Lajme Shqip Saturday, 08 August 2015 13:09

Në një alamet objekti dhe gjysmë të boshatisur në qendër të Prizrenit, vërehen hyrje-daljet e shumta të të të rinjve. Entuziazmi që kanë u dallohet në fytyrë. Ata po përgatiten për njërën prej ngjarjeve më të mëdha kulturore në Kosovë. Dhe si bazë kanë objektin e quajtur “Qendra Europa”, që në njëfarë mënyre simbolizon edhe aspiratën e kombit të ri në kontinentin e vjetër, për t’u bërë një ditë pjesë e familjes së madhe të Bashkimit Evropian.

Por rrugëtimi drejt këtij synimi është përplot me sfida për kosovarët, shkaku i demokracisë së brishtë dhe i nivelit të lartë të korrupsionit. Madje, të dëshpëruar me këtë situatë si dhe në mungesë të perspektivës për një jetesë më të mirë në një të ardhme të afërt, mijëra kosovarë gjatë fundit të vitit të kaluar dhe në fillim të këtij viti, ia kanë mësyrë rrugëve ilegale të emigrimit në kërkim të shpresës në vendet evropiane, shkruan “Koha Ditore”.

Ndonëse emigrimi vazhdimisht është prezent në këtë shoqëri, vala e fundit ka qenë marramendëse, duke mobilizuar edhe zyrtarë të ndryshëm evropianë që të vijnë në Prishtinë për të përcjellë porosinë se për kosovarët në Evropë nuk ka azil. Ndërkohë territori i Kosovës, e sidomos i fqinjëve të saj, përdoret edhe nga refugjatët sirianë dhe të tjerë për të tentuar kalimin në kërkim të fatit. Çështja është shndërruar edhe në temë globale.

Duke i pasur parasysh të gjitha këto zhvillime organizatorët e festivalit të filmit dokumentar dhe të shkurtër “DokuFest” kanë vendosur që në edicionin e 14-të me radhë ta trajtojnë migrimin nga aspekte të ndryshme.

Një pjesë e filmave që do të projektohen në kinematë e ndryshme të Prizrenit do t’i dedikohen kësaj teme. Bota, prej sot e (shtunë) vjen këtu dhe për tetë ditë, stacioni për t’u nisur në një udhëtim të lirë, ani pse virtual nëpërmjet filmit, është “DokuFesti”.