Lajme Shqip Thursday, 05 April 2012 14:50

Këngëtarja Rihanna e cila momentalisht është në rrugëtimin e saj të premierave të filmit debutues, “Battleship” ka një idhull për sa i takon karrierës. “Dua t’i ngjaj këngëtares Whitney Houston”, ka deklaruar ajo nga tapeti i kuq i premierës londineze të filmit.

Robyn Rihanna Fenty, ikonë e muzikës pop, vetëm 24-vjeçe dhe që deri tani ka shitur 20 milionë albume, është e para këngëtare nga Barbadosi që ka mbërritur tek trofetë Grammy duke mundur të fitojë 6 të tillë deri më tani, është duke eksploruar fusha të tjera përveç muzikës.

Në një rrëfim të gjatë për TgCom, Rihanna ka deklaruar se muzika nuk është gjithçka kërkon në jetë dhe karriera e saj tani që ka shkelur sheshxhirimin, rrëfen se do të ndalet gjatë në këtë përvojë. Dhe personit që do donte t’i ngjante është Whitney Houston sepse, pavarësisht jetës së saj private tragjike, ajo ka ditur të jetë në çdo kohë një artiste e jashtëzakonshme jo vetëm në skenë por edhe në sheshin e xhirimit.

Dhe këtë adhurim e dëshmon më së miri deklarata e Rihanna-s kur e kanë pyetur lidhur me lajmin se ajo është një ndër pretendentet kryesore për të qenë protagoniste në filmin për Houston.

Përgjigjja e këngëtares ka qenë: “Nuk kam pasur asnjë ofertë konkrete lidhur me këtë informacion që ka nisur të qarkullojë në media, por kush nuk do të donte?! Do të jepja jetën time për të qenë Whitney në sheshin e xhirimit. Është një rol i jashtëzakonshëm, një përvojë që do të më çmendte nga gëzimi”.