12
 
Lajme Shqip Sunday, 30 September 2012 15:20

Tiranë – Zv.Kryeministri dhe Ministri i Ekonomisë, Tregtisë dhe Energjetikës, Edmond Haxhinasto ka marrë pjesë sot në çeljen e një shkolle në gjuhën shqipe në Volos të Greqisë.

Në fjalën e tij, Haxhinasto tha se hapja e kësaj shkolle është një ngjarje e rëndësishme për emigrantët shqiptarë që jetojnë në këtë zonë.

Ai e cilësoi shërbimin ndaj emigrantëve shqiptarë, të cilët në greqi janë të shumtë, si një detyrim madhor.

Zv.Kryeministri falenderoi kryebashkiakun e Volosit, Panos Skotiniotis për kontributin e tij personal në hapjen e shkollës shqipe.(LajmeShqip.com)

 
Lajme Shqip Friday, 24 August 2012 10:30

Preshevë – Nxënësit shqiptarë të Luginës së Preshevës  që fillojnë klasën e parë, këtë vit do të jenë të barabartë me të gjithë nxënësit e trojeve shqiptare të cilët do të mësojnë me të njëjtën Abetare. Ky libër është i kompletuar dhe i shpallur zyrtarisht në Prizren nga kryeministri i Shqipërisë Sali Berisha dhe ai Kosovës Hashim Thaçi.

Duke e vlerësuar si një moment historik, Abetaren gjithëkombëtare kryeministri Berisha e quajti margaritar të Njëqindvjetorit të Pavarësisë së Shqipërisë.

Kryetari i Komunës se Preshevës  Ragmi Mustafa gjatë prezantimit të abetares, ka thënë se ky është një moment historik pasi kjo kryevepër po kurorëzohet në duart e fëmijëve edhe me rastin e 100 vjetorit të shtet shqiptarë.

Ky tekst disa ditë pas promovimit të tij arriti edhe në Luginë të Preshevës.  Arbër Pajaziti. shefi i kabinetit të kryetarit të komunës së Bujanocit arritjen e Abetares gjithëkombëtare  në Luginë të Preshevës  e cilësoi  rast  historik.

Ndërkohë gjatë ditës së sotme ka filluar shpërndarja dhe dorëzimi i abetares gjithëkombëtare nëpër shkollat fillore të komunës së Bujanocit.  Abetarja gjithëkombëtare është mirëpritur edhe nga drejtuesit e shkollave fillore. Ata u shprehën se, kjo është një vepër shumë e madhe dhe i faleminderojn gjithë ata që punuan dhe u angazhuan, që ky  libër të vijë edhe në rajonin e Luginës se Preshevës.

Për komunën e Bujanocit janë dhuruar gjithsej 300 abetare së bashku  abetare pune, ndërkaq për  komunën e  Preshevës 400 ekzemplarë.
Më 24 prill ishte përzgjedhur teksti fitues për Abetaren e përbashkët Shqipëri-Kosovë. Teksti ka katër autorë, dy nga Shqipëria, Shezai Rrokaj, Mimoza Gjokutaj si dhe dy nga Kosova, Islam Krasniqi dhe Saranda Kumanova Pozhegu.

Ndërkaq Abetarja gjithëkombëtare vjen në një vit historik. Abetaren gjithëkombëtare në 100 vjetorin e pavarësisë së shtetit shqiptar do ta kenë në duart e tyre edhe  nxënësit shqiptarë të Luginës së Preshevës. (LajmeShqip.com)

 
Lajme Shqip Tuesday, 20 March 2012 16:41

Tiranë – Sipas Ministrisë së Arsimit, data 3 prill është afati i fundit për të gjitha shtëpitë botuese, të cilat pritet të dorëzojnë variantet e tyre.

Në garë janë 13 shtëpi botuese, nga të cilat do të zgjidhet vetëm një, për të botuar tekstin e parë të përbashkët mes Shqipërisë dhe Kosovës.

Teksti i Abetares do të ketë një standard të njëjtë gjuhësor dhe pavarësisht varianteve që do të konkurrojnë, vetëm një abetare do të shpallet fituese nga komisioni i vlerësimit.

Pas afatit të vendosur, fituesi do të shpallet në fund të muajit prill dhe fëmijët shqiptarë të të dy republikave, do e nisin vitin e ri shkollor me Abetaren e përbashkët.

Kjo abetare do t’i bashkëngjitet tre abetareve ekzistuese alternative në Shqipëri, të cilat përzgjidhen çdo vit nga mësuesit, ndërsa në Kosovë do të jetë e vetmja.

Abetarja unike me titullin “Abetare e Përbashkët Shqipëri-Kosovë” do t’u ofrohet dhe fëmijëve të emigrantëve shqiptarë që jetojnë e punojnë në diasporë.

Unifikimi i teksteve shkollore është nisëm mes dy ministrive të arsimit të Shqipërisë dhe Kosovës, që do të vijojë edhe me tekste të tjera shkollore.

 
Lajme Shqip Monday, 10 October 2011 14:36

Ministri i Jashtëm Edmond Haxhinasto ka reagur lidhur me abetaren e gjuhës shqipe të zhveshur prej simboleve kombëtare mbi bazën e një kërkese të bërë nga pala serbe, e të vënë si kusht për të pranuar idenë e abetares në Medvegjë, Preshevë e Bujanovc.

Haxhinasto, ka dhënë një intervistë agjencisë së lajmeve ‘Presheva Jonë’, dhe në të ai ka pohuar se gjithçka është vendosur me aktorët lokalë që kanë një mandat për të folur e për të vendosur në emër të qytetarëve.

“Ne ishim përballë dy opcionesh: ose të kishim këtë abetare që kemi, ose të mos kishim abetare fare”, thotë në thelb ministri, duke lënë pa shpjeguar se pse është dashur të diskutojnë mbi dy opcione.

Haxhinasto është shprehur më tej se “Ministria dhe qeveria jonë shqiptare konsideron si sukses të vitit praninë e Abetares në mesin e voglushëve dhe voglusheve të Luginës së Preshevës.

Sipas tij “Retorika rreth kësaj qështje, politizimi i Abetares nuk i shërben aspak. Sepse aty ishin dy alternative: Ose , të kishte një Abetare që do të bëhej një Abetare  që do të bëhej në mënyrë koncensuale edhe nga shqiptarët e tjerë edhe përfaqësuesve zyrtarë të arsimit në atë zonë, ose t mos kishte  fare asnjë Abetare në gjuhën shqipe për shokollarët shiptarë të Luginës së Preshevës. Dhe besoj se këtu vetëm njeriu i verbërt apo i marrë nuk do të dunte ta bënte përzgjedhjen”.

Në këto momente, Haxhinasto mendon se duhet lënë anash politizmi i cështjeve dhe të ecet përpara duke i dhënë prioritet mësimit të shkronjave dhe gjuhës shqipe të standrardizuara sipas normave  tona kombëtare përmes Abetares dedikuar fëmijëve shqiptarë në Medvegjë, Bujanoc dhe Preshevë.

“Në të ardhmen, sigurisht do të ket vend të arrihet dhe të diskutohet më gjatë të arrihet një mirkuptim i gjitha palëve, për një abetare gjithkombëtare”-premton Haxhinasto.

Banorët Luginës së Preshevës protestuan disa ditë më parë kundër shpërndarjes së Abetares e cila sipas tyre ishte e zhveshur nga simbolet kombëtare duke akuzuar për këtë fakt ambasadorin shqiptarë në Beograd.

 
Lajme Shqip Monday, 03 October 2011 14:30

Tiranë- AK kërkon hetimin e marrëveshjes së nënshkruar ndërmjet Shqipërisë dhe Serbisë për abetaret ku mësojnë nxënës shqiptarë.

Aleanca Kuq e Zi i bën thirrje Kuvendit të Shqipërisë të mbledhë menjëherë Komisionin për Politikën e Jashtme që të hetojë në menyrë trasnpsarente marrëveshjen e qeverisë me diplomacinë serbe për ndryshimin e abetares.

Aleanca Kuq e Zi i bashkohet revoltës së qindra shqiptarëve dhe intelektualëve në Preshevë të cilët refuzojnë dhunimin e abetares shqiptare nëpërmjetë heqjes së simboleve kombëtare shqiptare.

Pak ditë më parë qeveria dhe shteti shqiptar ka pajisur me abetare shkollat shqiptare në jug të sërbise, përkatesisht Preshevë, Medvegj dhe Bujanovc. Të njëmijë abetaret që janë dhuruar nga shqipëria janë punuar mbi standardet e kërkuara nga qeveria sërbe duke hequr flamurin dhe çdo simbol shqiptar në përmbajtje të tyre.

 
Lajme Shqip Monday, 03 October 2011 11:11

Preshevë – Abetarja në gjuhën shqipe, që iu dhurua nxënësve të Luginës së Preshevës nga qeveria shqiptare, me rastin e vitit të ri shkollor, nuk I ka simbolet kombëtare dhe ato shtetërore.

Sipas një faksi, zyrtarë, rezulton se Ambasadori i Republikës së Shqipërisë ë Beograd Shpëtim Çaushi, ka dhënë pëlqimin e tij për këtë akt.

Në një letër zyrtare të shkruar në serbisht dhe që i drejtohet Ministrit të Arsimit e Shkencës së Serbisë, ambasadori shqiptar shkruan mes të tjerash se “kemi nderin t’ju njoftojmë që organet përgjegjëse shqiptare janë dakord me sugjerimet e shprehura në letrën tuaj dhe që Abetarja dhe Fletorja e Punës të riprodhuara, të mënjanojnë simbolet kombëtare dhe shtetërore”..

Dakord për çfarë?!…

Shqiptarëve të Luginës së Preshevës i’u është mohuar e drejta që flamuri kombëtar të figurojë, madje, edhe në brendi të Abetares së shkollarëve të klasës së parë.

Qeveria serbe ka kërkuar që ky libër të hiqet nga përdorimi, pikërisht për shkak se në faqen ku mësohet shkronja F, figuron flamuri kombëtar shqiptar.

Dhe kjo është pranuar nga Tirana zyrtare. Qeveria e Shqipërisë në datën 14 shtator nga dërguar si “dhuratë” në Luginën e Preshevës një mijë copë Abetare, të punuara me “standardet” e kërkuara nga qeveria e Serbisë, pra duke hequr flamurin dhe simbolet tjera kombëtare nga brendia e saj.

Paraprakisht, kësaj i ka prirë një dakordim nga vetë Ambasada e Shqipërisë në Beograd. Ambasadori, Shpëtim Çaushi, me një letër drejtuar Ministrisë së Arsimit dhe të Shkencës të Serbisë, kishte përcjellë pëlqimin për ta ndërruar, respektivisht për ta shkombëtarizuar Abetaren për nxënësit shqiptarë të Luginës së Preshevës.

Veç flamurit, nga Abetarja që iu dedikohet nxënësve shqiptarë të Luginës së Preshevës, Shkodra është zëvendësuar me Nishin dhe shumë toponime e emërtime shqiptare, janë zëvendësuar me ato serbe.

Nxënësit shqiptarë të Preshevës, kur të mësojnë shkronjën SH, do të mësojnë se “qyteti i NISHIT është qytet i bukur”, ku në origjinal është “SHKODRA është qytet i bukur”. Për të gjitha këto, ka qenë dakordimi dhe pëlqimi paraprak skandaloz i shtetit dhe i diplomacisë së Shqipërisë.

Protesta…

Sapo janë njohur me këtë fakt, banorët e Preshevës kanë mbushur rrugët e tyre me postera të ambasadorit shqiptarë në Serbi, Shpëtim Çaushi dhe një me mbishkrimin “Shpëtim…mos ma prek abetaren”

 
Lajme Shqip Saturday, 01 October 2011 17:21

Preshevë (PLOTËSUAR, E shtunë, 1 tetor, 17:21) – Dje portali LajmeShqip.com, ka raportuar për skandalin me  ndryshimin e tekstit të Abetares shqipe në Luginën e Preshevë. Ndërkohë, në orët e mbrëmjes ky skandal ka marrë përmasa të tjera, të manifestimit të revoltës së shqiptarëve në Luginë.

Nëpër rrugët e Preshevës, të premten mbrëma, janë vendosur posterë me fotografinë e ambasadorit të Republikës së Shqipërisë të akredituar në Beograd Shpëtim Çaushi, me shkrimin “Shpëtim – Mos ma prek Abetaren”, ka bërë të ditur portali Koha.

Këta posterë, nga persona të panjohur janë vendosur në dyert e shkollës fillore “Ibrahim Kelmendi” në Preshevë, si dhe në rrugën kryesore “15 Nëntori.

Posterë janë vendosur tri ditë pasi që ambasadori i Shqipërisë Shpëtim Çaushi ka dhënë pëlqimin që Abetarja për nxënësit e Luginës së Preshevës të reduktohet duke larguar simbolet nacionale dhe shtetërore.

Edhe disa subjekte politike të Luginës së Preshevës, duke reaguar lidhur me reduktimin e Abetares shqipe, janë shprehur se për shqiptarët e Luginës, është denigruese dhe e papranueshme ky libër dhuratë e shtetit amë, ndërsa Këshilli Kombëtar Shqiptar ka çmuar lartë angazhimin e institucioneve të Republikës së Shqipërisë dhe atyre të Republikës së Kosovës në avancimin e arsimit shqip në Luginë të Preshevës.

Në këtë drejtim KKSH-ja me theks të veçantë përshëndet edhe kontributin e ambasadorit të shtetit shqiptar në Beograd, Shpëtim Qaushi, rreth Abetares dhe teksteve tjera shkollore për nxënësit shqiptarë.

“Përkundër faktit se në opinion janë plasuar disa shkrime mbi gjoja reduktimet në këtë tekst të cilat i ka rekomanduar Qaushi, konsiderojmë se pohimet e tilla janë të pabaza dhe nuk mbështeten në kritikat profesionale të ekspertëve të literaturës shkollore”, thuhet në komunikatën e KKSH-së.

Ndërkaq, në një emision të Top Shoë është kërkuar dorëheqja e ambasadorit shqiptar, si pasojë e bastardimit të Abetares shqipe.

Prefekti i Preshevës, Ragmi Mustafa dhe deputeti i Vetëvendosjes, Liburn Aliu, në emisionin “Lugina e harruar” në Top Show kanë kërkuar nga kryeministri, Sali Berisha që të shqyrtojë vazhdimin e funksionit të ambasadorit shqiptar, në Beograd, Shpëtim Qaushi. Deputeti i VV-së, Liburn Aliu, ka shfletuar dokumentin ku ambasadori i Shqipërisë në Beograd, Shpëtim Qaushi, ka pranuar  që të hiqen simbolet kombëtare nga Abetarja. Edhe prefekti i Preshevës, Ragmi Mustafa, njëherësh dhe lider i PDSH-së, ka kërkuar nga autorët e Abetares që të tërhiqen, për të mos lejuar bastardimin e librit, pasi që sipas tij edhe shqiptarët e Luginës janë si shqiptarët e Shqipërisë dhe nxënësit duhet të mësojnë me ato tekste që mësojnë bashkëmoshatarët e tyre.

Sipas Aliut, përderisa nxënësit e Luginës nuk guxojnë të mësojnë për historinë e tyre, në anën tjetër nxënësit serbë në Kosovë mësojnë për UÇK-në si organizatë terroriste dhe Adem Jasharin si  terroristë.

Mustafa, gjithashtu pati reaguar edhe ndaj ministrit serb të arsimit, Zharko Obradoviq, për ndërhyrjen e tij joprofesionale në ndryshimin e Abetares Shqiptare, e cila sipas tij, për shqiptarët e Luginës, është denigruese dhe e papranueshme.

*****************************

Tiranë (30 shtator, E premte) 14:01– Skandali i kësja vjeshte ka qenë ndryshimi i tekstit të Abetares për nxënësit e shkollave shqipe në Luginë të Preshevës. Kjo ka ndodhë me insistimin e Qeverisë së Serbisë dhe me aminin e Qeverisë së Shqipërisë. Flamuri Shqiptar, Shkodra dhe elementet tjera kombëtare janë hequr nga teksti. Fillimisht, kësaj i ka thënë po Ambasadori i Shqipërisë në Beograd.

Një moment i reportazhit nga Lugina e Preshevës, në emisionin Lugina e Harruar, në Top Shou, tregon qartë shkallën e diskriminimit që Qeveria e Serbisë po e bën mbi shqiptarët e Luginës së Preshevës, por edhe dorëzimin e shtetit shqiptar përballë trysnisë serbe.

Portali LajmeShqip.com sjellë për lexuesit sekuencat ku bëhet fjalë për skandalin me librin bazë të nxënësve, Abetaren, e cila fillimisht është transmetuar nga presheva.com.

Veç tjerash, shqiptarëve të Luginës iu është mohuar e drejta që Flamuri Kombëtar të figurojë, madje, edhe në brendi të Abetares së shkollarëve të klasës së parë. Qeveria serbe ka kërkuar që ky libër të hiqet nga përdorimi, pikërisht për shkak se në faqen ku mësohet shkronja F, figuron Flamuri Kombëtar Shqiptar. Dhe kjo është pranuar. Qeveria e Shqipërisë ka sjellë si donacion një mijë Abetare të tjera, të punuara me standardet e kërkuara nga Qeveria e Serbisë, duke e amputuar flamurin dhe simbolet tjera kombëtare nga brendia e saj.

Paraprakisht, kësaj i kishte prirë një dakordim nga vetë Ambasada e Shqipërisë në Beograd. Ambasadori shqiptar në Beograd, Shpëtim Çaushi, me një letër drejtuar Ministrisë së Arsimit dhe të Shkencës të Serbisë, kishte përcjellë pëlqimin për ta ndërruar, respektivisht për ta shkombëtarizuar Abetaren për nxënësit shqiptarë të Luginës së Preshevës.

Veç flamurit, nga Abetarja që iu dedikohet nxënësve shqiptarë të Luginës së Preshevës, Shkodra është zëvendësuar me Nishin dhe shumë toponime e emërtime shqiptare, janë zëvendësuar me ato serbe.

Për të gjitha këto, ka qenë dakordimi dhe pëlqimi paraprak skandaloz i shtetit dhe i diplomacisë së Shqipërisë. (LajmeShqip.com)

 
Lajme Shqip Monday, 19 September 2011 14:33

Tiranë – Autoritetet arsimore të Shqipërisë dhe Kosovës po bashkëpunojnë për aplikimin e një programi, që njehson tekstet që përdoren në nivelin e shkollave fillore të të dy vendeve.

“Janë ngritur grupet e përbashkëta të punës, të cilat së shpejti fillojnë punë për unifikimin e programeve mësimore dhe të teksteve shkollore”, bëri të ditur Ministri i Arsimit, Myqerem Tafaj, duke shtuar se “hapi i parë do të jetë realizimi i Abetares së përbashkët brenda vitit 2012”.

Grupe të ekspertëve do të nisin me përpilimin e një Abetare të njëjtë dhe gradualisht procesi do të përfshijë dhe librat e lëndëve të tjera bazë.

Projekti për hartimin e një teksti Abetare-je të përbashkët që të përdoret në të gjitha trevat shqipfolëse është shumë afër realizmit. Zyrtarët e arsimit në Tiranë, Prishtinë e Shkup kanë një marrëveshje kooperimi që do të shtrihet dhe për tekstet e lëndëve të tjera nga sistemi shkollor fillor.

Sipas ministrisë shqiptare të Arsimit, bashkëpunimi Shqipëri – Kosovë do të shoqërohet dhe me liberalizimin e pranimeve, që do të bëhen në universitetet publike. Duke ju referuar shifrave konkrete, në sistemin universitar të Shqipërisë studiojnë rreth 700 të rinj nga trevat, nga Mali i Zi, nga Lugina e Preshevës dhe nga Maqedonia.

Sa i takon studentëve nga Kosova, nga viti i ri akademik pranimi i tyre do të jetë pa limit.

 
Lajme Shqip Friday, 26 August 2011 15:42

Tetovë – Koordinatori i  Aleancës Kuq e Zi për Maqedoninë, Valon Kurtishi, përmes një komunikate për shtyp i ka bërë  thirrje shtetit shqiptar, kosovar dhe atij maqedonas që viti i ri shkollor 2011-2012 të  nis me një Abetare të unifikuar.

“Të  gjitha strukturat përkatëse të tregohen të përgjegjshme dhe t’u ofrojnë të gjithë fëmijëve shqiptarë kudo që ndodhen dhe arsimohen, të kenë të  njëjtin  standard dhe të njëjtën abetare.  Aleanca Kuq e Zi vëren se diferencat mes abetareve në Shqipëri, Kosovë dhe Maqedoni janë kthyer në një tragjikomedi duke krijuar kaos në shumëllojshmërinë e ndryshme të Abetareve në treg.  Të shqetësuar për asimilimin e shqiptarëve jashtë territorit të Republikës së Shqipërisë, Aleanca Kuq e Zi  bën thirrje të mos tolerohet keq arsimimi i gjuhës amtare, të shpejtohet  unifikimi i tyre abetares dhe nëse është e nevojshme të shtyhet edhe viti i ri shkollor”, ka thënë Kurtishi.

“Aleanca Kuq e Zi u bën apel qeverive të tre vendeve Shqipëri, Kosovë dhe Maqedoni për të ngritur një grup ekspertësh të përbashkët për të arritur sa më parë këtë unifikim. Aleanca Kuq e Zi i kërkon qeverisë Shqipërisë, qeverisë Kosovës dhe qeverisë së Maqedonisë që të investojnë dhe shpërndajnë në çdo familje shqiptare që kanë fëmijë brenda por edhe jashtë në emigracion Abetare falas pa pagesë”, ka shtuar Valon Kurtishi, nga Aleanca Kuq e Zi. (LajmeShqip.com)

 
Lajme Shqip Friday, 03 June 2011 17:36

Tiranë – Fëmijët shqiptarë dhe ata nga Kosova do ta mësojnë gjuhën shqipe përmes teksteve të unifikuara. Pas një takimi sot në Tiranë me homologun e Kosovës, Ramë Buja, ministri i Arsimit, Myqerem Tafaj, deklaroi se “janë ngritur grupe pune nga të dyja vendet, të cilët do të hartojnë programe të përbashkëta, duke nisur nga abetarja, për të vazhduar më pas edhe me tekste të tjera”.
Tafaj tha se është rritur numri i studentëve kosovarë që studiojnë në universitetet shqiptare dhe shtoi se të dy vendet po punojnë për lëshimin e diplomave universitare të përbashkëta.
Dy ministrat theksuan nevojën e rritjes së numrit të profesoratit në universitetet e të dyja vendeve për shkak të hendekut që ekziston mes numrit të studentëve gjithnjë në rritje dhe atij të pedagogëve.

12