

“Qeverisë i humbet legjitimiteti, duhet një qeveri teknike, ndaj Meta ta çojë punën deri në fund. Unë jam pro koalicioneve, ndaj lëvizja e Metës ishte politike”, tha Ngjela gjatë një interviste për “News 24”.

PS MBLEDH KRYESINE, ZYRTARIZOHET FTESA PER KOALICION ME LSI
ORA 11:25
-Kryesia e PS zyrtarizon ftesën për koalicion me LSI. Burime bëjnë të ditur për “News 24”, se vendimi u miratua me jounanimitet në mbledhjen e kryesise, pasi mbledhja u karakterizua dhe me debate.  Deputeti Erjon Braçe është shprehur kundër kësaj aleance. Për të argumentuar këtë ai bëri dhe lidhjet me ngjarjet e 21 Janarit.

TOPALLI: PAVARESISHT LARGIMIT TE LSI, QEVERISIM DERI ME 23 QERSHOR
ORA 11:09 –
Në të njëjtën linjë me kryeministrin Berisha, kryeparlamentarja Jozefina Topalli e cilëson largimin e LSI-së nga qeveria si zbatim të së drejtës së çdo partie politike për të bërë zgjedhjet e veta. 

Nga Shkodra, Topalli u shpreh e bindur se shqiptarët do të zgjedhin sërish demokratët më 23 qershor.
“Jam optimiste se në 23 qershor shqiptarët do dinë të zgjedhin. Pavarësisht largimit të LSI, qeverisim deri më 23 qershor”,- u shpreh Topalli.

BERISHA: PARTITË BËJNË ZGJEDHJEN QË DËSHIROJNE
Ora 10:00-
Kryeministri Sali Berisha ka reaguar në rrjetin social Facebook mbi marrëveshjen parazgjedhore Rama-Meta.
Reagimi bëhet një ditë pasi mediat mësuan mbi nënshkrimin e një marrëveshjeje mes aleatit të tij në qeverisje, Meta me kundërshtarin politik, Rama. Sipas Berishës, çdo forcë politike ka të drejtën të bëjë zgjedhjet e saj, ndërsa ai në postin e kryeministrit ka për detyrë të gjejë zgjidhje kushtetuese për çdo problem institucional që mund të krijohet.

“Mirëmëngjes miq! Një debat i gjerë ka shpërthyer lidhur me njoftimet se LSI do të vendos të lerë qeverinë. Qëndrimi im ka qenë dhe mbetet i pandryshuar se çdo forcë politike bën zgjedhjen që dëshiron. Natyrisht për mua, qeveria dhe qeverisja janë përgjegjësi që bëhen edhe më të mëdha në periudhë elektorale.

Me këtë rast dua të siguroj zgjedhësit se asgjë nuk do të cënojë vendosmërinë e qeverisë për organizimin e një procesi zgjedhor të lire dhe te ndershem ne perputhje me Kodin Zgjedhor dhe Kushtetuten e vendit. Së dyti, dua të garantoj qytetaret se Kushtetuta e vendit ka te gjitha percaktimet e qarta per zgjidhje plotesisht kushtetuese te çdo problemi institucional dhe se ajo do te respektohet me rigorozitet në frymen dhe germen e saj. Une mbetem totalisht i përkushtuar te punoje me te gjithe energjite e mia, ne interesin me te mire te qytetareve dhe te vendit. Pershendetje, sb”, shkruan Berisha në ‘Facebook’.

RAMA MBLEDH TË VETËT, FESTON DERI NË MESNATË. ZYRTARISON SOT NE MBLEDHJEN E KRYESISE FTESEN PER KOALICION ME LSI
Partia Socialiste zyrtarizon sot, në mbledhjen e kryesisë, ftesën për koalicion drejtuar Lëvizjes Socialiste për Integrim. Por, para mbledhjes së kryesisë, kreu socialist, Edi Rama mblodhi në një darkë pune një pjesë të kryesisë së PS-së dhe grupit parlamentar. Gramoz Ruçi, Fatmir Xhafaj, Pandeli Majko, Arben Ahmetaj, Taulant Balla, Blendi Klosi, Ditmir Bushati, Bashkim Fino, Damian Gjiknuri, Saimir Tahiri, Eduard Shalsi, Erion Veliaj, bashkiakët Qazim Sejdini, Vangjush Dako, Niko Peleshi e Endri Fuga ishin dje, pjesë e darkës në një prej lokaleve të periferisë së Tiranës, “Xibraku”. Për rreth 4 orë, deputetët dhe Rama kanë shkëmbyer mendime, jo vetëm për ofertën ndaj Metës, por edhe për atë se si kjo do të pritet në elektoratin socialist. Tashmë është folur për një marrëveshje Rama- Meta, sipas së cilës LSI-ja largohet nga Qeveria me kushtin që PS-ja të votojë 3 ligjet e integrimit, që është edhe misioni i LSI-së në këtë qeveri. Pas darkës me deputetët, Rama u shpreh se “ishte një darkë festive”. Arsyeja e dhënë zyrtarisht për këtë darkë ishte lindja e djalit të dytë të deputetit Eduart Shalsi, megjithatë pakkush e ka besuar se kjo ka qenë arsyeja e vetme. Sot, rreth orës 10:30 mblidhet edhe kryesia e PS-së, e cila duket hapur se nuk do ta kalojë pa debate afrimin me LSI-në. Deri më tani, publikisht janë shprehur kundër marrëveshjes me Metën, anëtarë të kryesisë si Erjon Braçe, Pandeli Majko.

Por, sipas burimeve nga PS-ja, ka qenë edhe një lloj presioni nga të majtët evropianë që kërkojnë nga të majtët shqiptarë t’i japin fund kapitullit “Berisha” në qeverisje të vendit. 
Dhe thirrjet e tri ditëve të fundit të faktorit ndërkombëtar, presidentit të Partisë Socialiste Europiane, Sergei Stanishev, zv.presidentit të Parlamentit Europian, Xhani Pitella dhe dje të presidentit të Internacionales Socialiste, Jorgo Papandreu për t’u bashkuar Rama dhe Meta në një koalicion të përbashkët parazgjedhor për të qeverisur pas zgjedhjeve të bashkuar, kanë qenë të koordinuara në funksion të qëllimit të shkëputjes nga qeverisja aktuale.

Zbardhen detaje nga marrëveshja Rama-Meta
Kryetarët e dy partive kanë rënë dakord mes tyre që të ndjekin një skenar të caktuar për të shkuar drejt një bashkëpunimi parazgjedhor mes tyre. Burime pranë dy partive pohojnë se bisedat për këtë marrëveshje kanë kohë që kanë nisur, por është pritur momenti i duhur për të shkuar në realizimin e saj. Kreu i PS-së, Edi Rama, ka pranuar që deputetët e Grupit parlamentar socialist, pas disa muajsh refuzimi, të votojnë tri ligjet që kërkon Brukseli nga Shqipëria për marrjen e statusit të vendit kandidat, edhe pse afatet për ta arritur këtë tashmë kanë përfunduar. Tri ligjet mund të votohen edhe ditën e enjte gjatë seancës plenare, ndërsa sipas marrëveshjes Rama-Meta, LSI do të largohet nga qeveria duke tërhequr dhe ministrat e saj. E perditshmja ‘Panorama’ shkruan se Meta i ka kërkuar Edi Ramës që t’i garantojë tre vende në listat e kandidatëve të PS për përfaqësues të LSI-së, tre ministri të rëndësishme, por dhe drejtuesin e Parlamentit. Mësohet se nga ana e Ramës këto kushte janë pranuar, por kreu socialist ka kërkuar që ministritë të drejtohen nga emra të tjerë, për të ndryshuar imazhin e qeverisë së ardhshme.

Një ditë para mbledhjes së Kryesisë socialiste, e cila do të vendosë të ftojë LSI-në në një bashkëpunim parazgjedhor me PS, Rama ka zhvilluar një darkë me një grup të madh të anëtarëve të Kryesisë. 

PRAPASKENAT
Pas tri thirrjeve të figurave të së majtës evropiane për bashkim Rama-Meta para zgjedhjeve të 23 qershorit, të majtët e Tiranës nisën dje, lëvizjet politike. Paraditen e 1 prillit, kreu i LSI-së, Ilir Meta takoi në Kryeministri kreun e mazhorancës së djathtë, Sali Berisha. Edhe pse asgjë nuk u bë publike pas takimit, burimet folën për dy çështje të diskutuara mes dy aleatëve. Mësohet se Ilir Meta i ka dhënë siguri kryeministrit se nga LSI-ja nuk ka asnjë pengesë për kalimin e tri dekreteve të presidentit.

Nga ana tjetër, mes tyre është diskutuar edhe për çështjen e koalicionit. Asgjë nuk është thënë publikisht, por deri më tani, lajmi që po diskutohet në mjediset politike është largimi i Ilir Metës nga qeveria dhe bashkimi në një koalicion me PS-në. Pas takimit rreth gjysmë ore Meta-Berisha, asnjë prej tyre nuk ka konfirmuar gjë. Më pas, diku rreth mesditës, Meta mblodhi në hotel “Rogner” drejtues të kryesisë së LSI-së. Ky takim, sipas Luan Ramës ishte për çështje organizative të LSI-së, por një gjë e tillë nuk ka krijuar shumë bindje në media. LSI-ja pritet që brenda muajit prill të mbledhë Konventën e saj Kombëtare. Ky forum pritet të japë një qëndrim zyrtar edhe për këtë çështje. Nuk ka një datë për mbledhjen e forumit, edhe pse mendohet se mund të jetë mesi i muajit. Burimet thonë se nga kjo Konventë do të shpallet shkëputja nga qeveria, duke tërhequr ministrat. Pas kësaj, burimet edhe nga PS-ja flasin për krijimin e një qeverie teknike, deri në afrimin e datës së zgjedhjeve, për të mos lënë vendin në vakum qeverisës.

Madje ky skenar mendohet si më i pëlqyeshmi edhe për ata që janë dakord me këtë afrim të PS-së dhe LSI-së. Kjo, edhe për një arsye tjetër, që ka lidhje me të gjithë ata anëtarë apo simpatizantë të PS-së, të cilët mund të mos miratojnë një bashkim të tillë. Pas takimit me drejtues të LSI-së, Meta tha për mediat se: “Sot është 1 prilli dhe kuptohet që nuk ka vlerë të bëjmë ndonjë deklaratë, sepse nuk e di se sa të besueshme do të ishin deklaratat. Po ne takime kemi vazhdimisht dhe takimet janë mjaft konstruktive”. “Këto janë qëndrime, të cilat në fund fare do t’i vlerësojnë forumet e LSI-së. Meqenëse kam dëgjuar qëndrime të ndryshme për çështjen e dekreteve, natyrisht siç kemi vepruar gjithmonë, për çdo dekret do të shprehemi sipas bindjes së çdo deputeti”, – tha Meta. Po në “Rogner”, Meta ka shkëmbyer biseda edhe me kreun e PDS-së, Paskal Milo e kreun e PBDNJ-së, Vangjel Dule. (LajmeShqip.com)

 
Lajme Shqip Monday, 01 April 2013 19:31

TIRANË – Nga dje dhe sot vijuan apelet e përfaqësuesve të së majtës evropiane që kërkuan bashkimin në aleancë të PS dhe LSI për zgjedhjet parlamentare. Sipas së majtës evropiane, nëse Meta bëhet bashke me Ramën, vetëm në këtë mënyrë largohet Berisha nga qeverisja dhe vendi integrohet në BE.

Ndërsa apelet vijonin, paradite u shënua në kryeministri një takim i Berishës me Metën. Kreu i LSI komentoi shumë shkurt mbi aludimet për një marrëveshje të mundshme mes PS e LSI.

Ndërkohë burime nga selitë e partive konfirmojnë se ka një marrëveshje mes Ramës dhe Metës.

RAMA-META, JA MARRËVESHJA, PS MIRATON 3 LIGJET, LSI IKËN NGA QEVERIA
Burime brenda PS e LSI konfirmuan për “News 24” se realisht është bërë një marrëveshje mes Ramës dhe Metës.
“PS miraton 3 ligjet, LSI ikën nga qeveria me Berishën”, është thelbi i marrëveshjes mes PS dhe LSI.
Ndërkohë nesër kryesia e Partisë Socialiste fton zyrtarisht LSI për koalicion.

BERISHA TAKON METEN
Kryeministri Sali Berisha zhvilloi sot një takim në Kryeministri me kreun e LSI-së Ilir Meta. 

Takimi mes kryeministrit Berisha dhe aleatit të tij Meta vjen vetëm një ditë pasi Zëvendëspresidenti i Parlamentit Europian Gianni Pittella i bëri thirrje kreut të LSI-së Ilir Meta që të bashkohet me PS-në për të arritur një fitore në 23 qershor.

Po sot, apeleve iu shtua thirrja e Presidentit të Internacionalistet Socialiste Jorgos Papandreu. Papandreu iu drejtua dy kryetarëve të partive të majta, PS dhe LSI që të bashkëpunojnë në këto zgjedhje parlamentare me qëllimin e vetëm që të largojnë nga pushteti kryeministrin Berisha.

Pas apeleve nga jashte vendit, sot Berisha priti në Kryeministri Meten. Takimi është zhvilluar për 40 minuta ndërsa në fokus të bisedimeve mendohet të ketë qenë koalicioni parazgjedhor mes LSI-së dhe Partisë Demokratike. 
META
I ndodhur rreth mesditës në ambientet e ‘Rogner”, Meta u pyet nga mediat se për çfarë diskutoi me kryeministrin Sali Berisha sot paradite. Por kreu i LSI vlerësoi se meqë sot është 1 Prilli, nuk ka vlerë asnjë deklaratë.
Meta preferoi të përgjigjej shumë shkurt për mediat. “Sot është 1 Prill dhe në 1 Prill nuk ka vlerë të bëhet ndonjë deklaratë se nuk e di sa e besueshme do jetë deklarata”.

I pyetur mbi apelet që po bën e majta evropiane, që LSI dhe PS të jenë bashkë në zgjedhjet parlamentare, Meta tha se “këto janë qëndrime të cilat në fund fare do i vlerësojnë forumet e LSI”.

Ndërkohë, deputeti i LSI, Lefter Koka, në një prononcim për mediat theksoi se nuk ka asnjë ftesë zyrtare të PS. Në një deklaratë për mediat, jashte sallës së Kuvendit, Koka ka thënë se zgjidhja që do të bëjë LSI do të jetë në shërbim të vendit dhe të saj.

“Kreu i LSI, zoti Meta e ka bërë të qartë që do të jenë strukturat e partisë që do të marrin vendimin e duhur në shërbim të Shqiperisë dhe të LSI-së”- tha ai.

Sipas tij, LSI është një forcë e majtë dhe që PS mund të bëjë thirrje për koalicione, kjo ishte gjëja më normale. “Mirëpresim çdo bashkëbisedim me forcat politike, por në shërbim të vendit”,- tha ai.

Sipas Kokës, struktura të LSI do të vendosin këtë muaj mbi vendimet që do të merren mbi koalicionet për zgjedhjet parlamentare.
Koka theksoi se LSI do të vijojë të jetë fuqishëm në Parlamentin që pritet të dalë pas zgjedhjeve të 23 qershorit. 

Presidenti i Internacionales Socialiste apel Edi Rames dhe Ilir Metes. Papandreu: Bashkepunoni per zgjedhje, të bashkuar mundni Berishën
 
Apeli i Presidentit të Internacionalistet Socialiste George A. Papandreou ishte sot thirrja e radhës nga e majta evropiane drejtuar Edi Ramës dhe Ilir Metës.
Papandreou iu drejtua dy kryetarëve të partive të majta, PS dhe LSI që të bashkëpunojnë në këto zgjedhje parlamentare me qëllimin e vetëm, të largojnë nga pushteti, kryeministrin Berisha.
“Një qeveri e majtë do të sjellë integrimin e vendit”, thotë mesazhi i presidentit të Internacionales Socialiste.

APELI I PLOTE I PRESIDENTIT TË INTERNACIONALES SOCIALISTE
“Në cilësinë e Presidentit të Internacionales Socialiste dëshiroj t’ju bëj një thirrje Zëvendës Presidentit tonë dhe njëherazi Kryetar i Partisë Socialiste të Shqipërisë, Edi Rama, dhe Kryetarit të Lëvizjes Socialiste për Integrim, Ilir Meta.

Unë u bëj thirrje të dyve për ta konsideruar në mënyrë serioze bashkëpunimin mes forcave të tyre, duke patur parasysh zgjedhjet e qershorit 2013 që po afrojnë.

Pavarësisht dallimeve, sot sfida e vërtetë është krijimi i një fronti të bashkuar progresist. Ky front i bashkuar progresist do t’i mundësojë vendit ndërmarrjen e reformave të nevojshme për të garantuar një shoqëri më të ndershme me institucione demokratike, transparencë dhe llogaridhënie. Këto reforma janë të nevojshme qoftë për të siguruar statusin e vendit kandidat për Shqipërinë dhe rrugën e saj drejt Bashkimit Europian, qoftë për të garantuar liri dhe drejtësi për të gjithë qytetarët e Shqipërisë.

Për të konsoliduar demokracinë në Shqipëri nevojiten zgjedhje të lira e të ndershme dhe një shumicë e re qeverisëse që të jetë e vendosur dhe e gatshme për të garantuar sundimin e ligjit. Kjo është e rëndësishme jo vetëm për Shqipërinë, por edhe për Ballkanin, për Europën dhe më gjerë.

Në këto kohë sfidash dhe krize ekonomike, progresistët, socialistët dhe socialdemokratët kanë përgjegjësinë të garantojnë që interesat e njerëzve të dëgjohen dhe shihen si prioritet, duke garantuar një funksionim transparent të qeverisjes dhe institucioneve demokratike.

Bashkimi mund të sjellë fitoren dhe fitorja mund të sjellë shpresë dhe ndryshim. Dëshira ime është që të dy ju, të dashur Edi dhe Ilir, ta shfrytëzoni këtë mundësi historike.

Mund t’ju garantoj se do të keni mbështetjen e plotë të të gjithë familjes sonë progresiste në përpjekjen e vështirë dhe të guximshme drejt përmbushjes së synimeve dhe vlerave tona të përbashkëta”.(LajmeShqip.com)