Lajme Shqip Saturday, 22 September 2012 08:40

Odise Roshi dhe Edmond Kapllani kanë qenë heronjtë e skuadrës së FSV Frankfurt që ka fituar 2-1 ndaj St. Pauli falë golave të tyre për t’u ngjitur përkohësisht në vendin e dytë në Bundesliga 2.

Të dy futbollistët shqiptarë e kanë filluar ndeshjen si titullarë dhe kanë treguar se e meritojnë një vend të tillë. Roshi ka gjetur menjëherë rrugën e rrjetës që në minutën e 7-të të ndeshjes, duke realizuar golin e parë me fanellën e skuadrës ku është huazuar në këtë sezon nga radhët e Këln.

Pas barazimit të ekipit kundërshtar në minutën e 58-të, ka qenë radha e Kapllanit të shkruajë emrin e tij në librin e golashënuesve me një gjuajtje me kokë në minutën e 62-të, duke i dhënë tre pikë shumë të rëndësishme skuadrës së tij në këtë fillim kampionati.

Për Kapllanin, ky ishte goli i katërt në 6 ndeshje të luajtura në këtë sezon, duke treguar se po kalon një formë të shkëlqyer. Ndonëse ai ka më shumë se një vit që nuk grumbullohet me kombëtaren shqiptare, pritet që në tetor të marrë një ftesë nga trajneri De Biasi për dy ndeshjet e përfaqësueses, pasi aktualisht është sulmuesi më në formë shqiptar. (LajmeShqip.com)

 
Lajme Shqip Sunday, 26 August 2012 17:33

Edmond Kapllani duket se po kthehet në formën e tij më të mirë, për të treguar se ka ende për të dhënë në futboll. Sulmuesi durrsak po përjeton një rini të dytë me skuadrën e FSV Frankfurt, ku pas dy pasimeve të dhëna në dy ndeshjet e para të Bundesligës 2, në të tretën ka gjetur dy herë rrugën e rrjetës.

Sulmuesi ka shënuar dy gola prej sulmuesi të mirëfilltë zone, në po aq raste që ka patur gjatë ndeshjes. Në minutën e 42-të, pas një goditje dënimi të Jelen, Kapllani ka devijuar topin me kokë në portën kundërshtare duke kaluar në avantazh skuadrën e tij që deri në ato momente kishte qëndruar vetëm në mbrojtje.

Goli i dytë, i shënuar në minutën e 78-të, ishte një veprim mjaft i bukur teknik, pasi Kapllani iu shmang mbrojtësit Biliskov me një rrotullim në zonë dhe pastaj dërgoi topin aty ku portieri kundërshtar nuk mund të arrinte.

Me një formë të tillë, Kapllani duket se mund të jetë përsëri një alternativë shumë e vlefshme për kombëtaren shqiptare të futbollit, edhe për faktin se është sulmuesi më në formë shqiptar dhe po aktivizohet më rregullisht se të gjithë të tjerët. (LajmeShqip.com)