Lajme Shqip Sunday, 26 February 2012 12:00

Milano – Kjo është protesta e radhës e aktivisteve ukrainase të grupit “Femme”, të cilat zbarkuan në Milano për të “goditur” sipas mënyrës së tyre zemrën e botës së modës.

Ato mbanin në duar pankarta kundër sistemit në modë, kundër stilistëve dhe kompanive që operojnë në këtë industri, të cilat i quajnë fajtore për anoreksinë dhe fatin tragjik të shumë modeleve.

“Stilistët dhe kompanitë në botën e modës janë në gjendje të ofendojnë dhe përdhosin të gjitha femrat në emër të biznesit të tyre, në emër të përfitimit, në emër të parasë”, thanë aktivistet ukrainase.

Në duar ato mbanin parullat me mbishkrimin “moda = fashizëm”.

Vajzat u larguan nga policia lokale e Milanos pas disa minutave protestë, ndërkohë që brenda sallës, sfilata e Versaces u zhvillua pa probleme.

(LajmeShqip.com)