Lajme Shqip Monday, 09 May 2011 08:41

Tiranë – Presidenti i Republikës së Shqipërisë, Bamir Topi, së bashku me Zonjën e Parë, Teuta Topi, u nisën sot drejt Stambollit, ku me ftesë të Presidentit të Turqisë, Abdullah Gyl, do të marrin pjesë në Konferencën e 4-të të Kombeve të Bashkuara mbi Vendet më pak të Zhvilluara, e cila do të mbahet më datat 9-13 maj.

Në këtë Konferencë, ku janë të ftuar krerë shtetesh e qeverish të vendeve anëtare të Kombeve të Bashkuara, do të diskutohet për potencialet, realizimet dhe sfidat e vazhdueshme të vendeve në zhvillim, duke sjellë në vëmendje edhe mangësitë e dobësitë e vërejtura kryesisht në sektorin ekonomik e atë infrastrukturor.

Duke u bazuar në Programin e Veprimit të miratuar në Konferencën e 3-të, dhjetë vjet më parë, drejtuesit e Konferencës, por edhe të vendeve pjesëmarrëse, do të shqyrtojnë hapat e mundshëm e të rekomandueshëm me qëllim rritjen ekonomike dhe zhvillimin e mëtejshëm të vendeve më pak të zhvilluara.

Presidenti Topi do t’i drejtohet punimeve të Konferencës me një fjalë, ku do të vlerësojë ndihmën e vazhdueshme të Kombeve të Bashkuara në përparimin social e ekonomik të vendeve më pak të zhvilluara, si dhe do të evidentojë arritjet, ambiciet e sfidat e shtetit shqiptar për fuqizimin e gjithanshëm të vendit, përpjekjet për përmirësimin e urave të bashkëpunimit midis Shqipërisë e vendeve të Rajonit Ballkanik e më gjerë, për realizimin e projekteve madhore dhe ato në fushën e energjetikës, mjedisit, infrastrukturës, etj.

Gjithashtu, Kreu i Shtetit shqiptar, gjatë qëndrimit në Stamboll, do të zhvillojë takime të veçanta me homologun turk, Presidentin Abdullah Gyl, si dhe me Kryeministrin e Turqisë, Rexhep Tajip Erdogan dhe pritet të takojë e të përshëndetet edhe me Sekretarin e Përgjithshëm të Kombeve të Bashkuara, Ban Ki-Mun si dhe me shumë kryetarë të tjerë shtetesh e qeverish.

Punimet e Konferencës do të mbyllen me miratimin në fund të saj të ‘Programit të Veprimit të Stambollit’, i cili do të synojë përtërirjen e bashkëpunimit të gjithanshëm, duke marrë në konsideratë përparimet e vendeve më pak të zhvilluara në veçanti, por dhe ato në nivel global në tërësi.