Lajme Shqip Sunday, 28 October 2012 14:44

Sebastian Vetel thelloi në 13 pikë kryesimin e tij në botërorin e Formula 1 pasi arriti të fitonte garën e katërt radhazi në Çmimin e Madh të Indisë. Fernando Alonso ishte në gjendje që këtë radhë të minimizonte dëmet duke marrë vendin e dytë, për të mbajtur gjallë shanset e titullit kampion kur kanë mbetur edhe tre gara nga fundi i sezonit.

Rivalët e gjermanit të Red Bull as nuk patën mundësinë t’i afroheshin gjatë garës, pasi ai u shkëput i ndjekur nga shoku i tij i skuadrës, Mark Ueber, ndërsa Fernando Alonso përfitoi duke u futur mes dy makinave MekLaren, duke lënë pas Hemilton e duke ndjekur Baton, të cilin e kaloi sapo iu dha mundësia në pjesën e drejtë të pistës falë sistemit DRS.

Vendi i tretë dukej si pozicioni më i mirë i mundshëm i Alonsos deri në gjysmën e dytë të garës, kur një problem në makinën e Ueber bëri që spanjolli të kalonte australianin dhe të hidhej dëshpërimisht në sulm për të kapur Vetel.

Por gjermani ishte i pandalshëm dhe kaloi vijën e finishit me rreth 10 sekonda diferencë ndaj ndjekësit të tij, ndërsa Ueber e mbylli garën i treti, duke u mbrojtur nga sulmet e Hemilton që u rendit në vendin e  katërt. Vendi i pestë i shkoi Xhenson Baton, ndërsa më pas në zonën e pikëve me radhë u renditën Felipe Masa (Ferrari), Kimi Raikonen (Lotus), Niko Hulkenberg (Force India), Roman Groszhan (Lotus) dhe Bruno Sena (Uilliams). (LajmeShqip.com)

Renditja e botërorit për pilotë

240      Sebastian Vetel (Red Bull-Reno)

227      Fernando Alonso (Ferrari)

173      Kimi Raikonen (Lotus-Reno)

167      Mark Ueber (Red Bull-Reno)

165      Luis Hemilton (MekLaren-Mercedes)

141      Xhenson Baton (MekLaren-Mercedes)

93        Niko Rosberg (Mercedes)

90        Roman Groszhan (Lotus-Reno)

89        Felipe Masa (Ferrari)

66        Serxho Perez (Sauber-Ferrari)

 
Lajme Shqip Saturday, 27 October 2012 14:32

Sebastian Vetel ktheu dominimin e tij në Çmimin e Madh të Indisë në një tjetër “pole-position” për skuadrën Red Bull, e cila dominoi provat zyrtare duke vendosur të dy pilotët e saj në dy vendet e para.

Që në fillim u pa qartë që kualifikueset do të ishin një duel brenda skuadrës që ka dominuar provat dhe garat e fundit, me Ueber që fillimisht siguroi vendin e parë, por më pas u desh të dorëzohej para shokut të tij të skuadrës që regjistroi xhiron e tij më të shpejtë në 1 minutë e 25.283 sekonda.

Rreshti i dytë në vijën e nisjes i përket dy makinave MekLaren, me Luis Hemilton të tretin e Xhenson Baton të katërtin, një renditje që mund të ndikojë në luftën për titullin kampion. Kjo për shkak të vendit të pestë të Fernando Alonso, i cili do ta ketë shumë më të vështirë të synojë fitoren në pistën indiane. I vetmi ngushëllim për Ferrarin është prova e radhës pozitive e Felipe Masa, i cili regjistroi kohën e 6-të më të shpejtë dhe në garën e nesërme do të shërbejë si një mbrojtës për Alonson.

Vetë spanjolli deklaroi se nuk po lufton vetëm kundër Sebastian Vetel për titullin kampion, por edhe kundër gjenialitetit të Adrian Njuei, projektuesit të makinës Red Bull, i cili ka arritur të bëjë mrekullinë e radhës për ta bërë Vetel të pakapshëm nga kundërshtarët.

“Aktualisht nuk luftojmë vetëm kundër Sebastian, por duhet të them se po luftojmë edhe kundër Njuei, i cili ka arritur të çojë makinat e tij në vendin e parë apo të dytë në katër garat e fundit. Ne na duhet të kalojmë sa më shpejt dy makinat MekLaren dhe të vëmë nën presion pilotët e Red Bull duke pritur një gabim të tyre. Nëse ata nisen dhe shkëputen që në fillim, nuk kemi asnjë shans”, pranoi piloti spanjoll i cili deri pak javë më parë kryesonte i shkëputur renditjen e botërorit por tani ndjek Vetel me 6 pikë diferencë. (LajmeShqip.com)

 
Lajme Shqip Thursday, 25 October 2012 20:15

Fernando Alonso është munduar të ruajë qetësinë ndonëse është kaluar në renditjen e botërorit të Formula 1 nga Sebastian Vetel. Spanjolli i Ferrarit është munduar të shpjegojë disi situatën aktuale dhe shpresat që tashmë në makinë të bëhen ndryshime të rëndësishme që do ta ndihmojnë në luftën për titull.

“Ka 5-6 gara në të cilat unë nuk kam parë zhvillime të ndjeshme në makinën tonë. Sytë e të gjithëve janë drejtuar nga Ferrari dhe shtypi vazhdon të shkruajë se ka të reja të rëndësishme. Unë për vete them më mirë të presim zhvillimin e provave të lira të të premtes për të parë nëse do të arrijnë rezultate më të mira”, u shpreh piloti pas mbërritjes së tij në Indi ku në fundjavë do të zhvillohet një nga katër garat e fundit të sezonit.

“Le të themi se tani kam humbur avantazhin që më jepte mundësinë të gaboja një herë, por e cilësoj pozitën time mëse të mirë. Sidomos përsa i përket anës psikologjike, aty nuk ka ndryshuar asgjë, pasi jam 6 pikë mbrapa Vetel, por garohet ende për 100 pikë! Ndaj e shoh veten si të barabartë me Vetel përsa i përket mundësive që kemi në luftën për titull, pak gjëra kanë ndryshuar në krahasim me më parë”, shtoi ai.

“Mendoj se në garat e mbetura do të jetë një garë mes “paketave” në total që ofrojnë Ferrari dhe Red Bull. Do të jetë një përzierje mes forcës dhe mundësisë së skuadrës, makinës dhe pilotit. Çdokush do të përdorë pikat e tij të forta për të bërë më të mirën”, shtoi Alonso. (LajmeShqip.com)