Lajme Shqip Wednesday, 06 July 2011 13:30

Prishtinë – Qytetarët e Kosovës janë të rrezikuar nga sëmundjet infektive më shumë se sa vendet e tjera të Evropës, kjo statistikë është publikuar në raportin e zhvillimit njerëzor për vitin 2010 nga UNDP. Po ashtu, në këtë raport thuhet se edhe jetëgjatësia e kosovarëve është më e ulëta në rajon dhe në Evropë.

Vetëdijësimi i qytetarëve për të kërkuar ndihmë mjekësore është shumë i ulët, ndihma mjekësore kërkohet vetëm atëherë kur shfaqen simptomat e rënda të sëmundjeve infektive, kështu theksohet në raportin e publikuar nga Programi I Kombeve të Bashkuara për zhvillim -UNDP. “Qytetarët e Kosovës janë të rrezikuar nga sëmundjet infektive shumë më shumë se sa vendet e tjera të Evropës, në përgjithësi kjo shihet edhe në jetëgjatësinë e tyre, ku jetëgjatësia e kosovarëve është më e ulëta në rajon dhe në Evropë”, thuhet në raport. Gjatë vitit të kaluar kanë vdekur 8 pacientë të prekur nga ethet hemorragjike, por sipas Institutit të Shëndetit Publik, gjatë këtij viti në Kosovë nuk ka pasur epidemi të fruthit dhe janë zbutur rastet e sëmundjeve të turbekulozit. Naser Ramadani, drejtori i Institutit Kombëtar të shëndetit publik deklaroi se masat e ndërmarra kanë treguar rezultat të plotë, ku rastet e etheve hemorragjike kanë shënuar rënie gjatë këtij viti, “kemi pasur vetëm 3 raste dhe asnjë vdekje”. Edhe përkundër masave parandaluese sëmundjet e brucellozës, të barkqitjes dhe ajo e meningjitit vazhdon të jetë prezente në vendin tonë, por sipas mjekëve këto sëmundje shkaktohen nga papastërtia e duarve dhe përdorimi i ushqimit të papastër. Shemsedin Dreshaj, drejtor i Klinikës Infektive, deklaroi se edhe gjatë kësaj vere ballafaqohemi me helmimet në ushqim, me ethe hemoragjike me sindromën e meninxhitit dhe me sëmundjet e tjera që janë të përditshme”, tha ai. Në Klinikën Infektive të QKUK së brenda 24 orëve ka 50?60 raste të sëmundjeve infektive, ndërsa në sezonat e epidemive numri arrin deri në 100 pacientë në ditë, por sipas drejtorit të kësaj Klinike Shemsedin Dreshaj kjo Klinikë mund të mjekoj deri në 146 pacientë brenda një dite.