Lajme Shqip Tuesday, 07 February 2012 12:54

Prishtinë-Në Gjykatën e Qarkut sot po vazhdon shqyrtimi kryesor në procesin gjyqësor kundër deputetit Fatmir Limaj dhe 9 bashkëluftëtarët e tij.

Në këtë seancë pritet të trajtohet besueshmëria e provave të dëshmitarit “X”. Sipas avokatit mbrojtës Tahir Rrecaj pas një ekpertize grafologjike rezulton se ditari i dëshmitarit kryesor është shkruar nga të paktën katër persona.

Ndërkohë Shoqata Atlantiku ka reaguar ndaj gjykimit në “rastin Kleçka”, duke thënë se ai është proces politik i montuar nga qarqet anti-shqiptare dhe po jetësohet duke i persekutuar ish-ushtarët e UÇK-së.

Gjithashtu ata thonë se ky proces është i ndikuar politikisht dhe shprehen të gatshëm t’iu dalin në mbrojtje me çdo kusht nëse nuk mbyllet procesi sa më shpejtë.

Shoqata Atlantiku ka selinë në Nju Jork dhe në përbërjen e saj ka ish-ushtarë të Batalionit Atlantiku dhe një numër të madh kontribuesish dhe përkrahës të Ushtrisë Çlirimtare të Kosovës. (LajmeShqip.com)