Lajme Shqip Friday, 14 October 2011 14:48

Shkrimtari i njohur Dritëro Agolli në vijim të festimeve të 80 vjetorit të lindjes i ka drejtuar një mesazh politikës shqiptare.

Në festën e organizuar nga Partia Socialiste me rastin e 80-vjetorit të lindjes, shkrimtari Agolli i kërkoi opozitës të zhbllokojë ngërçin politik, pasi sipas tij situata politike është e acaruar.

Nga ana tjetër kreu i grupit parlamentar socialist Gramoz Ruçi ka komentuar këtë deklaratë duke u shprehur se këshillat e Dritëro Agollit janë një gur i çmuar për veprimtarinë dhe aksionin politik të Partisë Socialiste.

Sipas tij, me propozimet e fundit dhe me kërkesën që ka bërë lideri i PS-së për një debat institucional është në kuadër të këshillës së urtë dhe të mençur të shkrimtarit.

 
Lajme Shqip Thursday, 13 October 2011 13:11

Tiranë- Shkrimtari Dritëro Agolli feston sot 80-vjetorin e tij të lindjes.

Për të nderuar njeriun e letrave, që me krijimet e tij solli një traditë të re në letërsinë shqipe, Ministria e Turizmit, Kulturës, Rinisë dhe Sporteve dhe Akademia e Shkencave organizuan sot, një takim jubilar.

Sot në ditën e 80-vjetorit të tij të lindjes, Agolli tha se të jetosh është heroizëm, jo nga mundimet e jetës, por kur dëgjon se vdesin të rinjtë. “Duke jetuar këto vite mendoj dhe shikoj të kaluarën time dhe është një kosh me po dhe me jo. Jam munduar të pakësojë po-të, por mendoj që po nuk bëre gabime nuk krijon dot”, tha Dritëro Agolli.

Akademiku prej vitesh është duke shkruar një libër mbi kujtimet e jetës së tij, i cili ende nuk e ka parë dritën e botimit. Një libër për veten e tij dhe për të tjerët, prej të cilit deri tani Agolli ka shkruar 4-5 kapitujt e parë.

“E kam lënë në mes, sepse aty janë disa njerëz që kanë luajtur rol negativ në historinë e vendit. Disa janë gjallë, të tjerë kanë vdekur, por janë fëmijët, nipërit, mbesat e tyre dhe nuk dua t’i dëshpëroj. Do t’i lë të pabotuara për një periudhë”, tha Dritëro Agolli.

Shkrimtari e cilësoi takimin jubilar si një shenjë nderimi, siç mund të jetë për të gjithë shkrimtarët dhe artistë pasi ata, sipas shkrimtarit, duhen përkëdhelur. “Kur isha i ri flisja shumë pak, tani jam shumë llafazan, grindavec dhe dyshues”, tha ai duke qeshur.

Në takimin e organizuar në Akademinë e Shkencave miq e kolegë i uruan jetë të gjatë njeriut të letrave duke e cilësuar atë si shkrimtarin, i cili me talentin dhe intuitën e tij krijuese ka depërtuar thellë në botëkuptimin e shoqërisë shqiptare.

 

Kryeministri Sali Berisha i dërgoi njeriut të letrave një buqetë me lule dhe një urim me shkrim dore me rastin e 80-vjetorit të tij.

Në fjalën e tij përshëndetëse, studiuesi Ymer Çiraku e cilësoi Agollin si pelegrinin e shpirtit shqiptar. “Shtegtimi i këtij pelegrini të palodhur shfaqet i pandalur në kohë dhe në hapësirë, në histori dhe në aktualitet”, tha Çiraku. Sipas tij, ligjërimi i Agollit është ligjërimi i penës së një mjeshtri jo vetëm të palodhur, por edhe të spikatur me dashurinë të derdhur në çdo faqe libri.
Agollin e uroi edhe shkrimtari Moikom Zeqo, i cili e cilësoi atë si simbol të ekzistencës njerëzore, me një vullnet dhe energji të pashtershme. “Dritëro Agolli është shkrimtari që kuptoi që lirika shqipe mund të jetë e përjetshme”, tha Zeqo.

Ndërsa ministri i MTKRS-së, Aldo Bumçi tha se Dritëro Agolli është shkrimtari që falë talentit të jashtëzakonshëm u shndërrua në një model intelektual, i cili shënon një gur kilometrik në krejt rrjedhat që ka pësuar historia e letërsisë shqipe.

Dritëro Agolli lindi në Menkulas të Devollit. Rrugën letrare e nisi me vjersha të cilat i botoi që kur ishte nxënës gjimnazi. Për tridhjetë vjet me radhë ai u zgjodh deputet. Krijimtaria e tij letrare është mjaft e pasur në gjini e lloje të ndryshme: poezi, poema, tregime, novela, romane, drama, skenarë filmash etj. Disa prej veprave më të rëndësishme të tij janë përkthyer në gjuhë të ndryshme.

Agolli krijoi një model të ri vjershërimi në problematikë dhe në mjeshtërinë letrare, gërshetoi natyrshëm vlerat tradicionale të poezisë me mënyra të reja të shprehjes poetike. Ndërsa në prozën e tij, Agolli solli risi jo vetëm në strukturën narrative, por dhe në galerinë e personazheve, sa të çuditshëm aq dhe të zakonshëm, sa tragjikë aq edhe komikë.

Në vitin 2011 Dritëro Agolli, është nderuar me titullin doktor Honoris Causa nga Universiteti Europian i Tiranës.

 
Lajme Shqip Thursday, 13 October 2011 11:20

Tiranë – Shkrimtari i madh i letërsisë shqipe, Dritëro Agolli, ka mbushur sot 80 vjet. Ditëlindja e tij e 80-të është nderuar sot në Kuvendin e Shqipërisë me një duartrokitje deputetësh, me propozim të kryetares së Kuvendit, Jozefian Topalli, kurse kreu i Bashkisë së Tiranës i ka bërë Agollit një vizitë në shtëpi.

Kryebashkiaku i uroi gjigantit të letrave shqipe, jetë të gjatë. Basha u shpreh se Dritëroi është një nga autorët e mëdhenj të letërsisë shqiptare dhe një figurë e dashur publike, me vizion të kthjellët, të qëndrueshëm dhe të pandikuar nga interesat e çastit.

Dritëro Agolli, i cilësuar Homeri i gjallë e i vërtetë jo vetëm i Shqipërisë, por i mbarë qytetërimit modern, mban titulllin “Nderi kombit” (1988).  Vepra e tij letrare është përkthyer në shumë vende të botës si Francë, Gjermani, Itali, Rusi, Greqi, Spanjë, Rumani, Portugali, Norvegji, Siri, Izrael, Danimarkë etj.

Ai ka shkruar në të gjitha zhanret si në poezi, publicistikë, dramë, skenare filmash dokumentarë dhe artistikë.

Alen Boske, shkrimtar dhe kritik frëng ka shkruar për Agollin se: “Shqipëria na zbulon një autor me përmasa të mëdha … Dhe dinamiti mbulohet me petale. Një autor që meriton famë europiane”.

Agolli  është fitues i katër çmimeve të Republikës dhe i disa çmimeve vjetore në letërsi. Dritëro Agolli, është Anëtar i Akademisë së Firences “Muzat” në Itali. Ai është Qytetar Nderi i qyteteve të Korçës, Tiranës, Gjirokastrës etj.

 
Lajme Shqip Monday, 20 June 2011 17:18

Tiranë – Filmi i regjisorit, Edmond Budina, “Ballkan Pazar”, që trajton në mënyrë ironike skandalin e zhvarrimeve në fshatin Kosinë të Përmetit, ka ngjallur së fundi reagimin e Kishës Autoqefale të Shqipërisë, e cila e ka cilësuar atë si shpifje ndaj priftërinjve ortodoksë shqiptarë.

“Ballkan Pazar” e pati premierën më 14 prill, ndërkohë që letra e Kishës Autoqefale, e zbuluar pak ditë më parë, mban datën 26 maj.

“Ky film është një shpifje e turpshme ndaj priftërinjve ortodoksë shqiptarë dhe për pasojë, fyerje e rëndë për Kishën Ortodokse Autoqefale të Shqipërisë. Filmi është në mënyrë ekstreme sarkastik, e duke kaluar çdo cak, i shfaq priftërinjtë si përdhosës varresh, matrapazë eshtrash njerëzore dhe familjet e tyre si imorale”, thuhet në letër.

Regjisori i filmit Budina, në reagimin e tij në një gazetë të përditshme, i ka krahasuar fjalët e klerikëve me ato të komisarëve komunist, ndërkohë që shprehet i kënaqur që ndër 145 firmat e klerikëve nuk ka qenë firma e Hirësisë së Tij, Anastas Janullatos. Kjo sipas Budinës tregon se, ka ditur të distancohet prej faktit që kjo është një vepër arti dhe jo një traktat politik.

“Ju e gjykoni një vepër arti, një film, ashtu sikundër gjykohej në periudhën e regjimit një vepër, propagandë e mirëfilltë”, është shprehur regjisori Budina.

Ky debat në lidhje me filmin “Ballkan Pazar” ka përfshirë disa artistë dhe intelektualë, ndër ta edhe shkrimtarin Dritëro Agolli, i cili në një intervistë në një gazetë e cilësoi letrën e Kishës Autoqefale si një ndërhyrje të pastër të fesë në punët e kulturës dhe artit.

“Këto ndërhyrje i bëjnë dëm artit dhe zhvillimit të tij, por nga ana tjetër rrisin ndjenjën e zemërimit te artistët për të bërë vepra më të forta akoma”, është shprehur Agolli.

Shkrimtari tha se me kërkesat për ndalimin e kësaj apo asaj vepre arti, njerëzit e fesë janë bërë si Komiteti Qendror i Partisë së Punës, që kontrollonin e ndalonin çdo vepër që nuk u shkonte për mbarë.

Në letrën e Kishës Autoqefale cilësohet si e turpshme mbështetja e këtij filmi nga Qendra Kombëtare Kinematografike. Në lidhje me këtë, Drejtori i saj, Artan Minarolli është shprehur se duhet të respektohet arti kinematografik, i cili nuk është akt informues, por ka edhe krijimtari artistike.

“Filmi u shfaq për disa javë rresht në rrjetin e kinemave ‘Imperial’ dhe nuk kemi marrë asnjë reagim nga ana e spektatorëve. Për kinemanë është i rëndësishëm spektatori, ndërsa interpretimet qoftë fetare, burokratike apo shtetërore janë të ndryshme”, ka thënë Minarolli në media.

Filmi “Ballkan Pazar” është një prodhim në bashkëpunim me Italinë, ndërkohë që distributori Mediaplex Italia ka marrë përsipër shpërndarjen e filmit në kinematë italiane, që prej datës 8 qershor.

Komedia “Ballkan Pazar” përcjell idenë e shit-blerjeve jo vetëm të eshtrave, por edhe të ndërgjegjeve dhe shpirtrave njerëzorë, një histori absurde që interpetohet nga aktorët: Visar Vishka, Erand Sojli, Artan Islami, Karafil Shena, Valentina Xhezo, Laert Vasili, etj, ndërkohë që vetë regjisori Budina interpreton rolin e një prifti ortodoks. “Ballkan Pazar” pati premirën e parë në Festivalin e 15-të të Filmit në Sofje.

 
Lajme Shqip Sunday, 12 June 2011 20:49

Tiranë – Partia më e madhe e opozitës në Shqipëri, ajo Socialiste, festoi 20-vjetorin e themelimit, në kryeqytetin shqiptar. Kryetari aktual i PS-së mbajti një fjalim të shkrutër me këtë rast, duke ia dedikuar hedhjen e themeleve të PS-së në vitin 1990, ish-anëtarit dhe shkrimtarit të njohur, Dritëro Agolli.

800 persona të ftuar, jo vetëm drejtuesit socialistë në Tiranë e rrethe, por edhe të ftuar nga trupi diplomatik, komunitetet fetare dhe aleatët e Partisë Socialiste ishin të pranishëm në festën e socialistëve, por asnjë ftesë për Nanon, Berishën dhe ish-aleatin Ilir Meta.

“Ka shumë dallim mes Shqipërisë që kemi, ku humbasim përditë vlera e mundësi dhe Shqipërisë ku dëshirojmë të ngjitemi, drejt vlerave Evropiane. Vendi ynë ka pasur plot kthesa dramatike nga diktatura në demokraci. Në këtë 20-vjetor duhet të ndjehemi krenarë, sepse kështu si sot ne jemi pozicionuar në anën e duhur të historisë”, deklaroi Rama. Por, sipas Ramës vlera më e madhe e PS-së është demokracia brenda saj, prandaj, deklraoi ai, zakoni e do që duhen thënë vetëm fjalë të mira. “Unë sot do të rendis 3 prej tyre. Ne jemi parti që bëmë gjënë e duhur për interesin kombëtar. Respektojmë të gjithë qytetarët, liritë e të drejtat e tyre. Punojmë për të ndryshuar për të mirë Shqipërinë. Mirënjohje për ata që kanë kontribuar në 20 – vjet. Në Partinë Socialiste nuk ka munguar asnjëherë liria, kjo e bën të madhe forcën për të rezistuar ndaj çdo sulmi që i bëhet lirisë”, tha ndër të tjera në fjalën e tij, kryetari i PS-së, Edi Rama.

 
Lajme Shqip Saturday, 02 April 2011 07:51

Dashuri të nisura në bankat e shkollave, në zyrat e punës, apo dhe në udhëtime të këndshme. Të kurorëzuara më pas me martesë dhe shumë shpejt, trashëgimtarët u kanë mbushur jetën me gëzim. Por me kalimin e viteve, duket se dashuria e tyre është venitur, pasioni është shuar dhe fëmijët nuk kanë mundur t’i mbajnë të lidhur. Bëhet fjalë për personazhe VIP të politikës, artit, kulturës apo muzikës. Ja kush janë VIP-at e divorcuar në vite:


EVA ALIKAJ
Të gjithë e kujtojnë vajzën çapkëne të komedisë “Pallati 176”. Eva Alikaj na befason gjithmonë e më shumë me rikthimet e saj të bujshme, me rolet e spikatura që merr përsipër të luajë. Por edhe ajo ka pasur momentet e saj të vështira, sidomos atë të ndarjes nga bashkëshorti i saj austriak. Fryt i kësaj martese është djali Xhino.

YLLI PANGO
Nje ish ministër i kabinetin “Berisha” është Ylli Pango. Ai shkoi drejt divorcit para dhjetë vitesh. Më pas, lidhja e tij me një studente, më pas pedagoge në Fakultetin e Shkencave Sociale, do të ishte në qendër të vëmendjes për disa kohë. Me sa duket, Pango dhe vajza simpatike nuk gjetën dot gjuhën e përbashkët, ndaj vendosën të ndaheshin.

FATOS NANO
Është një tjetër politikan që vendosi të trokasë në dyert e gjykatës, për t’u ndarë nga bashkëshortja e tij, Rexhina Nano, me të cilën kishte dy fëmijë të rritur dhe kishte ndarë jetën me të për afro 30 vjet. Divorci që u shoqërua me një zhurmë të madhe mediatike, erdhi në vitin 2001. Në skenë doli Xhoana Nano, një femër disa vite më e re sesa Nano, plot sharm e finesë, e cila brenda një kohe të shkurtër do të shkonte në altar me kryeministrin e asaj kohe.

DRITËRO AGOLLI
Prishja e marrëdhënieve mes Shqipërisë dhe Bashkimit Sovjetik, do të rëndonte shumë mbi supet e shkrimtarit të njohur, Dritëro Agolli, pasi në njëfarë mënyre ishte i detyruar të ndahej nga gruaja e tij ruse, të cilën e kishte njohur kur ishte student atje. Shkrimtari, që me penën e artë bëri shumë adhurues, u nda nga e shoqja me të cilën kishte një djalë. Por siç thotë një fjalë e urtë, “Plumbi me plumb del”. Agolli njihet me Sadijen, gruan me të cilën vazhdon të jetojë edhe sot. Me vajzën 21- vjeçare shkodrane, shkrimtari atëherë 32 vjeç, u njoh në dasmën e Ismail Kadaresë. Dashuria mes tyre lindi pikërisht në atmosferën e dasmës dhe duket se po ajo dashuri vazhdon t’i mbajë të lidhur dhe sot, pasi gjithkund shkrimtari me kokën e zbardhur, shihet i shoqëruar nga e shoqja.

ARTA DADE
Deputetja e PS-së, Arta Dade është ndër të paktat femra të politikës që i shtohet listës së divorceve në vite. Për arsye që nuk u bënë kurrë publike, Dade, e cila ka mbajtur disa poste ministrore si, Ministre e Kulturës, apo e Jashtme, vendosi t’i japë fund martesës disavjeçare me Gëzim Dabullën. Deputetja e Partisë Socialiste, Arta Dade, e vlerësuar edhe për bukurinë e saj dhe shijen në të veshur është nënë e dy djemve. Pas ndarjes nga bashkëshorti, ajo nuk ka tentuar të martohet asnjëherë.

ELI FARA
Është ndarë që në moshë të re. Nga martesa e saj me Luli Kapuranin pati një vajzë, të cilën e ka rritur pa baba. Vajza e këngëtares së mirënjohur korçare është studente për Juridik. Eli Fara jeton prej vitesh jashtë Shqipërisë dhe nuk ka nisur ende një jetë të re. Eli Fara vazhdon të mbetet një ndër ikonat e bukurisë, sharmante dhe e ëmbël, edhe pse i ka kaluar të 40-at.

YLLKA MUJO
Aktorja e mirënjohur Yllka Mujo, shumë e dashur për publikun shqiptar me rolet e saj të spikatura në filma të ndryshëm Ajo vendosi t’i japë fund martesës së saj me Haig Zaharinë duke mos u martuar më. Ajo vendosi të rrisë vetë dy fëmijët e saj, një djalë dhe një vajzë. Ndërkohë vajza e saj, Elia Zaharia e fejuara e Princ Lekёs, sot është për t’u admiruar, një këngëtare dhe aktore e mrekullueshme dhe që padyshim ka marrë shumë nga e ëma.

ELSA BALLAURI
Në vitin 2006, drejtoresha e Grupit Shqiptar për të Drejtat e Njeriut, vendos të ndahet nga bashkëshorti i saj, Viktor Basha. Elsa dhe Viktori kanë qëndruar së bashku për 22 vite me radhë, duke sjellë në jetë dy fëmijë. Kështu, të dy palët kanë vendosur të shkojnë drejt divorcit dhe kërkesa e tyre është firmosur nga gjykata.