Lajme Shqip Thursday, 16 May 2013 11:10

Prishtinë – LDK-ja dhe Vetëvendosja kërkojnë që zgjedhjet lokale të mbahen në vjeshtë. Koha e përshtatshmë për zgjedhje sipas tyre është pjesa e dytë e shtatorit, apo fillimi i tetorit, në mënyrë që të evitohet vjedhja e votave si në zgjedhjet e kaluara. Pikërisht për këtë fakt LDK-ja është e bindur se i humbi zgjedhjet e kaluara.
E për Vetëvendosjen, nëse presidentja Jahjaga nuk e cakton datën e zgjedhjeve deri më 29 maj, atëherë ajo do të bëhet bashkëfajtore në procesin e vjedhjes së votave. Albulena Haxhiu ka thënë se Kushtetuta e Kosovës dhe ligjet në fuqi përcaktojnë se zgjedhjet duhet të mbahen në mënyrë periodike çdo katër vjet.
Por, shoqëria civile vlerëson se Presidentja po pret takimin e radhës mes kryeministrave Hashim Thaçi dhe Ivica Daçiq në Bruksel, për të shpallur datën e zgjedhjeve lokale. Ndërsa këshilltari i presidentes Atifetet Jahjaga, Arbër Vllahiu, i ka thënë KTV-së se presidentja do ta caktojë datën e zgjedhjeve lokale atëherë kur të përfundojnë të gjitha konsultimet me të gjithë liderët e partive politike.

 
Lajme Shqip Tuesday, 14 May 2013 10:45

Presidentja e Kosovës,  Atifete Jahjaga do t’i shpallë zgjedhjet lokale për të gjitha komunat, përfshirë edhe ato veriore, kurse datën e mbajtjes së tyre do të kumtojë para 15 gushtit. Kështu ka deklaruar për ‘Tribunën’ zëdhënësi i presidentes, Arbër Vllahiu. Sipas tij, Jahjaga është në fazën e konsultimeve me partitë politike në lidhje me zgjedhjet e ardhshme në nivel të komunave.
“Kur të harmonizohen qëndrimet e partive për datën e përafërt dhe kur të konsiderohet se janë krijuar kushtet e nevojshme për mbajtjen e zgjedhjeve në gjithë territorin e Kosovës, caktimi i datës nuk është imponim por zgjidhje konsensuale”, ka thënë Vllahiu.
Presidentja, ka vijuar ai, e ka afatin ligjor që deri më datën 15 gusht ta dekretojë ditën e mbajtjes së zgjedhjeve komunale që gjithsesi duhet të jetë ditë e diel.Shoqëria civile kërkon që data e zgjedhjeve komunale të caktohet nga pjesa e dytë e shtatorit, përkatësisht fillimi i muajit tetor. Drejtori Ekzekutiv i Institutit Demokratik të Kosovës, Ismet Kryeziu, ka tërhequr vërejtjen se në periudhën e dimrit, kur dita zgjat më pak, mundësitë për parregullsi janë më të mëdha, ngase errësohet më herët.

 
Lajme Shqip Monday, 04 February 2013 16:19

Prishtinë –  Liderët e partive politike janë marrë vesh që në zgjedhjet e ardhshme të garohet me një njësi zgjedhore në Kosovë, duke mos ndryshuar asgjë nga praktikat e deritashme, raporton ktv-ja.

Kjo ka ndodhur pas takimit të ftuar nga kryeministri Thaçi me liderët e partive politike, në të cilin kanë marrë pjesë kreu i LDK-së, Isa Mustafa, kryetari i AKR-së, Bexhet Pacolli, nënkryetari i AAK-së, Blerim Shala, Avni Klinaku nga Lëvizja për Bashkim dhe kryetari i Partisë Turke të Kosovës, Mahir Jagxhillar. Në këtë takim nuk është parë lideri i Lëvizjes “Vetëvendosje”, Albin Kurti.

Sipas zyrtarëve të Vetëvendosjes, kryeministri i vendit nuk u kishte dërguar atyre fare ftesë.
“Është një pajtueshmëri e përbashkët që vendi duhet të shkojë në zgjedhjet e ardhshme me një zonë të përbashkët zgjedhore dhe procesi duhet të përshpejtohet, në mënyrë që edhe komisioni t’i kryejë punët për reformën elektorale dhe ka mbetur të diskutohet edhe procesi i listave nëse duhet të jenë të hapura apo të mbyllura”, ka thënë pas takimit kryeministri i vendit, Hashim Thaçi. Ndërkaq, lideri i LDK-së, Isa Mustafa, ka thënë se pasi të diskutojnë brenda partisë, do të vendosin për reformën e listave, në mënyrë që të vijnë në përfundim se ç‘është më parimore dhe më demokratike, që zgjedhjet të jenë fer dhe korrekte.

Kurse, lideri i AKR-së, Behxhet Pacolli, e ka përshëndetur marrëveshjen dhe, sipas tij, kjo ka qenë më se e nevojshme.(KTV/LajmeShqip.com)

 
Lajme Shqip Thursday, 17 January 2013 14:06

Tirane – Shqipëria u radhit në kategorinë e vendeve me liri të pjesshme, në raportin e ri të “Freedom House”, që nënkupton kufizime në respektimin e lirive politike dhe atyre civile.

Një përfaqësuese e organizatës, Sylvana Kolezckowa, i tha ‘Zërit të Amerikës’ se vendi ynë dhe Kosova përballen me probleme të ngjashme, sidomos përsa i takon mungesës së aftësisë për të luftuar krimin e organizuar e për të ndjekur penalisht korrupsionin politik në nivele të larta.

Sylvana Kolezckowa, i pershkroi te rendurit ne kete kategori si vende ku ekzistojne intitucionet demokratike, por funksionimi i tyre ka te meta te medha. Shqipëria është anëtare e NATO-s dhe aspiron të anëtarësohet në Bashkimin Evropian. Megjithatë, edhe në klasifikimin e këtij viti ajo vazhdon të renditet si vend pjesërisht i lirë.

Kolezckowa jep këtë shpjegim: Fakti që Shqipëria vazhdon të ndeshet me një mur pengesash dhe refuzimesh lidhur me anëtarësimin, thote ajo, nuk është dhe aq për t’u habitur po të shikosh dobësitë në disa prej institucioneve bazë të vendit, që Bashkimi Evropian i merr shumë seriozisht, /sidomos në gjyqësor, në sundimin e ligjit dhe në zbatimin e ligjit antikorrupsion.”

 

Shqiperia krahasuar me nje vit me pare, ndodhet pothuajse ne shkallen e njejte te vleresimit. Sivjet ajo ka marrë notën 3 për dallim nga një vit më parë kur ishte vlerësuar me 3.5.Nga vendet e rajonit, bashkë me Shqipërinë dhe Kosovën, në radhën e vendeve me liri të pjesshme janë edhe Bosnja dhe Maqedonia, ndërsa Serbia, Kroacia e Mali i Zi, radhiten në mesin e vendeve të lira.(T.CH/LajmeShqip.com)

 
Lajme Shqip Wednesday, 16 January 2013 11:57

Washington – Kosova edhe në këtë vit në raportin e Freedom House mbi Liritë në Botë, është renditur në në mesin e vendeve pjesërisht të lira.

Sipas përcaktimit të Freedom House, shtet pjesërisht i lirë, është ai që ka kufizim të respektimit të lirive politike dhe atyre civile.

Një shtet i tillë shpesh vuan nga një ambient i korruptuar, sundim të dobët të ligjit, grindje fetare e etnike dhe një skenë politike ku një parti e vetme dominon me gjithë shkallën e caktuar të pluralizmit.

Vitin e kaluar Kosova ka qenë vend, gjithashtu, pjesërisht i lirë dhe notimet në dy shtyllat kryesore që, sipas Freedom House, përcaktojnë lirinë e një vendi, kanë mbetur identike, nota 5 për të drejtat politike dhe 4 për liritë civile.

Notimet nga 1 deri në 2.5 vlejnë për vendet e lira, nga 3 në 5 vendet pjesërisht të lira dhe nga 5.5 në 7 vendet jo të lira.

Nga vendet e rajonit, bashkë me Kosovën, në kategorinë e vendeve pjesërisht të lira janë Shqipëria, Bosnja dhe Maqedonia.

Ndërsa, shtete të lira janë konsideruar Serbia, Kroacia e Mali i Zi.

Shtet i lirë, sipas Freedom House, është ai ku ka konkurrencë të hapur politike, një klimë të respektimit të lirive civile, jetë të pavarur civile dhe media të pavarura.

Ndryshe, në raportin mbi gjendjen e Lirisë Globale, të Freedom House, potencohet se shfaqja e lëvizjeve popullore për reformat kanë qenë forcë nxitëse për fitoret e mëdha në Lindjen e Mesme në vitin e kaluar, transmeton REL.

Megjithatë, një numër i rajoneve kanë treguar kthim prapa si pasojë e reagimit autoritar ndaj këtyre lëvizjeve.

“Gjetjet tona tregojnë një rritje të sofistikuar të autoritarizmit modern”, thotë Arch Puddington, zëvendëspresident i Freedom House për hulumtime.

“Ata janë fleksibilë; ata shtrembërojnë dhe abuzojnë me kornizën ligjore; adoptojnë teknikat e propagandës moderne”, ka shtuar ai.

“Në veçanti që nga Pranvera Arabe, ata janë nervozë, që ka të bëjë me përndjekjen e intensifikuar nga ana e tyre të lëvizjeve popullore që kërkojnë ndryshime”.

Numri i shteteve të përcaktuara si të lira në vitin 2012 ishte 90, që paraqet 46 për qind të 195 shteteve në botë.(K.N/LajmeShqip.com)