Lajme Shqip Sunday, 01 April 2012 16:27

Librazhd-Të rinjtë e këtij qyteti kanë bërë “REFRESSH” dhe bashkë me kryetarin e Partisë Socialiste, Edi Rama, janë angazhuar të bëhen pjesë e ndryshimit që opozita shqiptare kërkon të sjellë në vend.

Ky është mesazhi që përcollen 350 të rinj nga Librazhdi duke marrë teserën e anëtarësimit në Partinë Socialiste. Pas shpalosjes së ngjyrave kuq e zi të flamurit shqiptar, lideri i opozitës, cilësoi si jetike kontributin individual të çdo qytetari për të sjellë ndryshimin e qeverisjes së vendit.

 “Të jeni të sigurt se nëse secili nuk bën luftën e tij sot që kjo të ndryshojë, nesër gjërat do të vazhdojnë po kështu. Dhe nëse kanë kaluar 22 vjet nga dita kur Shqipëria u çlirua prej kthetrave të diktaturës dhe mbetet peng i kthetrave të një të keqeje të madhe që i merr frymën çdo ditë, mund të kalojnë edhe 22 vjet të tjerë nëse njerëzit e zakonshëm të këtij vendi, nuk i thonë ndal kësaj të keqeje dhe nuk marrin në dorë fatin e këtij vendi siç keni vendosur ta merrni ju në dorë sot duke u bërë anëtarë të Partisë Socialiste”,

 Ajo që ka rëndësi themelore për kreun e opozitës është bashkimi i të gjithë shoqërisë për të refuzuar me votë atë që Rama e cilëson si padrejtësi sociale, kur krahason 2 alternativat për programin e taksave në vend. “Nuk është e mundur që një infermiere të paguajë më shumë se doktori kryeministër. Nuk është e mundur që një polic i thjeshtë të paguajë më shumë taksa se Ministri i Brendshëm. Nuk është e mundur që njerëzit e zakonshëm të paguajnë më shumë taksa se deputetët apo korporatat e mëdha që fitojnë miliona në muaj.”

Por çfarë do të ndryshojë nëse shoqëria bindet se alternativa e socialistëve është më e mirë për vendin? Edi Rama u dha këtë përgjigje të rinjve të Librazhdit: “Për këtë ne do të luftojmë së bashku jo për të sjellë në pushtet disa njerëz në vend të njerëzve të tjerë, por për të vënë qeverinë e Republikës së Shqipërisë në dispozicion të çdo qytetari dhe për të vendosur frymën e drejtësisë sociale mes gjithë shqiptarëve, ku kush fiton më shumë duhet të paguajë më shumë dhe kush fiton më pak duhet të paguajë më pak.” (TCH)