Lajme Shqip Wednesday, 04 April 2012 22:35

Pep Guardiola duhet të ketë fërkuar duart pas përfundimit të ndeshjes Çelsi-Benfika, ku në gjysmëfinale ndaj Barcelonës së tij nuk u kualifikua ekipi më i mirë, domethënë Benfika. Portugezët i kanë dhënë një leksion futbolli anglezëve në fushën e tyre por çuditërisht ishte Çelsi që festoi në fund kualifikimin në gjysmëfinalet e turneut pas një fitoreje 2-1. 

Skuadra angleze shihej si favorite për të kaluar turin edhe për shkak të fitores 1-0 në fushën kundërshtare, por Benfika kishte ardhur me ide të qarta në Londër, duke sulmuar që nga minuta e parë e duke vënë disa herë në vështirësi portierin Çeh. Megjithatë, vendasve i vjen në ndihmë edhe gjyqtari slloven Damir Skomina, i cili jep një penallti shumë të diskutueshme në minutën e 21-të, pas ndërhyrjes së Garsia ndaj Kol. Lampard transformon saktësisht nga pika e bardhe dhe i jep avantazhin ekipit të tij, duke lënë të kuptohet se ndeshja është mbyllur dhe kualifikimi është siguruar.

Por nuk e mendon njëlloj Benfika që vazhdon të sulmojë, edhe pse që në minutën e 40-të mbetet me 10 lojtarë pasi Skomina largon me karton të kuq kapitenin Maksi Pereira. Portugezët mbyllin Çelsin në gjysmëfushën e tyre dhe bëjnë që Çeh të bëhet protagonist kryesor i mbrëmjes me ndërhyrjet e tij.

Në minutën e 85-të, Havi Garsia shënon golin e barazimit dhe ngjall shpresat për skuadrën e tij, e cila në rast të shënimit të një goli tjetër do të siguronte kalimin e turit. Por golin e gjen Çelsi në minutën e 92-të me anë të një kundërsulmi të Raul Meireles, i cili vulos suksesin 2-1 dhe kalimin e londinezëve mes 4 skuadrave më të mira për herë të 6-të në 9 vitet e fundit. (LajmeShqip.com)

 
Lajme Shqip Tuesday, 03 April 2012 20:04

Roberto Di Mateo u ka kujtuar lojtarëve të Çelsit se ata rrezikojnë të shkruajnë historinë e gabuar nëse nuk e marrin me seriozitet maksimal ndeshjen e kthimit përballë Benfikës në fushën e tyre.

Londinezët janë favoritë për t’u kualifikuar në këtë sfidë, pasi i nevojitet vetëm barazimi për ta kaluar turin, pas suksesit 1-0 në fushën kundërshtare në ndeshjen e parë.

“Vetëkënaqësia është një rrezik. Jemi në pushimin e ndeshjes dhe kryesojmë 1-0. Por një kryesim 1-0 nuk do të thotë asgjë. Lojtarët tanë janë të ndërgjegjshëm për këtë situatë dhe do të na duhet të hyjmë në fushë me të njëjtën sjellje si ndaj Napolit”.

Benfika është një nga skuadrat më të vështira në këtë edicion të Ligës së Kampioneve dhe këtë e ka treguar duke eliminuar edhe Mançester Junajtid në fazën në grupe. “Kjo përballje nuk është mbyllur. Ata kanë shënuar në çdo ndeshje jashtë fushës së tyre në këtë edicion ndaj duhet të jemi shumë të kujdesshëm”, tha Di Mateo.

Trajneri italian ka refuzuar të përgjigjet për çdo pyetje tjetër përveç atyre direkte mbi ndeshjen e të mërkurës. Ai nuk ka pranua të përgjigjet pyetjeve rreth të ardhmes së tij dhe nëse klubi po mendonte ta mbante në punë edhe pas përfundimit të këtij sezoni. (LajmeShqip.com)

 
Lajme Shqip Tuesday, 03 April 2012 18:49

Oskar Kardozo mbetet optimist se Benfika mund të eliminojë Çelsin nga Liga e Kampioneve brenda në “Stemford Brixh”. Londinezët siguruan një avantazh të rëndësishëm në ndeshjen e parë në “Estadio da Luz”, ku një gol i Solomon Kalu u dha fitoren minimale 1-0.

Megjithatë, Kardozo beson se Çelsi ishte thjesht me fat në sfidën e parë dhe kjo tregon se Benfika mund të kualifikohet mes 4 ekipeve më të mira të turneut.

“Nuk besoj se Çelsi ishte me i mirë se ne në ndeshjen e parë. Ishte një ndeshje me shumë fat për anglezët. Ne nuk kemi frikë të luajmë kundër asnjë prej skuadrave të kampionatit anglez”.

“Kemi mundur Mançester Junajtid në Ligën e Kampioneve dhe ata janë më mirë se Çelsi. Sfida jonë nuk është e lehtë, por është  mundur”.

“Nuk e meritonim humbjen në Lisbonë dhe tani kemi mundësinë t’u japim një goditje të fortë në Londër. Për ne do të jetë e rëndësishme të shënojmë. Nëse Benfika merr kontrollin e lojës, atëherë do të shënojmë gola. Jam i bindur se lojtarët e Çelsit e dinë se nuk ka mbaruar asgjë”, tha Kardozo. (LajmeShqip.com)