Lajme Shqip Saturday, 01 September 2012 08:01

Ilir Azemi ka shkruar emrin në librin e historikut të Bundesligës në Gjermani, pasi ka qenë protagonist në golin dhe fitoren e parë për skuadrën e Grojter Furth në Bundesligë. Sulmuesi i aktivizuar si zëvendësues, ka dhënë pasimin për golin e Klaus në fitoren 1-0 të ekipit të tij në transfertë ndaj Mainz.

Pas ndeshjes së parë të humbur në shtëpi me rezultatin 3-0 ndaj Bajern Mynih, shumëkush priste që ekipi ku kapiten është mbrojtësi i përfaqësueses shqiptare, Mërgim Mavraj, të ishte skuadra më e dobët e kampionatit.

Në fakt, taktika e Furth ishte të luhej me kundërsulm, duke ndërtuar një mbrojtje të hekurt ku Mavraj ka qenë protagonist kryesor me ndërhyrjet e tij. Por në minutën e 66-të, dëmtimi i Fall bën që trajneri Buskens të aktivizojë 20 vjeçarin Azemi. Ky i fundit nuk vonon dhe brenda një minutë jep pasimin për golin e vetëm të takimit, të shënuar nga Klaus.

Për këtë paraqitje, Azemi është vlerësuar me notën 2 nga gazeta gjermane “Bild” (nota 1 është më e mira) ndërsa Mavraj ësthë vlerësuar me notën 3 për paraqitjen e tij në prapavijë. Rregullsia me të cilën Azemi po aktivizohet te Furth ka sjellë edhe interesimin në rritje nga FSHF për të veshur sa më parë kuqezi sulmuesin shtatlartë. (LajmeShqip.com)

 

 

 
Lajme Shqip Tuesday, 24 January 2012 22:09

Një tjetër talent shqiptar duket se ka shpërthyer në kampionatin gjerman të futbollit. Ilir Azemi, 19 vjeçari me origjinë nga Prishtina, është bërë pjesë e skuadrës së parë të Grojter Fyrth dhe ka dhënë prova se së shpejti do të jetë protagonist edhe në ndeshjet e kampionatit.

I aktivizuar deri tani vetëm me ekipin e dytë të Fyrth, Azemi i është bashkuar skuadrës së parë në fazën përgatitore që po zhvillon në Turqi, ndërsa ka qenë protagonist absolut i fitores 4-0 në miqësoren ndaj austriakëve të Admira Vaker.

Azemi ka hyrë në fushën e lojës vetëm në fillimin e pjesë së dytë, kur rezultati ishte ende 0-0, duke u kthyer në rrezikun kryesor për portën austriake. Ai ka qenë autor i dy golave dhe pjesëmarrës në aksionet e dy golave të tjerë.

Kjo paraqitje ka kënaqur trajnerin Buskens, i cili tani e sheh me vëmendje shtatlartin kosovar dhe mendohet që gjatë pjesës së dytë të sezonit ai të jetë pjesë e ekipit të parë duke fituar hapësira edhe në formacion.

Grojter Fyrth aktualisht mban vendin e dytë në renditjen e Bundesligës 2 dhe është ndër kandidatët kryesorë për t’u ngjitur më lart në edicionin e ardhshëm. (LajmeShqip.com)