Lajme Shqip Monday, 15 April 2013 16:30

Prishtinë – (E plotësuar) Fjala hyrëse e prokurores është përkrahur nga pala e dëmtuar.

“Si palë e dëmtuar i bashkangjitemi ndjekjes penale. Ne do të parashtrojmë kërkesë pasurore juridike të cilën do ta precizojmë gjatë gjykimit”, tha avokati i Jeta Xharrës, Kolë Ramaj.

Ndërsa, avokati i Lushtakut, Arianit Koci në fjalën e tij tha se boshti i këtij gjykimi penal akuzon klientin e tij për një fjali në intervistë.

Duke e quajtur klientin e tij Gjenerali Lushtaku, ai tha se Gjenerali kurrë nuk ka bërë presion ndaj Jeta Xharrës.

“Nuk ia lejon nderi dhe burrëria”, tha Koci.

“Për fjalinë e thënë ka kërkuar falje publike”, theksoi ai.

Aktakuza, sipas Kocit, është skajshmërisht e pasaktë.

“Përmendja e zgjedhjeve nga ana e prokurores po i jep konotacion politik këtij gjykimi. Nuk ka elemente për asnjë vepër penale për çka akuzohet Gjenerali pasi kërkoi falje publike dhe dëshmoi se është njeri paqësor dhe që e respekton ligjin”, tha Koci.

Në aktakuzë prokurorja ka thënë se UÇK’ja ka bërë krime gjatë luftës.

Koci dhe i pandehuri Rexhep Hoti e kanë dënuar këtë duke kërkuar që prokurorja e këtij rasti të jep sqarime për fjalët që ajo ka përdor për UÇK’në.

Hoti ka bërë thirrje që prokurorja të dalë në gjyq për këtë punë.

“Lufta e UÇK’së ka qenë e shenjt”, tha Hoti, i cili ka vendosur që për dallim prej tjerëve fjalën hyrëse ta merr vet.

“Aktakuza fillon me fjali të përrallave të Andersonit. Nuk kam besuar që gjykata do të bjen në këtë nivel. Do të isha shumë i kënaqur nëse do të dënohesha për liri të mendimit dhe medias. E lus prokuroren të mos luajë me konceptin e lirisë”, tha Hoti.

“A është kërcënim?”, e pyeti prokurorja.

“Jo, është shprehje e lirisë së mendimit”, tha Hoti.

“Me njohjet tuaja në EULEX mund të më dërgoni në burg. Do të isha i turpëruar sikur të isha prokurore e të përmendja vrasje qe po hetohen nga EULEX. Në vend se prokurorja të merret me ndriçimin e vrasjeve, ajo po merret me lirinë në media”, shtoi ai.

Hoti kërkoi që Arizona Dibra, e cila sipas tij kurrë nuk ka pasur gisht në politikat redaktoriale, të mos përzihet në rastin e BIRN,

“Jam në gjendje të paguaj komision për ta vërtetuar atë çfarë thash. Mos i merrni në qafe njerëzit që s’kanë pas gisht në ketë punë”, theksoi Hoti.

Fjala hyrëse e Hotit ka nervozuar prokuroren, por trupi gjykues nuk e lejoi atë për replikë.

Prokurorja fjalët e Hotit i quajti kërcënime dhe ofendime.

“Nuk e di pse jam këtu me orë të tëra. Nuk jam marr kurrë me politikën redaktuese. Nuk pranoj asgjë. Të gjitha që janë thënë për mua janë të pavërteta”, tha Arizona Dibra.

Edhe të akuzuarit e tjerë po kundërshtojnë aktakuzën, Ata vlerësojnë se nuk ka fakte për dyshimet e bazuara që janë paraqitur në aktakuzë.

“Në këtë gjykim Jeta Xharra paraqitet si viktimë e gazetarisë. Kurse, raportet bankare se ajo është gazetare e privilegjuar. Unë kam pasur program në RTK e jam paguar 50 herë më pak se Jeta. Prandaj e vlerësoj se kjo aktakuzë është tipike politike. Aktakuza është aferë politike për me ‘mjelë’ fonde”, tha i pandehuri tjetër, Qani Mehmedi.

Përplasen për fjalën hyrëse

Pas deklarimit të të pandehurve ka nisur leximi i fjalëve hyrëse nga ana e prokurores. Kjo ndodhi pavarësisht insistimeve të avokatit mbrojtës të Sami Lushtakut, i cili kërkoi paraqitjen e menjëhershme të dëshmitareve të rastit.

Arianit Koci kërkoi qe fjala hyrëse të lexohet në seancën e radhës, por diçka e tillë nuk u pranua nga trupi gjykues.

Madje, derisa Koci ka propozuar që fjalët hyrëse të lexohen një ditë tjetër, prokurorja Maria Bamie ka thënë se insistimi i Kocit është tendencë për ta shtyrë procesin gjyqësor, sepse po ofrohen zgjedhjet.

Mirëpo, kjo është mohuar nga Koci, pasi sipas tij, ai as që ka diskutuar me klientin për këtë punë.

Ndërkohë, siç kemi raportuar, Sami Lushtaku i ka kërkuar falje Jeta Xharres.

Ndërkaq, Arianit Koci, ka thënë se klienti i tij nuk e ka kërcënuar zonjën Xharra.

“Nuk behet fjale për kurrfarë kërcënimi”, ka thënë Koci.

Deklarohen të pafajshëm

Të gjithë të pandehurit u deklaruan të pafajshëm në të gjitha pikat e aktakuzës.

Pritet deklarimi i të pandehurve

Pasi prokurorja përfundoi leximin e aktakuzës, tashmë pritet deklarimi i të pandehurve lidhur me fajësinë apo pafajësinë e tyre.

Lushtaku i kërkon falje publike Jeta Xharrës

Në fillim të seancës Sami Lushtaku nëpërmjet avokatit të tij Arianit Koci ka vendosur t’i kërkojë falje publike Jeta Xharrës për fjalët që i ka thënë për të.

Sipas Kocit, ato fjalë kanë qenë një keqkuptim prandaj edhe Lushtaku kërkon falje.

Kurse, më pas prokurorja ka filluar leximin e pikave të aktakuzës.

Prokuroria Speciale e Kosovës, pati ngritur aktakuzë me të cilën i akuzonte Sami Lushtakun, Rexhep Hotin, Arizona Dibrën, Avni Azemin, Rizah Hajdarin dhe Qani Mehmedin, se në periudhën maj-qershor 2009 kishin nisur një fushatë mediale kundër Jeta Xharrës duke kryer veprat penale shkelje e statusit të barabartë të banorëve të Kosovës dhe kanosje, të dënueshme në bazë të kodit penal.

Sipas aktakuzës, veprat penale ishin kryer pasi që Xharra kishte udhëhequr një nga edicionet e emisionit “Jeta në Kosovë”, në RTK, ku kishte paraqitur keqmenaxhimin dhe kushtet e pafavorshme në Skenderaj, komunë e drejtuar nga Sami Lushtaku.

Fushata ndaj saj ishte zbatuar përmes botimit të artikujve për 12 ditë me radhë në gazetën Infopress, ku sipas aktakuzës, ishin përhapur gënjeshtra politike ndaj Jeta Xharrës me shprehjet si “Spiune e Serbisë, bombë profesionale, jetëshkurtër etj”.

Fillon seanca

Është zëvendësuar gjyqtarja vendore Valbona Musliu me gjyqtaren Lindita Jakupi.

Seanca ka filluar.

Gjykimi ndaj Lushtakut shtyhet për 40 minuta

Gjykimi ndaj Sami Lushtakut dhe të akuzuarve të tjerë në rastin e “BIRN”-it është shtyrë për 40 minuta, pasi njëra nga gjyqtaret është e sëmurë.

Sot gjykimi ndaj Sami Lushtakut për rastin e ‘BIRN’-it

Për pak çaste pritet të nisë gjykimi ndaj kryetarit të Skënderajt, Sami Lushtaku dhe të akuzuarve të tjerë në rastin e “BIRN”-it.

Kryetari i Skënderajt, Sami Lushtaku, Qani Mehmedi, Avni Azemi, Rexhep Hoti, Riza Hajdari dhe Arizona Dibra akuzohen nga prokuroria për veprat penale të kanosjes dhe shkelje të statusit të barabartë të qytetarëve të Kosovës.(G.E/LajmeShqip.com)

 
Lajme Shqip Tuesday, 09 April 2013 14:04

Koshare – “Beteja e Koshares” është një ndër betejat më të lavdishme të Ushtrisë Çlirimtare të Kosovës (UÇK), në luftën e saj për lirinë e vendit, e cila ishte simbol unifikimi i sferës politike dhe ushtarake të vendit. Kjo betejë u bë për ta thyer kufirin shqiptaro-shqiptar dhe për ta vendosur një kufi tjetër, atë me Serbinë. Kështu u tha ndër të tjera në shënimin e 14-vjetorin e “Betejës së Koshares”.
Zëvendëskryeministri i Republikës së Kosovës, Hajredin Kuçi, me këtë rast ka thënë se “Beteja e Koshares” është një prej betejave më të lavdishme, e cila shënon kulmin e unifikimit të sferës politike dhe ushtarake, e cila sipas tij, u bë për thyerjen simbolike të kufirit shqiptaro-shqiptar dhe vendosjen e një kufiri tjetër – atij me Serbinë. Ai ka kërkuar që këtë unitet ta ruajnë qytetarët e Kosovës dhe ta kultivojnë sa herë që është nevoja. Kuçi po ashtu e ka falënderuar jo vetëm shtetit shqiptar, por edhe te gjitha familjet për kontributin e tyre dhënë gjatë luftës në Kosovë.
Me një fjalë rasti, në këtë ditë, u është drejtuar të pranishmëve edhe Kryetari i Lidhjes Demokratike të Kosovës (LDK), Isa Mustafa, i cili ka shfaqur interesimin e partisë së tij për ta ndërtuar një shtet ashtu siç e kanë menduar dhe kërkuar ata që luftuan dhe u flijuan për këtë vend.
Po ashtu, edhe lideri i Aleancës për Ardhmërinë e Kosovës (AAK), Ramush Haradinaj, ka thënë se lufta ka qenë në një periudhë të ndjeshme dhe të vështirë. Me këtë betejë Haradinaj ka thënë se të gjithë mburremi me të, duke i nderuar të rënët dhe duke u zotuar se do te punojmë për një shtet ashtu siç e kërkuan dëshmorët.
Gjatë këtij manifestimi, një fjalë rasti e mori edhe Komandant i Brigadës 138 Agim Ramadani, Rrustem Berisha, i cili hodhi kritika edhe ndaj qeverive të deritashme në Prishtinë, por edhe ndaj qeverisjeve lokale të Deçanit, për të cilat ai ka thënë se nuk kanë bërë asgjë deri më tash për ta ndërtuar rrugën që çon deri te këto varreza dëshmorësh, e për të cilat po thuhet se janë shumë të rëndësishme për lirinë dhe historinë e vendit.(K.P/LajmeShqip.com))

 
Lajme Shqip Thursday, 07 March 2013 14:30

Prishtinë – Gjatë seancës solemne me rastin e 15 vjetorit të Epopesë së Ushtrisë Çlirimtare të Kosovës (UÇK), deputetëve u është drejtuar edhe kryeministri i Kosovës, Hashim Thaçi.

Ai ka thënë se Epopeja e UÇK-së shënon me të drejtë sakrificën e familjes Jashari. Sipas tij, tri ditët e Epopesë krijuan luftën e drejtë për çlirimin e Kosovës nga okupuesit shekullorë, duke realizuar ëndrrën për Çlirim të të gjithë brezave.

Thaçi duke kujtuar të kaluarën ka thënë se UÇK-ja ishte niveli më i lartë i organizimit politik dhe ushtarak që ka njohur ndonjëherë Kosova dhe si e tillë është cilësuar edhe si lëvizja më e suksesshme guerile e shekullit të XX-të.

Ai ka folur edhe për të tashmen duke çmuar të arriturat e tanishme dhe duke premtuar për punë të vazhdueshme në të ardhmen.

E kemi për obligim të përulemi para Epopesë së Jasharajve

Ka filluar seance solemne me rastin e 15 vjetorit të Epopesë së Ushtrisë Çlirimtare të Kosovës (UÇK). Seanca ka filluar me intonimin e himnit shtetëror të Kosovës, i cili edhe këtë herë është injoruar nga deputetët e Lëvizjes Vetëvendosje.

Deputeti i Lëvizjes Vetëvendosje, Rexhep Selimi, i cili e ka thirrur këtë seancë solemne ka thënë se ky Kuvend dhe këta deputet e kanë për obligim që të përulet me respekt për Epopenë e Jasharajëve në Prekaz me 5, 6 dhe 7 mars.

Selimi ka kujtuar Shaban Jasharin, në Ditën e mësuesit, duke çmuar punën e tij.

Ai ka thënë se rasti i flijimit të Familjes Jashari është unik në botë dhe si i tillë duhet kujtuar dhe ruajtur në vlerat më të larta të shtetit, pasi ata janë realizuesit e lirisë.

Selimi ka lexuar emrat e 56 të vrarëve të familjes Jashari në seancë. (K.P/LajmeShqip.com)

 
Lajme Shqip Wednesday, 06 March 2013 14:37

Prishtinë – Sot, në kuadër të manifestimit “Epopeja e UÇK-së”,  po bëhen homazhe te varrezat e Jasharëve në Prekaz. Atje kanë qëndruar presidentja Atifete Jahjaga, kryeministri Hashim Thaçi, kreu i Kuvendit, Jakup Kransiqi, e zyrtarë të tjerë shtetërorë, si dhe ish-ushtarë të UÇK-së dhe qytetarë të shumtë. Një ditë më parë në Prekaz bënë homazhe homazhe kryetari i AAK-së, Ramush Haradinja dhe ai i Vetëvendosjes, Albin Kurti.

Kryeministri i Qeverisë së Republikës së Kosovës, Hashim Thaçi, i shoqëruar nga anëtarë të kabinetit qeveritar, ka bërë sot homazhe në kompleksin memorial Adem Jashari, me rastin e shënimit të përvjetorit të “Epopesë së UÇK-së” në Prekaz.

Me këtë rast, kryeministri Thaçi ka thënë se rënia e komandantit Legjendar Adem Jashari dhe familjes Jashari ka bashkuar gjithë shqiptarët.

“Çdo rënie është e dhimbshme, por kjo rënie ka qenë ajo që e ka bashkuar popullin e Kosovës. Kjo rënie ka qenë ajo që ka ngritur në këmbë gjithë shqiptarët kudo që jetonin; që i ka bashkuar rreth idealit për çlirimin e Kosovës; për ndërtimin e Kosovës së pavarur dhe sovrane” ka thënë kryeministri Thaçi.

Shteti i Kosovës, theksoi kryeministri, po nderon  gjithë dëshmorët e lirisë por edhe sakrificën e qytetarëve të Kosovës për liri.

“Sot jemi në rrugë të sigurt, duke respektuar gjithmonë të kaluarën, duke marrë gjithmonë parasysh vizionin euroatlantik për të ardhmen e Republikës së Kosovës, vullnetin e qytetarëve të vendit, jemi duke konsoliduar dhe forcuar shtetin tonë. Ne kemi rreth 100 njohje ndërkombëtare dhe jemi në rrugë të sigurt për të qenë pjesë e NATO-s, Bashkimit Evropian dhe Organizatës së Kombeve të Bashkuara. Unë kam besim të plotë se kështu të bashkuar si qytetarë, si politikë, do të lëvizim shpejt, sigurt drejt të ardhmes së Kosovës së re, Kosovës demokratike, Kosovës evropiane, të zhvilluar dhe me një mirëqenie sociale të qytetarëve të saj” ka shtuar kryeministri Thaçi.(LajmeShqip.com)

 
Lajme Shqip Tuesday, 05 March 2013 14:05

Prishtinë (plotesuar) -Epopeja e Ushtrisë Çlirimtare të Kosovës (UÇK), 15 vite më parë bashkoi të gjithë, kudo që ishin, qytetarët shqiptarë, në Kosovë, Shqipëri, Maqedoni, Preshevë, në Mal të Zi, e diasporë, prandaj sot të gjithë përulemi për sakrificën e qytetarëve shqiptarë për lirinë e Kosovës, ka thënë kryeministri i vendit, Hashim Thaçi në ceremoninë ushtarake të Forcës së Sigurisë së Kosovës.

Fillimisht para pjesëtarëve të FSK-së ka parakaluar presidentja e Republikës së Kosovës, Atifete Jahjaga.

Ndërsa kryeministri i vendit, Hashim Thaçi ka thënë se me rreshtimin dhe parakalimin e trupave të FSK-së po fillon shënimi i 15 vjetorit të Epopesë Çlirimtare të Kosovës, sot kur shteti i Kosovës shënoi pesëvjetorin e pavarësisë dhe kur institucionet më të larta shtetërore të Kosovës po nderojnë njërën nga ngjarjet më të ndritura dhe heroike të historisë sonë të re.

Për më tepër ai ka shtuar se sot kur Kosova është njohur nga rreth 100 shtete, Kosova e lirë e sovrane po nderon heroizmin e komandantit legjendar Adem Jashari, sakrificën e familjes Jashari dhe te të gjithë të rënëve dhe dëshmorëve në altarin e lirisë.

Shefi i ekzekutivit të vendit ka thënë se 15 vjet më parë me një çmim të lartë jetësh e përpjekjesh, Kosova po ndërronte rrjedhat e historisë, po hapej fuqizimi i kapitullit të luftës së Ushtrisë Çlirimtare të Kosovës, kapitulli drejt fitores dhe lirisë së vendit tonë.

“UÇK-ja u bë zëri autentik i vullnetit të qytetarëve tanë. Prandaj, të gjithë qytetarët e Kosovës, pa dallim, u radhitën nga zëri i historisë. U radhitën me vizionin e Ushtrisë Çlirimtare të Kosovës. Këtë vizion të lirisë, humanizmin dhe demokracisë, e mbështeti edhe bota e përparuar. E mbështetin shtetet e demokracisë perëndimore, Shtetet e Bashkuara të Amerikës, shtete e Bashkimit Evropian, aleanca më e fuqishme ushtarake e botës, NATO. Me luftën e drejtë, vendosmërinë heroike dhe mbështetjen ndërkombëtare, Kosova realizoi ëndrrën më të lartë të saj, lirinë. Në themelet e kësaj ëndrre qëndron mundi dhe djersa e qytetarëve tanë, e mbi të gjitha gjaku dhe sakrifica e dëshmorëve të lirisë”, ka theksuar kryeministri Thaçi.

Ai ka thënë se pesëmbëdhjetë vjet pas Epopesë së Ushtrisë Çlirimtare të Kosovës, Kosova ka shënuar të arritura të pamohueshme, ndonëse ende ka mbetur shumë për tu bërë.

Sipas tij, Kosova me sukses ka kaluar periudhën e trancizionit, duke vënë bazat e një shoqërie të lirë dhe demokratike.

Më tej ai ka shtuar se Kosova, duke pasur një të kaluar të rëndë, çmon dhe vlerëson lartë paqen, lirinë, barazinë, dhe jetën e përbashkët brenda por edhe në rajon.

I pari i qeverisë ka thënë se Kosova çdo ditë me shumë po përbush parakushtet për tu bërë pjesë e institucioneve euroatlantike dhe atyre të Bashkimit Evropian.

“Kosova sot funksionon pa mbikëqyrjen ndërkombëtare. Çdo ditë e më shumë po përmbush parakushtet për t’u bërë pjesë e institucioneve euroatlantike, e Bashkimit Evropian, NATO-s dhe Organizatës së Kombeve të Bashkuara. Dëshmi e përkushtimit tonë institucional për perspektivën tonë euroatlantike, jeni vetë ju, të nderuar pjesëtarë të FSK-së, që me profesionalizmin tuaj, bëni që të jemi krenarë”, ka thënë ai.

Ndërsa komandanti i Forcës Sigurisë së Kosovës, Kadri Kastrati ka thënë se Epopeja e Ushtrisë Çlirimtare e Kosovës ka hyrë në të gjitha analet e studiuesve dhe strategëve ushtarak.

“Në këtë përvjetor të Ushtrisë Çlirimtare të Kosovës, Epopeja e shkruar në analet e historianëve, studiuesve dhe të strategëve të artit ushtarak epope që ka personazh familjen emblematike të kombit tonë, familjen e komandantit legjendar, Adem Jashari. Në 15 vjetor të legjendës sonë ne vijmë me avancimin e institucionit tonë, institucion që po tregon disiplinë, profesionalizëm, përkushtim dhe gatishmëri dhe avancim drejt përgjegjësive kombëtare e ndërkombëtare. Duke ndihmuar vendit në çlirimin e tij anëtarësimi në familjen e madhe globale”, ka thënë Kastrati.

Më tej, ai ka shtuar se institucioni i FSK-së është ndërtuar në shtetin e ri, shtetin e Kosovës i cili themelet i ka në sakrificën kombëtare.

Sipas tij, FSK po profesionalizohet dhe modernizohet mbi heroizmin dhe gjakun e familjes Jasharëve dhe mijëra dëshmorëve e martirëve të kombit.

Ceremonia ushtarake e FSK-së është përmbyllur me një program kulturor dhe artistik, ku kanë përformuar këngëtar të estradës sonë.(LajmeShqip.com)

***************************************************

Prishtine – Në Kosovë kane nisur aktivitetet ne kuader te “Epopesë së UÇK-së”, në shenjë kujtimi për rënien e Adem Jasharit, i shpallur komandanti legjendar i Ushtrisë Çlirimtare të Kosovës.

“Epopeja e UÇK-së” është një organizim gjithëpopullor që zhvillohet nën patronatin e kryeministrit të Kosovës.  Para 15 viteve, Adem Jashari dhe familja e tij ishin rrethuar nga forca të shumta policore serbe.

Si pasojë, komandanti Jashari bashkë me 54 familjarë, përfshi edhe gra e fëmijë, kishin mbetur të vrarë. Qeveria e Kosovës ka publikuar tashmë axhendën e tri ditëve të manifestimit.

Më 5 mars, në kazermën e FSK-së “Adem Jashari” në Prishtinë duke filluar nga ora 14:00 do të mbahet ceremoni ushtarake e FSK-së e shoqeruar me programin kulturor dhe artistik.

Më 6 mars do të bëhen homazhe pranë varrit të komandantit Adem Jashari dhe varrezave të familjes Jashari në kompleksin memorial “Adem Jashari” në Prekaz të Skenderajt, si dhe në të gjitha komplekset memoriale të dëshmorëve të UÇK-së në Kosovë.

Kurse në ora 18:00 në Sallën e Kuqe të Pallatit të Rinisë dhe Sporteve, do të mbahet Akademi përkujtimore kushtuar komandantit legjendar Adem Jashari, familjes Jashari dhe gjithë dëshmorëve dhe të rënëve për liri.

Ndërkaq në ditën e tretë, më 7 mars, duke filluar nga ora 18:00 në sheshin “Adem Jashari” në Skenderaj do të mbahet manifestimi “Nata e Zjarreve”, ku do të ndizen flakadanë të zjarreve dhe do të përcillen me një program kulturor-artistik.(LajmeShqip.com)

 
Lajme Shqip Sunday, 04 March 2012 11:30

Prishtinë 6 mars – Sot, në ditën e dytë të manifestimit “Epopeja e UÇK-së, në program janë homazhet te Kompleksi Memorial i “Adem Jashari” në Prekaz, te varrezat e dëshmorëve në Gllogjan, te shtatorja e Zahir Pajazitit në Prishtinë dhe ajo e Mujë Krasniqit në Klinë.

Epopeja e UÇK-së bashkoi të gjithë popullin shqiptar për t`u çliruar nga okupimi shekullor. Kështu u shpreh kryeministri Hashim Thaçi pasi bërë homazhe pranë shtatores së heroit të kombit Zahir Pajaziti. Ai tha se në këtë ditë po nderohen të gjithë ata që ranë në altarin e lirisë dhe kjo Epope sublimon vlerat kombëtare të popullit shqiptar.

“Sot jemi këtu duke nderuar dhe respektuar në mënyrë shtetërore një prej komandantëve më të shquar të UÇK-së Zahir Pajazitin, i cili me luftën, punën, sakrificën dhe heroizmin e tij, dërgoj mesazh tek të gjithë se pa luftë të armatosur nuk mund të çlirohet Kosova”, tha Kryeministri Thaçi.

Nderimi i dëshmorëve të UÇK-së, përçon mesazhin e marrjeve të energjive të reja për të ardhmen e vendit, duke e integruar Kosovën në BE, tha ndër të tjera kryeministri i vendit.

*************************************

Prishtinë (PLOTESUAR 5 Mars, 17:20) Duke përshëndetur fillimin e manifestimit treditësh gjithëpopullor tradicional  “Epopeja e UÇK-së”, sot në kazermën e FSK-së “Adem Jashari” në Prishtinë, familja e Komandantit Legjendar Adem Jashari bëri thirrje për unitet.

Në emër të familjes heroike nga Prekazi, Bekim Jashari, duke përshëndetur të gjithë të pranishmit në manifestim dhe qytetarët e vendit, përkujtoi se “populli ynë sot 14 vite më parë ishte në luftë, Kosovën e kishte kapluar tumi dhe flaka, por ishim bashkë, e ndihmuam njëri-tjetrin, që ne sot të gëzojmë lirinë”.

“Atëherë, vallë ne sot pse duhet kaq vështirë ta kemi që të jemi bashkë, ta duam njëri-tjetrin, ta ndihmojmë njëri-tjetrin, që ta çojmë këtë vend përpara, ta bëjmë shtet të fortë, konkurrent me shtetet tjera”, theksoi djali i heroit Hamëz Jashari.

Më 5, 6 e 7 mars 1998, në Epopenë e Prekazit, në mbojtje të pragut të shtëpisë dhe Kosovës, në luftën për liri dhe pavarësi, në përballje me sulmin e egër të forcave serbe, ranë heroikisht 56 anëtarë të Familjes Jashari, 20 prej tyre të Familjes së ngushtë të Komandantit Legjendar Adem Jashari.

*************************

Prishtinë (PLOTESUAR 5 Mars, 14:30)-Kryetari i Lidhjes Demokratike të Kosovës,  Isa Mustafa dhe anëtarët e Kryesisë bënë sot homazhe dhe vendosën kurora me lule te varri i Komandantit Adem Jashari, me rastin 14-vjetorit të qëndresës së tij heroike në Prekaz të Skënderajt.

“Adem Jashari dhe të gjithë të rënët e tjerë të Familjes Jashari janë heronj të të gjithë Kosovës dhe të kombit shqiptar në përgjithësi. Ata u flijuan për idenë e madhe të lirisë dhe të pavarësisë së Kosovës dhe si të tillë do të nderohen e do të kujtohen përgjithmonë nga populli dhe institucionet e Kosovës”, tha Kryetari i LDK-së,  Isa Mustafa, gjatë qëndrimit në familjen Jashari.

Mustafa ritheksoi se LDK-ja dhe të gjithë qytetarët e Republikës së Kosovën shprehin admirimin e plotë për veprën e Komandantit Adem Jashari dhe familjes së tij, të cilët dhanë një shembull të rrallë të sakrificës për çlirimin e atdheut.

*************************

Prishtinë (PLOTESUAR 5 Mars, 13:00) Në Kosovë filluan sot në mesditë ceremonitë e treditore të manifestimit gjithëpopullor tradicional “Epopeja e UÇK-së”, në kazermën “Adem Jashari” në Prishtinë, me parakalimin e kuadrateve të FSK-së, me pjesëmarrjen e drejtuesve të institucioneve më të larta dhe përfaqësuesve të Familjes Jashari nga Prekazi.

Në manifestimin e hapur me Himnin Kombëtar dhe Himnin e Kosovës, kryeministri Hashim Thaçi theksoi pak më parë se “14-vjetori i ‘Epopesë së UÇK-së’ përkon edhe me 100-vjetorin e Pavarësisë së Shqipërisë dhe Flamurit Kombëtar.

“13 vjet në Kosovën e lirë dhe 4 vjet në Kosovën e pavarur janë të pamjaftueshme për realizimin e të gjitha ëndërrave, por të mjaftueshme për të treguar vendosmërinë dhe vullnetin për të krijuar insitucione të përgjegjshme, shoqëri bashkëkohore dhe shtet modern europerëndimor”, u shpreh Thaçi.

Manifestimi “Epopeja e UÇK-së”, (5, 6 dhe 7 mars) organizohet nga qeveria në nderim të Epopesë së Ushtrisë Çlirimtare të Kosovës dhe në kujtim të Komandantit Legjendar Adem Jashari, Familjes Heroike Jashari dhe gjithë dëshmorëve të kombit, si dhe të gjithë të rënëve për lirinë dhe pavarësinë e vendit dhe popullit tonë, me moton “Nderojmë të kaluarën -ndërtojmë të ardhmen”.

Manifestimi i filluar me ceremoninë kryesore në kazermën “Adem Jashari” në Prishtinë, me parakalimin e kuadrateve të FSK-së, vazhdon me një program kulturor-artistik nga ansamblet dhe këngëtarët e njohur të estradës dhe të ansamblit “Shota”.

Nesër, më 6 mars, do të bëhen homazhe te Kompleksi Memorial i Komandantit Legjendar Adem Jashari dhe Familjes Jashari në Prekaz, nga ora 10:00 -12:00.

Ndërsa, në orën 18.00, në Sallën e Kuqe të Pallatit të Rinisë dhe Sporteve në Prishtinë, do të mbahet Akademia Përkujtimore, kushtuar Komandantit Legjendar Adem Jashari, Familjes Jashari dhe të gjithë dëshmorëve të kombit. Akademia do të ketë edhe një program artistik nga Filarmonia e Kosovës.

Më 7 Mars, në ora 18.00, në Kompleksin Memorial Adem Jashari në Prekaz do të mbahet manifestimi “Nata e Zjarreve” ku do të ndizen pishtarët simbol i luftës dhe sakrificës për liri, si dhe në të gjitha vendet ku janë zhvilluar betejat e UÇK-së në Kosovë.

Ndërsa programi kulturor-artistik, do të mbahet në sheshin “Adem Jashari” në Skenderaj. Më 5, 6 e 7 mars 1998, në Epopenë e Prekazit, në mbojtje të pragut të shtëpisë dhe Kosovës, në luftën për liri dhe pavarësi, në përballje me sulmin e egër të forcave serbe, ranë heroikisht 56 anëtarë të Familjes Jashari, 20 prej tyre të Familjes së ngushtë të Komandantit Legjendar Adem Jashari.

*************************

Prekaz (PLOTESUAR 5 Mars, 12:35) Homazhet në Komplekisn memorial “Adem Jashari” në Prekaz filluan sot që në orët e para të mëngjesit.

Në 14 vjetorin e rënies së komandnatit legjendar Adem Jashari dhe sakrificës sublime të jasharëve, ndër të parët homazhe bëri kryeparlamentari Jakup Krasniqi.

Ai tha se 5 marsi është ditë më e shënuar për historinë e popullit të Kosovës, ndërsa Prekazi si një vend i shenjtë.

Homazhe te varri i komandantit legjendar Adem Jashari bëri edhe delegacioni i AAK, i kryesuar nga nënkryetari Ahmet Isufi. Jasharët dhe Prekazi janë frymëzim për të gjithë qytetarët e Kosovës, tha me kete rast Isufi.

Si kryeparlamentari Krasniqi ashtu edhe nënkryetari i AAK-se Isufi, vizituan më pas familjen Jashari dhe u priten nga Murat e Lulzim Jashari.

Ndërkohë homazhe tek varrezat po bëjnë edhe qytetarë, nxënës, studentë e delegacione të ndryshme nga gjithë Kosova.

****************************

Prishtinë (PLOTESUAR 5 Mars, 11:45) Manifestimi nisi në orën 11 në Prishtinë me parakalimin e Forcës së Sigurisë së Kosovës, ndërsa vazhdon nesër me homazhe në Kompleksin Memorial “Adem Jashari”, kurse përmbyllet më 7 mars me “Natën e Zjarreve.

Presidentja e Kosovës, Atifete Jahjaga, e cila ndodhet për vizitë në SHBA, i është drejtuar me një telegram familjes Jashari, me rastin e përvjetorit të betejës së lavdishme të 5 marsit 1998.

Në telegram ndër të tjera thuhet se përkushtimi i heronjve dhe atdhedashuria, mbesin udhërrëfim për ne. Ata janë bazament i shtetësisë dhe pavarësisë së Republikës së Kosovës.

Kryetari i Kuvendit të Kosovës, Jakup Krasniqi, ka bërë sot homazhe te Varrezat e Dëshmorëve në Prekaz si dhe ka vizituar  familjen Jashari.

Me rastin e 14-vjetorit të Epopesë së Ushtrisë Çlirimtare të Kosovës, Prekazin sot do ta vizitojnë edhe zyrtarë tjerë të institucioneve si dhe subjekteve të ndryshme politike.

 ***************************

Prishtinë- Në Kosovë nga dita e sotme përgjatë tre ditëve, 5-7 mars do të nisë manifestimi gjithëpopullor tradicional “Epopeja e UÇK-së”.

Manifestimi organizohet nga qeveria në nderim të Epopesë së Ushtrisë Çlirimtare të Kosovës dhe në kujtim të Komandantit Legjendar Adem Jashari, familjes heroike Jashari, dëshmorëve të kombit dhe gjithë të rënëve për lirinë dhe pavarësinë e Kosovës, me moton “Nderojmë të kaluarën -ndërtojmë të ardhmen”.

Manifestimi do të nisë me ceremoninë kryesore më 5 mars në orën 11:00 në kazermën “Adem Jashari” në Prishtinë me parakalimin e kuadrateve të FSK-së, një program kulturo-artistik nga ansamblet dhe këngëtarët e njohur të estradës dhe të ansamblit “Shota”.

Sipas axhendës, në të do të flasin komandanti i FSK-së, gjenerallejtënant Kadri Kastrati, kryeministri Hashim Thaçi dhe përfaqësuesi i Familjes Jashari.

Më 6 mars do të bëhen homazhe te Kompleksi Memorial i Komandantit Legjendar Adem Jashari dhe Familjes Jashari në Prekaz, nga ora 10:00 -12:00, ndërsa në orën 18.00, në Sallën e Kuqe të Pallatit të Rinisë dhe Sporteve në Prishtinë, do të mbahet Akademia Përkujtimore kushtuar Komandantit Legjendar Adem Jashari, Familjes Jashari dhe të gjithë dëshmorëve të kombit si dhe një program artistik nga Filarmonia e Kosovës.

Më 7 Mars, në ora 18.00 në Kompleksin Memorial Adem Jashari në Prekaz do të mbahet manifestimi “Nata e Zjarreve” ku do të ndizen flakadanët simbol i luftës dhe sakrificës për liri edhe në të gjitha vendet ku janë zhvilluar betejat e UÇK-së në Kosovë. Ndërsa programi kulturo-artistik, do të mbahet në sheshin “Adem Jashari” në Skenderaj.

Më 5, 6 e 7 mars 1998 në Epopenë e Prekazit në mbrojtje të pragut të shtëpisë dhe Kosovës në luftën për liri dhe pavarësi, në përballje me sulmin e egër të forcave serbe, ranë heroikisht 56 anëtarë të Familjes Jashari, 20 prej tyre të Familjes së ngushtë të Komandantit Legjendar Adem Jashari. (LajmeShqip.com)

 
Lajme Shqip Wednesday, 29 February 2012 09:50

Prishtinë – Manifestimi tradicional “Epopeja e UÇK-së”, më 5, 6 dhe 7 mars, do mbahet në nderim të epopesë së Ushtrisë Çlirimtare dhe në kujtim të Komandantit legjendar Adem Jashari, familjes Jashari dhe gjithë dëshmorëve të kombit, si dhe të gjithë të rënëve për liri dhe pavarësinë e vendit dhe popullit tonë, me moton “Nderojmë të kaluarën -ndërtojmë të Ardhmen”.

Axhenda u bë e ditur mbrëmë nga ministri i FSK-së, Agim Çeku, kryetar i Komisionit për organizimin e manifestimit “Epopeja e UÇK-së”, pas një takimi të Komisionit.

Ceremonia kryesore, më 5 mars, do të mbahet në kazermën “Adem Jashari” në Prishtinë, me parakalimin e kuadrateve të FSK-së, duke filluar në orën 11:00, dhe më pas do të ketë një program kulturoro-artistik.

Më 6 mars, në Kompleksin Memorial “Adem Jashari” në Prekaz, duke filluar nga ora 10:00 deri në orën 12:00, do të bëhen homazhe para varrit të Komandantit legjendar Adem Jashari dhe Varrezave të familjes Jashari, si dhe në Skenderaj dhe në të gjitha komplekset memoriale të UÇK-së në Kosovë.

Ndërsa po më 6 mars, duke filluar nga ora 18:00, në sallën e Kuqe të Pallatit të Rinisë dhe Sporteve, në Prishtinë, do të mbahet Akademia Përkujtimore kushtuar Komandantit legjendar Adem Jashari, familjes Jashari dhe të gjithë dëshmorëve dhe të rënëve për liri. Akademia do të përcillet me një koncert të Filarmonisë së Kosovës.

Më 7 Mars, në ora 18.00, në Kompleksin memorial Adem Jashari, do të mbahet manifestimi “Nata e Zjarreve”, ku do të ndizen flakadanët simbol i lirisë, si dhe në të gjitha vendet e fushë betejave në Kosovë. Ndërsa programi kulturoro-artistik do të mbahet në sheshin “Adem Jashari” në Skenderaj.

Ministri Agim Çeku, gjithashtu njoftoi se në kuadër të manifestimit do të organizohen edhe aktivitete të ndryshme  sportive.

Kryetari i Komisionit për organizimin e Manifestimit “Epopeja e UÇK-së”, ministri i Forcës së Sigurisë së Kosovës, Agim Çeku, bëri thirrje për pjesëmarrje masive në manifestimin përkujtimor më 5, 6 dhe 7 mars.

 
Lajme Shqip Friday, 25 March 2011 09:09

Prishtinë – Në Gllogjan të Deçanit, nën patronazhin e Komunës së Deçanit, është shënuar dje përvjetori i 13-të i Epopesë së Ushtrisë Çlirimtare të Kosovës në Dukagjin dhe 12-vjetori i ndërhyrjes së NATO-s në Kosovë.

Në tubimin qendror, morën pjesë personalitete të shquara të jetës politike e institucionale të vendit dhe autoritete të tjera.

“Marsi i vitit 1999 i NATO-s, nuk do të ndodhte pa marsin e 1998-ës së shqiptarëve”, ka thënë në fjalën e tij me këtë rast kryeparlamentari Jakup Krasniqi.

Në manifestimin në Gllogjan, u tha se “populli dhe luftëtarët e UÇK-së luftuan për të lënë prapa robërinë dhe vuajtjet”.

Rifat Jashari, duke folur në emrin e Familjes Jashari ftoi për unitet dhe veprime të duhura në mbrojtjen e vlerave të UÇK-së nga padrejtësitë që po u bëhen pjesëtarëve të saj.

Ai tha se një nga këto padrejtësi të mëdha ndaj këtyre vlerave, tash e sa vite po rëndon edhe mbi ish-kryeministrin e vendit dhe komandantin e UÇK-së Ramush Haradinaj.

Në po këtë ditë, Komuna e Deçanit e ka nderuar me titullin “Qytetar Nderi”, ambasadorin e Norvegjisë në Kosovë.