Lajme Shqip Wednesday, 01 February 2012 11:50

Një gjykatës i EULEX-it në Gjykatën e Qarkut në Prishtinë ka konfirmuar pjesërisht aktakuzën kundër pesë të pandehurve lidhur me marrëveshjen për Operatorin e Rrjetit Mobil Virtual  (ORRMV) të arritur ndërmjet PTK-së dhe Dardafon-it Sh.p.k dhe bartjen e mëvonshme të licencës për Dardafon.net Sh.p.k në vitin 2008 dhe 2009.

Dosjen e plotë për rastin e PTK-së mund ta gjeni këtu. Portali i ka publikuar ekskluzivisht të gjitha aktakuzat dhe dosjet tjera të këtij rasti gjatë vitit 2011.

Gjykatësi i procedurës paraprake ka konfirmuat tri pika të aktakuzës kundër Ismet Bojkut, përfaqësues ligjor i Dardafon Sh.p.k dhe Dardafon.net Sh.p.k, Blerim Devollit dhe Shkëlqim Devollit, dy pronarë të kompanive private që i përkasin Devolli Group (Pika 1: Mashtrim, në kundërshtim me nenin 261 të Kodit Penal të Kosovës (KPK); Pika 2: Lidhja e kontratave të dëmshme, në kundërshtim me nenin 237 të KPK; dhe Pika 4: Falsifikim i dokumenteve, në kundërshtim me nenin 332 të KPK.

Gjykatësi po ashtu ka konfirmuar tri pika kundër Shyqyri Haxhës, Kryeshef ekzekutiv  në PTK dhe Rexhë Gjonbalajt, kryetar i bordit të drejtorëve në PTK (Pika 6: Lidhja e kontratave të dëmshme, neni 237 i KPK; dhe Pikat 7 dhe 10: Shpërdorim i pozitës zyrtare, neni 339 i KPK).

Dy pika kundër Ismet Bojkut, Blerim Devollit dhe Shkëlqim Devollit janë hedhur poshtë (Pika 3: Keqpërdorim i besimit; dhe Pika 5: Krim i organizuar). Gjykatësi i procedurës paraprake po ashtu ka hedhur poshtë dy pika kundër Shyqyri Haxhës dhe Rexhë Gjonbalajt (Pikat 8 dhe 9: Keqpërdorim i autorizimeve në ekonomi).

Kundër pikave të hedhura poshtë, prokurori mund të paraqes ankesë brenda tre ditëve nga dita e dorëzimit të vendimit. 

Aktakuza ishte ngritur më 9 qershor 2011 nga një prokuror i EULEX-it i Prokurorisë Speciale të Kosovës (PSK). 

Aktakuza është rezultat i një hetimi të filluar në qershor të vitit 2010 nga një prokuror i EULEX-it i PSRK-së, në bashkëpunim me njësinë e Inteligjencës financiare të policisë së EULEX-it. Gjatë bastisjeve të kryera më 15 korrik 2010, hetuesit kanë konfiskuar një sasi të madhe të materialit i cili ishte ekzaminuar nga PSRK. Ishin kryer edhe ekspertiza kyçe lidhur me provat e konfiskuara. Lidhur me këtë rast janë intervistuar një numër i dëshmitarëve.

Hetimi, ndjekja dhe gjykimi i rasteve të korrupsionit dhe krimit të organizuar në Kosovë janë pjesë e mandatit ekzekutiv të EULEX-it. (LajmeShqip.com)

 
Lajme Shqip Friday, 04 November 2011 09:03

Prishtinë -Zvonko Veselinoviq nuk udhëheqë vetëm bandat e krimit serb në veri të Kosovës. Ai është partner i mirë edhe i kompanisë më profitabile publike të Republikës së Kosovës, Postës dhe Telekomit. Portali LajmeShqip.com publikon ekskluzivisht dy kontratat të PTK-së për vendosjen e antenave në veri të Kosovës. Se si funksionin rrjeta e krimit të organizuar në shtetin më të ri në botë, dëshmojnë edhe faktet në vijim, të cilat, të zezë mbi të bardhë, i sjellë portali LajmeShqip.com.

I shumëkërkuari nga Policia e Kosovës, Zvonko veselinoviq, ka qenë këmbëkryq në mes të Prishtinës, për të nënshkruar një kontratë me kompaninë, aksionare e së cilës është edhe Qeveria e Kosovës, PTK-në. Ai ka një kontratë me këtë gjigant ekonomik t vendit, nga e cila fiton para të majme. Është spekuluar se kontrata është e nënshkruar nga bashkëshortja e tij, Liljana Bozhoviq, por faktet flasin ndryshe. Burime të konfirmuara mirë të Portalit LajmeShqip.com, kanë mësuar se nënshkrimi i kontratës është bërë personalisht nga Zvonko Veselinoviq, dhe jo nga Ljiljana Bozhoviq, gruaja e Zvonkos, siç është në kontratë. Këtë e vërteton edhe fakti se në kontratë nuk ka nënshkruar personalisht Ljiljana, por është nënshkruar “FOR”, për Ljiljanën.

Portali e ka verifikuar burimin dhe e ka rikonfirmuar se Zvonko Veselinoviq ka qenë personalisht në PTK dhe e ka nënshkruar kontratën dhe anekskontratën. Kontratës i mungon autorizimi që i jep të drejtë Zvonkos të nënshkruajë në emër dhe për Ljiljana Bozoviqin.

Kontrata i siguron Zvonkos 1.000 euro për muaj nga Posta dhe Telekomi i Kosovës, të cilat i paguhen në xhirollogarinë e gruas 1160-642610-000121,nëProCredit Bank.

Zvonko Veselinoviq, i cili tashmë e ka fituar edhe epitetin si kapoja kriminale i veriut të Kosovës është bërë garantues për antenat e kompanisë telefonike mobile Vala në Mitrovicë. Në këmbim të sigurisë së një antene, ai e merr këtë shumë parash nga kompania publike, aksionare e së cilës është Qeveria e Kosovës.

Kjo ndërmarrje publike, që këto ditë dështoi për herë të dytë që të privatizohet, pas tërheqjes së Harvatski Telekomit, me arsyetimin se zyrtarët e lartë të saj akuzohen për korrupsion, në një periudhë i kishte paguar Zvnoko Veselinoviqit haraç, e më vonë këtë pagesë e kishte zyrtarizuar me një kontratë të cilën e ka siguruar dhe e sjellë ekskluzivisht portali LajmeShqip.com.

PTK-ja, për antenën e vendosur në veri të Mitrovicës ka paguar dy muaj pa letra, ndërsa paratë i kanë shkuar në konton e saj në ProCredit Bank, Liljana Bozhoviqit, gruas së kapos së krimit në veri, Zvonko Veselinoviq.

Për t’i legjitimuar këto pagesa, në këmbim të sigurisë së antenës, dy muaj më vonë, ish-drejtori i Postë-Telekomit të Kosovës, Etrur Rrustemaj, e ka vënë firmën e tij bashkë me drejtorin e prokurimeve, Fatmir Gjonbalaj, në një marrëveshje në letër me Liljana Bozhoviq.

Vendi i vetëm ku PTK-ja do të mund të vendoste BTS-at, sipas burimeve të portalit, ishte një banesë private në katin e pestë të një ndërtese kolektive, në rrugën “Kralj Peter I”, në pjesën veriore të Mitrovicës.

Zvonko Veselinoviq, që udhëheqë me biznese mafioze në veriun e Kosovës, sipas burimeve të portalit, para katër vitesh ka qenë personalisht në zyrën qendrore të PTK-së, për të negociuar dhe nënshkruar kontratën me PTK-në.

Mirëpo, brenda vetë kontratës së nënshkruar mes palëve, përpos që ka mospërputhje datash, ka edhe një element të dyshimt, që është nënshkrimi i kontratës.

Në kontratë shkruan decidivisht se marrëveshja starton më 1 qershor të vitit 2007 dhe ka validitet për dy vjet, deri më 1 qershor të vitit 2009, ndërsa nënshkrimi i Etrur Rrustemajt, në po këtë marrëveshje, figuron të jetë i datës 7 gusht të vitit 2007, dy muaj më vonë. Kurse, Fatmir Gjonbalaj, shef i Prokurimit të PTK-së, figuron të ketë nënshkruar më 6 gusht të atij viti, ndërsa tek nënshkrimi i Bozhoviqit nuk figuron data fare.

Përmes kësaj marrëveshjeje, PTK-ja obligohet t’ia paguajë zyrtarisht gruas së kapos së krimit të veriut një shumë prej 1.000 eurosh, 350 euro në emër të qirasë për lirimin e hapësirës për pajisjet telekomunikuese të kësaj ndërmarrjeje publike, dhe 650 euro në emër të shpenzimeve të furnizimit me energji elektrike të pajisjeve telekomunikuese.

Derisa ky serb ka udhëhequr grupet kriminale për bllokimin e rrugëve në veri dhe për djegien e pikave kufitare më 26 korrik të këtij viti, ai në ndërkohë vazhdon të marrë para nga Qeveria e Kosovës, nëpërmjet PTK-së. Në këtë mënyrë, qeveria e bën Zvonko Veselinoviqin garantues të funksionimit të antenës në atë pjesë të Kosovës, që më së paku kontrollohet nga autoritetet kosovare.

Pavarësisht se Etrur Rrustemi nuk është më drejtor, kontrata nuk është shkëputur as nga pasardhësit e tij në krye të Postës dhe Telekomit të Kosovës. (LajmeShqip.com)

 

 

 

Anekskontrata

 

 AKontrata me majorin e Ministrisë së Punëve të Brendshme të Serbisë, Dushan Ivanoviq

 

 

 

 

 
Lajme Shqip Wednesday, 12 October 2011 11:00

Prishtinë (PLOTESUAR, E Enjte, 14:02) – Seanca e mbajtur sot për konfirmimin e aktakuzës ndaj PTK-së dhe kryeshefit ekzekutiv të saj, Shyqeri Haxha, është shtyrë për datën 27 tetor dhe 3 nëntor, për arsye se Prokuroria nuk ia ka dhënë të gjitha shkresat mbrojtjes, kanë bërë të ditur burime të Portalit LajmeShqip.com.

Kopjen e plotë të aktakuzës ndaj Haxhës dhe të tjerëve mund ta lexoni këtu.

Bëhet e ditur nga burimi, se mbrojtja ka kërkuar të ndahen rastet dhe të mos gjykohen si një, por Prokuroria ka refuzuar, duke vlerësuar se rastet janë të ndërlidhura dhe nuk mund të ndahen. (LajmeShqip.com)

****************************

Prishtinë – Kur Portali LajmeShqip.com kishte publikuar ekskluzivisht 12 faqe të aktakuzës së ngritur ndaj kryeshefit të Postë-Telekomit Kosovar, Shyqeri Haxha, kryetarit të Bordit të drejtorëve të kësaj kompanie, Rexhë Gjonbalaj dhe pronarëve të kompanisë private “Devolli Group”, më 8 qershor të këtij viti, për keqpërdorime të mëdha dhe shkelje ligjore, në bashkëveprim, kishin qenë të menjëherëshme reagimet nga Oda Ekonomine e Kosovës, Aleanca Kosovare e Biznesit etj.

Portali nuk kishte komentuar asgjë, por kishte raportuar për ngritjen e aktakuzës ndaj tyre dhe kishte publikuar 12 faqet e para të saj. Dhe ky raportim i portalit, po konfirmohet tani kur të akuzuarit pritet të dalin të enjten në gjykatë, për t’iu konfirmuar aktakuza.

Njëri nga skandalet më të mëdha ku janë të përfshirë zyrtarët e kompanisë kosovare publike PTK, e cila është nxjerr në shitje, do të përfundojë të enjten në Gjykatë.
Dy drejtuesit kryesorë të kësaj ndërmarrjeje, Shyqeri Haxha, kryeshef i PTK-së dhe Rexhë Gjonbalaj, kryetar i Bordit të drejtorëve, së bashku me pronarët e kompanisë “Devolli Group”, Blerim Devolli, Shkelqim Devolli dhe përfaqësuesi ligjor i kësaj kompanie, Ismet Bojku do të paraqiten në seancën për konfirmimin e aktakuzës në Gjykatën e Prishtinës, nga një gjyqtar ndërkombëtar i EULEX-it, për akuza të ngritura nga Prokuroria Speciale e Republikës së Kosovës.

Atyre pritet t’u lexohet akuza pesë muaj pas ngritjes së saj, nga dy prokurorë të EULEX-it, për lidhjen e kontratës që ka të bëjë me operatorin mobil virtual, e cila cilësohet si tejet e dëmshme për PTK-në.

Dy zyrtarët e PTK-së, Haxha e Gjonbalaj, akuzohen për vepra penale të lidhjes së kontratave të dëmshme, Shpërdorim të pozitës zyrtare dhe Keqpërdorim të Autorizimeve në Ekonomi.

Pronarët e Devolli Group, Blerim Devolli dhe Shkëlqim Devolli si dhe zyrtari i kësaj kompanie, Ismet Bojku, akuzohen për mashtrim, lidhje të kontratave të dëmshme, keqpërdorim të besimit, falsifikim të dokumenteve zyrtare dhe krim të organizuar.

Ata do të paraqiten në gjykatë katër ditë pas tërheqjes nga tenderi për privatizimin e PTK-së, të kompanisë kroate “Harvatski Telekom”. Arsyeja e kësaj tërheqjeje, sipas zyrtarëve të saj, ka të bëjë po me këto akuza të ngritura nga prokurorë të EULEX-it. Ndërsa kryeshefi i PTK-së, Haxha, tërheqjen e kompanisë kroate dhe përmendjen e akuzave, i ka cilësuar si përpjekje për ta denigruar personalitetin e tij dhe për ta ulur vlerën e PTK-së.

Hetimet për këtë skandal të PTK-së kishin nisur në korrik të vitit të kaluar. Aktakuza ishte ngritur një vit më vonë.

Kryetari i Bordit të PTK-së, Rexhë Gjonbalaj akuzohet se, më datën 20 tetor 2008, në takimin e Bordit të Drejtorëve të PTK-së, qëllimisht ka votuar në favor dhe pa rezervë që PTK-ja të lidhë marrëveshje me Dardafonin, me një ndarje të fitimit me PTK-në në vlerë prej 22 për qind. Rexhë Gjonbalaj ishte i vetëdijshëm se marrëveshja përfshinte një ndarje të papranueshme të fitimit prej 22 për qind dhe një mungesë e sigurisë së domosdoshme për PTK-në dhe ishte bazuar në propozimin për ndarjen e fitimit të cilën më parë Bordi e kishte refuzuar.

Gjonbalaj ishte forca kryesore në bord të PTK-së, që marrëveshja të aprovohej me këtë ndarje të papranueshme të fitimit dhe përmbajtjen e pasigurt.

Shyqeri Haxha, kryeshefi ekzekutiv i PTK-së, akuzohet se e ka nënshkruar marrëveshjen finale më 16 janar 2009 ndërmjet PTK-së dhe Dardafon.net LLC, duke e ditur se kjo marrëveshje do t’i shkaktonte humbje PTK-së në vlerë të pallogaritshme, që do të tejkalonte 100.000.00 euro.

Portali LajmeShqip.com i kishte publikuar ekskluzivisht 12 faqet e para të aktakuzës në qershor, gjë që kishte bërë të reagojnë për ta sulmuar ashpër Portalin LajmeShqip.com nga Oda Ekonomike, AKB etj. Publikimi i parë i aktakuzës mund të lexohet këtu.

 
Lajme Shqip Tuesday, 11 October 2011 17:59

Zagreb (Reuters) – Telekomi Kroat T-HT është duke vlerësuar që të tërhiqet nga tenderi për shitblerjen e kompanisë shtetërore, Post-Telekomit të Kosovës, pasi që menaxherët e kompanisë kosovare janë akuzuar për korrupsion, kanë bërë të ditur nga T-HT, të martën.

T-HT, shumica në pronësi të Deutsche Telekom (DTEGn.DE) dhe Telekom Austria, u përzgjodhën në listën më të ngushtë, në qershor, në garën për  75 për qind të PTK-së, vetëm disa ditë para se të akuzoheshin drejtori ekzekutiv dhe katër të tjerë nga prokurori i Bashkimit Evropian.

“Pas akuzave të ngritura kohëve të fundit ndaj menaxherëve të PTK-së, të dyshuar për korrupsion, T-HT është duke shqyrtuar pjesëmarjen e vazhdueshme në procesin e privatizimit“, tha për Reuters zëdhënësja Maja Ëeber, nga Zagrebi.

Shefi Ekzekutiv i PTK-së, Shyqeri Haxha, dhe kryetari i bordit, Rexhë Gjonbalaj, janë akuzuar për “kontrata të dëmshme” dhe për abuzim të pozitave zyrtare. Gjyqi nuk ka filluar ende.

Shitja e  PTK-së pritej të ishte në mes të 300 dhe 600 milionë euro ($ 409 – $819,000,000), fonde tashmë të parashikuara për buxhetin 2011.

Qeveria po përballet me një krizë të buxhetit, pasi Fondi Monetar Ndërkombëtar ndërpreu një marrëveshje në pritje me Kosovën në këtë vit, prej 108.000.000 €, kur qeveria devijoi nga programi i tij, duke rritur pagat e sektorit publik.

Marrëveshja e FMN-së ishte një parakusht për Kosovën, për të marrë një grant prej rreth 200 milion euro nga Komisioni Evropian dhe Banka Botërore.

PTK, kompania më fitimprurëse në Kosovë, ka rreth 1 milionë abonentë mobilë dhe 100.000 abonentë të telefonisë fikse dhe, gjithashtu, ofron shërbime të internetit.
Kosova, e cila e shpalli pavarësinë nga Serbia në vitin 2008, nuk e ka prefiksin e shtetit, dhe thirrjet ndërkombëtare shkojnë nëpër Monako, Serbi dhe Slloveni. (1 $ ose 0,732 euro).

 
Lajme Shqip Tuesday, 14 June 2011 16:31

Prishtinë – Posta dhe Telekomi i Kosovës është skandali i parë i madh i keqpërdorimeve milionëshe, që është hapur më në fund nga drejtësia në Kosovë.

Vera e paralajmëruar e kapjes së „peshqve të mëdhenj” të krimit të organizuar dhe korrupsionit në Kosovë, ka vënë në rrjetë drejtuesit e PTK-së, Shyqeri Haxhën, kryetar i Bordit të Drejtorëve të këtij gjigandi publik dhe udhëheqësin tjetër të saj, Rexhë Gjonbalaj, tok me pronarët e kompanisë tjetër private, “Devolli Group”, për milionat e keqpërdorura në aferën “Dardafon”.

Portali Lajmeshqip.com, e ka përcjellë ekskluzivisht pjesën e parë të aktakuzës rreth këtij rasti, me 12 faqe faksimil, ndërkaq në vijim i përcjellë faqet tjera të aferës më të madhe të korrupsionit në vend, në të cilën implikohen këto dy kompani gjigande, njëra e sektorit publik e tjetra e sektorit privat.

Aktakuza shumëfaqëshe jep detajet e keqpërdorimeve në PTK, mënyrën e ndërtimit të piramidës së krimit të organizuar dhe llahtarisë finaciare, ku “me ligjin e të mëdhenjve” dhe “dorën e fortë”, bossët e kompanive më të rëndësishme në vend, janë shndërruar në orientue ekskluzivë të parasë publike.

Portali Lajmeshqip.com, sjellë ekskluzivisht serinë e radhës të fakteve – aktakuzën shumëfaqëshe me detajet e keqpërdorimeve në PTK, mënyrën e ndërtimit të piramidës së krimit të organizuar dhe llahtarisë finaciare, ku “me ligjin e të mëdhenjve” dhe “dorën e fortë”, bossët e kompanive më të rëndësishme në vend, janë shndërruar në orientues ekskluzivë të parasë publike

 

 

Pages: 1 2 3 4 5 6

 
Lajme Shqip Wednesday, 08 June 2011 18:50

Prishtinë – Portali Lajmeshqip.com sjellë ekskluzivisht kopjen e aktakuzës së ngritur ndaj Shqyqyri Haxhës, Drejtor i Përgjithshëm i PTK-së dhe bashkëpunëtorëve të tij, ngritur nga Prokuroria Speciale e Republikës së Kosovës.

Aktakuza e ngritur më 8 qershor 2011 (sot), është e ndarë në dy pjesë.

Pjesa e parë ka të bëjë me të akuzuarit Blerim Devolli, Shkëlqim Devolli dhe Ismet Bojku, të cilët akuzohen për lidhje të kontratave të dëmshme, keqpërdorim të besimit, falsifikim dokumentesh dhe krim të organizuar.

Në pjesën e dytë të saj akuzohen Shyqyri Haxha dhe Rexhë Gjonbalaj, për lidhje të kontratave të dëmshme, shpërdorim të detyrës zyrtare dhe keqpërdorim të autorizimeve në ekonomi.

Shyqyri Haxha, drejtor i përgjithshëm i PTK-së, sipas aktakuzës, ndër të tjera, ka bërë shkelje të rënda të keqpërdorimit të detyrës në ekonomi, duke rënë ndesh me paragrafin 1, nënparagrafin 5 dhe paragrafin 2 të nenit 236 të Kodit Penal të Kosovës. Sipas kësaj shkeljeje, ai mund të dënohet deri në tetë vjet burg, duke u implikuar në keqëprdorime që i kanë sjellë përfitim material mbi 100 mijë euro, në vetëm njërin rast.

Trungu i akuzës ndaj Ddrejtorit të Përgjithshëm të PTK-së, Shyqyri Haxha dhe Rexhë Gjonbalajt, është marrëveshja midis PTK-së dhe Dardafon LLC, ku janë të përfshirë në bashkëveprim në krim të organizuar, falsifikim dokumentesh dhe keqpërdorim të besimit edhe Blerim Devolli, Shkëlqim Devolli dhe Ismet Bojku.

Aktakuza flet për historinë e krimit të organizuar dhe keqpërdorimeve drastike, të kryera në tre vitet e fundit në kompaninë më profitabile publike në Kosovë, Postën dhe Telekomin (PTK).

Portali Lajameshqip.com ka mësuar se vera do të jetë e nxehtë në ngritjen e akuzave dhe vënien nën pranga të shumë zyrtarëve të tjerë të lartë të vendit, të përfshirë në korrrupsion dhe krim të organizuar, në dhjetë vitet e fundit.

EULEX-i, disa muaj më parë ka paralajmëruar kapjen e “peshqve të mëdhenj” të krimit të organizuar në Kosovë.

 
Lajme Shqip Wednesday, 30 March 2011 13:33

Prishtinë – Punëtorët e Postë-Telekomit të Kosovës do të protestojnë edhe nesër kundër privatizimit të kësaj ndërmarrjeje përmes projektbuxhetit të vitit 2011.

Protesta organizohet gjatë kohës së mbajtjes së seancës së Kuvendit të Kosovës rreth projektbuxhetit.

Sindikata e pavarur e PTK-së edhe njëherë kundërshton tendencën e privatizimit të PTK-së përmes buxhetit të Kosovës. Kryetari i kësaj sindikate, Milazim Alshiqi, tha se përmes përfshirjes së PTK-së në projektbuxhet, tentohet të bëhet presion mbi deputetët që pas votimit të buxhetit, përkundër bindjeve të tyre lidhur me shitjen e kësaj ndërmarrjeve, të votojnë për shitjen e saj.

“Meqenëse neni 4 nuk është larguar nga Projektligji i Buxhetit të Kosovës ne kemi vendosë të dalim prapë në protestë më 31 03 2011 në ora 10:30 minuta nga ndërtesa kryesore e PTK-së për të kërkuar nga deputetët të mos e votojnë buxhetin e Kosovës pa e larguar nenin 4 nga ky buxhet”, ka thënë Alshqi.

Alshiqi ftoi punëtorët e PTK-së që të protestojnë kundër kësaj mënyre të privatizimit, duke kërkuar që çështja e kësaj ndërmarrjeje të diskutohet në ndonjë seancë tjetër. Por ai nuk saktësoi se çfarë hapash do të ndërmarrin në rast se votohet edhe neni katër.

“Qëllimi i protestave tona ka qenë që të dialogohet para se të vijë te një veprim më radikal, të cilin nuk e dëshirojmë, por për këtë do të vendosë kuvendi i sindikatave dhe do të dalim me qëndrime që do të jenë më radikale se këto”.

Ndryshe, sindikata e PTK-së ka protestuar edhe javën e kaluar, kur kuvendi miratoi në parim projektbuxhetin, duke kundërshtuar shitjen e kësaj ndërmarrjeje.

 
Lajme Shqip Tuesday, 29 March 2011 11:54

Prishtinë – Kryesia e Kuvendit të Kosovës vendosi sot për mbajtjen e seancës plenare më 31 mars, ku në rend dite do të jetë miratimi i projektligjit për buxhetin e vitit 2011.

AAK e cila e ka miratuar projektligjin në leximin e parë, tha se të enjten nuk do ta votojë buxhetin nëse nuk hiqet neni 4, ku parashihet edhe leja për Qeverinë që të procedojë me  privatizimin e PTK-së, pa një vendim të veçantë të Kuvendit.

Projektligji për buxhetin për vitin 2011 pritet të miratohet të enjten në seancë plenare të Kuvendit, e cila u përcaktua sot në mbledhjen e Kryesisë. Kryesuesi i mbledhjes së kryesisë, Xhavit Haliti, tha se kjo mbledhje është konform rregullave të parapara me rregullore të Kuvendit dhe me Kushtetutë.

Në mbledhje ishin të pranishëm edhe shefat e grupeve kuvendare, por vetëm ai i AAK-së, Ardian Gjini, shfaqi qëndrimin e partisë së tij në lidhje me buxhetin. Ai tha se  nëse nuk ndahet neni 4, AAK-ja nuk do ta mbështesë këtë ligj, ashtu siç e mbështeti në leximin e parë.

Gjini tha se AAK ka pasur edhe shumë vërejtje të tjera, por ka hequr dorë nga kërkesat, për shkak të situatës në të cilën ndodhet Kosova.

Në nenin katër të Projektligjit për buxhetin, qeverisë i jepet leja që të procedojë me  privatizimin e PTK-së, pa një vendim të veçantë të Kuvendit, siç e parasheh Ligji për ndërmarrjet publike, përkatësisht neni 9 i tij.

 
Lajme Shqip Monday, 28 March 2011 13:18

Prishtinë – Komisioni për buxhet dhe financa i Kuvendit të Kosovës shqyrtoi sot Projektligjin e Buxhetit të Republikës së Kosovës për vitin 2011.

Komisioni nuk ka diskutuar për Nenin 4, sipas të cilit i mundësohet qeverisë të privatizojë PTK-në pa miratimin e Kuvendit.

Kryetarja e këtij komisioni parlamentar, Safete Hadërgjonaj, kërkoi nga anëtarët e komisionit që ky nen të diskutohet nesër, meqë, sipas saj, pritet nga qeveria një propozim i ri rreth tij.

“Meqë jemi me nxitim për të përfunduar punën tonë si Komision për buxhet, ne do të fillojmë me pjesën tekstuale. Mendoj që t’i shqyrtojmë të gjitha nenet, kurse Nenin 4 ta lëmë për nesër, derisa qeveria të përgatitet dhe të vijë me një variant të vetin për këtë nen”, ka thënë Hadërgjonaj.

 
Lajme Shqip Friday, 25 March 2011 19:09

Prishtinë –  Me 67 vota për, 35 kundër dhe dy abstenime, Kuvendi i Kosovës pas një debati maratonik prej nëntë orësh, ka miratuar në parim Projektligjin për buxhetin 2011.

Opozita ka kundërshtuar nenin 4 të Projektligjit të buxhetit, i cili parasheh shitjen e PTK-së.

Në seancë ka pasur debat edhe për çështjen e rritjes së pagave, për të cilën opozita ka thënë se nuk janë rritur pagat aq sa ka premtuar kryeministri.

Me miratimin e sotëm në parim ngarkohet Komisioni për buxhet dhe financa dhe komisionet e përhershme që të shqyrtojnë projekt-buxhetin dhe të sjellin një raport me rekomandime, në mënyrë që më së largu deri më 31 mars ligji të miratohet në Kuvend.

Kryeministrit të Kosovës, Hashim Thaçi, disa herë i është dashur të dalë të premten në foltoren e Kuvendit të përballet me dilemat që kanë ngritur ligjvënësit e opozitës për projektbuxhetin e vitit 2011, por edhe për t’i bindur ata që ta mbështesin këtë projektbuxhet.

Ai ka këmbëngulur në vendimin e tij për ngritje të pagave, duke thënë se edhe subjektet tjera politike duhet ta mbështesin këtë projektbuxhet që parasheh ngritjen e mirëqenies së qytetarëve të Kosovës, sikurse që ka këmbëngulur për privatizimin e PTK-së, i cili parashihet me nenin 4 të projektbuxhetit.

Nga deputetët e opozitës shpesh kjo është konsideruar si fushatë e papërfunduar zgjedhore nga ana e kryeministrit Thaçi, përderisa përfshirja e privatizimit të PTK-së, është konsideruar si shkelje e Kushtetutës dhe Ligjit për ndërmarrjet publike.

Ndërkohë në krah të tij shpeshherë në foltoren e Kuvendit janë paraqitur ministri i Financave, Bedri Hamza dhe ai i Zhvillimit Ekonomik, Besim Beqaj. Ky i fundit ka zhvilluar edhe replikë me deputetin e LDK-së, Arben Gashi, i cili është edhe kryetar i Komisionit për legjislacion.

Gashi duke e kundërshtuar nenin 4 të Projektligjit të buxhetit, i cili parasheh shitjen e PTK-së, ka thënë se ky projektbuxhet po e rrezikon të ardhmen e PTK-së, ndërkaq për rritjen e pagave ka thënë se e kundërshton, për faktin se vendimi është marrë nga zyra partiake.

Ministri Besim Beqaj ua ka rikujtuar opozitarëve se asnjë buxhet nuk aprovohet në bazë të parave kesh, por duke llogaritur të hyrat buxhetore, ndërkaq e ka quajtur logjikë të kaluar, këmbënguljen për mosprivatizimin e PTK-së.

Ministri i Zhvillimit Ekonomik ka thënë se neni 4 do të riformulohet, por ka mohuar të jetë në kundërshtim me ndonjë normë kushtetuese.

“Unë besoj në profesionalizmin e disa deputetëve këtu, por disa të tjerë i lus që ta nxjerrin digitronin për llogari”, ka thënë Hamza.

Debati për Projektligjin për buxhetin ka nisur paradite dhe ka vazhduar edhe gjatë pasdites, ndërkaq sipas të gjitha gjasave, miratimi në parim i këtij projektbuxheti do të shtyhet për të shtunën, ose për të hënën, pasi që përveç kërkesave të mëdha të deputetëve për të diskutuar, është në pyetje edhe kundërshtimi për përfshirjen e privatizimin e PTK-së në kuadër të projektligjit për buxhetin. LDK-ja kërkon që çështja e privatizimit të PTK-së, të vijë si ligj i veçantë, e mos të përfshihet në kuadër të buxhetit.

HAMZA: BUXHETI ËSHTË I PROJEKTUAR NË BAZË TË PRIORITETEVE TË QEVERISË

Ministri i Financave, Bedri Hamza, ka thënë se buxheti i vitit 2011 është projektuar në bazë të prioriteteve të qeverisë së vendit, duke paraparë një rritje ekonomike prej 5.3 për qind dhe trajtimin e çështjeve sociale.

Ai në një prononcim ka thënë se ka shumë arsye pse duhet votuar ky buxhet, sepse siç ka thënë ai buxheti parasheh përmirësimin e pozitës materiale të gjithë punësuarve në sektorin publik dhe gjithashtu edhe ndërtimin e autostradës.

Sipas tij, me këtë buxhet parashihet furnizimi me libra falas për të gjithë nxënësit e shkollës fillore dhe parashihet fondi për barna esenciale. Ndërsa ai ka shtuar se është koha që Kosova deri më 1 prill të ketë buxhetin e miratuar që të mund të vazhdoj me pagesat normale.

Ministri ka theksuar se ky buxhet është i projektuar në bazë të prioriteteve që i paraparë Ekzekutivi i vendit.

Ndërsa i pyetur se a do të votojnë edhe deputetët e opozitës këtë buxhet, Hamza beson se të gjithë deputetët e Kuvendit të Kosovës do të votojnë miratimin e buxhetit.