Tiranë- Partia Bashkimi për të Drejtat e Njeriut shprehu dje, mbështetjen për komunitetin rom në Shqipëri, duke e cilësuar të drejtën e strehimit të tyre, një të drejtë themelore. 

Përmes një deklarate për shtyp, nënkryetari i PBDNJ-së, Thanas Poci i bëri thirrje strukturave të shtetit, por edhe shoqërisë civile, të ndahen përfundimisht nga qëndrimet diskriminuese ndaj pakicave etnike në tërësi, dhe  pjesëtarëve të komunitetit rom në veçanti.   

“Konkretisht, i drejtohemi qeverisë shqiptare, duke i kërkuar reagimin e menjehershëm, në zbatimin real të një strategjie kombëtare, për përmirësimin e situatës sociale të komuniteteve rome dhe atij ballkano-egjiptian.  Ne jemi të bindur se, vetëm projektet konkrete të mbështetura me financa publike, do të mund të nxjerrin  këta qytetarë shqiptarë, nga skamja e vërtetë që prej vitesh i ka mbërthyer”, thuhet në këtë deklaratë.

Duke përshëndetur qëndrimin e Avokatit të Popullit për këtë çështje, PBDNJ thekson se këmbana e alarmit që ra në oborrin e Avokatit të Popullit duhet të dëgjohet nga të gjithë, maxhorancë dhe opozitë, strukturat shtetërore dhe shoqëria civile, si dhe përfaqësuesit diplomatik të huaj me shërbim në Tiranë. (LajmeShqip.com)