Drejtori sportiv i Korinthians, Duilio Alvesh, ka bërë të ditur se klubi i tij do të ishte i interesuar në afrimin e sulmuesit brazilian të Milanit, Aleksandre Pato. Klubi i Sao Paulo është në kërkim të një sulmuesi tjetër pasi largoi pak javë më parë Adrianon për shkak të problemeve të ish-lojtarit të Interit.

Mendohej se alternativa më e mirë ishte Diego Forlan, që nuk po arrin të shfaqë formën e zakonshme te Inter, por sipas mediave braziliane, Korinthians nuk dëshiron të paguajë aq shumë për lojtarin uruguaian. Pato, që tashmë është kthyer në zgjedhjen e fundit në repartin e avancuar të Milanit, duket se është alternativa më e mirë, ndërsa klubi brazilian është gati t’i ofrojë atij mundësinë të riaftësohet nga problemet fizike që kanë kufizuar në 18 ndeshje paraqitjet e tij këtë sezon.

“Na pëlqen ideja por nuk kemi folur ende me të. Kam ndjekur situatën e tij nëpërmjet shtypit, ai është një lojtar i madh dhe do të ishte i mirëpritur këtu”, tregoi Alvesh për “Lancenet”.

“Dyert e Korinthians janë të hapura për të nëse dëshiron të vijë de të riaftësohet te ne. Duam një sulmues të nivelit botëror por nuk na nevojitet medoemos të blejmë një sulmues të tillë, mund të jetë një huazim. Menduam për Forlan, por tani po shohim për lojtarë nga klubet e tjera evropiane”.

Në fillimin e kësaj jave, trajner i PSZH, Karlo Ançeloti, konfirmoi se ai vazhdon të jetë i interesuar për të marrë Pato në Paris, pasi i njeh mirë cilësitë e lojtarit që bleu vetë nga Internacional në vitin 2007 për 22 milionë euro. (LajmeShqip.com)