Lajme Shqip Wednesday, 04 September 2013 13:18

Shkup – Kryetari i ri i Akademisë së Shkencave të Shqipërisë, akademik Muzafer Korkuti ka zbardhur prioritetin e tij lidhur me botimin e Enciklopedisë Shqiptare të njohur si Fjalori Enciklopedik Shqiptar në një vëllim. Ai në një intervistë për “Gazeta Shqiptare” thekson se kjo enciklopedi do t`i jap përgjigje shtrembërimeve të Enciklopedisë maqedonase, sa i përket shqiptarëve. 

“Është domosdoshmëri! Ai do t’u japë përgjigje çështjeve themelore të historisë sonë. Them ‘në anglisht’, në mënyrë që fqinjët tani e tutje ta kenë të qartë prejardhjen e shqiptarëve. Duke e lexuar atë fjalor në gjuhën angleze, t’i kenë sa më të qarta problemet sa iu takon shqiptarëve dhe që t’u jepen shtrembërimeve që janë bërë, siç qe rasti i Enciklopedisë maqedonase”, ka theksuar akademik Korkuti, shkruan INA.
Botimi i kësaj enciklopedie ka nxitur qarqet akademike maqedonase, të cilët dje nuk kanë dhënë komente pas paralajmërimit të Akademisë së Shkencave të Shqipërisë për një enciklopedi të re në gjuhë angleze, dhe komenteve se ajo do ti jap përgjigje shtrembërimeve të enciklopedisë maqedonase, e cila kishte përmbajtje fyese dhe etiketuese kundër shqiptarëve.

 
Lajme Shqip Sunday, 31 July 2011 15:28

Shkup – Që nga dorëheqja e dy anëtarëve shqiptarë të redaksisë së re, Ramiz Abdyli dhe akademik, Alajdin Abazi, hartimi i Enciklopedisë së re të Maqedonisë ka mbetur në vendnumëro. Pra, redaksia e re nuk ka mbajtur asnjë mbledhje në lidhje me këtë çështje. Bile, dy anëtarët shqiptarë që dhanë dorëheqje nuk janë zëvendësuar me anëtarë të rinj. “Lajmeshqip.com” mëson se Akademia e Shkencave dhe Arteve të Shqipërisë  (ASHASH), do të ndihmojë që shqiptarët të trajtohen ashtu siç duhet në Enciklopedi dhe fyerjet dhe mashtrimet historike të pranishme në botimin e parë të Enciklopedisë të mos përsëriten. Burime të sigurta, brenda Akademisë së Shkencave dhe Arteve të Maqedonisë (ASHAM) bëjnë të ditur se me Akademinë e Shkencave të Shqipërisë kanë arritur një marrëveshje në të cilën ndër të tjera një vend të veçantë zë edhe Enciklopedia. Marrëveshja mes akademive do të nënshkruhet në Ohër në gjysmën e dytë të muajit gusht, ose në fillim të muajit shtator nga kryetari i ASHAM-it, akademik Georgi Stardelov dhe kryetari i ASHASH-së, akademik Gudar Beqiraj. Akademikët shqiptarë dhe analistët mendojnë se redaksia e re u formua vetëm për të qetësuar situatën dhe jo për të hartuar enciklopedinë e re. Në shtator të vitit 2009 ASHAM-i botoi “Enciklopedinë maqedonase”, vepër kjo e mbushur me fyerje dhe të pavërteta për shqiptarët. Pastaj Akademia e shpalli si të pavlefshme atë, edhe pse ajo ende vazhdon të shitet. U formua redaksia e re për hartimin e Enciklopedisë së re, mirëpo për hartimin e saj nuk u ndanë mjete financiare.(Lajmeshqip.com)