Kukës – Mjegulla karakteristike e këtij dimri sërish ka mbuluar zonën verilindore, pas dy ditëve reshjesh shiu.

Një gjë e tillë ka shkaktuar vështirësi në lëvizjen e mjeteve në të gjitha akset rrugore të këtij rajoni, gjë që ka bërë që në akset rrugore kryesore të shtohen postblloqet e policisë rrugore që u kërkojnë drejtuesve të mjeteve të lëvizin me drita të ndezura për shkak të shikimit të ulët si pasojë e mjegullës së dendur.

Ndërkohë, të gjitha akset rrugore janë të kalueshme, edhe pse pak ditë më parë  në zonat e thella pati reshje dëbore.

“Të gjitha akset rrugore janë të kalueshme, por  duhet treguar kujdes nga drejtuesit e mjeteve  për shkak të mjegullës së dendur që ka mbuluar thuajse të gjitha akset rrugore”, thotë drejtori i ndërmarrjes së mirëmbajtjes së rrugëve, Arben  Basha.

Më shumë vështirësi  për lëvizjen e mjeteve  ka në akset rrugore Kukës-Shishtavec, Kukës-Bushtrisë,  Kukës-Qafë  Mali, Qafë Mali-Bajram Curri,  për shkak të shtresave të akullit ende të pranishme.