Lajme Shqip Friday, 15 February 2013 17:08

Prishtinë – Me rastin e shënimit të pesë vjetorit të pavarësisë së Kosovës, si dhe në kuadër të shënimit të 100-vjetorit të pavarësisë së Shqipërisë, është hapur ekspozita unike e titulluar “Si i shihte Londra Ballkanin, Kosovën dhe Shqipërinë 100 vjet më parë?”.

Kjo ekspozitë, e organizuar nga Qendra për Studime Shqiptare nga Londra, MPJ e Kosovës dhe MPJ e Shqipërisë, përmban piktura, dokumente, harta, fotografi, shkrime dhe karikatura nga arkivat britanike, një pjesë e të cilave janë prezantuar për herë të parë para publikut.

Ministri i Punëve të Jashtme i Kosovës, Enver Hoxhaj, në hapje të ekspozitës ka thënë se në rrafshin kohor ajo ofron pamje dhe përmbajtje që nga shekulli 17, 18, 19 dhe veçanërisht shekulli 20, duke e përshkruar fatin dhe pozitën e shqiptarëve në Ballkan, por mbi të gjitha duke e pasur në fokus themelimin e shtetit shqiptar, formimin e shtetit shqiptar, luftërat ballkanike, thuhet në njoftimin zyrtar të MPJ-së.

“Kjo ekspozitë tregon se ku kemi qenë ne para 100 vjetësh, para 200 vjetësh, para 300 vjetësh, se sa rrugë të gjatë kemi bërë që sot në shkurtin e vitit 2013 ta kemi shtetin e Kosovës si shtet sovran dhe të pavarur, shumetnik dhe si shtet qytetar, i cili i reflekton aspiratat që ka pasur populli i Kosovës, populli i Shqipërisë gjatë këtyre shekujve”, tha Hoxhaj, duke shtuar se në këtë rrugë të gjatë shqiptarët kanë pasur vazhdimisht një shtet mik, Britaninë e Madhe.

Hoxhaj tha po ashtu se Britania e Madhe së bashku me Shtetet e Bashkuara të Amerikës kanë qenë dy shtetet vendimtare që kanë mundësuar krijimin e shtetit shqiptar në fillim të shekullit 20.

“Britania e Madhe së bashku me Shtetet e Bashkuara të Amerikës janë dy fuqitë më vendimtare që kanë kontribuar edhe për lirinë e Kosovës, por edhe formimin e shtetit të Kosovës si shtet i pavarur dhe sovran”, tha Hoxhaj.

Myrna McGreggor, nga Ambasadës së Britanisë së Madhe në Prishtinë, tha se shteti i saj dhe shqiptarët kanë një histori të gjatë dhe tejet interesante.

“Politika britanike drejt shqiptarëve ka qenë e fokusuar në siguri dhe stabilitet në rajon”, tha McGreggor.

Ambasadori i Shqipërisë në Prishtinë, Islam Lauka falënderoi ata që e kanë përgatitur këtë ekspozitë, “veçanërisht zotin Maliqi dhe në mënyrë të veçantë zotin Destani për rolin dhe kontributin e tij të jashtëzakonshëm në krye të Qendrës së Studimeve Shqiptare në Britani”.

Shkëlzen Maliqi, kurator i ekspozitës, vlerësoi lart materialet e sjella nga Bejtullah Destani nga Qendra për Studime Shqiptare në Londër.

“Është një koleksion shumë i çmueshëm. Për njëzet e sa vite ai ka mbledhur ndoshta dhjetë mijë e më shumë dokumente, fotografi, libra që kanë të bëjnë me çështjen shqiptare dhe Ballkanin”, tha Maliqi.

Bejtullah Destani tha se viteve të fundit është koncentruar të sjellë disa imazhe që janë të natyrës historike, hartografike, arsimore dhe karikaturave të ndryshme që pasqyrojnë historinë e Shqipërisë.

Ai ka veçuar tre dokumente shumë interesante, dokumentin e aktit të besës, i nënshkruar nga shumë fise të veriut të Shqipërisë, i organizuar nga gjeneral Philips, dokumentin e shekullit 16-të, ku tregon që mbreti Henri VIII ka veshur kostum shqiptar, dhe dokumentin e Komitetit të Korfuzit, të vitit 1883, i organizuar nga Francesco Crispi, një arbresh në anën tjetër të Adriatikut.

Ekspozita “Si i shihte Londra Ballkanin, Kosovën dhe Shqipërinë 100 vjet më parë?” do të jetë e hapur deri më 1 mars 2013, në ambientet e Bibliotekës Kombëtare dhe Universitare të Kosovës në Prishtinë.(LajmeShqip.com)

 
Lajme Shqip Sunday, 13 January 2013 15:18

TIRANË – Policia e Shtetit feston sot 100 vjetorin e krijimit të saj. E krijuar më 13 janar të vitit 1913, pak javë pas shpalljes së pavarësisë së vendit, Policia shqiptare ka përshkruar një rrugë të gjatë, duke u përballur me sfida të mëdha, transformime rrënjësore si në aspektin strukturor e organizativ, ashtu dhe në atë legjislativ e konceptual, për të ardhur në ditët e sotme, si një strukturë e rëndësishme e shtetit, që aplikon filozofinë bashkëkohore të Policimit në Komunitet.

Në këtë përvjetor jubilar, ishin parashikuar për t’u zhvilluar një sërë aktivitetesh, të cilat nisën që prej mëngjesit në Shkollën e Policisë, me kujtimin dhe nderimin e heronjve të Policisë, e që vazhduan me kumtesa e takime për historikun e Policisë, sfidat e saj, etj. Me këtë rast, në Tiranë zhvillohet edhe një paradë e trupave elitare të Policisë së Shtetit. 

PRESIDENTI NISHANI I JEP POLICISË SË SHTETIT “URDHRIN E FLAMURIT KOMBËTAR”
Ora: 12:20 – Përpara nisjes së paradës së trupave elitare të Policisë së Shtetit në sheshin “Skënderbej”, Presidenti i Republikës Bujar Nishani dekoroi Policinë e Shtetit me “Urdhrin e Flamurit Kombëtar”. 

Gjatë fjalës së tij, presidenti Nishani theksoi se ky 100-vjetor duhet të shërbejë si një ditë për të reflektuar mbi sfidat e së ardhmes.
“E ardhmja jonë është padyshim një e ardhme e sigurt dhe e ndritur në familjen europiane. Ndaj në cilësinë e Presidentit të Republikës kërkoj që të rrisni standardet e shërbimit dhe aftësitë profesionale në mbrojtje të jetës dhe pronës qytetare, duke respektuar liritë dhe të drejtat e njeriut.”- u shpreh presidenti.

Kreu i shtetit shprehu nderimin e tij për policët e rënë në krye të detyrës. “Sot në këtë ditë të shënuar për Policinë e Shtetit shprehim nderim të thellë dhe kujtojmë sakrificën sublime të atyre që dhanë jetën në krye të detyrës, në mbrojtje të rendit, institucioneve, flamurit dhe shteti. Amaneti i tyre është amaneti i kontributit ndaj shtetit dhe ligjit.”- u shpreh presidenti.

BERISHA: NDERIM PËR SUKSESET E SE SHKUARËS, ARRITJET T’I ÇONI PËRPARA
Ora 11:20 – Gjatë fjalës së tij në ceremoninë e organizuar, kryeministri Berisha shprehu nderimin e tij për sukseset e policisë së shtetit në 100 vitet e krijimit, duke theksuar rëndësinë që këto arritje të çohen përpara në interes të kombit shqiptar dhe Shqipërisë.

Ndërsa vlerësoi punën e Policisë së Shtetit në mbrojtje të lirive dhe të drejtave të qytetarëve, goditjen e bandave kriminale, kryeministri theksoi se anëtarësimi në NATO nuk do të ishte i mundur pa përkushtimin dhe seriozitetin e punonjësve të policisë.

“Pa punën tuaj, pa përkushtimin tuaj, pa vendosmërinë tuaj, në luftën kundër bandave dhe grupeve kriminale, të cilat bënin ligjin në porte, aeroporte dhe institucionet e vendit, shqiptarët nuk do ishin dot anëtarë të NATO-s. Me përkushtimin, seriozitetin tuaj, ju përmbushët detyrimet tuaja në procesin e lëvizjes së lirë të shqiptarëve. Me punën tuaj të shkëlqyer ju bëtë që ai skepticizëm qe ekzistonte ndaj Shqipërisë dhe shqiptarëve për heqjen e vizave të zhdukej. Në procesin zgjedhor ju jeni më të mirët në përmbushjen e detyrimit tuaj ligjor.”- u shpreh Berisha. 

Ndër të tjera, kryeministri Berisha theksoi se sot është dita për tu përulur me nderim për policët që dhanë jetën në krye të detyrës.
“Përulem me nderimin më të madh para qindra e qindra oficerëve, efektivave, inspektorëve, punonjësve të policisë së shtetit që ranë, gjatë këtyre viteve për tu bërë të pavdekshëm në mbrojtje të jetës, pasurisë së qytetarëve shqiptarë. Nderim të madh familjeve të tyre.”- vijoi Berisha. 

NOKA: POLICIA E SHTETIT KA PJEKURINE STANDARTET PËR TË PËRMBUSHUR ME MISIONIN E SAJ
Ora: 11:15 – “Policia e Shtetit, sot në 100-vjetorin e themelimit të saj mbart pjekurin dhe standardet e nevojshme për të përmbushur me sukses misionin e saj, në mbrojtje të komunitetit” – tha Ministri i Brendshëm, Flamur Noka. 

I pranishëm në aktivitetin e organizuar me rastin e 100-vjetorit të krijimit të policisë së shtetit, në një nga sallat e “Tirana International Hotel”, Noka vlerësoi punën e kryer nga organi i ruajtjes së rendit në luftën kundër krimit të organizuar, trafikut të qenieve njerëzore..etj.
Sipas Nokës, “Policia e shtetit me punën e saj bëri të mundur garantimin e shtetit të së drejtës, duke respektuar jetën e gjithësecilit. Falë punës së policisë së shtetit, theksoi Ministri i Brendshëm, Shqipëria nuk cilësohet më si vend tranzit i drogave të forta dhe tashmë ka hyrë në një etapë të re në luftën kundër krimit të organizuar.”
Duke u përsiatur në korridoret e historisë, Noka theksoi se rrugëtimi i Policisë së Shtetit drejt standardeve më të larta Europiane kaloi nëpër disa etapa. “E krijuar disa javë pas shpalljes së pavarësisë, policia e shtetit nisi punën e saj në një klimë të vështirë dhe pavarësisht kësaj përpjekjet për të realizuar me sukses detyrën ishin maksimale.”, tha Noka.
“Pjesa më e errët e historisë së organit të rendit, tha më tej ai, ishte periudha e diktaturës, ku policia nuk ishte më në shërbim të komuniteit, por ishte armë në duart e diktaturës. Më tej, vijoi Noka, ndryshimi i sistemit bëri të mundur që policia të rikthehej në shërbim të qytetarit dhe në 1995 të nisi fluturimin e saj drejt standardeve europiane, dhe falë kësaj policie, u realizua dhe ëndrra e një shekullore e shqiptarëve për lëvizjen e lirë”, nënvizoi Ministri i Brendshëm. 

Noka, duke sjellë në vëmendjen arritjet e organit të ruajtjes së rendit theksoi se, “Sot policia operon në standardet më të larta, në përputhje me të gjitha normat Europiane në shtetin e së drejtës. Lufta me zero tolerancë ndaj krimit të organizuar, korrupsionit, trafiqeve të qenieve njerëzore si dhe në menaxhimin e kufijve, e mbështetur nga teknologjia e fundit kanë bërë, që i kanë dhënë policisë besimin e nevojshme për ta kthyer atë në aleatin më të rëndësishëm të mbrojtjes së jetës së qytetarit.” përfundoi Ministri i Brendshëm Flamur Noka. 

BURGAJ: POLICIA, PARAROJE E LUFTËS KUNDËR KRIMIT
Ora: 11:00 – Kreu i Policisë së Shtetit, Hysni Burgaj theksoi se në këtë 100-vjetor, policia është shndërruar në një organizatë e aftë për të prodhuar siguri. Kryepolici siguroi se Policia e Shtetit do të vijojë të jetë pararojë e luftës kundër krimit.

“Në këtë përvjetor të 100, përulemi me nderim përpara kolegëve tanë, që nder vite dhanë jetën. Ndërsa i kujtojmë me nderim, krenari e dhimbje përshëndes familjet e dëshmorëve të policisë.”- u shpreh Burgaj.

Kreu i Policisë falenderoi “qeverinë dhe partnerët ndërkombëtar për ndihmën e pakursyer”, ndërsa premtoi ecjen me hapa të shpejtë drejt modernizmit të mëtejshëm të policisë në vend.

KUJTOHEN POLICET E RËNË NË KRYE TË DETYRËS
Ora: 10:10 – Me rastin 100-vjetorit të krijimit të Policisë, në shkollën e Formimit të Policëve, u kujtuan ditën e dielë Policët e rënë në detyrë.
Në cermoninë përkujtimore të organizuar nga Policia e Shtetit, Ministri i Brendshëm, Flamur Noka, Kreu i Policisë së Shtetit, Hysni Burgaj, si dhe familjar të policëve të rënë në detyrë kujtuan dhe nderuan të rënit në detyrë, duke vendosur kurora pranë “Memorialit kushtuar policëve që dhanë jetën për jetën”.
Ceremonia e zhvilluar në shkollën e formimit të policëve, ishte aktiviteti i parë i zhvilluar për ditën sotme, në kuadër të 100 vjetorit të krijimit të policisë së shtetit. 

Policia e Shtetit feston sot100 vjetorin e krijimit të saj. E krijuar më 13 janar të vitit 1913, pak javë pas shpalljes së pavarësisë së vendit, Policia shqiptare ka përshkruar një rrugë të gjatë, duke u përballur me sfida të mëdha, transformime rrënjësore si në aspektin strukturor e organizativ, ashtu dhe në atë legjislativ e konceptual, për të ardhur në ditët e sotme, si një strukturë e rëndësishme e shtetit, që aplikon filozofinë bashkëkohore të Policimit në Komunitet.

HISTORIKU I POLICISE SE SHTETIT
Policia shqiptare, e krijuar më 13 janar të vitit 1913, është ndër institucionet e para të krijuara me një akt të posaçëm të kryeministrit të asaj kohe të Qeverisë së Vlorës, Ismail Qemali.

Në qershor të po atij viti u vendos për herë të parë uniforma e rregullt kombëtare e xhandarmërisë. Ndërsa në vitin 1919, për herë të parë u krijua Drejtoria e Përgjithshme e Qetësisë Publike, si dhe u ngritën 14 zyra të policisë në prefektura e nënprefektura.

Regjimi mbretëror i dha një status të veçantë policisë dhe xhandarmërisë. Në atë kohë u formuan disa polici si, ajo e Sigurisë Publike, Policia Bashkiake, Policia Rurale dhe Policia Kufitare. Fundi i vitit 1944 e gjeti Shqipërinë nën një regjim të ri.

Komunistët vendosën pushtetin e tyre ushtarak në të gjithë vendin. Pas miratimit të statutit të RPSH-së, me ligjin e 9 dhjetorit 1946, Policia Popullore u përcaktua si organ ekzekutiv i administratës shtetërore dhe ishte një prej organeve të diktaturës së proletariatit, e ndërtuar sipas parimeve marksiste – leniniste, të luftës së klasave, vijës së masave, etj.

Përmbysja e sistemit komunist dhe vendosja e sistemit demokratik pas vitit 1991, solli ndryshime të rëndësishme edhe në Polici. Nga prill i vitit 1991 u krijua Ministria e Rendit Publik dhe Drejtoria e Përgjithshme e Policisë së Shtetit.

Nga viti 1991 e deri më sot, Policia shqiptare ka pësuar ndryshime të rëndësishme përsa i përket strukturës dhe mënyrës së organizimit për parandalimin e krimit, si dhe për t’u ndjerë më afër qytetarëve të saj.

Nga viti 2006 e në vijim me synim për të sjellë ndryshime cilësore në funksionimin e strukturave të Policisë së Shtetit u ideua e realizua një proces i tërë reformimi, i cili synonte krijimin e standardeve më të mira për rritjen dhe zhvillimin e mëtejshëm të policisë, si dhe përmirësimin e cilësisë së shërbimit të ofruar ndaj komunitetit.

Ky proces u zhvillua jashtë ndikimeve politike në përzgjedhjen e personelit, si dhe me asistencën e misioneve të huaja PAMECA, ICITAP dhe OSBE. Tashmë, përqafimi i filozofisë së policimit në komunitet nga Policia e Shtetit mundëson përfitime të cilat konsiderohen thelbësore si: ndryshim të mendësisë, krijimin e një kulture moderne menaxhimi, ndërtimin e partneritetit, përmirësimin e infrastrukturës, krijimin e një imazhi në rritje për Policinë e Shtetit, duke e lidhur këtë dhe me krijimin e besimit.(B.W/LajmeShqip.com)

 
Lajme Shqip Friday, 04 January 2013 15:48

TIRANE – Ekspozita e armëve dhe përkrenares mit të heroit tonë kombëtar, për mëse 1 muaj u shndërrua në vend peligrinazhi sepse shqiptarët mundën për herë të parë t’i shihnin në mjediset e Muzeut Historik Kombëtar. Kur kanë mbetur vetëm pak ditë nga mbyllja e ekspozitës së çelur më 22 nëntor, muzeologu Fredi Gusho thotë se janë rreth 1 milionë e gjysmë vizitorët që kanë parë ekspozitën.

“Sidomos fluks i madh qe në ditët e festimeve të 28 Nëntorit. Numri i vizitorëve nga 700 deri në 800 mijë veta. Vazhdojnë të vijnë akoma njerëz edhe tani për Vitin e Ri, nga ardhja e emigrantëve pati shumë fluks”, thotë muzeologu Fredi Gusho.

Në sajë të një bashkërendimi edhe me drejtoritë arsimore të vendit, janë të shumta shkollat që ditë pas dite sjellin në muze nxënësit për të vizituar armët dhe përkrenaren e Skënderbeut.

“Gjatë muajit nëntor dhe dhjetor ka pasur jashtëzakonisht shkolla që kanë ardhur me program të vecantë. Rreth 600 mijë nxënës kanë ardhur edhe nga rrethe të ndryshme”, shtoi ai.

Sipas të dhënave dokumentare, është konstatuar se dy shpatat dhe përkrenarja e Skënderbeut ranë në duart e arqidukës Ferdinand mes viteve 1588-1593 e nga ornamentet, studiuesit kanë përcaktuar se ato janë realizuar në shekullin e pesëmbëdhjetë. Ekspozita e çelur më 22 nëntor në Pavionin e Mesjetës, do të qëndrojë e hapur në Muzeun Historik Kombëtar deri më 13 Janar. (LajmeShqip.com)

 
Lajme Shqip Saturday, 29 December 2012 16:24

Tirane – Kryeministri i Shqipërisë, Sali Berisha ka organizuar në “Pallatin e Brigadave” në Tiranë pritjen e përvitshme të personaliteteve të medias shqiptare.

Ai e cilësoi median si pasurinë më të madhe të vendit.

“Gjatë këtij mandati qeverisës, media ka qenë de facto opozita e shkëlqyer e vendit”, ka deklaruar Berisha.

Ai më pas ka folur për spontanitetin e organizimit të festimeve të 100-vjetorit të Pavarësisë, me ç’rast ka thënë pohuar se askush nuk duhet t’i trembet nacionalizmit shqiptar, i cili është nacionalizmi më qytetar dhe tërësisht i frymëzuar nga vlerat e lirisë.

“Do të ishte e pafalshme që për shkak të barbarive të nacionalizmave të tjerë, të vendosim në të njëjtin shtrat nacionalizmin shqiptar, që nuk bazohet mbi urrejtjen dhe shfarosjen”, ka thënë Berisha.(LajmeShqip.com)

 
Lajme Shqip Thursday, 27 December 2012 20:43

Prishtinë- U prezantuan në Prishtinë 100 histori suksesi të qytetarëve shqiptarë më të shquar në botë, përzgjedhur nga Albanian Excellence, me mbështetjen e Agjencisë Telegrafike Shqiptare dhe drejtorit të Përgjithshëm të saj, Gëzim Podgorica, i cili ishte i pranishëm në Mbrëmjen Gala natën e kaluar në Prishtinë, organizuar nga zëvendës kryeministri i parë i qeverisë së Kosovës, Behgjet Pacolli.

Sipas ATSH-së, në Mbrëmjen Gala, të organizuar në Hotel “Swiss Diamond Prishtina”, morën pjesë zyrtarë të lartë të qeverisë së Kosovës e të Shqipërisë, mes të cilëve ministri i Jashtëm shqiptar, Edmond Panariti, si dhe deputetë e personalitete të tjera të njohura nga të dy vendet e bota shqiptare, si dhe ish-presidentët shqiptarë Rexhep Meidani e Alfred Moisiu.

Më shumë të ftuar, mes tyre personalitete politike dhe mediatike, që janë shquar për idetë e tyre në favor të integrimit mbarëkombëtar, shtylla kryesore e  Mbrëmjes Gala ishte prezantimi i 100 individëve me kombësi shqiptare nga e gjithë bota, që kanë arritur të ndërtojnë histori suksesi në profesionet e tyre dhe të cilët janë përzgjedhur nga Albanian Excellence në Tiranë me rastin e 100 vjetorit të Pavarësisë së Shqipërisë. Mes tyre ka inxhinierë projektues urash të mëdha në SHBA, tenorë me famë botërore si Saimir Pirgu, rektorë universitetesh në Perëndim, muzikantë, artistë, manaxherë në kompani globale telekomunikacioni, etj. 

“Albanian Excellence”, në bashkëpunim me Agjencinë Telegrafike Shqiptare, realizuan kështu aktivitetin e parë të shqiptarëve të suksesit dhe në këtë udhë, me shumë dashuri dhe vetëdije u bashkua edhe z. Pacolli”, u tha në mbrëmjen gala të Projektit, të ideuar e iniciuar nga gazetarja Flora Nikolla. 

Një numër prej këtyre personaliteteve të kombit shqiptar kishin ardhur në Prishtinë për të bërë të njohur historitë e tyre, me ftesë të zv/kryeministrit të parë të qeverisë së Kosovës, Behgjet Pacollit, i cili në fjalën përshëndetëse  në Mbrëmjen Gala dha vlerësimet më të larta me përkushtimin për të ecur së bashku dhe më tej në suksese.

Pacolli është shprehur i nderuar edhe që është zgjedhur  President nderi i Albanian Excellence, e cila do të vazhdojë çdo vit në identifikimin e këtyre personaliteteve të kombit shqiptar në botë.

Në fund të Mbrëmjes Gala, ku kishte edhe artistë të shquar shqiptarë, u shpall edhe institucionalizimi i Lëvizjes për Union Ekonomik Shqiptar, një organizatë jofitimprurëse e themeluar nga Behgjet Pacolli, ish presidentë të Shqipërisë, rektorë universitetesh shqiptare,  politikani i ndjerë Arbën Xhaferi etj. Në favor të këtij institucionalizimi, kanë firmosur një peticion dhe shumë prej këtyre personaliteteve të Albanian Excellence, që do jenë njëkohësisht themelues në organizatën e re.(LajmeShqip.com)

 
Lajme Shqip Thursday, 27 December 2012 19:48

Tiranë – Në 26 gushtin e vitit 1913, do të dilte numri i parë i gazetës “Përlindja e Shqipëniës”, organ zyrtar i Qeverisë së Vlorës. E cilësuar si organi i vetëm publicistik në atë periudhë, ajo kishte për synim të mbronte të drejtat kombëtare të shqiptarëve përmes botimeve të shkrimeve të ndryshme me karakter politik, kulturor, edukativ, letrar etj. Numri i saj i fundit, do ta shihte dritën e botimit më 28 mars 1914.

Sot paradite, në Bibliotekën Kombëtare promovohet një botim i veçantë për këtë gazetë.  Bëhet fjalë për një riprodhim fotostatik të saj, që ditë më parë u promovua si fillim në Bibliotekën Kombëtare dhe Universitare në Prishtinë. Me rastin e 100-vjetorit të Pavarësisë së Shqipërisë, gazeta është marrë nga arkivi për herë të parë në këtë formë. Ajo ishte botim i Qeverisë së Vlorës, qëllimi i së cilës ishte dhënia e informatave kombëtare dhe mbrojtja e të drejtave kombëtare shqiptare. Gazeta kishte karakter politik, kulturor dhe artistik, ndërsa roli kryesor i saj ishte ndërlidhja me vendet evropiane dhe afrimi i raporteve me vendet fqinje. Ngjarjet, të cilat kryesisht lidheshin me krijimin e statusit të Shqipërisë pas vitit 1912, ishin temat kryesore që trajtoheshin tek “Përlindja e Shqipëniës”. 

Në numrin e parë të gazetës “Përlindja e Shqipëniës”, në shkrimin kryesor të saj me titull “Kqyrje politike” paraqitet jehona e Konferencës së Bukureshtit pas luftërave të përgjakshme në Ballkan, si dhe trajtohen interesat e vendeve të Ballkanit për një prani më të madhe në përvetësimin e territoreve të synuara. 

Në numrin e dytë të gazetës dallohet shkrimi “Konferenca e Londrës tha fjalën e fundit për çashtjen shqipëtare”. Këtu trajtohet fati i Shqipërisë para mbledhjeve të Fuqive të Mëdha në Londër, statusi i Shqipërisë, kufiri me fqinjët, fati i shqiptarëve në Kosovë, Dibër e Çamëri. 

Në shkrimin autorial të Mihal Gramenos me titullin “Cilët jemi”, trajtohet roli i miqve shpëtimtarë, – siç i quan Grameno Italinë dhe Austrinë, – të cilët ndikuan në afirmimin e së drejtës shqiptare për liri dhe pavarësi, duke e sensibilizuar opinionin ndërkombëtar për fatin e kombit shqiptar në periudha të ndryshme të historisë së tij. Më tutje, Grameno paraqet të dhëna interesante për historinë e kombit shqiptar, pastaj për personalitetin e Ismail Qemalit dhe të personaliteteve të tjera.
Shqipëria si ishte… 

Në faqet e kësaj gazete shihet Shqipëria si ishte. Gazeta kishte për synim kryesor paraqitjen e shkurtër të ngjarjeve kryesore të cilat ndërlidheshin me krijimin e statutit për Shqipërinë, pastaj rolin dhe kompetencat që do të kishte Ministria e Arsimit në edukimin e brezave, paraqitja e vendimeve të ndryshme që organizoheshin në konferencat e mbajtura në qytetet e Shqipërisë: Gjirokastër, Shkodër, Berat, Korçë etj. 

Po kështu, nuk është lënë jashtë vëmendjes as shtrirja e hershme e territoreve shqiptare. Shkrimi “Kufitë e Shqipëriës. Shqipëria e lirë”, na paraqet të dhëna interesante që kanë të bëjnë me heroizmin kombëtar të Skënderbeut, pastaj pushtimet e tokave shqiptare nga perandoria turke, si dhe nga vendet fqinje. Ndërkaq, në shkrimin publicistik “Gjyqësia në Shqipërië”, të Kristo Floqit jepen informacione për funksionalizimin e drejtësisë dhe të ligjeve në Shqipëri, duke u dhënë përparësi sistemit gjyqësor dhe veprimeve patriotike të qeverisë. 

Në numrat e tjerë vijues, gazeta “Perlindja e Shqipëniës” i jep një dimension të veçantë shpresës, punës dhe bashkimit të shqiptarëve për të arritur qëllimet e tyre në funksionalizimin e shtetit të shpallur. Duhen dalluar shkrimet: “Kosova asht jona”, “Thirrja e qeveriës te Fuqitë e mëdha”, “Serbia dhe kryengritja e Kosovës” etj. Në këto shkrime dominon porosia për të arritur qëllimin e parashtruar nga intelektualët dhe patriotët shqiptarë në realizimin e misionit të tyre për të dhënë kontribut për ndërtimin e Shqipërisë. 

Figurat politike 

Gjithashtu, vend të veçantë zë edhe trajtimi i figurave politike e diplomatike. Pos Ismail Qemalit, Hasan Prishtinës, Isa Boletinit etj., një vend të rëndësishëm zë edhe figura e Esad Pashë Toptanit dhe e Wilhelm de Wiedit etj. Karakterizimi i veprimtarisë së tyre bëhet në raport me zhvillimin e ngjarjeve politike e qeverisëse në Shqipëri. Trajtimi i ngjarjeve të shumta, kryesisht politike përbrenda viteve 1913 dhe 1914, të cilat janë botuar në këtë gazetë, janë me interes për historiografinë shqiptare, meqë burimet dëshmojnë për shumë fakte dhe argumente edhe të panjohura deri më sot. 

Në promovimin e realizuar në Kosovë, drejtuesi i Bibliotekës Kombëtare të Prishtinës, Sali Bashota ka thënë se “Gazeta ‘Përlindja e Shqipëniës’, duke qenë zëdhënëse e ideve për mbrojtjen e interesave kombëtare, ka ndikuar në sensibilizimin e opinionin shqiptar dhe të opinionit ndërkombëtar për rrugëtimin e Shqipërisë drejt realizimit të idealeve të lirisë dhe të pavarësisë”. Bashota dhe prof. Aurel Plasari, bënë me dije se botimi u realizua si projekt i përbashkët i Bibliotekës Kombëtare të Shqipërisë, e cila vuri në dispozicion koleksionin e kësaj gazete që ruan në fondet e Arkivit të vet, dhe i Bibliotekës Kombëtare dhe Universitare të Kosovës, e cila realizoi përgatitjen dhe botimin e materialit. Botimi luksoz, i një cilësie të lartë tipografike, do t’u shpërndahet bibliotekave në Shqipëri dhe Kosovë, për pasurimin e fondeve të tyre dhe vënien në dispozicion të studiuesve dhe lexuesve në përgjithësi. Gjithashtu, varianti elektronik i këtij botimi është hedhur në portalin albanologjik Shqipëri-Kosovë. (LajmeShqip.com)

 
Lajme Shqip Monday, 24 December 2012 17:06

TIRANË- Kryeministri Sali Berisha ka deklaruar sot se do t’i kërkojë qeverisë të shtyjë me tre muaj afatin e funksionimit të komitetit për 100 vetorin e Pavarësisë.

Në mbledhjen e këtij komiteti, duke deklaruar gjithë festimet madhështore për 100 vjetorin e pavarësisë, Berisha ka theksuar se mbetën ende detyra pa u realizuar, si Muzeu i Spacit, puna për martirët e besimit në zot, apo për studentët e dhjetorit ’90.

“Me gjithë përpjekjet tona për të përmbushur plotësisht detyrimet mbetet punë për t’u bërë dhe unë me miratimin tuaj do t’i kërkojë qeverisë të zgjasë afatin e këtij komiteti dhe për tre muajt që vijnë. Më pas vendi hyn në fushatë elektorale. Por janë për tu dhënë përgjigje disa problemeve që në Komitet ramë dakord. Muzeu i Spacit, duhet detyrimisht të ndërtohet në homazh të pjesës më të dhimbshme të historisë sonë, të barbarisë së luftës së klasave që përjetuan shqiptarët”- tha Berisha.

Kthimi i eshtrave te Sami Frasherit

Ai ka theksuar se duhet te behet gjithcka per kthimin e eshtrave te Sami Frasherit ne atdhe. “Rikthimi i eshtrave të Sami Frasherit në Shqipëri, ai është gjeni i doktrinës së Shqipërisë perëndimore. Libri i tij është dokumenti themelor i të sotmes dhe të ardhmes shqiptare. problemi eshte pak i komplikuar se ka familjare te tij, te suksesshem ne fushat ku punojne”- tha Berisha.

Te kthejme koken e Ali Pashes

Berisha, pasi ka kerkuar nga ministri i Kultures te behet gjithcka qe bashkeshortja e Ismail Qemalit te rivarroset prane bashkeshorrtit te saj, ka deklaruar se duhet te behet gjithcka të kthehet nga Stambolli koka e Ali Pashës.

“A do varroset ne Tepelene, apo ne Muzeun Kombetar kjo ehste ceshtje tjeter, por koka e tij duhet te kthehet ne atdhe. Ai është një nga personalitete me peshën më të vecantë. Nëse marrim historinë pas vdekjes së Skënderbeut, historia jonë u transferua në Stamboll, por shkoi drejt harresës historike, rrezikonim të mbeteshim në harresë si komb. Ali Pasha. Bonaparti tregoi interes të vecantë për pashain e Janinës. Në të gjithë përpjekjen e tij, ky strateg i madh i tha botës se ky komb është i pamposhtur”- tha Berisha.

Eshtrat e Mit’hat Frasherit

“Të sillen eshtrat e Mit’hat Frashërit, shkrimtarit, publicistit, një nga njerëzit më mendjendritur të letrave dhe kulturës sonë”- ka thene Berisha ne vijim te fjales se tij ne mbledhjen e Komitetit te 100 vjetorit.

Sipas tij, i biri i Abdyl Frashërit ka një kontribut shumë të madh, mbetet simbol i atdhetarit të flaktë, gjeniut në veprat tonë, politikan për të cilin ideologjia sunduese për shqiptarët duhet të ishte ajo kombëtare. “E la me dëshirë të varrosjes në oborrin e Institutit Albanologjik ku dhuroi bibliotekën më të pasur të kohës, ne duhet ta sjellim, lidhur me varrimin, ndofta pranë të atit do të ndihej më i lumtur”- tha ai.(P.O/LajmeShqip.com)

 
Lajme Shqip Wednesday, 19 December 2012 09:24

Shkup – Presidenti maqedonas Gjorgje Ivanov, në fjalimin e tij të fundvitit tha se në rajon akoma ekzistojnë individë me ide radikale që mendojnë për shtete të mëdha.

Ai tha se deklaratat për shtete të mëdha janë absurde dhe përdoren vetëm për përfitime politike. Edhe pse nuk ka përmendur emra, Ivanov duket se këto porosi i ka përcjellë në adresë të kryeministrit shqiptar Sali Berisha, lidhur me deklaratën e tij për bashkimin e shqiptarëve në një shtet, si dhe në adresë të kryeministrit Hashim Thaçi, për zotimin e tij se Kosova do të jetë guardian i të drejtave të shqiptarëve të Maqedonisë.

“Edhe gjatë këtij viti në drejtim të Republikës së Maqedonisë u hodhën deklarata absurde dhe ofenduese nga disa politikanë “kujdestarë” nga vendet fqinje, për marrëdhëniet tona ndërfqinjësore dhe ndëretnike, por ne nuk u provokuam. Në hapesirat tona, jo vetëm në Republikën e Maqedonisë, ka ende individë të cilët mendojnë për ide radikale dhe mite për shtete të mëdha”, deklaroi Ivanov.

“Këtyre ideve dua t’ju përgjigjem me thënien e njërit prej etërve te Europës, të madhit Kalegri, i cili para 90 vitesh tha se: ‘Ekziston vetëm një mundësi radikale për zgjidhje të drejtë dhe afatgjate për çështjen e kufijve të Ballkanit dhe kjo është jo ndryshimi, por heqje e atyre kufijve’”, vijoi ai.

Fjalimi i presidenti maqedonas në Kuvend u bojkotua nga deputetët e opozitës shqiptare. “Presidenti Ivanov nuk është president i Maqedonisë, por është president i vetëm një partie, gjegjësisht president i VMRO-së dhe punon direkt me direktivat e kryeministrit Gruevski. Presidenti Ivanov nënçmoi popullin shqiptar dhe historinë e tij duke mos shkuar në manifestimin qendror që organizohej në Tiranë me rastin e 100-vjetorit të shtetit shqiptar”, deklaroi Flamure Kreçi, deputete e Rilindjes Demokratike Kombëtare.

Ndërkaq, opozita maqedonase që ishte prezente në sallë, disa herë reagoi gjatë fjalës së presidentit Ivanov duke e akuzuar atë se është shëndrruar në zëdhënës të kryeministrit Nikolla Gruevski. (T.CH/LajmeShqip.com)

 
Lajme Shqip Sunday, 09 December 2012 21:00

“Shqipëria kryeneçe” është një libër historik i botuar në Suedi në vitin 1976. Gun Kessle e Jan Myrdal e kanë titulluar atë “Albania Defiant” ndërsa përkthyesi Altin Galanxhi ka shqipëruar kapitullin për Skënderbeun. Heroi ynë është parë në kontekstin historik me të dhëna interesante kryesisht para dhe gjatë kohës që ka jetuar. “Të gjitha faktet e paraqitura ilustrojnë gjendjen në të cilën ishte Shqipëria sidomos para daljes në skenë të Skënderbeut dhe ndryshimet që pësoi vendi me ardhjen e tij, sukseset kundër turkut dhe lindja e idesë së krijimit të shtetit shqiptar që jetoi ndër shekuj gjer në shpalljen e Pavarësisë më 28 Nëntor 1912”, – vëren Galanxhi. Përkthyesi, shprehet se kapitulli sikur merr përsipër se përse Skënderbeu, krejt ndryshe nga bashkëkohësit e tij, mbeti një burim frymëzimi dhe krenarie për popullin shqiptar për 5 shekuj dhe se edhe në ditët e sotme kujtimi i tij mbahet lart, si një hero kombëtar. “Arsyet janë interesante dhe aktuale për kohën kur jetoi dhe veproi Skënderbeu, por po aq të tilla edhe për shqiptarin e ditëve të sotme. S’ka se si të mos krenohemi me një figurë të tillë”, – thekson Galanxhi.
Vlerësimi i dy autorëve për heroin tonë kombëtar është i madh, aq sa duket se edhe vetë ata e konsiderojnë hero. Kjo, nëse nuk kemi parasysh arsyet pse sipas tyre, ai la Perandorinë për Arbërinë. Më poshtë ka pjesë nga libri, shkëputur prej kapitullit mbi heroin.
Mbi themelimin e një mbretërie
Statuja e Skënderbeut qëndron në sheshin qendror të Tiranës. Statuja e Skënderbeut është gjithandej nëpër Shqipëri. Populli këndon për Skënderbeun. Shkruajnë poema për Skënderbeun. Shkruajnë teza për Skënderbeun. I ndërtojnë muzeume Skënderbeut.
Nën turqit, arti shqiptar jetoi në formën e pikturave ikonografike dhe kishtare, si edhe zbukurimeve dekorative. Kur në vitin 1883, piktori kishtar shqiptar Jorgji Panariti pikturoi portretin e Skënderbeut në manastirin e Athosit, dhe kur piktori ikonografik shqiptar A.N. Ballamci pikturoi të famshmen Skënderbeu mbi Kalë, së fundi arti shqiptar u rilind.
Kur Ismail Qemali e shpalli Shqipërinë të pavarur më 28 Nëntor 1912 dhe ngriti flamurin kombëtar të Shqipërisë së lirë në Vlorë, flamuri që ai ngriti ishte nga armët e lashta të Kastriotëve, flamuri i Gjergj Kastriot Skënderbeut.
Kur në korrik të 1942-it Partia Komuniste Shqiptare iu drejtua fshatarësisë dhe i nxiti ata që të rroknin armët kundër forcave pushtuese, apeli i Komitetit Qendror thoshte: Ashtu si stërgjyshërit tanë që luftuan nën flamurin e Skënderbeut në luftën e ashpër kundër atyre që kishin shkelur vendin tonë, po ashtu edhe ne, djemtë e tyre të denjë, jemi ngritur kundër pushtuesve fashistë e tradhtarë për atdheun, nën flamurin e Skënderbeut, për lirinë e vërtetë të popullit shqiptar.
Dhe kënga partizane thoshte: Nën flamurin e Skënderit, nën udhëheqjen e Enverit. Por kush ishte Skënderbeu? Edicioni i dytë i “Nordisk Familjebok”, një nga enciklopeditë tona suedeze, jep një përgjigje; doli nga shtypi dy vjet para se Shqipëria të arrinte pavarësinë kombëtare.
Kastrioti, Gjergj, hero kombëtar shqiptar, i mirënjohur nën emrin e Skënderbeut (nga turqishtja Skënderbe [do të thotë] “Princ Aleksandër”), lindur fill pas 1403-it, vdekur më 17 qershor 1468 në Alesion (Lezhë) u dorëzua nga i ati, Gjon Kastrioti, kryezot i Matit në Shqipërinë veriore, si peng tek sulltani Osman Murati II-të, që e rriti në frymën muhamedane. Kur ky i fundit, edhe pse kështu, refuzoi t’i jepte [Skënderbeut] tokat që ia pat lënë trashëgim i ati (babai i Kastriotit kish vdekur më 1442-in), [Skënderbeu] u kthye në vendin e vet me treqind kalorës shqiptarë pas fitores së Huniadit kundër Turqve në Nish (1443) dhe i ngriti bashkatdhetarët e vet në kryengritje. Falë një fermani, për të cilin ai kish detyruar sekretarin e shtetit të Sulltanit ta firmoste duke i vënë thikën në fyt, ai mori në duar kalanë e Krujës, përqafoi Krishtërimin sërish dhe pas një kohe të shkurtër u bë zotëruesi i gjithë Shqipërisë dhe mur mbrojtës për Krishtërimin kundër Islamizmit. Disa ushtri turke u mposhtën keqas nga [Skënderbeu]. Murati vetë me 100 mijë ushtarë u përpoq më kot ta mposhtte atë (1449-1450) dhe më 1461-in Muhameti II-të u detyrua të bënte paqe me të, duke e lënë atë në zotërim të Shqipërisë. Sidoqoftë, më 1467 Kastrioti e theu paqen me këmbënguljen e Piut II-të dhe të venedikasve dhe sërish luftoi me sukses kundër të pafeve. Ca vite pas vdekjes se tij, shqiptarët u detyruan sërish t’u nënshtroheshin autoriteteve osmane (1479). I biri i Kastriotit, Gjon Kastrioti, shkoi në Napoli, ku anëtari i fundit i shtëpisë së Kastriotëve vdiq më 1873-in.
… Ca kohë kaloi para se Shqipëria të përfshihej në sistemin osman. Më 1402, ushtria osmane vuajti një humbje në duart e trupave të Tamerlainit, trupat e të cilit u komanduan më me aftësi. Jashtë Ankarasë, Sulltan Bajaziti dhe shumë nga gjeneralët e tij u morën robër. Sulltani vdiq në robëri. Tamerlaini u tërhoq në Samarkand, dhe pesë djemtë e Sulltan Bajazitit filluan të grindeshin me njëri-tjetrin [për fronin e atit]. Nga viti 1413 tre nga djemtë u eliminuan. Pastaj i katërti mposhti të pestin dhe u bë Sulltan Mehmeti I-rë.
Më 1423, Gjon Kastrioti njohu Muratin II-të si sovran të tijin. Por e gjitha që kërkohej prej tij qe një haraç vjetor dhe që të jepte djalin e tij Gjergj si peng tek sulltani, që të rritej si princ osman.
Më 1428-ën, përleshjet midis osmanëve dhe venedikasve për Salonikën filluan. Në mars të 1428-ës, Murati II-të mori Salonikën. Lufta vazhdoi dhe Gjon Kastrioti bëri aleancë me Venedikun dhe sulmoi osmanët. Por Venediku arriti paqe me sulltanin që të mbante Durrësin dhe zotërimet e veta në Shqipëri. Gjon Kastrioti u mposht. Ai humbi kala, vila e sasi të mëdha toke, por ndryshoi emrin dhe besimin fetar dhe u ringjall si feudal osman, lord Hamza.
Pasi shtypi kryengritjen e Gjon Kastriotit, Murati II-të vendosi të paraqesë urdhrin e rregullt osman në Shqipëri. Më 1431-in, tokat u dokumentuan, përfshi këtu edhe regjistrimin e përgjithshëm të popullatës. Toka u bë [pronë] e sulltanit.
Prej këtyre 335 pronave, 26 iu dhanë fisnikëve shqiptarë, që patën ndryshuar fenë në atë Islame, 56 iu dhanë shqiptarëve të krishterë, dhe 250 u mbajtën nga osmanët me origjinë joshqiptare. Midis atyre që ndryshuan fenë dhe morën prona qenë ish-lordët feudalë shqiptarë.
Taksat
Kur në vitin 1430 fshatarët e Mysjes shpallën se ata, ashtu si feudalët e tyre, nuk pranonin “njerëz nga vende të huaja, ose të tillë që s’janë nga të familjes së kontit tonë”, ata po shprehnin – me mentalitetin feudal – kërkesat e tyre klasore. Ishte pikërisht në këtë Shqipëri në të cilën u kthye Skënderbeu. Në 28 nëntor 1443, ai e shpalli veten, princi i lirë e i pavarur i Krujës.
Skënderbeu ishte një njeri i shkëlqyer, politikisht dhe ushtarakisht. Gjithashtu, ai kishte marrë edukatën ushtarake më të mirë të mundshme në makinën ushtarake osmane. Ai kish komanduar në fushë të betejës dhe kish gëzuar konfidencën e superiorëve të tij në pozitën e lartë si administrator. Tani ai e shpalli veten të pavarur dhe iu vu luftës kundër Perandorisë Osmane. U duk sikur kjo qe thjesht një kryengritje si shumë të tjera: një lord i trashëgimisë Kastriotase po përgatitej të luftonte për interesat e tij, si Kastriot dhe si princ. Por gjatë njëzetë e pesë viteve që i kishin mbetur nga jeta, ai e vërtetoi veten e tij të aftë, përbrenda kësaj gjendjeje të veçantë historike, të ngrihej mbi caqet e mendësisë së tij prej feudali dhe të rrekej – dhe pothuajse ia arriti – të vinte në jetë institucionin e nevojshëm historik të një shteti shqiptar.
…Shqipëria ish e nevojshme si bazë, pjesërisht për pushtimin e Serbisë dhe Greqisë, pjesërisht për një pushtim të Italisë.
Papa bëri përpjekje diplomatike – nëpërmjet bishopëve të tij – të [bindte] lordët e ndryshëm feudalë të Ballkanit që të bashkoheshin me Huniadin dhe të ngriheshin kundër osmanëve. Sepse fitorja e Huniadit nuk ishte vetëm fitore kundër osmanëve, por gjithashtu një fitore për katolikët romakë mbi Kishën Ortodokse.
Edhe në Shqipëri lordët feudalë qenë ngritur kundër osmanëve. Qe kjo gjendje kur Skënderbeu në krye të 300 kalorësve shqiptarë braktisi ushtrinë osmane dhe u nis për në Krujë.
Në vjeshtë të vitit 1443 dhe në pranverë të vitit 1444 lordët feudalë shqiptarë spastruan pjesën më të madhe të Shqipërisë nga trupat osmane.
Suksesi i madh hungarez kundër osmanëve, suksesi i shqiptarëve, diplomacia e Papës dhe mbështetja e Venedikut (sado e dyshimtë) krijoi një gjendje në të cilën u duk e mundshme për të zbuar osmanët jashtë Ballkanit.
Skënderbeu [organizoi] një mbledhje në Lesh (Lezhë). Në 2 mars, princat shqiptarë, lordët e mëdhenj feudalë dhe përfaqësuesit e klaneve të maleve u mblodhën në katedrale. Ata arritën të kapërcenin mospëlqimet ndaj njëri-tjetrit dhe formuan “Lidhjen Shqiptare” që, së bashku me hungarezët, të zbonin osmanët jashtë Ballkanit. Qe manifestimi i parë kombëtar në historinë shqiptare.
Mbledhja u bë e mundur me mbështetjen e diplomacisë venedikase – qyteti i Lezhës ishte nën kontrollin e Venedikut. Sidoqoftë, nuk ishte pjesë e politikës venedikase që të bashkohej në një koalicion madhor kundër osmanëve. Oligarkia venedikase kishte interesat e veta për të konsideruar. Për ta, “Lidhja Shqiptare” ishte vetëm një vegël. Venediku hyri në pazarllëqe me sulltanin, nxori në pah rrezikun prej “Lidhjes së Lezhës” dhe propozoi që Venediku të merrte në mbrojtje qytetet e Vlorës, Kaninës dhe Gjirokastrës. Por Sulltani, siç qëlloi, ndjeu neveri t’i jepte Venedikut këto qytete.
Princat shqiptarë nuk kishin themeluar një mbretëri shqiptare. Ata thjesht kishin hyrë në një aleancë të dobët politike. E megjithatë, qe e para në historinë shqiptare. Lidhja qe një shoqëri mes palëve të barabarta, ku gjithsecili mbeti i pavarur. Prapëseprapë Skënderbeu arriti ta emëronte veten Komandant të Përgjithshëm dhe krijoi një pasuri lufte. Kështu, përbrenda Lidhjes u mboll fara e mbretërisë shqiptare.
Luftërat
Në pranverë, Skënderbeu mblodhi ushtrinë e tij dhe krijoi një rrjet spiunësh në gjithë vendin. Në 29 qershor 1444, kjo ushtri e re shqiptare prej 10 mijë burrash u poq me ushtrinë osmane prej 25 mijë vetësh në betejë. Qe e përgjakshme. Osmanët humbën 7,000 vetë dhe 500 u zunë rob. Shqiptarët humbën 3,800 burra, por qenë fitimtarë. Prestigji i Skënderbeut u rrit.
…Fitoret e Lidhjes Shqiptare dhe rritja e prestigjit e fuqisë së Skënderbeut përbrenda Lidhjes po bëheshin kërcënuese ndaj politikës dhe interesave të oligarkisë së Venedikut. Një Shqipëri e bashkuar do të thoshte humbjen e fuqisë së Venedikut mbi qytetet bregdetare shqiptare dhe ky do të qe një kërcënim i drejtpërdrejtë (shumë më serioz se ai osman) ndaj kontrollit të Venedikut mbi rrugët tregtare në Adriatik.
…Unë s’kam ndërmend ta vazhdoj këtë rrëfim të mbuloj luftërat dhe politikat e huaja të çerekshekullit që pasoi. Ka qenë, sidoqoftë, e nevojshme të tregoj se këto Luftëra Ballkanike të shekullit XV-të nuk mund të përshkruhen në kontekstin e “të krishterëve” kundër të pafeve.
Skënderbeu ishte një politikan dhe Komandant i Përgjithshëm i aftë. Me burime të vogla ai mbarti një luftë të gjatë dhe të suksesshme kundër fuqisë botërore të kohës së tij. Por ai qe më tepër se një Komandant i Përgjithshëm dhe një politikan i aftë. Ai themeloi një shtet. Nga të qenurit e primus inter pares, capitaneus generalis i lordëve feudalë të Lidhjes Shqiptare, ai u zhvillua në një sundues të plotfuqishëm të Shqipërisë.
Lufta e bëri të nevojshme për të që të kufizonte fuqitë dhe privilegjet e lordëve feudalë. Fuqia e tij, në vend që të rivendoste rolin e tij si Kastriot, vazhdimisht u çimentua në detyrën e tij historike si Komandant i Forcave Shqiptare.
Mbledhja në Lezhë pat qenë një lidhje e mbledhur vullnetarisht e lordëve të lartë. Kur interesat e tyre kapriçoze binin ndesh me interesat e luftës, Skënderbeut iu desh t’i shtypte, dhe vendi i tyre u mor nga fisnikëria e ulët, e cila mbajti pronat me qira direkt nga Skënderbeu. Qe, gjithashtu, e lidhur drejtpërdrejt me shtetin e ri qendror, të cilin Skënderbeu hap pas hapi qe i detyruar ta krijonte që të mund të vazhdonte luftën.
Në vend të përfundimit…
Të vazhdosh një luftë të suksesshme me një forcë të vogël kundër një superfuqie ushtarake kërkon taktika dhe armë, të cilat këta lordë feudalë nuk ia arrinin dot. Taktikat guerile dhe kalorësia e lehtë qenë pikat e forta të Skënderbeut. Sulme të vazhdueshme, prita, sulme të shpejta, toka të zhuritura dhe pjesëmarrje popullore; por Skënderbeu nuk nguroi të ngrinte bujkrobërit kundër venedikasve dhe t’i nxiste ata t’u vinin flakën vilave të lordëve), e gjitha gjatë një lufte të pafundme dhe mizore – e gjitha kjo shënjonte drejt së ardhmes. Me Skënderbeun, shqiptarët morën hapin jashtë Mesjetës.
Në vitin 1446, Skënderbeu bëri vizitë në Romë. Lufta pat vazhduar për shumë kohë. Osmanët e patën shkatërruar Shqipërinë. Popullsia e vet qe shkatërruar. Uria po kërcënonte. Skënderbeu kish nevojë për armë, municione, ushqime. Por Papa Pali II-të qe “shumë dorështrënguar t’i jepte Skënderbeut ndonjë mbështetje”, siç pat thënë Marksi. Prapëseprapë qyteti i Romës i dha atij një hyrje triumfale. Skënderbeu, sidoqoftë, nuk hyri në qytet si një komandant mesjetar, me parzmore elegante. Kronikat thonë që ai “qe veshur si një varfanjak”, edhe pse në atë kohë ai qe më i mirënjohuri i gjithë komandantëve të Evropës.
Dikush mund të thotë se në fund, pas mposhtjes së Huniadit në vjeshtën e vitit 1444 dhe me politikën e Venedikut së bashku me atë të zyrës papale, që qenë ato që qenë, shqiptarët nuk mund të fitonin kundër Perandorisë Botërore Osmane. Ky, sidoqoftë, është thjesht një spekulim. E parë në kontekstin e kohës së vet, lufta e Skënderbeut zbuloi mundësirat e fitores gjer në fund.
Pas vdekjes së Skënderbeut dhe mposhtjes së shqiptarëve, cila qe gjendja në Shqipëri? Vendi qe i shkatërruar më shumë se çdo vend tjetër në Evropë. Tregtia qe në vendnumëro. Shumë qytete qenë shkatërruar kaq shumë, sa ato kurrë nuk u rindërtuan. Kishat, manastiret dhe kështjellat u dogjën e u rrafshuan. E gjithë pasuria qe plaçkitur. Një numër i madh njerëzish u vranë ose vdiqën urie. Të tjerët u arratisën. Në vitet 1444, 1464 dhe 1468, valë të mëdha refugjatësh u dyndën në jug të Italisë dhe në Siçili.
Kjo është një panoramë e errët, dhe as që tregon rëndësinë historike për atë që bëri Skënderbeu. Por qe gjatë kësaj lufte kur kombi shqiptar u formua. Dhe në shekujt që do të vinin, Skënderbeu – për gjithë shqiptarët, pavarësisht nga besimi fetar apo dialekti – do të qe heroi kombëtar i Shqipërisë. Dhe s’qe fare kjo figurë heroike një mit. Qe gjatë kësaj lufte të gjatë e të hidhur kur Shqipëria u bë një mbretëri, dhe qe pikërisht kjo kohë kur shqiptarët u bënë të ndërgjegjshëm në vetvete si një komb. Qe pikërisht kjo luftë që bëri të mundur të mbijetonin si një i tërë.
Dhe ja se si armët e shtëpisë së Kastriotëve u bënë simbol kombëtar i Shqipërisë. Dhe ja pse, në një luftë të re, të hidhët, partizanët shqiptarë kënduan: Nën flamurin e Skënderit, nën udhëheqjen e Enverit.(G.Sh)

 
Lajme Shqip Thursday, 06 December 2012 16:59

Tiranë – Në kuadrin e festimeve të 100-vjetorit të Pavarësisë, Ambasada Shqiptare në Hagë ka organizuar një koncert me muzikë klasike në teatrin e mirënjohur të Hagës, Anthon Philipzaal.

Në program pati pjesë të autorëve shqiptarë dhe të huaj, të cilat u performuan me një nivel tepër të lartë nga violinistja Adelina Hasani, pianistja Mirsa Adami dhe violinçelisti Artur Trajko. Në mënyrë të veçantë origjinaliteti dhe niveli i lartë i kompozitorëve klasikë shqiptare: Zadeja, Dizdari, Peçi e Harapi ishin suprizë për të ftuarit.

Prezantimi me mjeshtëri i koncertit nga Altin Kaftira, ish/balerin i parë i Trupës së Baletit të Amsterdamit, si dhe kombinimi i repertorit me dy pjesë baleti të luajtura me mjeshtëri nga Alina Fejzo (e specializuar në Akademinë e Dancit, Rotterdam) dhe Altin Kaftira, krijuar enkas për këtë aktivitet, i dhanë një vlerë të veçantë dhe emocionuese shfaqjes.

Koncerti u shoqërua më pas me një pritje ku ishin të ftuar përfaqesuesit e trupit diplomatik, e organizatave ndërkombëtare, autoritetet hollandeze, si dhe diaspora shqiptare në Hollandë.(LajmeShqip.com)