Majemi është mundur në shtëpi nga Uashington me rezultatin 86-84 por ajo që shqetëson më shumë ekipin nga Florida është dëmtimi në dorën e majtë i Duejn Uejd. LeBron Xhejms dhe Kris Bosh ishin lënë pushim nga trajneri Spoelstra, ndërsa Uejd ishte i vetmi nga treshja që luante në këtë sfidë, por edhe ai është detyruar të braktisë fushën e lojës pas më pak se tre minutash, si pasojë e ndrydhjes së gishtit të dorës së majtë. Lojtari do të qëndrojë të paktën një javë pushim, por kjo mund të ndikojë disi në paraqitjen e Majemit në play-off,  ndërsa duket se kjo skuadër do të jetë e dyta në Konferencën e Lindjes. Sa për ndeshjen, e cila kaloi në plan të dytë pas dëmtimit të Uejd, ajo u vendos nga një kosh i Nene në sekondën e fundit të takimit, kur dukej se dy skuadrat po shkonin drejt kohës shtesë. 

Vendi i parë në Konferencën e Lindjes pritet t’i mbetet përfundimisht Çikagos, që ka dhënë një provë force duke mundur Dallas me rezultatin 93-83, ndërsa Derrik Rouz është kthyer mes titullarëve duke shënuar 11 pikë e 8 pasime në 32 minuta lojë.

Një ndeshje shumë e rëndësishme ka qenë ajo mes Denver dhe Feniks, e mbyllur me suksesin e ekipit udhëtues që ka siguruar pjesëmarrjen në play-off, ndërsa ka zvogëluar shpresat e skuadrës së Stiv Nesh për të vazhduar në fazën me eliminim direkt të sezonit. Gjithsesi, organizatori i Feniks ka arritur të pakën që në këtë ndeshje të shkruajë emrin në historinë e NBA, duke u ngjitur në vendin e pestë në renditjen e të gjitha kohërave për pasimet, për të kaluar legjendarin Oskar Robertson që mbante këtë pozicion. (LajmeShqip.com)

Rezultatet

Denver-Feniks              118-107

Filadelfia-Indiana          109-106

Uashington-Majemi      86-84

Golden Steit-Hjuston    96-99

Dallas-Çikago                 83-93

Portland-Memfis           89-93

Nju Xhersi-Miluoki       95-106

Orlando-Utah               107-117