Lajme Shqip Monday, 25 July 2011 12:59

Kukës – Në qytetin e Kukësit kanë nisur punimet për ndërtimin e muzeut të ri historik, mungesa e të cilit ka qenë ndër vërejtjet kryesore të shprehura nga vizitorët e shumtë vendas e të huaj.

“Muzeu do të ndërtohet me një fond prej 14 678 521 lekë të akorduar nga PNUD-i. Ky investim mundëson përmirësimin e shpejtë të situatës muzeologjike të rajonit, ndërsa kemi gjetur edhe bashkëpunimin e pushtetit vendor”, thotë koordinatori kombëtar i projekteve të PNUD-it në qarkun e Kukësit, Bukurosh Onuzi.

Muzeu i ri historik po ngrihet në qendër të qytetit të Kukësit, shumë pranë memorialit të mirënjohjes, që përkujton mikpritjen kuksiane të kosovarëve në pranverën e vitit 1999, kur qyteti e fshatrat përreth tij mirëpritën brenda 2 muajve rreth 412 mijë kosovarë të dëbuar me dhunë nga vatrat e tyre.

“Firma ndërtuese, që e ka marrë përsipër ndërtimin e muzeut të ri historik është “AK” shpk, ndërsa afati i përfundimit të punimeve është 31 dhjetori i këtij viti”, thotë kryetari i bashkisë së Kukësit, Hasan Halilaj.

Muzeu i mëparshëm i këtij qyteti, një godinë dykatëshe e mjaft efikase, në fillim të viteve ’90 u privatizua përmes fondit prej 780 mijë lekësh, ndërsa një pjesë e mirë e materialit muzeal humbi.

Ndërkohë, nga specialistët e muzeulogjisë po diskutohet për materialin muzeal dhe grumbullimin e tij me synimin e vënies në aktivitet sa më shpejt të jetë e mundur.