Lajme Shqip Tuesday, 08 October 2013 16:49

Tiranë- Trupi gjykues i Gjykatës së të Drejtave të Njeriut në Strasburg hodhi poshtë edhe shpresën e fundit të Jaho Salihit dhe Ismet Haxhisë për të fituar lirinë. Vendimi i gjyqtarëve evropianë ka qenë i prerë: procedurat penale, që çuan në dënimin e oficerëve të rangut të lartë të policisë shqiptare për përfshirje në vrasjen e një politikani ishin të drejta.

Gjykimi i çështjeve nr. 29861/03 Haxhia kundër Shqipërisë dhe 29864/03 Mulosmani kundër Shqipërisë nuk është përfundimtar, pasi mund të apelohet pranë Dhomës së Madhe të Strasburgut. Por, duket se ka qenë unanim në rastin e Jaho Salihit dhe me shumicë votash në rastin e Haxhisë, raporton sekretaria e Gjykatës.

Përfundimi i trupit gjykyes ka qenë se nuk është konstatuar shkelje e neneve 6 paragrafi 1 dhe 3 (a) deri (d) – e drejta për një gjykim të drejtë të Konventës Evropiane të të Drejtave të Njeriut. Ndërkohë, Gjykata e konsideroi si të papranueshëm ankesën e dy aplikuesve për shkelje të Nenit 6 paragrafi 2 (prezumimi i pafajësisë).

Gjykata ka arritur në konkluzionin se procedurat e ndjekura në të dy rastet nuk përmbanin asnjë element të mungesës së drejtësisë. Avokatët e aplikantëve kanë patur në dispozicion mjaft kohë që të studjonin dosjen e çështjes; dënimet e tyre janë kryer mbi bazën e dëshmive nga një numër dëshmitarësh dhe Gjykata nuk mundi të gjejë arbitraritet në paraqitjen e provave.

Nga ana tjetër, Gjykata mendon se ankesa e Jaho Salihit për një shkelje të së drejtës së tij për t’u prezumuar i pafajshëm është e pabazuar në mënyrë të dukshme. Ndërkohë që një deklarim publik nga ana e një politikani kryesor të opozitës, i cili akuzoi menjëherë pas krimit Salihin për vrasje, mund të ketë patur ndikim edhe pse Salihi u akuzua më se një vit më pas, politikani që e bëri këtë deklaratë, e bëri si një qytetar privat dhe nuk mbante asnjë post publik në atë kohë, arsyetojnë gjyqtarët.

Aplikimi i Ismet Haxhisë u depozitua në Gjykatën Evropiane të të Drejtave të Njeriut më 20 korrik të vitit 2003, ndërkohë që ai nga Jaho Salihi Mulosmani është dorëzuar më 4 korrik të të njejtit vit.

Gjykimi u bë nga një Dhomë e përbërë prej shtatë gjyqtarësh:

Ineta Ineta Ziemele (Lituani), kryetare
David Thór Björgvinsson (Islandë)
George Nicolaou (Qipro)
Zdravka Kalaydjieva (Bullgari)
Vincent A. De Gaetano (Maltë)
Paul Mahoney (Mbretëria e Bashkuar)
Markelian Koca (Albania), gjyqtar i posaçëm
Sekretare Françoise Elens-Passos /Shqiptarja/

 

 
Lajme Shqip Thursday, 12 September 2013 13:24

Tiranë – Heroi i Demokracisë, Azem Hajdari, do të prehet që nga sot në varrezat e Dëshmorëve të Kombit. Pas ceremonisë së homazheve të organizuar nga Bashkia e Tiranës, që nisi sot rreth orës 10:00, eshtrat e liderit të dhjetorit do të zhvendosen nga Sharra drejt Varrezave të Dëshmorëve. 

Në ceremoni morën pjesë katër ministra të qeverisë ‘Rama’, ambasadorët e BE, OSBE dhe SHBA, deputetë të PD e aleatë të saj, ndërkohë që më pas nderoi figurën e Hadarit edhe kryetari i Parlamentit, Ilir Meta. Meta shoqërohej nga Luan Rama. Presidenti Bujar Nishani, kreu i PD-së Lulzim Basha dhe ish-kryeministri Berisha kryen homazhet e rastit pak minuta para se koortezhi ti drejtohej Varrezave të Dëshmorëve të Kombit. Në ceremoni morën pjesë edhe kreu i Komunitetit Myslyman, Selim Muça dhe kreu i Kishës Katolike Imzot Rrok Mirdita, ish-presidenti Alfred Moisiu, si dhe deputetët e PS-së, Taulant Balla e Pandeli Majko.

 Azem Hajdari, Heroi i Demokracisë, mban titullin më të lartë të Republikës së Shqipërisë “Urdhrin e Flamurit” dhe urdhrin më të lartë në Republikën e Kosovës, “Medaljen e Lartë të Lidhjes Shqiptare të Prizrenit”, të dhënë nga ish–Presidenti Ibrahim Rugova. Azem Hajdari është Qytetar Nderi i Tiranës dhe pothuajse i të gjithë bashkive dhe komunave të Republikës së Shqipërisë. 

Vendimi për të rivarrosur Azem Hajdarin në Varrezat e Dëshmorëve u mor në datën 5 shtator dhe Bashkia Tiranë ngriti një komision të posaçëm pune që do të merrej pikërisht me ceremoninë që do të zhvillohet sot në prani të shumë personalitete të ftuara nga të gjitha trevat shqiptare. Azem Hajdari në dhjetor 1990 u vu në krye të lëvizjes studentore, kohë e cila shënon dhe fillimin e aktivitetit të tij politik. Në dhjetor 1990 – shkurt ai u zgjodh Kryetar i Komisionit Nismëtar të Partisë Demokratike. Në vitet 1991 – 1993 ishte nënkryetar i Partisë Demokratike të Shqipërisë dhe anëtar i Komitetit të saj Drejtues. Më 31 mars 1991 – deputet i Partisë Demokratike të Shqipërisë për Shkodrën. Më 22 mars 1992 – deputet i Partisë Demokratike të Shqipërisë për Shijakun. Më 26 maj 1996 – deputet i Partisë Demokratike të Shqipërisë për Bulqizën, 29 qershor 1997 – deputet i Partisë Demokratike të Shqipërisë për Tropojën, 1992-1996 – kryetar i Komisionit Kuvendor për Rendin Publik dhe SHIK-un, – nëntor 1996 – kryetar i Sindikatave të Pavarura Shqiptare, qershor 1997 – kryetar i Komisionit Kuvendor për Mbrojtjen Kombëtare, 1995 – 1998 – president i klubit të futbollit “Vllaznia” të Shkodrës dhe president i Federatës Shqiptare të Arteve Marciale.

BASHA: AZEMI U VRA SE MPOSHTI FRIKËN, 
Ora 12:57 Kreu i PD-së njëherësh kryetari i Bashkisë së Tiranës, Lulzim Basha mbajti një fjalë nderi në ceremoninë e organizuar në varrezat Dëshmorët e Kombit për rivarri8min e eshtrave të ‘Heroit të Demokracisë” , Azem Hajdari. 

‘15 vite më parë i dhamë lamtumirë tribunit dhe të djathtë të Sali Berishës, i cili mbrojti PD nga skenarët më të zinj të saj’, theksoi Basha. 

KORTEZHI DREJT VARREZAVE TË DËSHMORËVE 
Ora 12:26- Pas homazheve që zgjatën rret 2 orë e 30 minuta, arkivoli i liderit të dhjetorit Azem Hajdari iu drejtua Varrezave të Dëshmorëve që do të jetë prej sot edhe banesa e tij e fundit. 

NISHANI HOMAZHE PËR AZEM HAJDARIN 
Ora 12:20 Presidenti i Republikës së Shqipërisë Bujar Nishani kreu homazhet e rastit në nder të ‘Heroit të Demokracisë” Azem Hajdari. Pasi nënshkroi në librin e kujtimeve presidenti u takua dhe me kreun e PD-së Lulzim Basha dhe Sali Berishën. Presidenti nuk u prononcua për gazetarët pas homazheve teksa ka zgjedhur të përshëndesë me kortezi njerëzit të cilët ndodheshin jashtë Pallatit të Kongreseve. /BW/

 
Lajme Shqip Wednesday, 11 September 2013 13:31

Bashkia e Tiranës njoftoi se ditën e enjte, trupi i Azem Hajdarit do të prehet në varrezat e Dëshmorëve të Kombit.

“Ditën e enjte, më datë 12 shtator, personalitete të larta të jetës politike nga Shqipëria dhe më gjerë, kryetarët e partive politike, studentët e dhjetorit ‘90, intelektualët, nismëtarë të lëvizjes për demokraci, miq, shokë dhe kolegë të Azemit do të kryejnë homazhe për nder të tij e më pas ta përcjellin për në Varrezat e Dëshmorëve të Kombit.

-Në orën 10:00, në Pallatin e Kongreseve do të kryhen homazhe, në nderim të Heroit të Demokracisë Azem Hajdari.

-Në orën 12:00, kortezhi i përmortshëm me arkivolin e vendosur në shtratin e topit, do të niset për në varrezat e Dëshmorëve të Kombit.

-Në orën 12:30, do të nisë ceremonia e varrimit në Varrezat e Dëshmorëve të Kombit,” thuhet në njoftimin e Bashkisë, e cila ka shpërndarë edhe një CV të Azem Hajdarit.
Biografia e Azem Hajdarit:

-Azem Hajdari u lind më 11 mars 1963, në qytetin Bajram Curri;

-I martuar, me tre fëmijë, Kirjaldi, Rudina dhe Azemi i vogël, i lindur katër muaj pas vdekjes së Azemit;

-Më 1987 fiton të drejtën e studimit dhe regjistrohet në Universitetin e Tiranës, Fakulteti i Shkencave Politike e Juridike;

-Në vitin 1993 diplomohet për filozofi në Universitetin e Tiranës;

-Në vitin 1995 diplomohet si jurist në Universitetin e Tiranës;

-Në vitet 1993-1994 ndjek kualifikim pasuniversitar në Shtetet e Bashkuara të Amerikës për filozofi;

-Më 1996 ndjek kualifikim për politikat e sigurisë e mbrojtjes, në kuadrin e NATO-s, në Garmisch-Partenkirchen, në Gjermani;

 

Aktiviteti Politik:

-Dhjetor 1990 – Udhëheqës i Lëvizjes Studentore;

-Dhjetor 1990 –Kryetar i Komisionit Nismëtar të Partisë Demokratike;

-1991 – 1993 – Nënkryetar i Partisë Demokratike të Shqipërisë dhe anëtar i Komitetit të saj Drejtues;

-31 mars 1991- Deputet i Partisë Demokratike të Shqipërisë për Shkodrën;

-22 mars 1992 – Deputet i Partisë Demokratike të Shqipërisë për Shijakun;

-26 maj 1996 – Deputet i Partisë Demokratike të Shqipërisë për Bulqizën;

-29 qershor 1997 – Deputet i Partisë Demokratike të Shqipërisë për Tropojën;

-1992-1996 – Kryetar i Komisionit Kuvendor për Rendin Publik dhe SHIK-un;

-Nëntor 1996 – Kryetar i Sindikatave të Pavarura Shqiptare;

-Qershor 1997 – Kryetar i Komisionit Kuvendor për Mbrojtjen Kombëtare;

-1995 – 1998 – President i klubit të futbollit “Vllaznia” – Shkodër dhe president i Federatës Shqiptare të Arteve Marciale

 

Vlerësime për Heroin e Demokracisë:

-Urdhri i Flamurit;

-Urdhri “Gjergj Kastrioti-Skënderbeu”, dhënë nga Presidenti i Republikës;

-Medalja e Artë e Lidhjes Shqiptare të Prizrenit, dhënë nga ish-Presidenti i Republikës së Kosovës, Ibrahim Rugova, në vitin 2003;

-Urdhri “Nderi i Kombit” (2002);

-Pishtar i Demokracisë;

-“Qytetar Nderi” i qytetit të Tiranës, Vlorës dhe i pothuajse të gjithë bashkive e komunave të Shqipërisë./ tema/ 

 
Lajme Shqip Tuesday, 12 March 2013 08:40

Tiranë – Tribun i lirisë së shqiptarëve, e cilësoi kryeministri Sali Berisha figurën e Azem Hajdarit, ndërsa sot eshte kujtuar 50 vjetori i lindjes së tij.

“Jemi këtu për të festuar 50 vjetorin e njerit prej figurave më të shquara në historinë e lirisë së shqiptarëve, 50 vjetorin e lindjes së Azem Hajdarit. Theksoj për të festuar, sepse burra si ai shënjohen me germa të arta në memorien e historisë së kohës. Nuk vdesin kurrë. Ata jetojnë gjithnjë, ndaj dhe ditëlindja e tyre festohet gjithnjë. I tillë ishte Azem Hajdari, një personalitet, një i ri, i cili në takimin më të parë nuk mund të gjeje diçka tjetër për ta vlerësuar, përveç fjalës tribun.”- tha Berisha.

Berisha e vlerësoi figurën e Azem Hajdarit si udhëheqësin e Lëvizjes Studentore, ndërsa më vonë, theksoi  ai, Azemi ishte dëshmi se një tribun i vërtetë lirie drejtonte këtë lëvizje, udhëhiqte vendosmërisht këtë lëvizje.

“Në 1 shekull janë me qindra dhe me mijëra shqiptarë që kanë bërë sakrifica më të mëdha, më sublime për lirinë e kombit. Unë kam bindjen se asnjë nuk ka kontribuar personalisht sa Azem Hajdari për lirinë tonë për lirinë e shqiptarëve. Ndaj ne nuk kujtojmë, ne sot festojmë ditëlindjen e këtij tribuni të madh të lirisë së shqiptarëve.”- tha Berisha.

Kryeministri Berisha kujtoi gjithashtu se Azem Hajdari ka bërë gjithçka që të mbështeste Lëvijen Çlirimtare të Kosovës.

“Ai ra në atentatin e rrezikshëm shumë në Tropojë. Por në Tropojë ai shkoi për të mbështetur qytetarët e Kosovës. Shkoi për të mbështetur Lëvizjen Çlirimtare të Kosovës. Idhulli i tij ishte Presidenti Rugova, tek i cili kishte një besim të jashtëzakonshëm, adhurim të jashtëzakonshëm. Çdo ditë ai do të jetonte me preokupimin më të madh se si në të ndihmojmë Kosovën. Ai ndjehej tërësisht pjesë e saj, kërkonte të merrte pjesë direkt.”- theksoi kreu i qeverisë.

Berisha tha se sot ne duhet të jemi krenarë sepse idealet e tij janë bërë realitet.

“Festojmë sepse Shqipëria sot është anëtare e NATO-s, lëvizim të lirë në mbarë Evropën, festojmë sepse shqiptarët bëjnë përpjekjet më të madhe për tu bashkuar me Evropën,  Kosova është e lirë, se shqiptarët janë të lirë dhe të pavarur. Në Shqipëri po ndërtojmë demokracinë e bazuar në vlerat e tregut. Jemi më të sigurtë se kurrë në të ardhmen që Azem Hajdari projektoi për vehte, për fëmijët e tij dhe për shqiptarët.”- përfundoi Berisha. (LajmeShqip.com)

 
Lajme Shqip Wednesday, 12 September 2012 14:25

Tiranë – Homazhe ne kujtim te 14 vjetorit te vrasjes se deputetit demokrat Azem Hajdarit. Ne nje ceremoni perkujtimore, kryeministri Sali Berisha dhe përfaqësues të së djathtës kanë bere homazhe në bustin e ngritur për nder të “Pishtarit të demokracisë” Azem Hajdari.

Berisha, duke e cilesuar ate tribunin e lirisë së shqiptarëve, deklaroi se ‘pa kurajen e tij asnjë nga nuk e merr me mend se si do të ishim sot në 100-vjetorin e pavarësisë”

“Ne sot kujtojmë tribunin e lirisë së shqiptarëve, Azem Hajdarin, udhëheqësit të lëvizjes studentore dhe të Partisë Demokratike që u ekzekutua në këtë vend nga banda të qeverisë, në aktin më makabër në vrajsen e shekull për Shqipëri. Ne nderojmë sot, Azem Hajdarin në këtë 100-vjetor të pavarësisë sonë por mendimi i parë që na vjen natyrshëm në mendje është se pa veprën e tij, pa trimërinë e itj, pa kurajon e tij, asnjë nga ne nuk e merr me mend se si do të ishim sot në 100-vjetorin e pavarësisë”- tha Berisha.(LajmeShqip.com)

 
Lajme Shqip Monday, 12 September 2011 16:26

Tiranë – Presidenti i Republikës, Bamir Topi, zhvilloi sot në mesditë një vizitë në familjen e “Pishtarit të Demokracisë”, Azem Hajdari, njërit prej politikanëve dhe deputetëve më të spikatur në historinë e demokracisë shqiptare, i cili humbi jetën tragjikisht 13 vjet më parë në Tiranë.

Gjatë vizitës, Kreu i Shtetit kujtoi me nderim e respekt të veçantë disa momente të paharrueshme të punës e  bashkëbisedimeve miqësore me të ndjerin Azem Hajdari, si një udhëheqës me vlera të rralla demokratike e patriotike, duke vënë në dukje veçanërisht vullnetin, dëshirën e punën vetëmohuese të tij për të realizuar ëndrrën e hershme, konsolidimin e demokracisë në Shqipëri.

Në një prononcim për mediat, Kreu i Shtetit, duke vlerësuar këtë figurë të shquar të historisë së demokracisë shqiptare, u shpreh se “sa më shumë kalojnë vitet, aq më shumë e vlerësojmë Azemin, një njeri që ka demonstruar të jetë i lirë, edhe atëherë kur shumë njerëz ishin të kompleksuar”.

“Edhe pse kalojnë vitet, vështirë se gjendet një figurë paralele me Azem Hajdarin, për kurajon civile e qytetare, për të demonstruar në çdo lloj mjedisi se njeriu, para se të realizojë vepra të mëdha, duhet të jetë së pari një njeri i lirë. Kjo është arsyeja që ai respektohet dhe mbetet gjithmonë një figurë shumë e freskët për shoqërinë dhe demokracinë shqiptare”, u shpreh Presidenti Topi.

Kryeministri Sali Berisha, në përvjetorin e 13-të të vrasjes së deputetit të Partisë Demokratike, Azem Hajdari, shprehu bindjen se, “idealet dhe ëndrrat e tribunit të lirisë sot janë realitet në Shqipëri”.

Kreu i qeverisë, pas homazheve të zhvilluara në memorialin e ngritur për nder të tij, e cilësoi deputetin demokrat “tribun të demokracisë, i cili jo vetëm vrau frikën, por që shumë shpejt u shndërrua në flamurmbajtësin dhe maratonomakun e demokracisë shqiptare”.

Duke vlerësuar lart rolin e tij në fillimet e demokracisë në Shqipëri dhe kontributin kundër regjimit vrastar kryeministri theksoi se, “nga fallangat terroriste të shtetit të asaj kohe, Azem Hajdari hyri në historinë e lirisë së shqiptarëve si një tribun i pashembullt, në një kohë kur kombi lëngonte nën shtypjen më të egër, kur në tërësi besohej se Shqipëria do të mbetej Kuba e Adriatikut dhe shqiptarët nuk do të dilnin dot nga regjimi i skllavërisë në të cilin jetonin”.

“Ata të cilët shkrehën plumbat mbi gjoksin e tij menduan dhe besonin se do të mund të eleminonin kauzën e Azem Hajdarit, por gabuan rëndë. Sot projekti dhe ëndrra e tij dhe e studentëve të dhjetorit është më realitet se kurrë. Shqipëria sot është vend anëtar i NATO-s dhe shqiptarët lëvizin të lirë në mbarë Europën, dhe po ecin të sigurtë drejt horizontit të ri “Shqipëria, vend i zhvilluar”, u shpreh kryeministri Berisha.

Studenti Azem Hajdari ishte udhëheqës i Lëvizjes Studentore të Dhjetorit 1990, që çoi në përmbysjen e regjimit komunist në Shqipëri dhe vendosjen e pluralizmit politik. Ai ishte një nga themeluesit e Partisë Demokratike të Shqipërisë, partia e parë opozitare dhe Kryetar i Komisionit Nismëtar të kësaj partie.

Azem Hajdari ishte deputet i PD që nga viti 1991 deri sa u vra pabesisht më 12 shtator 1998 para selisë së Partisë Demokratike nga drejtues të Komisariatit të Policisë të Tropojës.