LA Leikërs kanë provuar edhe një herë se janë një ekip i jashtëzakonshëm kur gjenden në ekstrem. Në ndeshjen kundër Oklahoma, skuadra e Kobi Brajant e pa veten 18 pikë mbrapa në fundin e periodës së tretë, por arriti që falë lojës së yjeve të saj të barazojë ndeshjen dhe më pas ta fitojë atë 114-106 pas dy kohëve shtesë. Brajant ishte vendimtar me dy gjuajtje shumë të rëndësishme për tri pikë, ndërsa e mbylli takimin me 26 pikë, 6 topa në tabelë dhe 8 pasime. Një ndihmë shumë e madhe i erdhi nga Pau Gasol, që shënoi 20 pikë, 14 topa në tabelë dhe 9 pasime. 

Humbja e Oklahomas i ka dhënë mundësinë San Antonios që të shkëputet më shumë në kreun e renditjes së Konferencës së Perëndimit. Teksanët fituan lehtësisht 114-98 kundër Kliveland, ndonëse Tim Dankan u la pushim nga trajneri Popoviç. Tashmë San Antonios i duhet vetëm një fitore në tre ndeshjet e mbetura për të siguruar matematikisht vendin e  parë në Konferencë.

Një ndeshje e rëndësishme ishte ajo mes Majemit dhe Hjuston, ku LeBron Xhejms shënoi 32 pikë e 8 topa në tabelë në suksesin 97-88 për skuadrën e tij, ku mungonin për arsye dëmtimesh katër titullarët e tjerë. Ky rezultat ndikoi garën për vendin e 8-të në Konferencën e Perëndimit, duke i hequr përfundimisht mundësinë Hjuston të marrë pjesë në play-off për të tretin vit radhazi. (LajmeShqip.com)

Rezultatet

Nju Jork-Atlanta                113-112

Oklahoma-LA Leikërs       106-114

Toronto-Detroit                  73-76

Hjuston-Majemi                  88-97

Sakramento-Dallas             114-88

G. Steit-Minesota                93-88

Kliveland-San Antonio        98-114

Orlando-Denver                  74-101

Nju Orlins-LA Klipërs         98-107