Lajme Shqip Wednesday, 11 May 2011 20:10

Tiranë – Prokuroria e Përgjithshme e Shqipërisë përfundoi hetimet dhe dorëzoi për gjykim dosjen penale ndaj Ilir Metës, ndaj të cilit është ngritur akuza e “korrupsionit aktiv”.

Plator Nesturi, këshilltar me median në Prokurorinë e Përgjithshme konfirmoi faktin se ndaj Ilir Metës është ngritur akuza e korrupsionit, por hezitoi të fliste për detaje të tjera lidhur me dosjen penale, brenda së cilës ndodhen faktet që ngarkojnë me përgjegjësi kreun e Lëvizjes Socialiste për Integrim.

Ndërkohë Gjykata e Lartë shqiptare ka hedhur sot shortin që ka përcaktuar trupën gjyqësore që do të shqyrtojë dosjen penale në ngarkim të ish-zëvendëskryeministrit Ilir Meta të akuzuar tashmë për korrupsion.

Sipas një njoftimi për mediat vendore pas hedhjes së shortit me gogla është përcaktuar se trupa gjyqësore do të përbëhet nga Ardian Dvorani relator si dhe anëtarët Besnik Imeraj, Arjana Fullani,Gani Dizdari dhe Guxim Zenelaj.

Avokati i Metës, Petrit Serani ka deklaruar se kundërshton akuzat e Prokurorisë sepse janë të pabazuara, pasi veç të tjerash, për mbrojtjen video-përgjimi nuk është i vlefshëm pasi është marrë në kundërshtim me ligjin. Por në fakt, pavarësisht pretendimeve për një montazh të bisedës së përgjuar, ekspertët amerikanë vërtetuan se videoja ishte origjinale.

 
Lajme Shqip Wednesday, 11 May 2011 17:56

Tiranë – Gjykata e Lartë caktoi sot trupin gjyqesorë që do të shqyrtojë çështjen në ngarkim të ish zv/kryeministrit Ilir Meta, i cili akuzohet për “Korrupsion”.

Gjykata e Lartë në një njoftim shtypi bëri të ditur sot se, “në këtë Gjykatë u hodh shorti për caktimin e trupës së gjyqtarëve që do të gjykojnë çështjen e regjistruar në Gjykatën e Lartë me kërkues Prokurorinë e Pergjithshme, për procedim penal nr.1 të vitit 2011, kundër Ilir Metës, Nr. Aktit- 8/11”.

Sipas njoftimit zyrtar, pas hedhjes së shortit me gogla, trupa gjyqësore përbëhet nga relatori Ardian Dvorani dhe anëtarët: Besnik Imeraj, Arjana Fullani, Gani Dizdari dhe Guxim Zenelaj.

Prokuroria e Përgjithshme përfundoi hetimet dhe dorëzoi një ditë më parë për shqyrtim në Gjykatën e Lartë çështjen penale ndaj Metës me akuzën e “Korrupsionit”. Hetimet ndaj tij, nisën nga prokuroria pas publikimit pak kohë më parë në një televizion të një video-përgjimi, ku ai shfaqej me ish – ministrin e Ekonomisë, Dritan Prifti, në një bisedë për disa tendera të ministrisë së Ekonomisë.

Nderkohë, përfaqesuesit ligjor të zotit Meta, mësohet se kanë kundërshtuar akuzën e ngritur ndaj tij, duke e cilësuar atë si të pavertetë.