Lajme Shqip Tuesday, 16 April 2013 09:53

Lajmi i përhapur në mediat italiane se kompania braziliane e fondit të investimeve, “DIS”, po kërkon të dërgojë sulmuesin shqiptar Armando Sadiku në radhët e Korinthians, ka bërë mjaft bujë. Rreth kësaj teme ka folur edhe menaxheri i futbollistit, Sokol Haxhia, i cili ka konfirmuar se për sulmuesin e Luganos ka interes nga shumë klube të njohura, ndërsa nuk do t’i thuhej jo një oferte të mundshme nga Brazili.

“E kam lexuar edhe unë ditët e fundit këtë histori rreth një kontakti mes presidentit të Luganos dhe përfaqësuesve të kompanisë. Por të shohim se çfarë do të ndodhë, pasi për momentin me ne nuk ka pasur kontakte të drejtpërdrejta”.

“Korinthians është një skuadër e madhe. Nga ana jonë dyert janë të hapura për një marrëveshje të mundshme, pasi ky është një klub shumë i rëndësishëm. Por e përsëris se për momentin nuk ka pasur kontakte të reja”, shpjegoi Haxhia.

Sipas tij, lojtari ka tërhequr vëmendjen e klubeve të Serisë A, edhe atyre shumë të rëndësishme.

“Në janar e kërkoi Siena? Siena dhe jo vetëm ajo! Me përjashtim të Milan, Juventus, Inter dhe Roma, të gjithë klubet e tjera e kanë monitoruar në vazhdimësi lojtarin. Por blerja e tij është e lidhur me pasaportën e ekstrakomunitarit që ka, pasi është futbollist shqiptar. Do të shohim se çfarë mund të ndodhë në ditët në vazhdim, pasi për momentin diskutimet nuk kanë shkuar më shumë se interesimi për një transferim të mundshëm gjatë verës”, shpjegoi Haxhia për sulmuesin shqiptar që ka shkëlqyer në dy vitet e fundit në kampionatin zviceran. (LajmeShqip.com)

 
Lajme Shqip Thursday, 11 April 2013 18:40

Nga mediat italiane sot ka dalë një lajm i bujshëm i merkatos të futbollistëve shqiptarë. Armando Sadiku, sulmuesi i përfaqësueses kuqezi, ka tërhequr vëmendjen e një prej klubeve më të njohura braziliane, Korinthians, që është gati të realizojë transferimin e tij gjatë verës.

Në lajmin e publikuar nga faqja e specializuar e internetit tuttomercatoweb.com, sqarohet se si futbollisti shqiptar që aktivizohet te Lugano në Zvicër, po ndiqet nga ekspertët e kompanisë DIS. Kjo kompani, që në fakt është një fond investimi, aktualisht përfaqëson të drejtat e Korinthians për blerjen e lojtarëve, pasi në Brazil lejohet që kartoni i një futbollisti të zotërohet nga një palë e tretë.

DIS është interesuar për lojtarin dhe po mendon të blejë kartonin e tij, duke e transferuar sulmuesin 22 vjeçar në Brazil, për të luajtur me fanellën e këtij klubi legjendar, fitues në fuqi i Kupës Libertadores. Atje, ai do të formonte dyshen e sulmit as më shumë e as më pak por me vetë Aleksandre Pato, sulmuesin e Brazilit që u transferua në janar te klubi i vendlindjes nga radhët e Milanit.

Sadiku ka ngjallur shpesh interesin e klubeve të njohura evropiane por deri tani, askush nuk ka bërë një lëvizje konkrete për të siguruar shërbimet e tij. Fakti që ai luan në kombëtaren shqiptare të futbollit ka rritur ndjeshëm interesimin për sulmuesin, i cili në këto sezone në Zvicër ka shkëlqyer duke u kthyer në një golashënues të mirëfilltë. (LajmeShqip.com)