Lajme Shqip Thursday, 01 March 2012 08:30

Tiranë – Helena Kadare, Romeo Çollaku, Lindita Arapi, Agron Tufa, Viola Isufaj dhe Persida Asllani do të marrin pjesë në Panairin e librit në Lajpcig të Gjermanisë, që do të mbahet në datat 14 deri në 17 mars.

Sa u takon botuesve, deri tani janë emrat e katër shtëpive: Dituria, Argeta LMG, Onufri dhe Ombra GVG. Secila shtëpi botuese do të ekspozojë atje botimet e veta më përfaqësuese, ndërsa mësohet se hapësira dedikuar botimeve shqip këtë vit është më e madhe, rreth 24 metra katrorë.

Me grupin e njerëzve të librit do të jetë edhe një kuartet, që do të luajë muzikë. Shkrimtarët shqiptarë do të mund të lexojnë pjesë nga librat e tyre dhe do të mund të takojnë lexuesit. Për këtë aktivitet, i cili konsiderohet si një nga më të rëndësishmit, bëhet e ditur se në këtë panair do të flitet për letërsinë bashkëkohore shqipe, duke përfshirë edhe letërsinë e atyre shkrimtarëve që nuk do të jenë të pranishëm.

Kjo është hera e dytë që Shqipëria merr pjesë në Panairin e librit në Lajpcig, ndërkohë që Shoqata e Botuesve Shqiptarë ka nënshkruar një marrëveshje trevjeçare me Ministrinë e Kulturës për prezantimin në këtë  Panair.

Helena Kadare është fituesja e çmimit “Shkrimtarja e vitit” në Panairin e Librit Shqip në nëntor të vitit të kaluar, kur edhe prezantoi kujtimet e saj përkrah Ismail Kadaresë, nën titullin “Kohë e pamjaftueshme”.

Një vit më parë në një sipërfaqe 16 metra katrorë u prezantuan pesë shtëpi botuese (“Dituria”, “Onufri”, “Ombra”, “Neraida” dhe “Fan Noli”) dhe pesë shkrimtarë relativisht të rinj, por të afirmuar Ervin Hatibi, Luljeta Lleshanaku, Ardian Kyçyku, Agron Tufa, Ledia Dushi e Albana Shala. Shqipëria mori pjesë për herë të parë me një stendë, ku dhe në mbrëmjen me titullin “Ballkani bën rrok” Shqipëria u prezantua edhe nga ana muzikore me grupin “Akustika”.

Panairi Ndërkombëtar i Librit “Leipzig 2011”, është një ndër panairet më të mëdha të librit në botë. Me një tradite rreth 4 shekullore ky eveniment mbledh botues, shkrimtarë dhe njerez te letrave nga e gjithë bota. Në vitin 2010 janë regjistruar 156.000 vizitorë dhe 2071 botues nga 39 vënde.

 
Lajme Shqip Monday, 14 November 2011 16:30

Tiranë – Në Pallatin e Kongreseve në Tiranë ditën shtunë u ndanë çmimet e Panairit të 14-të të Librit “Tirana 2011”. Juria me anëtarë: Mirela Kumbaron, Pëllumb Xhufin, Arta Markun, Dhurata Shehrin,  Xhevat Beqarajn vlerësoi me çmimin “Autori i Vitit 2011” Helena Kadarenë për romanin “Kohë e pamjaftueshme”, me motivacionin: “Për elegancë në shkrim dhe emocionet e thella që kapërcejnë objektin e rrëfimit. Jo një jetë e rrëfyer, por rrëfimi i jetës”.

“Kohë e Pamjaftueshme” triumfoi mbi katërshen e librave të përfolur si më të shitur të  këtij panairi: “Shqipëria” me autor Ben Blushin, “Kurbani” Edi Rama, “Enver Hoxha” Blendi Fevziu. Edhe kësaj here lexuesit nuk i shpëtuan yshtjes që ushqen promovimi i librave para se të vijnë në panair. Botuesit hezitojnë të japin shifra për shitjen e librave me shpjegimin se me to shpesh bëhen abuzime dhe nuk janë treguesi real i shitjeve. “Stenda tregon vetë” tha para vitrinës së mbushur plot Arlinda Dudaj, botuesja e “Kurban”-it. Nuk preferoi të jepte një shifër as Bujar Hudhri, botues i “Onufrit”, shtëpia që botoi librin “Kohë e Pamjaftueshme”.

Çmimi i Veçantë i Jurisë iu dha Muhamet Ademit për “Lirika e fijes së barit” me motivacionin “Për personalitetin kompleks të një poeti të panjohur që na sjell vlerat e një letërsie, e cila mbijetoi edhe pa lexues”. Përkthyesi i Vitit u shpall Shpëtim Çuçka për shqipërimin nga italishtja të librit “Historia e bukurisë” të Umberto Ecos, me motivacionin “Për vlerat e sjelljes në shqip me cilësi e thellësi të njërës prej veprave të rëndësishme të letrave bashkëkohore botërore”. Në kopertinën e botimit luksoz lexuesit i jepet ky shpjegim: “Megjithëse shoqërohet me ilustrime nga qindra kryevepra të të gjitha kohëve, ky libër nuk përbën një histori arti. Ilustrimet, ashtu si edhe një përzgjedhje e gjerë citimesh nga Pitagora deri në kohën tonë, shërbejnë për të rikujtuar pikëpamjet e ndryshme mbi të Bukurën, të cilat janë shfaqur e janë bërë objekt debatesh që nga Greqia e lashtë e deri sot. Ky libër ndriçon mënyrat e ndryshme se si është kuptuar Bukuria e natyrës, luleve, e kafshëve, e yjeve, e përpjesëtimeve matematike, e dritës, e gurëve të çmuar, e veshjeve, e Zotit dhe e Djallit”.

Veç vlerësimit të Stendës me Paraqitjen më të Mirë Grafike që u nda për shtëpinë botuese “Pegi”, një çmim tjetër shkoi për shtëpinë botuese “Albas” e vlerësuar për Librin e Vitit për Fëmijë, çmim që i kushtohej revistën “Grupsat”. Botimi nuk i afron fëmijët me botën e Ëinx-ave apo të këngëtarëve të preferuar, por është një enciklopedi që ka edhe argëtimin brenda. Ajo i referohet “Horizonti”-t, një prej revistave të dashura për fëmijët e para viteve ‘90, pa pasur parasysh përmbajtjen ideologjike. Për këtë arsye çmimi iu dha “Për vlerat edukative, enciklopedike, estetike dhe argëtuese në formimin e shijeve te lexuesi i vogël”. Në panair “Albas” përuroi 50 tituj të rinj që i përkasin projektit për edukimin parashkollor, i cili ka për qëllim sensibilizimin e prindërve, mësuesve dhe opinionit publik për mënyrën e përdorimit të informacionit të librave. Ndër to, librat e serisë “Si të mbrojmë planetin”, 3 R-të: Ripërdorim, Reduktim dhe Riciklim, që i ndihmojnë fëmijët të kuptojnë se burimet e tokës janë të kufizuara dhe mjaft të çmuara, ndaj duhen përdorur dhe mbrojtur me kujdes. Rita Petro, drejtoresha e botimeve, theksoi se në libra preken edhe tema të tjera aktuale me qëllimin e dhënies së një mesazhi me rëndësi, “nëse nuk flasim hapur me fëmijët, atëherë problemet tona do të jenë më të rënda”.

“Para se të bënim projektin me serinë e librave, ne studiuam tregun dhe pamë se nuk i mungonin enciklopeditë ose librat me përralla. Ndaj menduam të bënim diçka ndryshe. Madje këta lloj librash ndihmojnë edhe të rriturit, sepse deri në moshën 6 vjeç fëmija nuk di të lexojë. Kështu që ai informacionin e librit do ta marrë nëpërmjet prindit. Këta libra thyejnë tema “tabu” dhe duhen më parë të përthithen nga prindërit dhe edukatorët”, shpjegon Petro. Po si do shkojë libri në dorën e fëmijës? Botuesja tregon që nuk synohet tregu komercial. Nga ana tjetër, shkollat kanë qenë të mbyllura për kësilloj botimesh dhe nuk janë përfshirë në politikat e Ministrisë së Arsimit. E vetmja rrugë që ato të futen në shkolla, është rishqyrtimi i botimeve shkollore nga komisionet të cilat duhet të vlerësojnë, përzgjedhin, vendosin për botimet cilësore. Por, sa aplikohet kjo në praktikë?!, citoi Petro.

 

 
Lajme Shqip Saturday, 12 November 2011 21:00

Tiranë – Panairi i Librit “Tirana 2011” ka shpallur sot fituesit e edicionit të 14-të, ku autorja më e mirë është vlerësuar Helena Kadare për librin “Kohë e pamjaftueshme”.

“Për elegancë në shkrim dhe emocionet e thella që e kapërcejnë objektin e rrëfimit. Jo një jetë e rrëfyer, por rrëfimi i Jetës”, thuhet në motivacionin e çmimit.

Në rreth 700 faqe botim, rrëfehet historia personale e autores me të shoqin, Ismail Kadare, por bashkë me këto ndodhi shfaqen për lexuesin ngjarjet politike, sociale, fakte kurioze mbi jetën e Kadareve në diktaturë dhe post saj.

“Kohë e pamjaftueshme”, libri që ka ngjallur shumë debate në vend, zbulon fatin e një çifti të pazakontë, në këtë rrëfim të mbushur plot ngjarje që dalin dhe e kapërcejnë të zakonshmen.

Përkthyesi i vitit u shpall Shpëtim Çuçka, për përkthimin e “Historia e bukurisë” të Umberto Ecos, me motivacionin “Për vlerat e sjelljes në shqip, me cilësi e thellësi, të njërës prej veprave të rëndësishme të letrave bashkëkohore botërore”.

Revista “Grupsat” e shtëpisë botuese “Albas” u vlerësuar si libri i vitit për fëmijë me motivacionin “Për vlerat edukative, enciklopedike, estetike dhe argëtuese në formimin e shijeve te lexuesi i vogël”.

Juria e panairit me anëtarë Mirela Kumbaron, Pëllumb Xhufin, Arta Markun, Dhurata Shehrin, Xhevat Beqarajn, akordoi dhe çmimin e veçantë të jurisë, që e tërhoqi poeti Muhamet Ademi për librin “Lirika e fijes së barit”, me motivacionin “Për personalitetin kompleks të një poeti të panjohur, që na sjell vlerat e një letërsie e cila mbijetoi edhe pa lexues”.

Një çmim tjetër ishte edhe ai stendës me paraqitjen më të mirë grafike, që iu dha shtëpisë botuese “Pegi”.

Panairi i Librit “Tirana 2011″” u çel në 9 nëntor në Pallatin e Kongreseve, ku gjatë tre ditëve të para të tij interesi ka qënë shumë i lartë. Radhë të gjata ka pasur në stendat e botimeve të Ben Blushit për librin “Shqipëria”, Edi Ramës për librin “Kurban” dhe Blendi Fevziut për librin “Enver Hoxha”.

Panairi i Librit do të qëndojë i hapur edhe ditën e nesërme.