Lajme Shqip Monday, 15 April 2013 11:26

Tiranë – Ish të përndjekurit politikë u janë rikthyer ditën e hënë  protestave para Parlamentit vetëm disa minuta para nisjes së seancës plenare.

Ata janë lidhur me zinxhirë në formë proteste ndaj mungesës së vëmendje së qeverisë ndaj kësaj shtrese dhe mosdhënies së kësteve të dëmshpërblimit që u takon, por janë përplasur me policinë, që e ka shpërndarë protestën.

Përfaqësuesi i tyre dhe një nga personat më aktivë në mbrojtje të kauzës së kësaj shtrese, Skënder Tufa u shpreh se nëse nuk u vihet veshi për të drejta e tyre, atëherë do të ndërmarrin veprime ekstreme duke u djegur si kamikazë.

Ndërkohë policia ka shoqëruar në komisariat disa nga protestuesit që ndodheshin para parlamentit.(T.CH/SH.CLajmeShqip.com)

 
Lajme Shqip Monday, 11 February 2013 16:20

Tiranë – Ish- të përndjekurit politikë kanë vazhduar protestat e tyre të zakonshme përpara kryesisë së Kuvendit.

Meqë për ta është bërë jashtëzakonisht e vështirë që të afrohen pranë ndonjë politikani për t’i gjuajtur me vezë, të përndjekurit kanë vendosur që të gjuajnë me vezë fotografitë e presidentit Bujar Nishani, kryetares së Kuvendit, Jozefina Topalli, Kryeministrit Sali Berisha dhe Ministrit të Financave, Ridvan Bode.

Skënder Tufa, ish- koordinator i grevës së urisë, tha se në këtë vend sundon një neodiktaturë. Ai ka bërë thirrje për protesta mbarëpopullore kundër qeverisë.

“Për këto të drejta janë sakrifikuar shokët tanë,” tha Tufa.

Edhe pse kanë kaluar gati 5 muaj nga greva e urisë së ish-të përndjekurve politik, grevë e cila u mbyll me humbjen e jetës së ish- grevistit Lirak Bejko, serish nuk ka një reagim nga qeveria shqiptare për të zgjidhur kërkesat e kësaj kategorie.(T.O/LajmeShqip.com)

 
Lajme Shqip Saturday, 10 November 2012 18:21

TIRANË -Drama me ish-të burgosurit politik nuk ka fund. Pas vdekjes së Lirak Bejkos, plagëve të Gjergj Ndrecës nga vetëdjegia me benzinë, një tjetër apel i ngjashëm bëhet nga Asllan Patrioti. Ish-koordinatori i grevës së urisë së ish-të përndjekurve politike bëri të ditur sot në një intervistë për TvNews24 se do t’i japë fund jetës me vetëdjegie për shkak të vendimit të padrejtë të Gjykatës së Apelit. Patrioti theksoi se nuk meriton të qëndrojë në arrest shtëpie për një krim që nuk e ka kryer dhe se ky qëndrim pasiv në shtëpi po u pret bukën fëmijëve të tij.

“Kam deklaruar se do të ndjek shembullin e Lirak Bejkos. Arrestimi më është bërë me anë të politikës dhe jo se kam bërë ndonjë krim dhe nëse unë kam bërë një krim, një arrestim i tillë jashtë cdo lloj norme njerëzore nuk duhej bërë”, tha Patrioti. 

“Nëse një kryefamiljar nuk do dalë dhe të nxjerr bukën e gojës, por të rrijë arrest shtëpie do të thotë se është një vdekje e dytë sidomos për këtë shtresën e të përndjekurve politik. Vite të tëra që ky shtet nuk na ka ofruar akoma punë nuk na ka ofrua akoma një banesë. Unë do të vetëdigjem dhe shumë shpejt. I thashë nëse ti nuk heq arrestin e shtëpisë dhe nuk më jep këstin e lekëve të prapambetura unë do të vetëdigjem”, shtoi ish- i përndjekuri politik. 

Sa këste ke marrë deri tani?
“1 këst, para katër viteve. Më takonjë edhe 2 këste të tjera”, tha Patrioti.(B.W)

 
Lajme Shqip Wednesday, 07 November 2012 13:26

TIRANE– Ceremonia e homazheve për Lirak Bejkon u zhvillua pranë institutit të ish-të përndjekurve, për rreth dy orë, ndërsa miq, të afërm dhe politikanë, e figura të medias ishin të pranishëm. Ish- i pëndjekuri Gjergj Ndreca la spitalin dhe erdhi në ceremoni: ‘Nderoj martirin e demokracisë”, ishin fjalët e tij, para se të përkulej mbi trupin e bashkëvuajtësit të grevës.

Homazhe pranë trupit të pajetë të Lirak Bejkos kanë zhvilluar edhe kreu i Aleancës Kuq e Zi, Kreshnik Spahiu, Kreu i PLL-së e njëherësh zv/ministër i Mbrojtjes Ekrem Spahia, kreu i PLD-së Spartak Ngjela por edhe përfaqësuesit e FRD-së Gazmend Oketa e Aleksandër Biberaj kanë kryer homazhe dhe kanë ngushëlluar familjarët. Homazhe edhe nga personalitete të medias.

Trupi i pajetë i ish-të përndjekurit Lirak Bejko, mbërriti dje në Atdhe me tragetin e linjës Bari-Durrës, ndërsa është pritur nga familjarët e tij, e më pas është transportuar drejt banesës në Tiranë, ku familjarët, të afërmit e miqtë i dhanë lamtumirën e fundit. Lirak Bejko humbi jetën pak ditë më parë në një spital në Bari, nga plagët e marra në grevë, ku i vuri flakën vetes me benzinë në shenjë proteste për mosmarrjen e dëmshpërblimit. 

PËRFUNDON CEREMONIA E HOMAZHEVE
Ora 13:05- Përfundon ceremonia e homazheve. Me himnin e flamurit në sfomnd trupi i Lirak Bejkos po lë ambientet e institutit të ish-të përndjekurve dhe po i drejtohet varrezave të Sharrës, ndërsa e mbajnë në krahë bashkëvuajtësit e grevës së urisë.

OKETA: SOT DITË REFLEKTIMI PËR TË GJITHË
Ora 12:24- Deputeti i FRD-së, Gazmend Oketa menjëherë pas homazheve deklaroi se dita e sotme duhet të jetë një ditë refektimi për të gjithë, për të kthyer vëmendjen tek shtresat në nevojë.“Do të dëshironim t’i shprehnim ngushëllimet më të thella familjes dhe gjithë bashkëvuajtësve, atyre që ishin një simbol për gjithë qytetarët shqiptarë pas viteve 90’. Sot një ditë ku të reflektojnë të gjithë shqiptarët, humbjes së jetës së Lirak Bejkos nuk duhet t’i japim ngjyrime politike, sot të reflektojmë, të kthejmë vëmendjen jo vetëm tek ish- të përndjekurt por edhe tek të gjitha shtresat në nevojë”, komentoi ai.

AK, SPAHIU: QYTETARËT TË KENË NDËRGJEGJE PËR TË REAGUAR
Ora 12:10- Homazhe pranë trupit të pajetë të Lirak Bejkos kanë zhvilluar edhe kreu i Aleancës Kuq e Zi, Kreshnik Spahiu. Ai ka deklaruar për mediat se sot “Tek cdo qytetar duhet të ketë mbetur ndërgjegjia për të reaguar, shqiptarët duhet të thyejnë apatinë, tashmë si 22 vite më parë kur njerëzit vriteshim në burgje, njerëzit vriten në rrugë”, tha ai.

KREU I PS, EDI RAMA HOMAZH LIRAK BEJKOS
Ora 11:18- Ashtu sic pritej, lideri i PS-së Edi Rama ka qënë sot i pranishëm gjatë ceremonisë së homazheve për ish të përndjekurin Lirak Bejko. Kreu i PS-së është përkulur para trupit të pajetë, ndërsa ka ngushëlluar më pas edhe familjarët e ish- të përndjekurit. Kreu i PS-së e ka postuar në Twitter mesazhin e tij të ngushëllimit, për Liraj Bejkon e familjen e tij. Rama shkruan: “Lamtumira për Lirakun mes njerëzish të vrarë 22 vjet në cdo shpresë prej atyre që u morën votën dhe u ofruan vec një ferr të ri zhgënjimesh. E pashlyeshme pamja ëngjëllore e dy vajzave jetime që babanë e dalë gjallë nga ferri komunist ua treti në flakë ferri i ri i zhgënjimeve. E pamundur të harrohen nëna dhe gruaja e të ndjerit të ndarë forcërisht prej tyre nga fuqia shkatërruese e arrogancës së këtij pushteti! U prehtë në paqen që se gjeti dot asnjë sekondë në rrugën e vet nga një ferr në tjetrin dhe shërbeftë akti i tij për një reflektim dinjitoz”, tha ai.

GJERGJ NDRECA: LASHË SPITALIN, PËR MARTIRIN E DEMOKRACISË
Ora 11:02- Gjergj Ndreca, ish-i përndjekuri politik që ndërmori të njëjtin akt vetëflijimi si Lirak Bejko, ka lënë sot ambientet e spitalit për t’i dhënë lamtumirën e fundit mikut të tij, Lirak Bejko. Në një prononcim për median, ai deklaroi: “Lashë ambjentet e spitalit për të nderuar vëllain dhe bashkëvuajtësin tim, për të nderuar martirin e demokracisë”, tha Ndreca.

TRUPI I LIRAK BEJKOS MBËRRIN TEK INSTITUTI I ISH-TË PËRNDJEKURVE
Ora 10:57- Trupi i pajetë i Lirak Bejkos mbërrin tek Instituti i ish-të Përndjekurve, ku pritet që për rreth dy orë atij ti jepet lamtumira e fundit, nga miq të afërm por edhe personalitete të politikës.Ish-të përndjekurit, bashkëvuajtës me të në grevën e urisë e kanë mbajtur në krahë arkivolin që transportonte trupin e Bejkos, ndërsa mësohet se edhe kur të përcillet drejt varrezave të Sharrës, ata do ta mbajnë në krahë trupin e mikut të tij.

TRUPI I BEJKOS DREJT INSTITUTIT TË ISH-TË PËRNDJEKURVE
Ora 10:40- Trupi i pajetë i Lirak Bejkos niset drejt Institutit të ish-të Përndjekurve, ku pritet të zhvillohen edhe homazhet për nder të tij.Arkivoli i Lirak Bejkos ka dalë nga banesa e tij i mbështjellë me një flamur kuqezi.Pas homazheve mësohet se Bejko do të prehet në varrezat e Sharrës.

DEKLARATAT DJE
Ora 07:37- Pas mbërritjes së trupit të Lirakut në atdhe, në shtëpinë e tij ka qenë i pranishëm edhe kreu i FRD, njëherësh edhe ish-presidenti i vendit, Bamir Topi. Dje ai u bëri thirrje forcave politike në vend që të mos spekulojnë me ish-të përndjekurit.

Për vdekjen e Lirak Bejkos ka shprehur keqardhjen e tij edhe Komisioni Evropian, ku përmes zëdhënësit Peter Stano kanë shprehur këtë mesazh për familjarët dhe Shqipërinë. “Ripërsërisim se është tepër e rëndësishme që të shkurajojmë aktet e tilla si vetëdjegia përmes një dialogu në mes të autoriteteve dhe shoqërisë civile, në mënyrë që të adresohen dhe zgjidhen çështjet e ngritura nga ish-të përndjekurit politikë dhe kjo duhet të ndodhë në kuadër të legjislacioneve të vendit, duke i respektuarato”, – thekson Peter Stano.

Edhe kryetarja e grupit të punës për ish-të përndjekurit në Partinë Socialiste, Keti Bazhdari u bëri thirrje shqiptarëve të marrin pjesë në homazhe, për të nderuar mundin e Lirak Bejkos.”Ai është dëshmor i vërtetë i demokracisë, djalë vital dhe i fortë, që la gjithçka për t’iu bashkuar kauzës. Askush nuk ndalon askënd për të nderuar Lirak Bejkon”, u shpreh Bazhdari.(LajmeShqip.com)

 
Lajme Shqip Monday, 05 November 2012 13:41

TIRANE – Bashkëshortja e Lirak Bejkos, ish-të përndjekurit politik që ndërroi jetë tre ditë më parë në Itali, bëri të ditur në një intervistë për ‘NEWS 24’ se trupi i të ndjerit pritet të vijë në Shqipëri të martën, ndërsa ceremonia mortore do të zhvillohet ditën e mërkurë.

Ndërsa shprehu dhimbjen për humbjen tragjike të bashkëshortit të saj, Edlira Bejko deklaroi se homazhet për nder të tij do të zhvillohen në Institutin e Ish-të Përndjekurve Politik, vetëm nëse arrihet konsensusi me drejtuesit e Institutit.

Lirak Bejko kishte afro 20 ditë që luftonte me vdekjen në një nga spitalet e Barit në Itali, derisa mëngjesin e ditës së premte, rreth orës 11:30 minuta, trupi i tij nuk i ka përballuar më dhimbjet dhe zemra i ka ndaluar së rrahuri.

Lirak Bejko ishte babai i dy vajzave, emri i të cilit u bë i njohur vetëm pas vetëflijimit, duke i vënë flakën vetes, gjatë grevës së urisë së ish-të përndjekurve, për të kërkuar dëmshpërblimin e viteve të burgut.

Prej disa javësh, Lirak Bejko qëndronte në terapi intensive në spitalin e Barit në Itali, ku u ishte nënshtruar katër operacioneve. Madje, sipas familjarëve të tij, pas operacionit të fundit Liraku nuk fliste më dhe pjesa e poshtme e trupit nuk përgjigjej më, gjendje që sa vinte dhe përkeqësohej derisa i mori atij edhe jetën. Menjëherë pas vdekjes së tij, janë lajmëruar të afërmit e Lirakut, të cilët janë ende të tronditur nga dhimbja e thellë për humbjen e të dashurit të tyre.

Pamjet kur Liraku i vuri flakën vetes do të mbeten gjatë në mendjet e gjithë shqiptarëve, por jo vetëm. Vetëm pas vetëflijimit të tij, emri i Lirak Bejkos arriti të dëgjohej në të gjitha vendet e botës. (LajmeShqip.com)

 
Lajme Shqip Saturday, 03 November 2012 12:49

Tiranë – Dhjetë ditë pas mbylljes së grevës së urisë shënohet viktima e parë e protestës së ish-të përndjekurve.

Lirak Bejko, një nga dy ish-të përndjekurit politikë të cilët ndërmoren aktin e vetëflijimit në shenjë proteste ndaj qeverisë shqiptare për mosplotësimin e kërkesave të tyre për dhënien e dëmshpërblimit humbi jetën rreth mesditës së të premtes në një nga spitalet e Barit në Itali. Sipas mjekëve, Bejko ndërroi jetë pak pas orës 11:30 të paradites, duke mos i përballuar dot plagët e djegies të shkallës më të rëndë në më shumë se 50 përqind të trupit.  

Bejko iu bashkua grevës së urisë pikërisht ditën që një tjetër grevist, Gjergj Ndreca kishte tentuar vetëflijimin. Gjatë një takimi me ambasadorin amerikan Arvizu në ambientet e grevës, ai u bë i njohur si aktivist në grevë pasi nxorri protezat e dhëmbëve që i ishin thyer në burgjet e komunizmit.

Dy ditë më pas ai ndoqi aktin e shokut të tij në përpjekje të dëshpëruar për të kërkuar një zgjidhje të dhënies së dëmshpërblimeve. Bejko fillimisht u shtrua ne spitalin universitar “Nënë Tereza” në Tiranë, por mjekët deklaruan se gjendja shëndetësore e tij ishte tejet e vështire, pasi si pasojë e flakëve kishte djegie dhe plagë në një pjesë të organeve jetësore.

Me inisiativen e kreut të Partisë Socialiste dhe mbështetjen e ambasades italiane, ai u dërgua në një klinikë më të specializuar për djegiet në Bari të Italise, por pavarësisht trajtimit intensiv nuk mundi t’i mbijetonte plagëve. Shoket e tij të grevës së urisë janë duke u marrë me përgatijet e ceremonisë së varrimit, ndërkohe që trupi pritet të kthehet të dielen në mbrëmje.

Grevistet e urisë kërkojne që ceremonitë e lamtumires të kryhen në institutin e integrimit të të përndjekureve politikë. ”Ne do të kërkojmë që tek instituti të bëhen homazhet e fundit të Lirakut. Nesër në nëntë do të jenë grevistët dhe një pjesë të ish-të përndjekurve, për të kërkuar në mënyrë paqësore që të vihen në dispozicion ambientet e institutit. Drejtojmë gishtin e akuzës ndaj kryeministrit, përgjegjësi i drejtpërdrejtë i këtij akti makabër”, deklaroi Skënder Tufa, koordinatori i ish-të përndjekurve gjatë grevës së urisë. Lirak Bejko ishte i martuar dhe me dy fëmijë. Ai ishte i dënuar politik, pas një dënimi të marrë në vitet ’80, për tentativë arratisjeje.

Rama: “I shokuar nga vdekja jo natyrale. Bejko s’pa dritë të bardhë, as nën regjimin e Enverit dhe as të Saliut”

Kryetari i Partisë Socialiste, Edi Rama, deklaroi se është i shokuar nga vdekja jonatyrale e Lirak Bejkos, i burgosuri politik që nuk arriti t’i mbijetojë vuajtjes së shkaktuar nga indiferenca barbare e qeverisë.“Është tragjedia e një familjeje të varfër, që nuk pa një ditë të bardhë as nën regjimin e egër të Enver Hoxhës, as në kohët e zymta të Sali Berishës”, thotë Rama.

Sipas kreut të PS-së, është edhe më shumë se kaq, një tragjedi tronditëse për Shqipërinë e votave të vjedhura, premtimeve të pambajtura, zhgënjimeve të pambarimta.Edi Rama deklaron se kjo është tragjedia e një kauze të drejtë, përballë një qeverie të padenjë për çdo të burgosur politik të regjimit komunist, e cila u soll me Lirakun dhe grevistët e tjerë, po aq çnjerëzisht sa ç’sillej edhe ai regjim, kur të burgosurit kërkonin të drejta përmes grevave të urisë. Madje edhe më keq, deklaron Rama, sepse i burgosuri, që i mbijetoi dhunës së atij regjimi, nuk i mbijetoi dot arrogancës së kësaj qeverie.

Lideri i opozitës thotë se Lirak Bejko është shqiptari i 31-të, që ndahet nga jeta për shkak të kësaj arrogance vrastare, pas 26 të vrarëve në Gërdec dhe 4 të vrarëve në protestën e 21 janarit.Në reagimin e tij, lideri i opozitës thotë se, të gjithë ata kanë qenë njerëz të zakonshëm të këtij vendi, që sot nuk jetojnë më, pikërisht sepse të zakonshmit për këtë qeveri janë mish për top, edhe kur i vret, edhe kur i dhunon, edhe kur i vjedh, edhe kur i gënjen.Në fund të deklaratës së tij, Rama bën thirrje për një Shqipëri të re.

AK: Bejko, viktimë e regjimit të Berishës

Edhe Aleanca Kuqezi ka reaguar për ndarjen tragjikisht nga jeta të ish të përndjekurit politika, Lirak Bejko. Në një komunikatë për mediat, AK thotë se Bejko është një martir i demokracisë që do të frymëzojë gjithmonë revoltën për liri. Bejko, thuhet më tej, është viktima e radhës e mbjellë nga regjimi i Berishës i cili për këtë veprime duhet të ndëshkohet. AK shton se ish i përndjekuri Bejko do të nderohet si Hero i Demokracisë.

FRD: Viktima e një pushteti as demokratik dhe as europian

Ngushëllime familjarëve dhe të afërmve të Lirak Bejkos u ka dërguar edhe Fryma e Re Demokratike. Në deklaratëne FRD-së thuhet se Bejko sakrifikoi rininë e tij në demokraci. “Një pushtet i ndërtuar mbi viktima, nuk është as demokratik dhe as europian”, thuhet më tej në deklaratë.

Vdekja e Bejkos, në sytë e mediave ndërkombëtare

Lajmi i vdekjes në spitalin e Barit të ish të përndjekurit Lirak Bejko ka bërë bujë edhe në mediat ndërkombëtare. Prestigjozja amerikane, Huffington Post në edicionin online të saj shkruan për lajmin tragjik duke shtuar se Bejko ishte pjesë e grevës së urisë së ish të përndjekurve që kërkuan dëmshpërblim për vitet e burgimit.

Greva e urisë përfundoi pas një muaji për shkak të përkeqësimit të gjendjes shëndetësore të pjesëmarrësve të saj, thotë Huffington Post, duke përmendur përmendur faktin se rreth 100 mijë shqiptarë u ekzekutuan, burgosën apo internuan nëpër gjatë periudhës së komunizimit. (T.Ch)

 
Lajme Shqip Friday, 19 October 2012 22:22

Tiranë-Zëvendës-ndihmës sekretari amerikan i Shtetit për Euroazinë, Philip Reeker, i bëri sot thirrje autoriteteve shqiptare që të hyjnë në dialog për të gjetur një kompromis për çështjen e grevës së urisë së ish-të përndjekurve politikë. Reeker u bëri thirrje si autoriteteve, ashtu edhe grevistëve, të mos ndërmarrin hapa që do të çonin në dëmtime fizike të vetes së tyre, ose të të tjerëve. Situata, tha zyrtari i lartë amerikan, duhet zgjidhur me dialog dhe me qetësi. “Palët nuk duhet të ndërmarrin sulme personale dhe politike të cilat kanë treguar se përshkallëzojnë situatën dhe pengojnë mundësinë e dialogut”, deklaroi Reeker. Zoti Reeker i bëri këto komente gjatë një konference shtypi në Uashington mbi Ballkanin perëndimor. Shqipëria, tha ai, mori një vlerësim pozitiv nga Komisioni Evropian lidhur me çështjen e statusit të vendit kandidat, por ky është vetëm një hap drejt proçesit të anëtarësimit në BE dhe vendi duhet të vazhdojë reformat. Deklarata e Reeker erdhi pasi grevisti Gjergj Ndreca i ka dërguar një letër edhe Sekretares Amerikane të Shtetit, Hillary Clinton. Në letër ai i shkruan asaj se ‘Qeveria aktuale ka miratuar një ligj në vitin 2007, mbi dëmshpërblimin e ish të përndjekurve politikë dhe e ka patur detyrim që ta zbatojë atë brenda 8 viteve. Në vitin e pestë të zbatimit, – shkruan Ndreca- Qeveria ka kryer një të tetën e detyrimit dhe me këtë ritëm, i bie që ligji të zbatohet pas 40 vitesh, kur askush nga ne nuk do të jetojë më”. “Thelbi i kërkesave tona, – shkruan më tej Ndreca,- ka të bëjë me një defekt themelor të shoqërisë ku jetojmë, moszbatimin e ligjit. Kërkesat tona u injoruan dhe në vend të dialogut dhe zgjidhjes u përballëm me një fushatë përbaltjeje, si kriminelë ordinerë. Akti im dhe i mikut tim Lirak Bejko, që shkuam me qetësi drejt vetëflijimit, nuk është akt i njerëzve të dëshpëruar, por i qytetarëve të vendosur që duan të ndezin shpresën e një shoqërie, e cila është lodhur nga zhgënjimet, korrupsioni dhe regjimet autoritare”. Duke iu referuar në letër Kryeministrit Berisha, Gjergj Ndreca i shkruan Sekretares Amerikane të Shtetit, se ‘në vitin 1997, kur në Shtëpinë e Bardhë ishte Presidenti Bill Klinton, ky politikan dogji Shqipërinë, vetëm pse nuk pranonte të ulej në dialog me kundërshtarët e tij dhe të dëgjonte këshillat e Shteteve të Bashkuara, për zgjedhje të lira dhe të ndershme’. “Një njeri që ka pranuar të djegë Shqipërinë për karriken e vet, nuk e ka problem të shikojë si digjen qytetarët e vet për të drejtat e tyre”, shkruan Ndreca. (TCH)

 
Lajme Shqip Thursday, 18 October 2012 15:33

TIRANË (PLOTESUAR 18 TETOR, 20:00)-Sot greva e urisë së ish-të burgosurve politikë hyri në ditën e 27-të, ndërsa zhvillime të reja po ndodhin në emër të saj. 

Pritet që Gjykata e Tiranës të shpërndajë grevën e urisë pas një vendimi që mori dje duke para parasysh padinë e policisë së kryeqytetit që konstatoi se grevistët kanë kryer vepra penale gjatë kohës së grevës së urisë. 

Dje, policia shoqëroi koordinatorin e grevës, Asllan Patrioti ndërsa vendosi arrestimin e tij nën akuzën mashtrimit. Patrioti, shprehet policia, ka përfituar 700 euro nga një shtetas italian, të cilit i premtoi se do ti gjente automjetin e humbur. ‘Shumën e parave Patrioti e ka përfituar gjatë kohës së grevës”, tha policia. 

Ndërkohë, sot një grup ish-të burgosurish politikë protestuan para Parlamentit kur po zhvillohej seanca e radhës. Ish-të burgosurit i bënë thirrje politikës të ndihmojnë shtresën e personave që kanë kryer burg në vitet e diktaturës duke i dëmshpërblyer.

BODE: SHPËRNDARJA E KËSTIT TË DYTË SIPAS RADHËS
Ora 19: 05 Ministri Bode duke folur me shifra për shpërndarjen e dëmshpërblimit ndaj shtresës së ish-të burgosurve politikë deklaroi se tashmë po vijon shpërndarja e kistiti të dytë sipas radhës. “581 mln lekë për këstin e dytë për ish-të dënuarit politikë. Kush është mbi 65 vjeç ka marrë 864 mln lekë të dëmshpërblimit. Në vitin 2009-2012 fond për likuidim prej 6.5 mld lekësh për këtë shtresë. 305 të pushkatuar pa gjyq, të dënuar me burgim, 10835 persona. 581 mln lekë për këstin e dytë për ish-të dënuarit politikë, ndërkohë vijon shpërndarja e këstit të dytë sipas radhës e rregullit”,- theksoi Bode.

HALIMI DHE BODE INTERPELANCË NË KUVEND
ORA 18:50
Greva ish- të burgosurve politikë është bërë pjesë e debateve në Kuvendin e Shqipërisë, pas kërkesës për interpelancë me ministrin e Drejtësisë Eduart Halimi dhe ministrit të Financave Ridvan Bode.  Ministri Halimi deklaroi se ligji për dëmshpërblimin është miratuar në vitin 2007, ndërkohë që janë depozituar mbi 20 mijë kërkesa për dëmshpërblim dhe ka përfunduar procesi për mbi 11 mijë prej tyre. Halimi theksoi se është shpërndarë kësti i parë për të gjithë ish-të burgosurit politikë, ndërkohë që ka filluar shpërndarja e këstit të dytë për ata që janë mbi 65- vjeç.

“Nga 20 589 kërkesa të cilat janë depozituar në Ministrinë e Drejtësisë, ka përfunduar procesi për 11 759 kërkesa, të cilat kanë patur të bëjnë me pjesën që janë dënuar me burgim dhe me pjesën e të pushkatuarve pa gjyq. Pra për 11 759 janë zbatuar vendimet e qeverisë për dëmshpërblimet. Të gjithë këta persona kanë marrë këstin e parë dhe sipas informacioneve që më vijnë edhe nga Ministria e Financave të gjithë këta persona kanë marrë këstin e parë dhe ka filluar shpërndarja e këstit të dytë për ata që janë mbi 65-vjec. Ka përfunduar edhe faza e dytë për ata që janë mbi 65-vjec, dhe ka filluar shpërndarja e këstit të dytë për pjesën tjetër, por tashmë sipas rendit kronologjik të miratimit të kërkesave të tyre”, deklaroi Halimi duke akuzuar PS se gjatë qeverisjes në kohën kur Pandeli Majko ishte kryeministër shpërbleu me qindra milionë lek xhelatët e tyre, Ramiz Alinë, Nexhmie Hoxhën dhe bllokmenët e tjerë hoxhistë të dënuar për genocid dhe krime kundër njerëzimit

AK, SPAHIU-BERISHËS: DORËHIQU NËSE KE DINJITET
Ora 16:47-
Kreu i Aleancës Kuq e Zi, Kreshnik Spahiu, ka shkuar sot të takohet me ish-të përndjekurit grevistë, por nuk është lejuar nga forcat e policisë, që të hyjë në tendën e grevës. Ai ka akuzuar drejtpërdrejt Kryeministrin Berisha se po sillet në mënyrë çnjerëzore me këta njerëz, ndërsa i bëri thirrje të japë dorëheqjen. “Berisha po sillet në mënyrë çnjerëzore, është kundër aleancës perëndimore. Diplomatët e huaj i kanë bërë thirrje të dialogojë, po e vënë në provë nëse është burrë shteti apo burracak, dhe nëse është burrë shteti ai duhet të dorëhiqet. Dorëhiqu nëse ke dinjitet”, tha Spahiu.

Ndërsa vendimin e gjykatës për të shpërndarë grevën, Spahiu e cilësoi arbitrar.
“Vendim arbitrar, nuk mundet shteti dhe qeveria të ndalojnë disa njerëz të pinë ujë, të ndalojnë që të vdesin”, tha Spahiu më tej.

HOLTKEMPER APEL QEVERISË: ULUNI NË BISEDIME
Ora 15:45
Prezenca gjermane e akredituar në vendin tonë i është bashkuar thirrjes së ambasadorit të BE-së dhe të SHBA-së në vendin tonë për zgjidhjen e situatës së ish-të përndjekurve politikë. Ambasadorja gjermane Carol Holtkepmer nga qyteti i Pogradeci, i ka bërë apel qeverisë që të ulet në bisedime në mënyrë që të dëgjohet kërkesat e ish-të dënuarve politikë, të cilët kanë vuajtur shumë në diktaturë.

FATMIR LAMAJ RIKTHEHET NË GREVË, NUK LEJOHET TË HYJË NGA POLICIA
Ora 14:50 –
Ish i përndjekuri Fatmir Lamaj tentoi sot të rikthehej në grevën e urisë, por nuk u lejua të futej në çadrën e grevës nga uniformat blu. Burime nga vendi i ngjarjes bëjnë të ditur se policia nuk e lejon të rifutet në grevë, pasi Fatmir Lamaj ka ardhur pa ambulancë nga spitali. Grevisti Fatmir Lamaj u detyrua të largohej nga greva para 2 ditësh për shkak të problemeve shëndetësore.

TUFA: ARRESTIM POLITIK, KEMI OPOZITË ‘NUL’, ARVIZU NA NDIHMO!
Ora 10:40-Koordinatori i grevës së ish të burgosurve politik, Skënder Tufa duke folur në emër të grevistëve shprehu keqardhjen për mospjesëmarrjen e qytetarëve në protestën e ditës së sotme. Grevistët, tha Tufa shprehin keqardhje për indiferentizmin e shoqërisë shqiptare dhe të opozitës. ‘Mungesa e qytetarëve në vendin e protestës dhe grevës, tregon se politika ndërhyn’,-theksoi Tufa.

Tufa ka bërë edhe njëherë thirrje për dialog. “Ne jemi qytetarë të këtij vendi. Si të barabartë kërkojmë që të ulemi si qytetarë të zgjidhim problemet. Të burgosurit po presin zgjidhje qytetare. Ne ju presim. Ne presim dialogun”- tha ai. Lidhur me opozitën, Tufa tha se më duket se është në bashkëpunim me maxhorancën, pasi duket se ka një akord të mirëfilltë mes tyre. Ku është opozita, njerëzit po vdesin këtu, tha Tufa. “Opozita shqiptare e jonë është nul. Po shohim se ka një akord mes tyre, do bëjnë rrotacion. Ku është kjo opozitë që njerëzit po digjen, njerëzit vrasin veten, shitet atdheu ynë si plackë tregu, duhet të bëhet një plugim politik”.

I pyetur se ai më parë nuk e ka pranuar ndihmën e PS, Tufa u shpjegua në këtë formë : Opozita nuk ka punë në grevën e urisë, greva jonë duhet të quhet ekonomine. PS të përfaqësojë zërin qytetar. Të jetë aktive në zyrat e saj, për ligjet dhe jo këtu në mes të grevës”. Po ashtu ai shprehu keqardhjen edhe për arrestimin e koordinatorit tjetër, Asllan Patrioti, duke thënë se çdo veprim që bëhet me ish të burgosurit në këtë kohë është një veprim politik.  “Merreni pas grevës me Asllan Patriotin, cdo veprim që bëhet gjatë grevës është politik. Kërkoj ndihmën e Arvizu për këtë shkelje qytetare”.

ISH-TË BURGOSURIT PROTESTË PARA PARLAMENTIT: TË ZËVENDËSOJMË GREVISTËT,T’I SHPËTOJMË NGA VDEKJA
Ora 10:40
-Një grup ish-të burgosurish politikë kanë nisur të protestojnë para parlamentit ku po zhvillohet seanca e radhës. Ish-të burgosurit i bënë thirrje politikës të ndihmojnë shtresën e personave që kanë kryer burg në vitet e diktaturës duke i dëmshpërblyer. Protestuesit deklaruan se nuk do të reshtin grevat e urisë, pavarësisht vendimeve të Gjykatës që kërkon shpërndarjen e grevës së urisë së nisur prej 27 ditësh. Ata shprehen se do t’i zëvëndësojnë grevistët për të shpëtuar nga vdekja ata që kanë hyrë prej ditësh në grevën maratonë. Skënder Tufa, koordinatori i vetëm i mbetur në grevën e urisë vlerësoi se gjykata dha një vendim të jashtëligjshëm, porse ndërhyrja e Avokatit të Popullit shpëtoi grevën.

ARRESTOHET KOORDINATORI; MASHTROI NJË SHTETAS ITALIAN
Ora 09:00-Dje, policia shoqëroi koordinatorin e grevës, Asllan Patrioti ndërsa vendosi arrestimin e tij nën akuzën mashtrimit. Patrioti, shprehet policia, ka përfituar 700 euro nga një shtetas italian, të cilit i premtoi se do ti gjente automjetin e humbur. ‘Shumën e parave Patrioti e ka përfituar gjatë kohës së grevës”, tha policia.

Policia e Tiranës arrestoi mbrëmë në kushtet e flagrancës shtetasin Asllan Patrioti, 59 vjeç, banues në Tiranë, i cili akuzohet se ka marrë me anë të mashtrimit shumën prej 700 euro ndaj shtetasit italian M.N. Siç bënë të ditur burime zyrtare të policisë së Tiranës, në muajin qershor 2012, shtetasi italian M.N denoncoi vjedhjen e automjetit te tij personal, i cili pas pak ditësh u gjet dhe iu kthye pronarit nga strukturat e policisë së komisariatit të policisë Nr.4 Tiranë. ‘Ndërkohë që shtetasi italian prej kohësh, pas gjetjes se automjetit të vjedhur, ishte nën presionin e shtetasit Asllan Patrioti për t’u paguar, pasi pretendonte se kishte ndikuar për gjetjen e automjetit të vjedhur’, tha policia. Arrestimi në kushtet e flagrancës i shtetasit Asllan Patrioti, i cili është edhe koordinator i grevës së urisë të një grupi ish-të përndjekurish politikë në Tiranë, u bë në zbatim të urdhërit të Prokurorisë së Rrethit Gjyqesor Tiranë.

NJE DITE ME PARE ASLLAN PATRIOTI: BERISHA MOS E GEZOFSH DITELINDJEN 
“Berisha ka zaptuar gjykatat dhe prokurorinë. Unë dje e urova kryeministrin për ditëlindjen, por ai na e ktheu përgjigjen tamam. Kthej mbrapsht urimin, mos e gëzofsh. Këta njerëz nuk i ka bërë lopa, nuk janë “zogj kurvash”, janë njerëz që të kanë dhënë votat 22 vjet. Ndryshe do të ketë kufoma, do dalin me gjak, me kufoma, duam dëmshpërblim sipas ligjit. Çfarë të pengon për bisedime, nëse ti tenton me forcë, do kesh probleme. Kjo grevë do të vazhdojë në vend tjetër, kemi gati vendin.”- tha Asllan Patrioti.

Patrioti i ka bërë thirrje edhe njëherë kreut të qeverisë që të ulen në bisedime, pasi me forcë nuk dalin në asnjë mënyrë. Po ashtu, Patrioti kërkoi nga të burgosurit e tjerë politik që të vijnë në mbështetje të tyre, duke theksuar se greva e tyre është ekonomike dhe jo politike. Së fundi, sipas Patriotit, grevistëve u janë ndaluar takimet edhe me familjarët. Duke bërë një krahasim me kohën e vuajtjes së burgut, Patrioti tha se në atë kohë, ai (Enver Hoxha) ka qenë kriminel, pinoçet, të gjitha të zezat por 5-minuteshin me familjarët nuk na e ka ndaluar.

GJERGJ NDRECA RIKTHEHET ME AMBULANCË TEK GREVISTËT
Dje në mbrëmje, pas vendimit të gjykatës së Tiranës për të shpërndarë grevën e ish-të përndjekurve politikë, Gjergj Ndreca, i vetëdjegur pak ditë më parë për kauzën e tyre është rikthyer sot në mbrëmje pranë ambienteve të grevës për të takuar ish-të përndjekurit. Mësohet se Ndreca është rikthyer me ambulancë, ndërsa ka lëshuar thirrjet: “Para Ambasadës Amerikanë do vdesim të gjithë. Greva do të vazhdojë, te Presidenti Nishani nuk kam shpresë”.(LajmeShqip.com)

 
Lajme Shqip Wednesday, 17 October 2012 10:13

TIRANË (PLOTESUAR 17 TETOR)- Ndërsa greva e urisë së ish-të burgosurve politikë hyri sot në ditën e 26-të, një vendim nga Gjykata e Tiranës kërkon shpërndarjen e grevistëve duke parrë parasysh një padi nga ana e policisë, që e konsideron grevën të paligjshme. 

Pas vendimit të Gjykatës së Tiranës, e cila vendosi shpërndarjen e grevës, pasi e shpalli të paligjshme, në një deklaratë për mediat në emër të grevistëve, Fatmir Lamaj theksoi se ata nuk do të dalin nga greva. Pas deklaratës Lamaj shoqerohet në spital.

TUFA: NË SHQIPËRI DIKTATURË E RE
11:10 Koordinatori i grevës së ish-të përndjekurve politikë, Skënder Tufa, në një deklaratë para mediave i bëri thirrje qeverisë që të ulen në bisedime për një zgjidhje paqësore, ndërkohë që paralajmëroi se do regojnë nëse nxirren nga greva.

“Berisha iku dhe la urdhërat prapa. Këto nuk janë zgjidhje. Zgjidhja është siç tha dhe ambasadori amerikan dje, uluni dhe diskutoni. Nëse këta njerëz nxirren me vendim gjykate, që dihet se në dorë të kujt janë, ne deklarojmë se në Shqipëri ekziston një diktaturë e re që vepron në mënyrat më brutale dhe veprimi që behet me ne bëhet me çdo qytetar. Ne do i bëjmë thirrje në mënyrë paqësore siç tha dhe miku ynë Arvizu, nëse ju do veproni me vendimin e gjykatës ne do veprojnë në mënyrë paqësore”,- deklaroi Tufa.

PATRIOTI: BERISHA MOS E GËZOFSH DITËLINDJEN! MOS NXIRR GREVISTËT SE DO KESH KUFOMA
Ora 11:00-Koordinatori i grevës së urisë së ish-të burgosurve politikë, Asllan Patrioti, në një deklaratë të ashpër theksoi se nëse përdoret forca kundër grevistëve, do të ketë viktima. Madje Patrioti tërhoqi dhe urimin për ditëlindje ndaj Kryeministrit Sali Berisha që para 2 ditësh festoi 68-vjetorin.

“Unë dje e urova Kryeministrin për datëlindje, dhe ai na e ktheu në këtë monedhë. Por sot e tërheq, ‘Mos e gëzofsh datën e lindjes’. Se këta njerëz që kanë vuajtur për 27 ditë, nuk i ka bërë lopa. Kam heshtur se do bënim mbase negociata, kërkuam të ulim gjakrat, dhe u bëj thirrje, të ulin gjakrat,ndryshe do kesh kufoma. Ne duam dëmshpërblim për ligjin. Çfarë u pengon të na e jepni. Nëse t’i tenton t’i nxjerrësh me forcë këta njerëz, të siguroj se do kemi probleme”.

Koordinatori i grevës së urisë shtoi se ‘kjo grevë nuk do ndalet, do kemi tjetër. Jemi njerëz, kemi të drejta”. Nën thirrjet se greva nuk ka motiv politik, Patrioti nuk bëri të ditur vendin ku do vijojë greva e urisë. “E kemi sekret, ja sa të stabilizojmë gjërat”. 

“Janë ndaluar edhe familjet edhe cigaret, ne kemi qënë në burgjet e Enverit, maskara ka qenë, por 5 minutëshin e familjes e kishte në rregull maskarai. Familjet kanë ardhur dhe nuk i lënë. Ku jemi, në burg apo internim. Të gjithë kontrollohemi, por po të duam ti fusim benzinë ne ja fusim kur të duam, por nuk kemi asnjë qëllim. Nëse të është mërzit pushteti largohu. Unë të them hajt merr pushtet, dhe rri me ne. Ti mban Ilir Metën hajdut në pushtet, Ilir Metën e ke patericë dhe po mbahesh mbi të. Të them hajde me ne Ilir Meta nuk është me ty më”,- tha i revoltuar Asllan Patrioti.

INFARKT NE ZEMER, GREVISTI FATMIR LAMAJ DERGOHET ME URGJENCVE NE SPITAL
Ora 10:40-Pas deklaratës së kryer në emër të grevistëve, Fatmir Lamaj u transportua në urgjencë sepse pati nje goditje ne zemer. Lamaj ka qenë për ditë të tëra në grevë urie me ish-të burgosur të tjerë, të cilët kërkojnë dëmshpërblim për vitet e burgut të kryera në kohën e diktaturës. Ai u semur nga zemra sapo mësoi vendimin e gjykates për shpërndarje të grevës.

SEQUI: APEL QË AKTET EKSTREME TË VETËDJEGIES TË NDALOJNË
Ora 10:20 Ambasadori i BE-së Ettore Sequi i ftuar në emisioni ‘Vila 24”, ka komentuar grevën e ish- të përndjekurve. Sequi ka bërë apel që grevistët të ndalojnë aktet ekstreme, ndërkohë që bëri thirrje që të nisë dialogu.

GREVISTËT: NUK DALIM NGA GREVA,VETËM PO TË NA NXJERRIN ME FORCË
10:00 Tensionohet situata në ambientet ( pranë Komunës së Parisit), ku prej 26 ditësh një grup-ish të përndjekurish politikë po zhvillojnë grevën e tyre si shenjë protestë për të drejtat e tyre.

Pas vendimit të Gjykatës së Tiranës, e cila vendosi shpërndarjen e grevës, pasi e shpalli të paligjshme, në një deklaratë për mediat në emër të grevistëve, Fatmir Lamaj theksoi se ato nuk do dalin nga greva. ‘Paralajmerojme se do te digjemi para parlamentit, duam të drejtat tona’.

Lamaj e cilësoi kryeministrin, Berisha si një pjellë të komunizmit që vazhdon t’i shërbejë. “Kur kam qenë 21 vjeç dhe dola në gjyq për agjitacion dhe propagandë kam thënë këto fjalë: Jam armik i komunizmit deri në vdekje, i kam qëndruar, ndërsa t’i je një pjellë e tija, dhe vazhdon t’i shërbesh”- tha Lamaj, në përgjigje të deklaratave të kryeministrit Berisha, se grevistët po përdoren nga Partia Socialiste.

Lamaj sqaroi po ashtu edhe akuzat që janë lëshuar mbi të për privatizime të shumta në qytetin e Sarandës. Ai tha se aktualisht nuk ka asnjë pronë, dhe kjo mund të jetë lehtësisht e verifikueshme në hipoteke, ku ka akses çdo qytetar.

Në përgjigje të deklaratave të mbrëmshme të Ministrit të Drejtësisë, Eduard Halimi, Lamaj tha se së bashku me një bashkëvuajtës kam marrë një repart ushtarak me disa dhoma, por në 97-tën, bandat greko-komunist“Gjykata dha vendim të gabuar në kundërshtim me çdo qytetar. Në një shtet që nuk funksionon ligji demokracia ka vdekur. Në këtë vend nuk ekzistojnë më institucionet e pavarura. Do ta zhvendosim grevën diku tjetër, greva do të vazhdojë. Berisha ka krijuar klone për mbajtjen e pushtetit”,- deklaroi Lamaj. 

GJYKATA VENDOS SHPËRNDARJEN E GREVËS
Ora 09:50-Gjykata e Tiranës vendosi shpërndarjen e grevës së ish-të burgosurve politikë pas një padie nga Drejtoria e Policisë së Tiranës. Në padinë e Drejtorisë së Policisë së Tiranës konstatohet se greva konsiderohet e paligjshme sepse në të janë kryer vepra penale.

26 DITE GREVË
Ora 07:00-Në ditën e 26-të të grevës së urisë gjendja shëndetësore e ish-të përndjekurve është rënduar së tepërmi. Mjeku, Besnik Lamçe, i cili kujdeset nga afër për të ngujuarit, tha dje se kushtet atmosferike po rëndojnë akoma edhe më shumë gjendjen e tyre. Ndërkohë, ish- të përndjekurit bënë thirrje që të ulen tonet dhe të gjendet një zgjidhje.

Amnesty International i bëri thirrje Qeverisë shqiptare që të takohet me shoqatën e ish- të përndjekurve politikë dhe të vendosë dialogun për adresimin siç duhet të shqetësimeve të tyre. Amnesty International e nxit Kryeministrin Berisha që të adresojë shqetësimet e tyre dhe të sigurohet që kompensimet të bëhen në mënyrën e duhur.(LajmeShqip.com)

 
Lajme Shqip Tuesday, 16 October 2012 15:13

TIRANË- Sot shënohet dita e 25 e grevës së urisë së ish-të përndjekurve politikë, ndërkohë që kushtet atmosferike duket se po rëndojnë akoma dhe më shumë gjendjen e tyre, e cila me kalimin e ditëve ka shfaqur shenja dobësimi dhe rëndimi shëndetësor.

Grevisti 55-vjeçar, Vllasi Koçi u detyrua dje ta braktiste atë për shkak të komplikacioneve në zemër, për tu rikthyer sërish pas mungesës së shërbimit të duhur mjekësor. Koordinatori i grevës, Skënder Tufa, akuzoi bluzat e bardha për militantizëm dhe shërbim të keq ndaj Koçit, duke i akuzuar se po marrin urdhra nga Kryeministri.

Ndërkohë,  mjeku Besnik Lamçe, i cili po ndjek grevën e urisë së ish- të përndjekurve duke mos dashur të komentojë akuzat që ish- të përndjekurit bënë për bluzat e bardha deklaroi se ai vetë po të lindë nevoja nuk do lejojë që parametrat jetësore të grevistëve të vihen në rrezik. 

ASLLAN PATRIOTI: TË ULIM TONET DHE KËRCËNIMET
Ora 13:36 Koordinatori i grevës Asllan Patrioti në një prononcim për NEWS24, njoftoi se vajza e Gjergj Ndrecës, i cili dogji vetën i pari me benzinë, bashkë me të rinjtë e shkollës i ka bërë thirrje sot  kryeministrit Berisha të ulet me negociata me grevistët.

Patrioti bëri thirrje që të ulen tonet, ndërkohë megjithëse nuk dha shumë detaje deklaroi se ka disa sinjale për negociata që do të mund ti japin zgjidhje situatës.

“Ka disa sinjale për negociata. I bëj thirrje kryeministrit të ulim tonet dhe kërcënimet dhe të gjejmë një gjuhë të përbashkët në mënyrë që të vlerësojë këta njerëz”,- tha Patrioti.

DREJTORESHA E ASHR-SË: URGJENCA NË GATISHMËRI TË GREVISTËVE
Ora 11:19 Në një deklaratë për mediat, nga ambientet ku po zhvillohet greva e ish-të përndjekurve politikë, drejtoresha e ASHR-së Liljana Ramasaco deklaroi se grupi i mjekëve të urgjencës i ka dhënë shërbim çdo grevisti, ndërkohë që do të vijojë me të njëjtin intensitet shërbimin ndaj tyre.

MJEKU: GJENDJA E GREVISTËVE ËSHTË RËNDUAR
Ora 10:55 Mjeku Besnik Lamçe, i cili po ndjek grevën e urisë së ish- të përndjekurve në një dalje për mediat informon se gjendja e ish-të burgosurve shfaqet e rënduar në ditën e 25 të rezistencës së tyre. 

“Gjendja është e rënduar në konteksin e mungesës së lëngjeve në organizëm dhe prishja e parametrave që tek Vllasi Koçi, Ramazani Kollçaku etj, ka filluar të ulet tensioni, kanë mungesë lëngjesh, që pasqyrohet me uljen e oksigjenit në gjak. Konkretisht problematika duhet ndjekur me kujdes për më vonë. Aktualisht është e rënduar. Gjendja e dy prej tyre Vllasit dhe Ramazanit është më e rënduar. Kujdesi ndaj tyre e ka synim të parë tu rrimë pranë dhe për t’i këshilluar për të mirën e jetës së tyre. Ata kanë bindjet e veta dhe nuk mund të ndikojmë”, deklaroi mjeku Lamçe. 

Mjeku Lamçe, duke mos dashur të komentojë akuzat që ish- të përndjekurit bënë për bluzat e bardha deklaroi se nuk do lejojë që parametrat jetësore të grevistëve të vihen në rrezik. “Nëse do ishte rënduar gjendja e tyre jetësore unë do i merrja vetë në krah dhe do i nxirrja me zor nga greva drejt spitalit. Nuk di çfarë të them për akuzat, por  unë di të them se shërbimi i urgjencës e ka pikën më kulmore kujdesin për shëndetin e grevistëve”, theksoi Lamaj. 

GREVISTËT: HALIMI GËNJEN PËR PRONAT TONA, BERISHA PJELLË E KOMUNIZMIT
Ora 10:35 Paraditen e sotme mediat janë lejuar të hynë në ambientet e grevës. Në një deklaratë për mediat, grevisti Fatmir Lamaj ka reguar ndaj deklaratave të mbrëmshme të ministrit të Drejtësisë, Eduard Halimi. “Ministri Halimi arriti deri aty sa të gënjejë se kam privatizur gjysmën e Sarandës. Hipotekat sot kanë akses për çdo qytetar, me përjashtim të një reparti ushtarak që u nda me një shokun tim bashkëvuajtës. Edhe ato shpi që i rregulluam na u hodhën në erë nga bandat e vitit 1995”,- deklaroi Lamaj, duke hedhur poshtë deklarat që ministri Halimi bëri dje në një intervistë televizive. 

Lamaj u përgjigj edhe ndaj sulmeve që bëri një ditë më parë Kryeministri Berisha ndaj shtresës së ish- të burgosurve politikë, duke e akuzuar atë për urrejtje. “Edhe njëherë ndaj zotit Kryeministër që thotë se jemi të përdorur nga PS dhe se jemi spiuna, kur kam qenë 21-vjeç dhe dola në gjyq për propagandë kam deklaruar se jam armik i komunizmit deri në vdekje dhe kështu do them deri sa të vdes, ndërsa ti je pjellë e saj dhe vijon ti shërbesh”,- theksoi Lamaj.(LajmeShqip.com)