Lajme Shqip Wednesday, 27 April 2011 17:39

Prishtinë – Zv/kryeministri Hajredin Kuçi ka mohuar të ketë përplasje midis institucioneve të Kosovës dhe EULEX-it, ndërkohë që ka dalë në mbrojtje të ministrit të Punëve të Brendshme, Bajram Rexhepi, i cili verbalisht ka nisur ‘betejën’ me misionin evropian në Kosovë

Kuçi ka thënë se nuk dëshiron të merret me deklaratat individuale, por ka theksuar se ministri Rexhepi nuk e ka kritikuar EULEX-in për punë, por për mospunë.

I pyetur pse po e pengon EULEX-in angazhimi i institucioneve të Kosovës për rend dhe ligj, ai ka thënë se përgjigje për këtë do të jepte në praninë edhe të EULEX-it, përderisa ka theksuar se Qeveria e Kosovës do të vazhdojë jetë këmbëngulëse për ‘drejtimin e kurrizit pa e thyer’, që nënkupton bashkëpunimin me EULEX-in, por gjithnjë duke pasur parasysh obligimin ndaj qytetarëve dhe tërësisë territoriale të vendit.

Ai ka bërë të ditur se bisedimet me partnerin e koalicionit, Aleancën Kosova e Re janë duke shkuar mirë dhe shumë shpejt do të ketë ri-dizajnim të Qeverisë.

Megjithatë, Kuçi nuk ka shpalosur detaje sa i përket ministrive që do t’i marrë AKR-ja, përderisa i është shmangur edhe pyetjes për mospraninë e zëvendëskryeministrit Behgjet Pacolli për të tretën herë radhazi në mbledhjen e Qeverisë.

Kuçi ka theksuar se shumë shpejt do të ketë një organogram, i cili do të përcaktojë kompetencat e secilit zëvendëskryeministër, përderisa ka bërë të ditur se do të bëhet një koordinim ndërmjet postit të zëvendëskryeministrit përgjegjës për politikë të jashtme dhe zëvendëskryeministrit për ekonomi.