Lajme Shqip Tuesday, 19 March 2013 12:48

Prishtinë – Zëvendëskryeministri i vendit, Hajredin Kuçi, pas takimit me komisionarin për Zgjerim të BE-së, Shtefan Fule,  deklaroi të martën se Qeveria e Kosovës është e gatshme të jetë konstruktive në dialogun me Serbinë dhe në takimin e nesërm tha se do të shkohet me vullnetin për të arritur marrëveshje. Nga ana e tij zyrtari i lartë i BE-së mbështeti dialogun dhe dinamikën e tij midis Kosovës e Serbisë, si një interes të të dy vendeve, suksesi i të cilit mirëpritet nga Bashkimi Europian.

Zëvendëskryeministri me këtë rast theksoi se kryeministri Hashim Thaçi në takimin, që pritet të mbahet nesër me kryeministrin serb, Ivica Daçiq, do të shkojë me vullnetin për të arritur marrëveshje, me qëllim të paqes, stabilizimit dhe normalizimit të raporteve, por siç tha ai, duke pasur parasysh respektimin e sovranitetit të Kosovës.

Kuçi po ashtu tha se në takimin me Fulen, ka prezantuar të arriturat dhe gatishmërinë për përmbushjen e obligimeve lidhur me procesin integrues, duke theksuar posaçërisht përmbushjen e kritereve afatshkurta.Ai kërkoi që të përshpejtohet procesi sa i përket marrëveshjes së Stabilizim-asocimit si dhe liberalizimit të vizave. Kuçi tha se presin hapa konkretë nga Komisioni Evropian muajin e ardhshëm.

Komisionari për Zgjerim i BE-së, Stefan Fule ka deklaruar se Prishtina e Beogradi janë afër përmbushjes së detyrave sa i përket integrimeve evropiane, megjithatë ai ka thënë se Kosova duhet të shfaq kurajo më shumë në sundimin e ligjit, luftën kundër korrupsionit dhe zhvillimit ekonomik.Këto, komente, Fule i bërë pas takimit që pati me Zëvendëskryeministri i Republikës së Kosovës, Hajredin Kuçi dhe ministrinë e integrimeve, Vlora Çitaku.

Fule e vlerësoi progresin e bërë deri më tani , duke thënë se ky progres është si rezultat i punës së madhe që ka bërë Kosova dhe për hapat tjerë do të vendosin shtetet anëtare në qershor.“Kosova duhet të shfaqet kurajo më të madhe në sundimin e ligjit, luftën kundër krimit dhe korrupsionit dhe zhvillimin ekonomik, vazhdimin e reformave për rrugën e saj drejt Evropës dhe do ta kemi përkrahjen tonë gjithmonë”, ka thënë ai.

Sipas tij, palët janë më afër që të përmbushin detyrat që kanë të bëjë me anëtarësimin e BE-së.Sipas tij, marrëveshja Kosovë-Serbi do të ishte mirë të arrihej për të mirën e qytetarëve të të dyja vendeve, si dhe do të forconte aspiratat për integrime evropiane.

Takimi ndërmjet kryeministrit Thaçi dhe atij serb, Daçiq pritet të mbahet të mërkurën, më 20 mars. Komisioneri për Zgjerim i BE-së pritet të takohet edhe me presidenten Jahjaga si dhe me krykuvendarin Krasniqi.(LajmeShqip.com)

 
Lajme Shqip Thursday, 19 July 2012 17:37

Prishtinë – Lufta kundër krimit të organizuar dhe korrupsionit mbetet kusht kyç për avancimin e agjendës evropiane të Kosovës, mesazhe këto që janë konfirmuar edhe nga zyrtarët më të lartë evropianë si dhe nga Sekretarja Amerikane e Shtetit, Hillary Clinton. Qeveria Thaçi, përveç që nuk ka treguar vullnet për luftimin e këtyre dukurive, ka kontribuar në rritjen e tyre, sidomos në institucionet që do të duhej të ishin shembull i luftimit të dukurive negative, vlerëson partia më e madhe opozitare në vend, Lidhja Demokratike e Kosovës.

Në fakt, siç theksohet në një komunikatë të LDK-së, Qeveria e Kosovës vazhdimisht shfrytëzon agjendën evropiane si mjet për fuqizim të pushtetit, e jo si nxitje për zhvillim dhe reformë.

“Rritja e rasteve te dyshuara për korrupsion në vitin 2011 dhe 2012, në krahasim me vitin 2010, po e minon funksionimin efikas të institucioneve. Për më tepër, kjo po e zbehë kredibilitetin e tyre para qytetarëve dhe para institucioneve e partnerëve ndërkombëtarë si dhe po e bllokon fuqizimin e subjektivitetit ndërkombëtar të Kosovës. Për më tepër kjo Qeveri, veçse forcon gjetjet e raportit të Freedom House – ‘Kombet në Tranzicion’, ku Kosova cilësohet si regjim autoritar gjysëm i konsoliduar”, thekson LDK.

Procesi i liberalizimit të vizave dhe integrimi i Kosovës në BE, në përgjithësi, sipas LDK-së, po dëmtohet seriozisht duke pasur parasysh që numri i zyrtarëve të dyshuar për falsifikim të dokumenteve është signifikant, duke dëmtuar kështu procesin e sigurisë së dokumenteve si një nga komponentët kyç në këtë proces.

Skandalet e shumta në institucionet që kanë rol kyç në procesin e integrimit evropian, sipas kësaj partie, dëshmojnë mosgatishmërinë e kësaj Qeverie për të avancuar interesat e Kosovës në proceset euro-atlantike. Ndërsa bllokimi i punës së Kuvendit nga ana e Qeverisë – siç thekson LDK – ishte edhe një alarm se kjo Qeveri përfaqëson anti-vlera evropiane.

“Me veprime që nuk ndodhin askund, dhe për të mbrojtur interesa që po e dëmtojnë zhvillimin ekonomik të vendit, Qeveria bënë që Kosova të dështojë në zbatimin e reformave ekonomike dhe në krijimin e një ambienti të përshtatshëm për biznes”.

Qeveria përmes sabotimit të punës së Kuvendit, sipas LDK-së, bllokoi edhe kalimin e një sërë vendimesh që janë konsideruar parakushte për reflektim të progresit në Studimin e Fizibilitetit. “Këtu përfshihen emërimet në Bordin e KPM-së dhe RTK-së si dhe një sërë ligjesh që do të dëshmonin vullnetin e institucioneve për një vlerësim pozitiv nga institucionet e BE-së në vjeshtë të këtij viti”.

“Me këto veprime Qeveria dëmton edhe Studimin e Fizibilitetit i cili pritet të publikohet, si dhe bënë që Qeveria e Kosovës të jetë shkaktari kryesor i stagnimit të proceseve integruese”, thuhet më tutje në komunikatë.

“Qeveria e Kosovës vazhdon politikat kontradiktore, me spektakle televizive, krijime te grupeve punuese, duke lënë anash zbatimin konkret të detyrimeve që dalin nga Plan Veprimi për Partneritet Evropian. Kjo lloj politike rrezikon seriozisht momentumin pozitiv të Brukselit ndaj rajonit në përgjithësi”.

Lidhja Demokratike e Kosovës i bën thirrje Qeverisë së Kosovës që urgjentisht të adresojë seriozisht obligimet që dalin nga agjenda Evropiane, e posaçërisht ato që ndërlidhen me fushën e sundimit të ligjit, me reformën e administratës publike, me përmirësimin e ambientit biznesor dhe shtrirjen e sovranitetit në veri.

 
Lajme Shqip Wednesday, 30 May 2012 23:17

Bruksel – Mbledhja e parë e Dialogut të Strukturuar për Sundimin e Ligjit është mbajtur të mërkurën në Bruksel.

Ky dialog është projektuar për të ndihmuar Kosovën që të adresojë sfidat në fushën e sundimit të ligjit, e cila është shqetësimi kryesor për Ballkanin Perëndimor në tërësi. Zyra e BE-së në Kosovë bën të ditur se në këtë fazë, Komisioni Evropian do të fokusohet në gjyqësor dhe në luftën kundër korrupsionit dhe krimit të organizuar.

Sa i përket luftës kundër krimit të organizuar, Komisioni ka theksuar rëndësinë e përmirësimit të kapacitetit të Kosovës, që në mënyrë efektive të hetojë dhe ndjekë penalisht rastet e krimit të organizuar ndërkufitar, të trafikut të drogës dhe të qenieve njerëzore. Ky mekanizëm po ashtu ka theksuar nevojën për përpjekje të shtuara në parandalimin, hetimin dhe ndjekjen e korrupsionit.

Në lidhje me gjyqësorin, Komisioni Evropian ka vënë në pah rëndësinë e një gjyqësie efikase dhe të pavarur. “Pas progresit të arritur në miratimin e legjislacionit kyç, Kosova është inkurajuar për ndjekjen e reformave gjyqësore, për të forcuar edhe më tej pavarësinë, joanshmërinë dhe transparencën”, deklaroi Komisioni Evropian.

Sipas tij, Qeveria e Kosovës ka konfirmuar se sundimi i ligjit mbetet prioritet i lartë dhe se është fuqimisht e përkushtuar për të arritur rezultate. (R.EL)

 
Lajme Shqip Tuesday, 27 March 2012 11:54

Prishtinë (PLOTESUAR 19:00) Kosova do t’i përmbushë të gjitha obligimet dhe kriteret e nevojshme demokratike, theksoi Kryeministri Hashim Thaçi, pas takimit që zhvilloi sot me Komisionerin e lartë për Zgjerim të BE-së, Stefan Füle.

Kryeministri i Republikës së Kosovës, Hashim Thaçi, priti sot në një takim Komisionerin e lartë për Zgjerim të BE-së, Stefan Füle, i cili po qëndron në vizitë zyrtare në Kosovë. Pas takimit kryeministri Thaçi dhe komisionari Fyle dhanë një konferencë shtypi.

Thaçi përshëndeti vizitën e zotit Füle në Kosovë, gjithashtu për fillimin e Studimit të Fizibilitetit, si dhe mundësinë e ofrimit të nënshkrimit të Marrëveshjes për Stabilizim Asociim. Ai tha se ky akt është jashtëzakonisht i rëndësishëm në historinë e re të Kosovës në procesin e integrimit të Kosovës në Bashkimin Evropian.

“Konkretisht, Kosovës i ofrohet mundësia për nënshkrimin e marrëveshjeve kontraktuale me Bashkimin Evropian. Kjo nënkupton trajtimin e njëjtë dhe të barabartë të Bashkimit Evropian edhe për Kosovën”, tha Thaçi.

Prandaj, shtoi ai, falënderoj Komisionarin Füle për prezencën e tij sot në Kosovë, gjithashtu edhe pjesëmarrjen e tij në formimin dhe themelimin e Këshillit Kombëtar për Integrim Evropian dhe fillimin e Studimit të Fizibilitetit, i cili ka për qëllim vlerësimin dhe skanimin e gjendjes praktike në Kosovë dhe rekomandimin e fillimit të Marrëveshjes për Stabilizim Asocimit ndërmjet Kosovës dhe Bashkimit Evropian.

Mendoj, shtoi ai, se ky është një hap i rëndësishëm i përkushtimit të përbashkët të politikës, institucioneve, shoqërisë civile, është një konsensus shtetëror, politik dhe qytetar për të ardhmen evropiane të Kosovës.

“Prezenca e sotme e z. Füle  në Prishtinë është mbështetje dhe inkurajim i ri për neve. Në ditët e ardhshme, ministrat e Qeverisë së Kosovës do të jenë në Bruksel. Shumë shpejt presim të marrim udhërrëfyesin për liberalizimin e vizave. Kosova do t’i përmbushë të gjitha obligimet dhe kriteret e nevojshme demokratike në mënyrë që të lëvizim shpejt në një afat rekord për implementimin e këtyre kritereve dhe përmbylljen e procesit të liberalizimit të vizave dhe anëtarësimin e Kosovës në strukturat e Bashkimit Evropian”, theksoi Thaçi.

*************************

Prishtinë (PLOTESUAR 15:30) Komisioneri për Zgjerim i BE-së, Stefan Fule, tha sot në Prishtinë,”se viti 2012 është një vit i mundësive për Kosovën”. Duke shprehur kënaqësinë që ka marrë pjesë në takimin e parë të Këshillit Kombëtar për Integrim Evropian, ku u dorëzoi udhëheqësve me të lartë të vendit Dokumentin e fillimit të Studimit të Fizibilitetit për marrëveshjen e Stabilizim-Asociimit për Kosovën , Fule theksoi në konferencën e përbashkët për shtyp me Presidenten e Kosovës Atifete Jahjaga se, “e mirëpres këtë qasje gjithëpërfshirëse meqë është thelbësore për përshpejtimin e përparimit të Kosovës drejt BE-së”.

“Ne e kemi filluar formalisht studimin e fizibilitetit për Marrëveshjen e Stabilizim Asociimit me Kosovën. Kjo e shtyn përpara axhendën evropiane për Kosovën. Studimi i fizibilitetit për Kosovën do të hapë një epokë të re në marrëdhëniet tona. Kosova duhet të përqendrohet në çështjet që janë të një rëndësie imediate për studimin e fizibilitetit”, tha Fule duke shtuar se do të doja që të nënvizoja disa prej tyre si, tregtia, reforma në administratën publike, reforma zgjedhore, sundimi i ligjit dhe integrimi i pakicave.

Komisioneri Fule tha se, “është me rëndësi që të sigurohet se kjo reflekton progres maksimal në zbatimin e axhendës së reformës evropiane dhe se kjo kërkon një mbështetje të gjërë publike dhe përkushtim të të gjithë spektrit politik”.

“Viti 2012 është një vit i mundësive për Kosovën. Studimi i fizibilitetit është një hap i rëndësishëm. Kjo është pjesë e një axhende ambicioze të marrëdhënieve ndërmjet BE-së dhe Kosovës”, theksoi Fule.

Në këtë kontekst, ai theksoi pritjen që udhërrëfyesi për vizat t’i prezantohet Kosovës gjatë kësaj pranvere. “Ne gjithashtu presim përparim, gjatë këtij viti, në hapjen e programeve të BE-së dhe anëtarësim në Bankën Evropiane për Rindërtim dhe Zhvillim. Në fund të muajit maj do të fillojë dialogu i strukturuar në sundimin e ligjit”, potencoi Füle.

Ne, shtoi ai, po punojmë ngushtë me autoritetet e Kosovës në planet e tyre për axhendën afatgjate dhe gjithëpërfshirëse për veriun. “Sikur e thashë edhe në hapjen e Këshillit Kombëtar për Integrime Evropiane është thelbësore që të gjitha forcat politike në Kosovë të mbështesin ndërtimin e besimit në mënyrë gjithëpërfshirëse, ashtu që të ketë komunikim të mirëfilltë dhe integrim, jo konfrontim”, theksoi Fule.

Presidenten Jahjaga tha se, “takimi i sotëm inaugurues i Këshillit Kombëtar për Integrim Evropian të Kosovës ishte informues dhe referues me paraqitjen e pikëpamjeve që të harmonizohemi dhe të koordinohemi, në mënyrë më të efektshme brenda institucioneve, që t’i kryejmë të gjitha ato detyra që kërkohen prej nesh”.

“Sot ishim këtu të dëshmojmë përkushtimin tonë, synimin tonë dhe dëshirën e të gjithë qytetarëve të Republikës së Kosovës, pa dallim, që alternativa jonë e vetme është të anëtarësohemi në Bashkimin Evropian, dhe gjithashtu po e them këtu sepse kjo është e ndërlidhur me politikat e sigurisë rajonale dhe globale, ne dëshirojmë dhe po ndërtojmë kapacitete të nevojshme që të bëhemi anëtar i NATO-s duke dhënë kontributin tonë në misionet humanitare dhe paqeruajtëse”, tha ajo.

Ky Këshill Kombëtar, sipas presidentes Jahjaga, përveç simbolikës së vet dhe drejtimit nga ajo si Presidente e vendit dhe faktor i unitetit do të zhvillojë veprimtari konkrete duke mos qenë organ ekzekutiv, por vend i zbatimit të plotë të kushtetutshmërisë dhe ligjshmërisë në përbërje më të gjerë institucionale pozitë, opozitë dhe shoqëri civile.

Presidentja Jahjaga zhvilloi edhe një takim të veçantë me Stefan Fule, Komisioner për Zgjerim i BE-së, ku bisedoi për një varg çështjesh me interes, për punën e Këshillit Kombëtar për Integrim Evropian, rolin e tij, për integrimin e mëtejshëm të minoriteteve, për dialogun dhe domosdoshmërinë e implementimit të marrëveshjeve të dala nga ky dialog e çështje të tjera.

**************************

Prishtinë- “Studimi i fizibilitetit për Kosovën do të hapë një fazë të re të marrëdhënieve tona”, tha Komisioneri për Zgjerim i BE-së, Stefan Fule në një konferencë shtypi, të mbajtur pas takimit inaugurues të Këshillit Kombëtar për Integrim Evropian të Kosovës, ku zyrtarisht u shpall fillimi i studimit të fizibilitetit.

Presidentja Atifete Jahjaga, tha se “sot ishim këtu për të dëshmuar përkushtimin tonë, synimin dhe dëshirën e të gjithë qytetarëve të Republikës së Kosovës pa dallim që alternativa jonë e vetme është të anëtarësohemi në Bashkimin Evropian”.

Në takimin e sapopërfunduar të Këshillit Kombëtar për Integrim Evropian të Kosovës morën pjesë edhe kryeministri i Republikës së Kosovës Hashim Thaçi, kryetari i Kuvendit Jakup Krasniqi, lideri i opozitës Isa Mustafa – kryetar i LDK, zyrtarë të tjerë të lartë të institucioneve e udhëheqës të partive politike, përfaqësues të shoqërisë civile, si dhe diplomatë të akredituar, të vendeve të quintit.

Para inaugurimit të Këshillit, Fule është pritur në takim nga presidentja Atifete Jahjaga, ndërsa tani do pritet edhe nga kryeministrii Hashim Thaçi, si dhe anëtarë të tjerë të qeverisë.

*******************************

Prishtinë – Në Kosovë, që prej ditës së sotme ka nisur punën një institucion i ri që quhet Këshilli Kombëtar për Integrime Evropiane. 

Ky këshill do të funksionojë nën udhëheqjen e Atifete Jahjaga. Gjatë takimit të themelimit të këtij Këshilli, komisionari për zgjerim Shtefan Fyle ka hapur edhe zyrtarisht procesin e hartimit të studimit të fizibilitetit për Kosovën.

Komisionari Fyle tha se studimi do të identifikojë edhe sfidat që duhet përmbushur tutje, në mënyrë që edhe Kosova një ditë të mund të negociojë për nënshkrimin e marrëveshjes së Stabilizim-Asociimit.

Në themelimin e këtij këshilli morën pjesë edhe kryeparlamentari  Jakup Krasniqi dhe kryeministri Hashim Thaçi. I pari i Kuvendit të Kosovës tha se për vendin nuk ka asnjë rrugë tjetër veç në familjen  evropiane.

Kurse, Kryeministri Hashim Thaçi tha se përmes këtij këshilli vendi do të krijojë një vizion  të qartë. Ai tha se integrimi evropian tashmë është prioriteti kryesor i vendit.

Në takimin e sotëm, vec krerëve institucionalë morën pjesë edhe lideri opozitar Isa Mustafa si dhe përfaqësues të komisioneve parlamentare.