Lajme Shqip Sunday, 05 January 2014 17:56

 

Seancat e përbashkëta të qeverisë së Maqedonisë me qeverive të dy shteteve fqinje, Shqipërisë dhe Kosovës janë ende në përgatitje e sipër.

 

Zëdhënësi i qeverisë së Maqedonisë Muhamet Hoxha thotë se, nuk ka pengesa për organizimin e seancave të përbashkëta me qeveritë e dy shteteve, por tani janë krijuar kushtet duke pasur parasysh faktin se në të dyja shtetet ishin në proces zgjedhor.

 

Nga qeveria e Maqedonisë thonë se ka gatishmëri nga të gjitha palët dhe se janë në kontakt të vazhdueshëm me qeveritë e të dyja vendeve, për të caktuar datën dhe temat e diskutimit që do të kenë karakter rajonal ndërsa do të jenë në shërbim të qytetarëve, shkruan shekulli.

 

Mbledhjet e përbashkëta të qeverive të vendeve të rajonit realizohen në kuadër të bashkëpunimit rajonal si parakusht për euro integrimin.

 

 
Lajme Shqip Wednesday, 04 December 2013 16:21

Shkup- Portali Almakos.com, raportoi se disa javë me radhë lideri i PDSH-së, Menduh Thaçi është duke e riorganizuar forumin rinor të kësaj partie në të gjitha qytetet, ndërkohë në një takim me forumin rinor të kësaj partie, Thaçi ka zbuluar se ç’farë kishte biseduar ai me liderin e BDI-së, Ali Ahmetin, në takimin e tyre të fundit.

Ndërkaq, gazeta “Lajm”, pas disa hulumtimeve kishte kuptuar se kryeministri i Shqipërisë, Edi Rama e kishte quajtur “njeri i pyllit” kryetarin e BDI-së Ali Ahmeti, në takimin e përbashkët në Shkup të treshit Rama-Ahmeti-Thaçi.

Thaçi për takimin në fjalë nuk ka përmendur taksativisht se bëhet fjalë për takimin me kryeministrin Rama, por ka thënë se bëhet fjalë për “takimin  e fundit me një mik të përbashkët”, që në fakt ishte takimi i realizuar me ndërmjetësim të kryeministrit shqiptar. 

Sipas deklaratës së Thaçit, duket se këtë epitet Rama ja ka dhënë Ahmetit më tepër në shaka, se sa seriozisht. 

 “Në një bashkëbisedim të fundit që pata me oponentin tim politik, ai tha ne e kemi bë Marrëveshjen e Ohrit në konsultim me ekspertin amerikan Pol Vud. I thash nuk e ka emri Pol Vud, por e ka Pol Vilijams. Dhe miku i përbashkët që rrinte me ne tha leje Menduh, ka të drejtë, sepse Vud anglisht do të thotë pyll, edhe ky ka ardhur prej pyllit dhe është shumë e qartë… Ne kemi vështirësi të jashtëzakonshme të merremi me këtë politikën e pyllit, me këtë politikë që nuk është politikë”, ka thënë Thaçi. 

Edhe përkundër tentimeve, “Lajm”nuk ka arritur të kontaktojë me përfaqësues të BDI-së.

 
Lajme Shqip Monday, 11 November 2013 17:40

Tiranë – Për herë të parë pas 16 vjetësh, që nga djegia e redaksisë prej pushtetit të PD-së në mars 1997, kryeministri i ri, ekskluzivisht për gazetën “Koha Jonë”. Lexoni se çfarë mendon Edi Rama për Ilir Metën, Ben Blushin, Sali Berishën, Bujar Nishanin, Spartak Ngjelën, Nikoll Lesin, Toni Bler, Hashim Thaçin, kryeministrat e Turqisë, Greqisë dhe Italisë, liderët shqiptarë të Maqedonisë si dhe disa ministra të kabinetit të tij. 

“Koha e Jonë” e ka pyetur kryeministrin Rama se çfarë “magjie” u bëre dy liderëve shqiptarë në Maqedoni, Menduh Thaçi e Ali Ahmeti. “I bashkove për të dytën herë në mënyrë të papritur për publikun; ishte raki e fortë apo forca e një shpirti shqiptar që i bëri të qeshnin  kaq shumë aq sa opinioni publik mendoi se “mrekullia ndodhi”, ishte pyetja. 

“Dy liderët e shqiptarëve të Maqedonisë më kanë dhënë bujarisht miqësinë e besimin e tyre dhe kemi mundur të ulemi krejt natyrshëm për të diskutuar mes nesh për çështjet e interesit të përbashkët”, ka thënë Rama. 

Kryeministri është pyetur nëse vëllazëria me kryeministrin e Kosovës Hashim Thaçi ishte “lojë me “Portën e Lartë”, raport Burrash Shteti proamerikanë apo ëndrra e fshehur për një komb të unifikuar në një shtet të vetëm shqiptar. “Jemi miq të kahershëm me kryeministrin e Kosovës dhe tani na bashkon edhe detyra e përbashkët për të çuar në një nivel të ri bashkëpunimi marrëdhëniet mes të dyja shteteve. Pres me entuziazëm mble­dhjen e parë të të dyja qeverive në Prizren”, ka thënë Rama.,

I pyetur nëse vuan nga psikoza kryeministrore se e zotëron situatën në gjithçka, Rama ka deklaruar se situatën në gjithçka mund ta zotërojë vetëm Zoti, “nëse vërtet ekziston në formën që i ka dhënë besimi i njeriut në të. “Ndërsa psikozën se të gjithë ta kanë me hile mund të kesh, them unë, vetëm nëse ua  ke të gjithëve me hile. Prandaj s’e gjej veten në asnjërin prej dy rasteve”. 

Rama thotë se as nuk tensionohet as nuk i përqesh ata që shkruajnë kundër tij në media. “Kur më ndodh t’i lexoj kundërvëniet ndër ato fare pak gazeta që shfletoj në herët e pakta që më jepet mundësia, thjesht mundohem t’i kuptoj”, ka thënë ai. 

Gazetari i “Koha Jonë” e ka pyetur kryeministrin Rama nëse te kryeministri turk  Erdogan, i pëlqen autoriteti i tij  për të shtypur kundërshtarët apo pamja sulltanore. Kryeministri shqiptar është përgjigjur se kryeministri i Turqisë është një mik i mirë i shqiptarëve dhe një kryeministër jashtëzakonisht mbresëlënës në bilancin e tij të derisotëm qeverisës.

Ndërsa, për kryeministrin grek Antonis Samaras ka thënë se i ka lënë përshtypjen e një lideri të vendosur për të nxjerrë vendin e vet nga kriza e madhe ekonomike. 

 
Lajme Shqip Wednesday, 06 November 2013 01:18

Shkup- Kryeministri i Shqipërisë , Edi Rama ka bërë bashkë krerët shqiptarë në Maqedoni, kreun e Bashkimit Demokratik për Integrime, Ali Ahmetin dhe atë të Partisë Demokratike Shqiptare, Menduh Thaçi,
Kryeministri ka shrkuar në faqen e tij zyrtare në Facebook: “Darke vellazerore ne Shkup me Ali Ahmetin dhe Menduh Thacin”.
Ndërkaq shefi i kabinetit të kreut të BDI-së Artan Grubi, ka postuar një fotografi në faqen e tij në Facebook, ku shihen Rama, Ahmeti dhe Thaçi duke darkuar./LajmeShqip/ 

 
Lajme Shqip Tuesday, 08 October 2013 14:10

Shkup- Lideri i BDI-së, Ali Ahmeti gjatë vizitës së tij në Hagë, falënderoi diplomatët dhe ushtarakët holandezë në arritjen e paqes në Maqedoni dhe ndërtimin e institucioneve demokratike, stabilitetit dhe sigurisë në vend.
Ahmeti theksoi që të gjitha të arriturat e përbashkëta me komunitetin ndërkombëtar në dekadën pas Marrëveshjes së Ohrit nuk duhet të rrezikohen me vonesat për anëtarësim në NATO dhe BE.
“Pikërisht ky investim i përbashkët dhe këto të arritura plotësohen vetem duke e integruar vendin në strukturat EuroAtlantike andaj dhe miqtë tanë, si Holanda dhe vendet e tjera të BE, duhet të vazhdojnë përpjekjet drejt tejkalimit të të gjitha pengesave që na pengojnë në këtë rrugëtim dhe rrezikojnë të arriturat e deritanishme”, u shpreh Ahmeti në takimin me Drejtorin Politik të Ministrisë së Brendshme Holandaze, Auke Venema, dhe Atashenë Ushtarake për Maqedoninë Jan Willem de Wolf.
Zgjidhja e emrit është pengesë serioze dhe sfidë për të ardhmen e vendit, prandaj kryetari i BDI-së, Ali Ahmeti kërkoi që Holanda të përfshihet në zgjidhjen e kontestit me Greqinë në mënyrë që Ballkani Perëndimor përfundimisht të jetë stabil dhe i qetë.
Ahmeti do të takohet sot me Ministrin e Jashtëm të Holandës, Timermans si dhe me komisionet parlamentare për punë të jashtme dhe çështje evropiane. /INA/

 
Lajme Shqip Friday, 16 August 2013 13:01

Shkup – Lideri i shqiptarëve në Maqedoni, Ali Ahmeti, po bëhet gazi i botës. E kjo fatkeqësisht nuk është hera e parë, e me gjasë nuk do të jetë as e fundit!
Rasti i parë u shënua më 28.02.2006, atëherë ku z. Ahmeti pretendoi se Pentagoni ngriti flamurin amerikan për nder të tij.
Asokohe, “Dnevnik” fillonte artikullin me titull “Ahmeti e ka valëvitur flamurin në Pentagon”?, ndërsa artikulli fillonte me deklarimin e Bashkimit Demokratik për Integrim që pretendonte se flamuri në Pentagon ishte ngritur për nder të kryetarit Ali Ahmeti.
Ndërsa hera e dytë, ndodhi pikërisht më 13.08.2013, kur BDI e lansoi lajmin e ngritjes së flamurit amerikan në Capitol Hill sërish për “nder” të Ali Ahmetit njofton Almakos.
Bashkimi Demokratik për Integrim plasoi në media lajmin se “Flamuri amerikan ngritët në Capitoll Hill për nder të Ahmetit”. Ishin siguruar fotografi nga ceremonia zyrtare e valimit të flamurit kombëtar amerikan mbi Capitoll Hill në Washington DC për nder të Kryetarit të Bashkimit Demokratik për Integrim Ali Ahmeti, që u bë më 13 gusht, me rastin e përvjetorit të nënshkrimit të Marrëveshjes paqësore të Ohrit.
Gafa e parë u demantua shpejt nga disa media që ironizuan me pyetjen se mos vallë Ali Ahmeti e ka marrë me vete flamurin. Madje, edhe vetë ambasada e SHBA-ve e kishte demantuar një lajm të tillë.
Mirëpo, kjo nuk mjaftoi që ta mbush me mend hierarkinë e BDI-së, ata vijuan me mashtrimin e radhës dhe keqpërdorimin e shtetit amerikan duke pretenduar se në Capitol Hill, Washington DC sërish u ngrit flamuri për nder të kryetarit Ahmeti.
Vlen të sqarojmë se në të dyja rastet flamuri amerikan vendoset për nder të çdo qytetari që mund të bëjë një pagesë modeste dhe se deri më tani, flamuri në këto vende është ngritur për nder të mbi 100.000 personave, e ndër të cilët është edhe lideri i Bashkimit Demokratik për Integrim, z.Ali Ahmeti. Pra, kushti i vetëm për këtë “nder” është të paguash.
Pas hulumtimit që Almakos i bëri këtij programi në faqet publike arritëm deri tek konstatimi se bëhet fjalë për një program publik ku kërkesë për ta ngritur flamurin mund të bëjë çdo qytetar amerikan, i cili kundrejt një shume të caktuar merr flamurin që është ngrit bashkë me certifikatën ku shënohet identiteti i personit në emër të të cilit është bërë kërkesa që të ngritet flamuri. Madje, ka ndodhur që vetëm brenda një dite të vetme të ngriten 300 flamuj përmes këtyre shërbimeve me pagesë.
E kontaktuar, ambasada e SHBA-së ka preferuar që mos të komentojë asgjë.

 

 
Lajme Shqip Sunday, 04 August 2013 18:40

Shkup – Përderisa liderët politik shqiptar vazhdojnë kohë pas kohe të takohen me liderët maqedonas siç ishte rasti i fundit mes Ali Ahmetit të BDI-së dhe Zoran Zaevit të LSDM-së, takimet mes liderëve shqiptarë assesi të ndodhin.

Për këtë, në BDI, thonë se për momentin janë përqendruar ekskluzivisht në çështjen e emrit, ndërsa nuk e shohin të arsyeshme ndonjë takim eventual me kreun e PDSH-së Menduh Thaçi.

“Kohëve të fundit aktivitetet tona kanë të bëjnë ekskluzivisht me zgjidhjen e çështjes së emrit me qëllim debllokimit të integrimit në NATO dhe BE.

Fatkeqësisht PDSH-ja përmes kryetarit të saj është shprehur se kjo është çështje ekskluzive e popullit maqedonas. Ne e kemi dënuar këtë qëndrim të PDSH-se, sepse vlerësojmë se kjo është në dëm të interesit shqiptar.

Ashtu që përderisa ata nuk e ndërrojnë qasjen nuk e shohim të arsyeshme që ata të involvohen apo të thirren për zgjidhjen e çështjes së emrit dhe me atë integrimin e vendit në NATO dhe BE”, deklaroi për “Zhurnal plus”, zëdhënësi i BDI-së Bujar Osmani.

 
Lajme Shqip Tuesday, 09 July 2013 12:50

Shkup – Si duket VMRO-DPMNE dhe BDI kanë mosmarrëveshje dhe sfida edhe gjatë punës së tyre në Parlament, por gjithmonë përpiqen që ato t’i tejkalojnë duke i harmonizuar deri në shkallën e mundshme. Sipas nënkryetares së Parlamentit nga radhët e BDI-së, SuzanaSaliu dhe deputetit të VMRO-DPMNE-së, Ilija Dimovski është normale që ndonjëherë ka mosmarrëveshje mes partnerëve të koalicionit në Parlament, por gjithmonë përpiqen që të arrijnë në gjuhë të përbashkët. 
Sipas Saliut, për momentin, puna në Shtëpinë ligjvënëse është dinamike për shkak të agjendës së ngarkuar lidhur me harmonizimin e legjislaturës së vendit me atë ndërkombëtare. 
“Parlamenti ka një agjendë shumë të ngjeshur dhe shumë dinamike për shkak të funksionit shumë të rëndësishëm që ka: ligjvënien e në veçanti harmonizimin e legjislaturës vendase me standardet ndërkombëtare dhe të drejtën Evropiane. Ky mision kërkon edhe përkushtim por edhe marrëveshje dhe konsensus në mes partnerëve shumicë”, deklaroi për Zhurnal plus deputetja e BDI-së Suzana Saliu. Por megjithatë, shton ajo, janë të pranishme qëndrimet e ndryshme që kanë me kolegët e koalicionit. 
“Ne deputetët e BDI-së shpeshherë kemi dallime me kolegët tanë të koalicionitpër përmbajtjen e shumë propozim-ligjeve por të gjitha ato i tejkalojmë me marrëveshje, me takime të drejtpërdrejta me ministrat e Qeverisë nga radhët e VMRO-DPMNE-së dhe përmes amendamenteve”, nënvizon Saliu. 
Nënkryetarja po ashtu ka potencuar se të rregullta janë edhe koordinimet e kreut të Parlamentit, koordinatorët e gupeve parlamentare edhe krahas bojkotit që bën opozita. 
“Koordinimet janë një forum i rëndësishëm parlamentar ku diskutohet për të gjitha problemet dhe dallimet që ka në mes deputetëve të shumicës parlamentare, madje shpeshherë në koordinime merremi vesh për mënyrat e tejkalimit të situatave të ndryshme”, vijo Saliu. 
Për qëndrimet e kundërta dhe harmonizimin e tyre flasin edhe deputetët e VMRO-DPMNE-së. Deputeti Ilija Dimovski thotë se kur hasin në sfida me kolegët e koalicionit nga BDI, gjithmonë përpiqen që t’i tejkalojnë përmes diskutimeve. 
“Ne gjithmonë kur kemi qëndrime të kundërta përpiqemi që t’i harmonizojmë deri në shkallën që mund t’i harmonizojmë. Gjithmonë ka sfida, gjithashtu ka edhe qëndrime të kundërta por mundohemi përmes diskutimeve t’i tejkalojmë dhe kjo është e gjitha”, u shpreh për “Zhurnal plus” deputeti Dimovski.

 

 
Lajme Shqip Saturday, 15 June 2013 15:49

Shkup -Lideri i BDI-së, Ali Ahmeti për DW ka sqaruar se pse e ka ndërmarrë këtë ofensivë diplomatike që pas SHBA-së tani po qëndron në Gjermani.

“Me koalicionin qeverisës kemi mirëkuptim se duhet të gjendet kompromis me palën greke rreth çështjes së emrit. Ne si shqiptarë i kemi informuar të gjithë partitë e palës maqedonase se me cilët emra nuk pajtohemi. Nuk pajtohemi që vendi të quhet Republika Sllave e Maqedonisë, as Republika Nacionale e Maqedonisë, por as edhe të mbetet emri Ish Republika Jugosllave e Maqedonisë”, ka thënë Ahmeti.

“Çdo kompromis tjetër për ne është i pranueshëm. Si për shembull Republika Maqedonia e Epërme, Republika e Maqedonisë së Veriut etj. Aktualisht ka një propozim nga ndërmjetësuesi Nimetz dhe për këtë arsye BDI është këtu dhe ka ndërmarrë këtë aktivitet diplomatik, pasi konsiderojmë se tani janë shanset që palët të ulen në tryezën e përbashkët. Megjithatë, unë nuk jam optimist se kjo do të zgjidhet në qershor, në mënyrë që të marrim datën e fillimit të negociatave për anëtarësim në BE”, tha Ahmeti.

Në pyetjen se ekzistojnë teza të ndryshme se të gjithë shqiptarët e Ballkanit duhet të jetojnë në një shtet të përbashkët siç është Shqipëria e Madhe, Ahmeti ka thënë:

“Projekti i Shqipërisë së Madhe është i lindur në qendrat e mëdha serbe të Millosheviqit, me qëllim që të hidhet poshtë kërkesa legale e shqiptarëve, të cilët atëherë kanë jetuar në ish-Jugosllavi”.

“Prioritet e shqiptarëve që jetojnë në Maqedoni janë që të implementohet tërësisht Marrëveshja e Ohrit, integrimi i vendit në NATO dhe BE, zhvillimi ekonomik dhe ndërtimi i marrëdhënieve të shëndosha ndëretnike ndërmjet të gjithë atyre që jetojnë në Maqedoni: maqedonas, shqiptarë, vlleh, turq, romë, boshnjakë etj”.

Ahmeti dje në Berlin ka pasur një takim në MPJ-në e Gjermanisë, kurse ka biseduar edhe me Dr. Hojsgen, njërin prej bashkëpunëtorëve më të afërt të politikës së jashtme të kancelares Angela Merkel.