Lajme Shqip Sunday, 18 November 2012 22:02

Luis Hemilton me MekLaren ka fituar Çmimin e Madh të SHBA të Formula 1në pistën e Teksasit, duke mundur pas një dueli entuziazmues Sebastian Vetel me Red Bull. Britaniku ka marrë suksesin por edhe gjermani është kënaqur me vendin e dytë, pasi ka lënë pas krahëve Fernando Alonson, duke çuar në 13 pikë diferencën mes të dyve para garës së fundit të sezonit në Formula 1.

Vetel është nisur i pari dhe ka mbrojtur mirë pozicionin e tij, ndërsa Alonso ka kapërcyer tre kundërshtarë që në kthesën e parë duke u ngjitur në vendin e katërt. Spanjollit i vjen ndihma pikërisht nga skuadra Red Bull, pasi Ueber tërhiqet në xhiron e 18-të dhe i lëshon vendin e tretë pilotit të Ferrarit, që gjithsesi sheh nga larg duelin për kreun mes Vetel dhe Hemilton pa u bërë asnjëherë protagonist.

Pas tentativave të njëpasnjëshme për shumë xhiro me radhë, më në fund Hemilton kalon Vetel në xhiron e 42-të duke shfrytëzuar sistemin DRS, me pilotin gjerman që më pas u ankua për manovrën e britanikut në ato momente. Që nga ai çast, pilotët në pistë mendojnë vetëm të mbrojnë pozicionet dhe gara mbyllet me suksesin e Hemilton para Vetel, me Alonson në vendin e tretë.

Vendi i katërt i shkoi brazilianit Felipe Masa me Ferrari pas një gare të jashtëzakonshme gjatë të cilës ai u duk shpesh se ishte i shpejtë po aq sa kryesuesit. E njëjta gjë mund të thuhet edhe për Xhenson Baton me MekLarenin tjetër, që mori vendin e 5-të falë një strategjie perfekte, ku filloi garën me gomat e forta. Sipas radhës, në zonën e pikëve përfunduan edhe Kimi Raikonen (Lotus), Romen Groszhan (Lotus), Niko Hulkenberg (Force India), Pastor Maldonado (Uilliams) dhe Bruno Sena (Uilliams).

Tani të gjithë presin me padurim garën e fundjavës së ardhshme në Brazil, ku lufta do të jetë vetëm për titullin kampion të pilotëve, pasi me pikët e marra sot, skuadra Red Bull siguroi kampionatit e tretë radhazi për konstruktorë. (LajmeShqip.com)

 
Lajme Shqip Saturday, 17 November 2012 21:59

Sebastian Vetel është vetëm 56 xhiro larg shkrimit të emrit të tij në librat e historisë së garave të Formula 1, me synimin për t’u bërë fituesi më i ri i tre titujve kampion. Gjermani vazhdoi dominimin e tij absolut duke marrë pole-position në Çmimin e Madh të SHBA në Teksas, ndërsa vendosi kohët më të shpejta në çdo sesion provash të kësaj fundjave.

Për 25 vjeçarin, në garën e tij të 100-të në Formula 1, ky është pole-position i 6-të i sezonit, ndërsa është i 36-ti në një karrierë të shkëlqyer që nesër mund të hapë një faqe të re të suksesshme. Gjermani kryeson renditjen me 10 pikë diferencë ndaj Fernando Alonsos, me shansin më të mirë për të mbyllur luftën për titullin kampion pasi spanjolli në këtë garë do të niset vetëm nga vendi i 8-të.

Alonso duhet të mbarojë garën me më pak se 15 pikë diferencë nga Vetel për të luajtur të gjitha shanset e tij në garën e fundit të sezonit, ndonëse duket qartë se Ferrari i tij nuk është në nivelin e makinave Red Bull të cilat në pjesën e dytë të sezonit kanë qenë të pakapshme.

Por edhe Vetel nuk ka një punë shumë të lehtë, pasi përkrah tij, në vijën e parë, niset Luis Hemilton, një kundërshtar i vështirë që do të provojë në të gjitha mënyrat jo vetëm të duelojë me të, por edhe të synojë fitoren e kësaj gare ku shumë gjëra do të varen nga konsumi i gomave për shkak të papastërtive që krijohen në pistë. (LajmeShqip.com)

 
Lajme Shqip Monday, 12 November 2012 18:34

Sebastian Vetel mendon se ai dhe Fernando Alonso e meritojnë në mënyrë të barabartë titullin kampion në këtë sezon të Formula 1, pasi kanë patur të dy një rrugëtim të ngjashëm ku sukseset janë kombinuar me aksidente dhe paraqitje zhgënjyese të makinës.

Alonso ishte favorit për të fituar titullin, pasi në pjesën e parë të sezonit fitonte pikë pa ndërprerje, ndonëse makina e tij nuk ishte në nivelin më të lartë. Por katër fitore radhazi të Vetel bënë që gjermani të përmbyste një avantazh prej 42 pikësh të spanjollit dhe është ai tashmë në kryesimin e kampionatit me 10 pikë avantazh.

“Nëse sheh garat që kemi zhvilluar deri tani, fatkeqësitë në garë, apo ato që nuk kemi përfunduar, janë të barabartë. Akoma mendoj se kampion do të shpallet piloti që e meriton më shumë. Pa dyshim që unë jam në një pozicion mjaft të mirë dhe do të bëj maksimumin deri në fund që të sigurohem që do të marr fitoren”.

“Sigurisht që garat e fundit na kanë ndihmuar shumë. Po të shohësh 20 garat e sezonit, kemi patur shumë probleme teknike që na kanë penalizuar, por shpresojmë që t’i kemi lënë pas krahëve ato. Është shumë e vështirë që të vazhdosh kaq shumë gara pa aksidente, por gjithsesi duhet të jesh i përgatitur kur këto gjera ndodhin, që t’i kalosh dhe të reagosh”, tha piloti 25 vjeçar i cili në garën e të dielës në SHBA do të regjistrojë nisjen e 100-të në karrierë në Formula 1. (LajmeShqip.com)