Lajme Shqip Friday, 22 July 2011 18:01

Prishtinë – Masat e reciprocitetit vlejnë vetëm për mallrat me Vulat e Doganave të Serbisë, por jo edhe për mallrat me origjinë nga Serbia, që mund të hyjnë nga shtetet tjera fqinje. Për këtë, kryetari i Odës Ekonomike të Kosovës, Safet Gërxhaliu i fton afaristët për vetëdijesim dhe që të mos i shfrytëzojnë këto rrugë alternative.

Ekzistojnë paqartësi tek opinioni se me masat e reciprocitetit, a nënkuptohet mos-pranim i mallrave vetëm me Vulat e Doganave të Serbisë, apo mospranim i mallrave me origjinë nga Serbia, pa marrë parasysh nga cilat pika doganore hyjnë ato. Zëdhënësi i Doganave të Kosovës, Adriatik Stavileci, ka sqaruar se reciprociteti vlen vetëm për mallra serbe me Vulat e Doganave të Serbisë.

“Edhe sot ka mallra të Kosovës, të cilat eksportohen fillimisht në Maqedoni dhe pastaj ato eksportohen prej Maqedonisë në shtetin serb, në këtë rast as shteti serb nuk mund t’i ndalë ato mallra. Në anën tjetër, edhe nëse një prodhues serb fillimisht i shet ato mallra në Maqedoni dhe pastaj vijnë në Kosovë, atëherë prapë nuk ka ndalesë në origjinë, por ka ndalesë në Vula, pra në atë që edhe Serbia nuk na njeh”, thekson Stavileci.

Sqarim të njëjtë jep edhe zëdhënësja e Ministrisë së Tregtisë e Industrisë, Dardana Halimi.

“Vendimi ka përcaktuar shumë qartë se Vulat e Doganave të Serbisë nuk njihen, e jo mallrat me origjinë nga Serbia, për arsye se këtu bëhet fjalë për reciprocitet”, thotë Halimi.

Rezikun se mallrat e Serbisë mund të hyjnë nga shtetet fqinje, qysh dje e ka paralajmëruar edhe kryetari i Odës Ekonomike, Safet Gërxhaliu. Ai sot ka ftuar afaristët për vetëdijesim.

“Në rend të parë duhet që biznesmenët kosovarë të tregojnë një vetëdije më të lartë për shtet. Nëse e përcjellin shtypin ditor, sot në Kosovë shumë më tepër vuajnë për këto masa biznesmenët kosovarë se sa në Serbi. Kjo është për mua alarmante dhe shqetësuese”, tha Gërxhaliu.

Mallrave që tentohen të hyjnë në këtë mënyrë në Kosovë, do t’iu rritet kostoja, për shkak të ri-eksportit dhe transportit.

 
Lajme Shqip Friday, 22 July 2011 13:47

Ai, pas takimit të Këshillit të Qarkut të Mitrovicës, në të cilën kanë marrë pjesë përfaqësuesit e katër komunave veriore, theksoi se aplikimi i masave të tilla doganore në pikat kufitare Jarinje dhe Bërnjak është i papranueshëm.
“Ftoj qytetarët serbë që të vazhdojnë të furnizohen me mallra nga Serbia, ndërsa porosis EULEX-in se do të kundërshtojmë me të gjitha mjetet dhe në mënyrë të fuqishme taksat doganore në këto pika”, ka thënë Nedelkoviq.

 
Lajme Shqip Friday, 22 July 2011 12:34

Prishtinë – Zv/ndihmës sekretari amerikan i Shtetit, Thomas Countryman, ka thënë se vendimi i Qeverisë së Kosovës për ndalimin e importeve nga Serbia ishte rrjedhojë e bllokadës së mëhershme tregtare që Serbia kishte vendosur kundruall Kosovës.

Në një intervistë për “Zërin e Amerikës”, Countryman tha se Shtetet e Bashkuara do të dëshironin të shihnin një qasje legale të të dyja palëve ndaj kësaj çështjeje.

Shtetet e Bashkuara të Amerikës kanë thënë se Qeveria e Kosovës ishte e detyruar të vendosë masa të ndërsjella në marrëdhëniet tregtare me Serbinë.

Countryman ka thënë se nuk do të dëshironin të shihnim një qasje të tillë, por të njëjtën kohë ka thënë se duhet të shihet e vërteta se Serbia ka filluar një bllokadë të tillë ndaj mallrave të Kosovës para më shumë se dy vjetësh.

“Edhe ajo bllokadë është jolegale kundruall marrëveshjes për tregti të lirë në Evropën Qendrore, të cilën Beogradi e ka nënshkruar vjet më parë dhe nuk lejon bllokadë të tillë as nga ana e Serbisë e as nga ana e Kosovës. Duam të shohim thjesht një qasje legale të të dyja palëve”, ka thënë ai.

Zyrtari i lartë amerikan tha se edhe shtyrja e bisedimeve ndërmjet Kosovës dhe Serbisë për muajin shtator, ka të bëjë me çështjen e bllokadës.

“Vendimi për të anuluar bisedimet e kësaj jave ishte rrjedhojë e mosgatishmërisë së Qeverisë së Serbisë që të heqë bllokadën ndaj mallrave të Kosovës dhe për këtë arsye nuk kishte mundësi për marrëveshje të reja gjatë kësaj javem”, ka thënë Countryman.

Megjithatë, ai ka thënë se SHBA-të janë optimiste se edhe Serbia edhe Kosova, mund të gjejnë zgjidhje praktike për çështjet e jetës së përditshme.

Ai ka theksuar se është shumë e rëndësishme që Beogradi të përmbushë reformat e brendshme dhe të ketë marrëdhënie sa më të mira më fqinjët, por, sipas tij, po aq e rëndësishme është për evropianët që një vend që synon statusin e kandidatit për anëtarësim në Bashkimin Evropian të përmbushë detyrimet e tij.

Zv/ndihmës sekretari amerikan i Shtetit ka thënë se ishte shembull shumë negativ që Beogradi tash dy vjet e gjysmë i shkelë detyrimet ndaj CEFTA-s.

 
Lajme Shqip Friday, 22 July 2011 09:44

Prishtinë – Një ditë pas vendimit për vendosjen e masave reciproke ndaj Serbisë, në pikat kufitare janë grumbulluar kamionë të cilët bartnin mallra me vulat serbe që e kishin destinacion Kosovën. Kjo i nervozoi biznesmenët e Serbisë, të cilëve ky vendim do t’u shkaktojë humbje. I irrituar u shfaq edhe Presidenti Boris Tadiç. Ai tha se reciprociteti i vendosur nga Prishtina është një provokim i madh dhe gjest i gabuar.

Në këtë përplasje, sipas ekspertëve, pritet të përfitojnë vendet e treta të rajonit. Ata vlerësojnë se bllokada e dyanshme i hap rrugë rritjes së këmbimit tregtar, sidomos ndërmjet Kosovës dhe Maqedonisë.

Zëdhënësi i Doganave të Kosovës, Adriatik Stavileci ka thënë se është duke u zbatuar vendimi mbi parimin e reciprocitetit dhe janë kthyer edhe ngarkesat e para që vijnë nga Serbia. Ndërkohë, siç ka njoftuar Stavileci, ka rënie në ardhjen e ngarkesave nga shteti fqinnje, që supozohet se ka ndodhë me përhapjen e njoftimit për zbatimin e reciprocitetit.

Kryetari i Odës Safet Gërxhaliu, duke e përgëzuar ministren Mimoza Kusari – Lila për guxim, nuk pret se do të ketë probleme në treg.

“Ne si OEK kemi partneritet me Odat e ndryshme homologe në rajon, në EU e më gjerë dhe të gjitha janë të zotuara që të shfrytëzojnë këtë moment për pozicionim në tregun kosovar dhe e tëra kjo është një garanci se nuk ka arsye për panik ose për një pasiguri për mungesë të mallrave”, tha Gërxhaliu.

Nga ana e tij, njëri ndër importuesit më të mëdhenj nga Serbia, deputeti Ramiz Kelmendi, po ashtu e përshëndet vendimin e qeverisë, por pret një mungesë të produkteve dhe ngritje të lehtë të çmimeve.

Ndryshe, kryetari I Odës Gërxhaliu, frikohet se afaristët do të tentojnë t’i futin mallrat serbe përmes Shqipërisë e Maqedonisë. Këtë mundësi të rieksportit, nuk e përjashtoi as zëdhënësi i Doganava, Stavilec.