Lajme Shqip Thursday, 18 July 2013 17:54

Telashe në horizont për ish-pjesëtarin e grupit “Oasis”, Liam Gallagher. Një gazetare amerikane pretendon se Gallagher është babai i vajzës së saj, që tani është më pak se 1 vjeç. Ajo ka shpjeguar se ka patur një takim rastësor me këngëtarin, ku ka mbetur shtatzënë.

Mësohet se gruaja është përpjekur të kontaktojë privatisht me Gallagher, duke e kërcënuar se do të fliste edhe me bashkëshorten e tij, Nicole Appleton, por nuk ka patur asnjë reagim nga ana e tij. Për këtë arsye gazetarja i është drejtuar gjykatës, duke kërkuar që këngëtari të njohë vogëlushen si vajzën e tij.

Lajmi u publikua fillimisht nga revista angleze “Sun”, e cila duke mos bërë të ditur emrin e artistit, shkruante se “një këngëtar anglez është bërë baba pas një takimi rastësor, “One Night Stand”.

Tashmë mediat kanë vërtetuar se artisti në fjalë është pikërisht Liam Gallgher.

Lajmi ka shkaktuar një “tërmet të vërtetë” në shtëpinë Gallagher. Një burim i afërt me familjen bëri të ditur se bashkëshortja e tij e ka përzënë nga shtëpia duke ia nxjerrë të gjitha rrobat në mes të rrugës.