Lajme Shqip Monday, 13 August 2012 08:32

Aktori anglez Liam Neeson është vënë sërish në luftë kundër krimit të organizuar shqiptar, por vetëm në film. Në muajin tetor në kinematë franceze, dhe më pas më gjerë, do të shfaqet filmi “Taken 2”, ku Neeson interpreton agjentin e tërhequr të CIA-s, Bryan Mills.

Këtë herë ai do të shpëtojë familjen e tij nga hakmarrja e bosit shqiptar Murat Hoxha, babai i personazhit Marko Hoxha që u vra në filmin e parë nga Neeson pasi i kishte rrëmbyer të bijën. Gjithashtu, Neeson do t’i duhet të shpëtojë edhe nga njerëzit e sheikut të vrarë po në episodin e parë të sagës, në një jaht luksoz në ujërat e Senës, në Paris.

Paradoksi i filmit është se, edhe pse do të ketë sërish një bandë shqiptare, në kastin e tij nuk ka asnjë aktor shqiptar. Madje, edhe figura e bosit Murat Hoxha interpretohet nga aktori kroat me etni serbe, Rade Serbedzija. Ky i fundit është i njohur në qarqet kinematografike evropiane, por për publikun mund të jetë më i njohur për interpretimin e oligarkut rus Ivan Tretiak në filmin “Shenjtori”, me Val Kilmer, si dhe për rolin e doktorit që shpiku virusin Kajmera në “Mission: Impossible 2”.

Filmi “Taken 2” është një prodhim francez me regjisor Oliver Megaton dhe producentin e mirënjohur Luc Besson, i cili ka shkruar edhe skenarin.