Lajme Shqip Saturday, 22 September 2012 17:52

Romë – Artistët, kanë qëndruar në Romë me rastin e një ekspozite të përbashkët që është hapur në Libreria Editrice Vaticana.Dymbëdhjetë artistë të rinj, shqiptarë nga Kosova i kanë dhuruar Papës Benedikti i XVI një pikturë dhe bashkë me të edhe një përkushtim, me rastin e audiencës që i pari i botës katolike u ka organizuar atyre në selinë e tij, në Vatikan.

Revista e Vatikanit “Zenit” i kushton hapësirë këtij njoftimi, duke i përshkruar artistët shqiptarë nga Kosova edhe si “artistë myslimanë”.

Piktura e dhuruar bart emrin “Fytyra universale” dhe është krijim i piktorit të ri, Fatos Kabashi. Ndërsa përkushtimi “Shenjtërisë së Tij Benediktit të XVI” është i 12 artistëve të rinj.

Artistët, siç raporton albinfo, kanë qëndruar në Romë me rastin e një ekspozite të përbashkët që është hapur në Libreria Editrice Vaticana. Ekspozita është hapur në përkujtim të përvjetorit të pesëmbëdhjetë të vdekjes së Nënë Terezës.

Në një përkushtim drejtuar organizatorëve të ekspozitës, ambasadori i parë i Italisë në Kosovë, Michael L.Giffoni ka shkruar “Në këtë ekspozitë të artistëve kosovarë me temë shëmbëlltyrën e jashtëzakonshme të Nënë Terezës, nuk mund të injorohet vargu i saj i shkurtë por i ngjeshur, në të cilin humanistja e madhe thotë “Unë jam një laps i vogël në duart e Zotit, asgjë tjetër. Është Zoti, ai që mendon. Është ai, i cili shkruan. Lapsi nuk ka të bëjë fare me të gjitha këto. Lapsi duhet vetëm të vihet në dispozicion”.

“Në këto pak fjalë ajo ka përshkruar jetën e saj shembullore, një shembull përsosmërie dhe përkushtimi absolut në shërbim të Zotit, në ndihmë të vuajturve. Me jetën e saj, ajo ka qenë dëshmitare e Zotit dhe një shembull për të gjithë njerëzit”.(LajmeShqip.com)