Lajme Shqip Friday, 20 May 2011 17:22

Tiranë – Presidenti i Republikës, Bamir Topi, zhvilloi sot paradite një takim pune me Ambasadoren e Mbretërisë së Bashkuar në Tiranë, Fiona Mekiluam, me të cilën diskutoi rreth situatës paszgjedhore në vend.

Presidenti Topi ndau shqetësimin lidhur me situatën aktuale, të cilën po e ndjek me shumë vëmendje në çdo moment. Ai nëvizoi se “duhet ruajtur qetësia, vetëpërmbajtja, rendi publik si dhe duhet gjetur ekuilibri i nevojshëm, që vendi të mos rrëshqasë në tensione të panevojshme politike”.

“Këto do të ishin të mundura vetëm nëpërmjet zbatimit me rreptësi të ligjeve dhe respektimit të pavarësisë së institucioneve kushtetuese nga kushdo”, theksoi Presidenti.

Kreu i Shtetit shqiptar dhe Ambasadorja britanike ndanë të njëjtin mendim se situata e tensionuar në vend po dëmton jo vetëm aspiratën integruese evropiane të Shqipërisë, por edhe imazhin e saj në botë, duke e ilustruar këtë edhe me shtyrjen e vizitës së planifikuar e të mirëpritur të Presidentit të Komisionit Evropian, Hoze Manuel Barrozo, në Tiranë.

Ambasadorja Fiona Mekiluam i shprehu Kryetarit të Shtetit shqiptar gjithë mbështetjen e saj si përfaqësuese diplomatike e Mbretërisë së Bashkuar, për rolin konstruktiv që po vazhdon të luajë si dhe për mesazhet dhe apelet pozitive të bëra deri më tani nga Presidenti Topi në funksion të qetësimit të situatës dhe gjetjes së një zgjidhje institucionale e ligjore.