Lajme Shqip Monday, 22 April 2013 16:25

TIRANË – Sot përkujtohet 95-vjetori i lindjes së piktorit Ibrahim Kodra, vepra e të cilit arriti lartësitë europiane.

Ibrahim Kodra ka lënë pas rreth 6 mijë vepra, të shpërndara nga muze privatë, koleksionistë dhe vetëm 2 mijë prej tyre janë të regjistruara dhe të dokumentuara. Krijimet e tij artistike u prezantuan për publikun shqiptar, vitin që lamë pas, në kuadër të 100-vjetorit. Fondacioni “Ibrahim Kodra” në Milano disponon vetëm pak prej qindra tablove të kompozuara nga Kodra, ndërkohë që shumë prej tyre janë shitur kur ai ka qenë ende gjallë.

Piktura e Ibrahim Kodrës është një bashkim i çuditshëm botësh; botës së tij origjinale, të mbartur nga vendlindja, me motivet dhe historinë e saj, shpesh herë të etiketuar si orientale nga shtypi italian, dhe skemave artistike perëndimore që kishin marrë jetë me avangardat e fillimit të shekullit të njëzetë. Ky bashkim, kjo përzierje e bën Kodrën një artist tepër të veçantë për periudhën kur ai jetoi dhe punoi.

Kubizmi i Kodrës nuk është një përpjekje për ta shpërbërë objektin por për ta ribërë atë, duke e kthyer pikturën e tij në një mjet precizioni të lartë, në funksion të të kuptuarit dhe të gjykuarit të artit dhe kulturës perëndimore, duke zgjedhur rrugën e përballjes kritike me këtë të fundit. 50 % e veprave të Kodrës ndodhet në Tiranë, në pronësi të koleksionistëve shqiptarë dhe 50 % e ekspozitës në GKA do të jetë me veprat e këtyre koleksionistëve dhe pjesa tjetër do të jetë nga Fondacioni Kodra.

Kodra lindi në Ishëm më 22 prill të vitit 1918. Jeta e tij në Tiranë në konviktin e shkollës “Naim Frashëri”, ndërpritet kur 20 vjeç (1938) largohet nga Shqipëria përgjithmonë me një bursë studimi nga oborri mbretëror për në Akademinë e Arteve të Bukura në Romë. Ai e lëshon Romën dhe përfundon në Milano, në Akademinë e Arteve të Bukura të Brerës. Ai ekspozon në Romë, Milano, Venecia, Paris, Belograd, Nju Jork, krijon raporte me piktorë të mëdhenj si Pikaso, Shagall, Matis, Fontana, Guttuso, me poetë, shkrimtarë, kritikë e regjisorë nga Montale dhe Sereni, nga Bertoni tek Munari, dhe Marotta.

Në 7 shkurt të vitit 2006, ai u nda nga jeta. Piktori Ibrahim Kodra kthehet i vdekur në atdhe. Në aeroportin “Nënë Tereza” zbresin nga avioni që vinte nga Milano, arkivolin e tij. Me nderime dhe ceremonial shtetëror përcillet për në vendlindje. Varri i tij ngrihet mbi një kodër në fshatin Ishëm.

Me rastin e 95 – vjetorit të lindjes së piktorit të njohur shqiptar Ibrahim Kodra, në përkujtim te jetës dhe veprës së tij, pasditen e sotme, në Galerinë Kombëtare të Arteve, do të zhvillohet një bisedë me artistë dhe intelektualë.(LajmeShqip.com)

 
Lajme Shqip Friday, 06 April 2012 16:30

Tiranë – Ibrahim Kodra është ndër piktorët që përmes punimeve të tij do të kthehet në atdhe në këtë 100-vjetor të vendit.

Krijimet e tij artistike do të prezantohen për publikun shqiptar, në ekspozitën e radhës në Galerinë Kombëtare e Arteve, që prej datës 13 prill dhe deri në 20 maj. Ekspozita e tij do të mbaj emrin e një prej krijimeve të tij, “Shqipëria fantastike”.

Ekspozita e Ibrahim Kodrës do të çelet në bashkëpunim me Fondacionin Kodra në Milano, ku një grup i GKA-së ka përzgjedhur veprat e tij më të mira. Fondacioni “Ibrahim Kodra” ne Milano disponon vetëm pak prej qindra tablove të kompozuara nga Kodra, ndërkohë që shumë prej tyre janë shitur kur ai ka qenë ende gjallë.

Sipas GKA-së, 50 % e veprave të Kodrës ndodhet në Tiranë, në pronësi të koleksionistëve shqiptarë dhe 50 % e ekspozitës në GKA do të jetë me veprat e këtyre koleksionistëve dhe pjesa tjetër do të jetë nga Fondacioni Kodra.

Ibrahim Kodra ka lënë pas rreth 6 mijë vepra, të shpërndara nga muze privatë, koleksionistë dhe vetëm 2 mijë prej tyre janë të regjistruara dhe të dokumentuara. Ai ka hapur ekspozita në vende të ndryshme të botës me piktorët më të njohur bashkëkohorë, si ekspozitë kolektive në “Paradise”, me piktorë si Picasso, Dali, Matta, Ernest, Levi, Panseca, Braque etj. Ekspozitë kolektive në “Stone Gallery” në Newcastle me Corneille, Gear, Gleghorn, Michaux, Millares. Ekspozita në Itali, Gjermani, Francë, Amerikë etj.

Ibrahim Kodra ka lindur në Ishëm të Durrësit në vitin 1918. Ai vdiq në vitin 2006 në Milano të Italisë ku jetonte prej 30 vjetësh. Veprat e tij gjenden në  Muzeumin e Vatikanit, në Dhomën e Deputetëve në Romë, në Galeri dhe në Muzeume të njohura të botës si në Itali, Zvicër, Danimarkë, Gjermani, Japoni, Angli, Francë, USA, Rusi, etj.

Pas Ibrahim Kodrës, GKA do të çel edhe ekspozitën e piktorit Lid Delija edhe kjo në kuadër të 100-vjetorit.

 
Lajme Shqip Saturday, 19 March 2011 13:32

Ishëm – Kryeministri Sali Berisha bëri sot homazhe në varrin e piktorit të shquar Ibrahim Kodra, të cilin e cilësoi si “një nga kolosët e pikturës shqiptare, italiane dhe evropiane”. 
Gjatë vizitës në Ishëm ku përuroi segmentin rrugor Bubq-Ishëm, Kryeministri u ndal dhe bëri homazhe te varri i piktorit Ibrahim Kodra. 
“Ai u largua në fillim të viteve 1930, por gjithë jetën ruajti frymëzimin që morri nga vendlindja e tij. U kthye si “Nder i Kombit” dhe prehet në vendlindjen e tij”, u shpreh kryeministri.
“Ibrahim Kodra dhe vepra e tij dëshmojnë se shqiptari i lirë me genin krijues mund të arrijë në të gjitha nivelet. Në këtë kontekst ky është një premtim i madh për të ardhmen e shqiptarëve”, vijoi Kryeministri.
Në fund kryeministri Berisha pasi vlerësoi nderin e madh që i bëjnë kombit korifejtë e arteve pamore si Kodra, kujtoi edhe problemet që i krijojnë atij piktorët e dështuar, duke iu referuar profesionit të kryesocialistit Rama.      
“Pikturat le t’ua lëmë korifejve dhe kolosëve”, përfundoi vlerësimin e tij kryeministri Berisha.
Piktori i madh Ibrahim Kodra (Ishëm 1918 – Milano 2006) është varrosur sipas dëshirës së tij në një nga kodrat e Ishmit, pranë së cilës ndodhet edhe kalaja mesjetare. Z. Berisha dhe drejtuesit qendorë dhe vendorë vizituan edhe një pjesë të Kalasë, në brendësi të së cilës banojnë disa familje.